Sociedá

L’empiezu del procesu de reforma estatutaria, ensin escaecer les prósimes elecciones autonómiques, echó a andar ayeri cola entrega del dictame del Conseyu Consultivu, representáu por Bernardo Fernández, al Executivu rexonal, na persona del presidente del Gobiernu, Vicente Álvarez Areces. Cola entrega na Xunta Xeneral de les propuestes, el Gobiernu abre un procedimientu nel que se fai imprescindible’l consensu col Partíu Popular, qu’ayeri volvió a manifestar tamien la so negativa a participar nesti procesu.

El presidente del Principáu, Vincete Álvarez Areces, recibía ayeri de manes del presidente del Conseyu Consultivu, Bernardo Fernández, el dictame sobre la reforma del Estututu d’Autonomía, al tiempu que se negaba a aelantar nada tocante al so conteníu. Respective al proceso que s’abre a partir d’agora, Areces informó de que’l Conseyu Consultivu va debatir esti xueves sobre’l conteníu de la comunicación que se va treslladar a la Xunta Xeneral antes de que termine esti mes. Momentu esi, nel que la reforma queda en manes del Parlamentu asturianu.

El presidente del Gobiernu asturianu volvía ayeri a insistir na necesidá de participación nesti procesu de los miembros del Partíu Popular, al tiempu que los populares volvíen a negase a facelo. Sicasí, poniendo qu’esta situación cambiare hai que siñalar que’l Principáu yá anda nos plazos llímites pa facer la reforma, si tenemos en cuenta de que les elecciones autonómiques van ser en 2007.

Tres de la gran aceptación per parte de los asturianos de la “Guía Practica De La Indumentaria Tradicional Asturiana”, editada’l pasáu mes de febreru pola Conseyeria de Xusticia, Seguridá Publica y Rellaciones Esteriores del Principáu d’Asturies, y destinada a los Centros Asturianos, la so autora, Gloria Roza, preparó una nueva edición al alcance de tou aquel que quiera facese con ella, tando disponible en diversas llibrería y en Vezos y Costumes, tienda de la propia autora.

Baxo’l títulu de ‘Guía práctica de la indumentaria tradicional asturiana’ presentase una guía práctica que quier ayudar a toos aquellos que tean interesaos nel tema a conocer cómo vistíen los asturianos y asturianes a lo llargo de los sieglos XVIII y XIX, desplicando prenda a prenda, con dibuxos y semeyes que permitan una correcta reproducción del traxe’l país. Presentáu pol conseyeru de Xusticia, Seguridá Pública y Rellaciones Esteriores, Francisco Javier García Valledor; prollogáu pol etnógrafu Fernando Ornosa, y confeccionáu pola esperta Gloria Roza, esta publicación quier desarrollar el sentimientu d’asturianía que los emigrantes lleven dientro y que vienen demandando dende fai munchos años.

Partiendo de que nun hai un traxe “típicu o estándar”, esti manual recupera la indumentaria tradicional, muncho más rica, variada, vistosa y colorida que’l conocíu como “traxe rexonal” que tres de la guerra civil s’inpunxu pola so clara intención unificadora, desvirtuando tala vistimenta.

Documentáu n’estremaes fontes bibliográfiques, en grabaos, la llírica popular, asina como’l trabayu de campo d’abondes persones y colectivos dedicaos a la recuperación de les nuestres costumes a lo llargo de los últimos venti años, nesti manual repásense dende les teles, los cortes, colores y adornos hasta les formes de confeccionar talu traxe. Nun falten les ilustraciones y los dibuxos qu’ayuden a visualizar la confección y colocación de cada prenda, asina como abondes canciones lliriques que testimonien l’usu de tales ropes tradicionales.

La secretaria xeneral de Política Llingüística de la Xunta gallega, compareció nel parllamentu pa informar del plan de normalización del usu y la oficialización del gallegu nel Occidente asturianu onde, pesie a reconocer una serie de ‘contactos’ col Principáu pa llograr esti oxetivu, tuvo d’almitir que ‘estes pontes de collaboración son difíciles yá que, tanto’l Gobiernu del Principáu como l’Academia de la Llingua Asturiana consideren qu’esta zona nun fala gallego, sión otra llingua nueva: el gallego-asturianu’. El diputáu del BNG, Bieito Lobeira propunxo na Xunta ‘dende’l respetu a les competencies’ d’entrambes comunidaes, l’apertura d’un debate ‘serenu y sensatu’, basáu na firma de convenios con ‘obligaciones recíproques, pero non imposiciones’.

Los socios de gobiernu del PSOE en Galicia, el BNG, apuesten pol desarrollu del plan de normalización del gallegu que se punxo en marcha l’añu pasáu, onde se recueye, ente otros puntos, la negociación de convenios col Gobiernu del Principáu pa que’l gallegu sía asignatura reglada nes escueles del Occidente asturianu.

L’Executivu asturianu alvirtió-y al gallegu que nun va permitir denguna ‘inxerencia llingüística’, cosa que llamenten dende’l BNG comparando la situación cola de la Xunta de Castiella y Lleón onde sí tienen robláu un conveniu pa la promoción del gallegu nes faesteres lleoneses y zamoranes onde se fala la llingua.

Amparándose na so defensa del ‘derechu de quien fala gallegu fuera de los llímites alministrativos de Galicia’, el diputáu nacionalista, Bieito Lobeira, propunxo na Xunta l’apertura d’un debate ‘serenu y sentatu’, dende’l ‘respetu a les competencies’ de les comunidaes autónomes p’aumentar la presencia del gallegu fuera de la so rexón, defendiendo la ‘firma de convenios con obligaciones recíproques, pero non imposiciones’ a les autonomíes.

La posible reforma del Estatutu d’Autonomía asturianu sigue enfrentando a los socios de gobiernu, PSOE ya IX, na forma d’encarar les posiciones. Mentes que’l PSOE xustifica el so allegamientu al Partíu Popular ‘por pura razón aritmetica y por pura razón política’, Izquierda Xunida tira por siguir l’exemplu de los socialistes gallegos, pactando primero ente les fuerces qu’afiten l’Executivu asturianu, pa da-yos entrada depues na negociación a los populares.

El presidente del Gobiernu asturiana, Vicente Álvarez Areces xustificaba ayeri la participación del Partíu Popular d’Asturies nel procesu de reforma estatutaria por ‘pures razones aritmetiques y polítiques’. D’esta manera, el xefe del Executivu daba respuesta a l’alvertencia fecha por Aurelio Martín, diputáu d’Izquierda Xunida, na que reclamaba un pactu de mínimos ente los socios de gobiernu, pa depues dar pasu a la negociación de la reforma colos populares.

Martín punxo pa ello como exemplu l’alcuerdu robláu ente’l PSOE de Galicia y los socios del BNG que primero alcordaron un pactu de mínimos sobre la reforma estatutaria na so comunidá. ‘Eso implica que les tres pates necesaries nel bancu nun son iguales. N’Asturies pasa lo mesmo, y PSOE ya IX, como socios del Executivu, deberíen negociar un pactu primero, a partir del que depues s’abra l’alderique col PP’, solicitó Martín, depues de la quiebra na confianza ente PSOE ya IX tres del pactu de los primeros col PP pa la escoyeta del cargu de Procurador Xeneral.

Mañana martes, día 20 de xunu, va celebrase en Xixón una manifestación organizada polos CSI, SUATEA, CGT y sector críticu de CC.OO, les organizaciones moces MIAS, Darreu, CJC-CMC, UJCE y Sindicatu d’Estudiantes, asina como’l FUSOA, IAS y El Militante, pa denunciar la nueva contrarreforma laboral que, en palabres de los convocantes a esta marcha, ta mazcaritada d’ ‘alcuerdu pa meyorar la competitividá y l’emplegu’ pero ye ‘inaceptable mesmo pola forma que pol conteníu’.

Ignaciu Llope, portavoz d’Izquierda Asturiana, afirmó qu’esta contrarreforma ‘ye inaceptable mesmo pola forma que pol so conteníu. Pol secretismu de les negociaciones y porque lleva a lo contrario de lo que dicen los sos defensores’. Asina Llope alvirtió que esta reforma ‘abarata’l despidu, baxando de 45 díes por añu y un másimu de 42 mensualidaes a 33 y 24 respectivamente, financia a la patronal por cumplir la llegalidá en forma de bonificaciones en cuotes a la Seguridá Social, xube’l númberu d’años computables pal cálculu de la pensión y endurez les condiciones d’accesu a la xubilación anticipada’.

La reforma pactada pol Gobiernu central, la patronal CEOE y los sindicatos mayoritarios CCOO y UXT, foi calificada por Llope como ‘una esplotación progresista’, n’alusión a la mayoría sindical y de la ‘izquierda plural’ que gobierna n’Asturies y que forma la mayoría parllamentaria en Madrid.

La pasada selmana, el Comite de les Rexones de la UE apoyó una propuesta del Gobiernu vascu, defendida por Andalucía, Asturies, Baleares, Canaries, Comunidá Valencia y Extremadura, na que se-y pidía al Parllamentu Europeu qu’autorizare l’usu na so totalidá de les llingües cooficiales d’España. Nun comunicáu unviáu a los medios, la Xunta pola Defensa de la Llingua Asturiana tachó ‘d’hipócrita’ la postura de los representantes asturianos que, defendiendo n’Europa’l multillingüísmu, n’Asturies siguen opiniendose a la oficialidá del asturianu.

Los representantes de la Xunta pola Defensa de la Llingua Asturiana acusaron a los representantes institucionales d’Asturies n’Europa de ‘querer dar lleciones sobre defensa de la diversidá llingüística nel Comite Europeu de les Rexones al tiempu que n’Asturies mantienen una política activa de substitución llingüística y marxinación de la llingua asturiana’.

Nel comunicáu mandáu a los medios d’información, la Xunta desíxe-y al Gobiernu asturianu que desplique ‘porque n’Europa defende’l derechu al usu del gallegu, catalán y euskera, mientres que n’Asturies defende, consiente, avala y apoya qu’a los asturianos y asturianes se nos niegue de contino’l derechu a usar l’asturianu’.

El Conceyu Abiertu pola Oficialidá, plataforma qu’axunta yá a cerca de 170 organizaciones polítiques, sindicales, sociales y culturales d’Asturies, col únicu oxetivu de consiguir que na prósima reforma del Estatutu d’Autonomía se reconoza’l calter de llingua oficial a la llingua asturiana, y al gallego-asturianu na so zona, presentó na tarde d’ayeri les valoraciones de les últimes actividaes llevaes a cabu al travies de les caravanes que percorrieron distintos conceyos. Pal CAO, l’alcalce de les cuatro primeres ediciones ‘supera con muncho les espectatives más optimistes’, calculándose la participación ciudadana en ‘miles de persones qu’asistieron a les actividaes programaes’.

Dende la so presentación del Conceyu Abiertu pola Oficiaidá en xunu de 2004 vien desarrollando actividaes y campañes bien estremaes: propuestes de diálogu, movilizaciones, campañes didáctiques y de concienciación, recoyida e firmes, etc, siendo la última d’elles la conocida como Caravana pola Oficialidá que yá tien percorrío cuatro conceyos asturianos.

Según los representantes del CAO, la valoración del alcance que ta teniendo la Caravana pola Oficialidá nestes cuatro primeres ediciones ‘supera con muncho les espectatives más optimistes’, protagonizando caúna d’elles l’actividá del día nel so conceyu. Mesmo na caravana del Nalón, na de Siero, na del Caudal que na d’Aviles del pasáu día 3 de xunu, foron ‘cientos de persones participaron o collaboraron de manera solidaria na organización de les caravanes, repartieronse decenes de miles de panfletos informativos y miles de persones asistieron a les actividaes programaes nos cuatro conceyos’.

El CAO, qu’estima y reconoz la participación de músicos y artistes que participaron solidariamente nes actuaciones de cada caravana, asina como a les persones y organizaciones que tán enfotaes na reivindicación de la oficialidá, valora sobremanera la ‘participación de los propios conceyos’, fechu que, en palabres de la organización, una vez más ‘visualiza la reivindicación de la oficialidá de la llingua asturiana y fai rescamplar l’apoyu mayoritariu que tien na sociedá asturiana’.

El portavoz de los socialistes na Xunta Xeneral del Principáu, Fernando Lastra, avisó ayeri a Izquierda Xunida de que nun va pasar por que se ruempa la unidá de votu nes decisiones parllamentaries no que toquen a l’acción de gobiernu. Pesie a que s’amosó confiáu en que la crispación provocada ente los socios del executivu a cuenta de la elección del Procurador Xeneral ‘va volver a la normalidá’, ensin falta de romper el pactu, Lastra echó contra’l conseyeru de Xusticia, Francisco Javier García Valledor, acusándolu de tener ‘afán de protagonismu’.

Tres de les declaraciones del dirixente d’Izquierda Xunida, Francisco Javier García Valledor, nes qu’almitía que’l pactu de Gobiernu pasaba pel so pior momentu depues del pactu ente la FSA y el PP nel repartu de cargos del Procurador Xeneral y adxuntu al mesmu, Fernando Lastra, portavoz de los socialistes na Xunta Xeneral, acusó al socio de gobiernu de tener ‘afán de protagonismu’, ironizando con que ‘ún pregúntase si Valledor ye quien a respirar ensin sentir la espectación de la rexón alredol d’el cada día’.

Sicasí, xunto a la sorna nes sos declaraciones, Lastra tamien dexaba ver una amenaza hacia García Valledor al asegurar ‘que nun vamos aceptar que se ponga como árbitru moral de la política asturiana’, y critió al conseyeru por querer volvese, según el, ‘protagonista d’una presunta rexeneración democrática, qu’el sabrá de que dexeneración parte’.

El conseyeru de Xusticia, Seguridá Pública y Rellaciones Esteriores del Principáu, Francisco Javier García Valledor, aseguró que l’Executivu autonómicu ‘ta más debil’ tres del alcuerdu algamáu ente’l Partíu Popular colos sos socios de gobiernu pal repartu de los puestos de Procurador Xeneral y adxuntu al mesmu, fechu que, en palabres del dirixente d’Izquierda Xunida, dexa ‘baxo mínimos’ el pactu de gobiernu ente la so formación y la FSA.

Con estes palabres, el conseyeru de Xusticia mantien la mesma postura amosada ayeri por Noemí Martín, portavoz d’Izquierda Xunida na Xunta Xeneral del Principáu, qu’amenazaba con una nueva epoca nes rellaciones de los grupos parllamentarios, viendose ‘llibres’ d’agora n’adelante pa pactar colos populares en too aquello no que nun tean acordies colos sos compañeros de gobiernu.

Mesmo Valledor que Martín ven nel alcuerdu ente socialistes y populares una rotura de la unidá de votu pactada nel pactu de gobiernu cola FSA, amás d’una ‘vulneración de la llei del Procurador Xeneral’, razón pola Izquierda Xunida nunca tuvo a favor d’estos nomamientos alcordaos ente socialistes y populares.

Esta ‘desllealtá’ de los socialistes que dexa ‘baxo mínimos’ el pactu, n’opinión de los sos socios de gobiernu, quiciás se materialice la selmana qu’entra na Xunta Xeneral si IX y PP voten a favor del centru de discapacitaos de Llangreu, propuesta de la que ta en contra’l PSOE y a la que tovía ayeri’l presidente Areces tachaba d’ ‘erru’.

La portavoz parllamentaria d’Izquierda Xunida, Noemí Martín, denunció la ‘quiebra de la confianza’ colos socios de Gobiernu tres del pactu algamáu por socialistes y populares pa repartise los cargos de Procueradora Xeneral y adxuntu, que foron pa la ex conceyala del partíu socialista en Xixón, María Antonia Fernández Felgueroso y el popular Noel Zapico. Martín anunció qu’esta actitú de los socialistes ‘inaugura una nueva etapa nes rellaciones de los grupos parllamentarios na Xunta Xeneral’, amenazando con romper la unidá de votu alcordada nel pactu de gobiernu.

‘El grupu socialista inaugura una etapa na que cadún llega a alcuerdos con quien estima oportuno y nosotros constatámoslo’, aseguró la portavoz d’IX na Xunta Xeneral del Principáu. Comportamientu que ‘nos fai más llibres p’actuar cuando nun haiga alcuerdu colos nuestros socios’, según IX.

Anque dende’l partíu d’izquierda esta llibertá nun supón la rotura del alcuerdu de gobiernu, sí quiebra la confianza ente entrambes fuerces yá que dende Izquierda Xunida considerase ‘grave que se pacto col PP ensin falar col so sociu de gobiernu’. Poro, dende esti momentu IX nun descarta facer lo mesmo, quier dicise, pactar colos populares, en toes aquelles votaciones nes que nun tea acordies col partíu socialista.