Sociedá

Esta mañana abrió’l plazu d’inscripción pal Cursu Avanzáu de Llingua Asturiana p’adultos organizáu pola Conceyalía de Cultura del Ayuntamientu d’Aviles al travies de la Oficina de Política Llingüística municipal (Estaya de la Llingua). El cursu, de baldre, va empezar el próximu día 2 d’ochobre n’horariu de 19.30 a 21.30 hores los llunes y miercoles nel Palaciu de Valdecarzana y va tener una duración de 60 hores. Al terminar el cursu los participantes van recibir un diploma acreditativu.

La inscripción pa participar nesti cursu puede facese a partir de mañana y hasta’l mesmu día 2 d’ochobre de les siguientes formes: na Oficina de Política Llingüística (primer pisu de la Casa la Cultura, na plaza de Domingo Álvarez Acebal) de 8.00 a 15.00 hores, llamando al telefonu 985 510035, unviando un fax al 985 510045 o mandando un correu ellectrónicu a les direcciones estayallingua@ayto-aviles.es o acdiaz@ayto-aviles.es.

El secretariu xeneral d’Izquierda Xunida y candidatu de la formación a les prósimes elecciones autonómiques, Jesús Iglesias, señaló ayeri que’l so partíu tien intención de repitir l’alcuerdu políticu col Bloque por Asturies col que fue a les elecciones del añu 2003, anque, sicasí, Iglesias nun quixo dar más datos sobre les condiciones de talu alcuerdu mentes que nun se reunan les dos formaciones. Pela so parte, el Bloque por Asturies va presentar el so propiu candidatu a la Xunta Xeneral nun actu públicu que va tener llugar en La Pola L.lena’l prósimu 8 de setiembre, coincidiendo col Día d’Asturies

El Bloque por Asturies, formación política d’izquierdes que nesta llexislatura partipa del gobiernu del Principáu al travies d’un pactu robláu con Izquierda Xunida, decidió’l pasáu 2 d’agostu proponer al so propiu candidatu a les elecciones del 2007, Rafael Palacios, que va ser presentáu oficialmente nun actu públicu que va tener llugar en La Pola L.lena’l prósimu 8 de setiembre, depues de qu’Izquierda Xunida aparcare les negociaciones cola so formación hasta’l mes de setiembre, presentando al so propiu candidatu, Jesús Iglesias, ensin falar sobre l’actual alcuerdu ente les dos fuerces d’izquierda.

Énte esta situación, el conseyeru de Xusticia y dirixente d’Izquierda Xunida, Francisco Javier García Valledor, llamentó la falta de diálogu ente les dos formaciones, asegurando que dende la so organización ‘debemos ser un poco más autocríticos tocante a la falta de comunicación’ ente les dos fuerces. Valledor manifestaba nesi momentu que vía ‘imprensincible renovar el pactu’, a lo que Jesús Iglesias añedió que ‘yá qu’hai voluntá común, podríemos empezar contactos en setiembre’.

Ayeri Jesús Iglesias volvía aplazar la decisión hasta una prósima reunión col Bloque por Asturies pero, na llinia de como fixere primero Valledor, manifestó l’interes del so partíu por revalidar l’alianza que los llevó al gobiernu asturianu na presente llexislatura.

Andecha Astur tacha d”engañu’ les polítiques de vivienda d’Izquierda Xunida, nes que se feliciten pola creación de 18000 viviendes n’Asturies, asegurando que namás se tán construyendo ‘pocu más de 2000, non 18000, qu’en cualisquier casu nun pasaría de ser una llimosna social’. Nel so comunicáu, Andecha Astur critica la política d’IX por nun camudar el sistema económicu que ta elevando los precios de la vivienda, incluyida la protexida, encareciendola nos últimos años nun 29%.

Andecha Astur reclama una política seria sobre’l coste del suelu, ‘que yá representa la mitá del preciu final de la vivienda’, asina como unes midides desgravatories pa los sistemes d’alquileres que funcionen de manera asomeyada a les de los compradores de vivienda, ‘que desgraven 16000 euros na declaración de la renta polos sos creditos hipotecarios’.

Les subvenciones a la vivienda, na mayoría de los casos, son p’Andecha Astur ‘llimosnes’. ‘Así, por exemplu, quien quiera comprar una vivienda ya
construida, solo tendrá un 5% de sovención. D’otra miente, sovencionase con 3000 euros por vivienda a los promotores de suelu protexíu: medida inútil y despilfarradora, porque esti dineru y muncho más consiguelu el costructor nes viviendes de promoción llibre’.

Andecha Astur, finalmente, echa-y en cara a Izquierda Xunida que renunciare a la creación de cooperatives de viviendes qu’en so momentu ellos mesmos promovieron, como ye’l casu de Roces-Granda.

Con motivu del centenariu de la espublización de la obra de Menéndez Pidal ‘El dialecto leonés’, estudiu consideráu fundacional pa la filoloxía asturiana, el Seminariu de Filoloxía Asturiana de la Universidá d’Uviéu prepara un simposiu científicu, ente los díes 9 y 11 d’ochobre, coordináu pol profesor Xulio Viejo, nel qu’espertos de la propia Facultá, xunto a especialistes lleoneses, cántabros y portugueses van analizar la obra de Pidal, asina como los sos trabayos d’encuestación per Asturies que quedaren inéditos.

Col envís da facer una revisión llingüística a estos cien años, el Seminariu de Filoloxía Asturiana collabora cola Universidá de Lleón que yá celebró un simposiu asomeyáu’l pasáu mes de marzu, cola participación del profesor Ramón d’Andrés.

Nel congresu, van dase a conocer unes encuestes dialectales feches por Pidal pel occidente a principios del sieglu pasáu qu’hasta agora taben inédites

El prósimu 8 de setiembre, el Bloque de la por Asturies, va celebrar el Día de la Nación Asturiana cola presentación del so candidatu a la Xunta Xeneral, asina como’l Bloque de la Mocedá Asturianista, nun actu a la una la tarde na Plaza Alfonso X El Sabio. Pela nueche, los festeyos van terminar con un conciertu de La Col.lá Propinde, Adizión Etílica, K-Nalón, Ampikoyo y los Mokomitas.

Nel marcu d’una espicha tradicional, el prósimu 8 de setiembre, a la una la tarde, el Bloque por Asturies va presentar al so candidatu a la Xunta Xeneral asina como’l so candidatu nel conceyu de L.lena. Amás, va ser presentáu tamién el Bloque de la Mocedá Asturianista.

La celebración del Día de la Nación Asturiana va seguir con tonada, música y xuegos tradicionales, pa terminar con un conciertu de La Col.lá Propinde, Adizión Etílica, K-Nalón, Ampikoyo y los Mokomitas.

El portavoz d’IAS, Ignaciu Llope, y la conceyala d’Asturianistes por Nava, Patricia Teja, anunciaron que les dos formaciones que representen ‘alcordaron facer en Nava los actos conxuntos del 8 de setiembre’, coincidiendo coles celebraciones oficiales, pa tresmitir ‘a la sociedá asturiana y naveta la otra cara de la moneda del país idílicu y festivu qu’Areces y Escobio quieren escenificiar’. Pa ello, nos prósimos díes van dar anuncia a una serie d’actos pa esti día nos que se proponga una ‘Asturies alternativa’ pa les elecciones de 2007.

L’actividá central del actu d’IAS y Asturianistes por Nava va xirar alredol d’un actu políticu nel que van intervenir representantes de les dos formaciones, al que va seguir una comida d’hermandá y que se va complementar con una concentración na mañana del vienres y la llectura d’una manifiestu conxuntu.

EL Boletín Oficial del Principáu d’Asturies de güei espubliza’l Decretu 98/2006, fecháu’l 3 d’agostu, pol que s’aprueben los topónimos oficiales del conceyu de Nava. L’espediente toponímicu navetu, que llevaba meses paralizáu ensin recibir el preste que lu facía oficial, pesie a pasar tolos trámites alministrativos previos, foi aprobáu nel últimu Conseyu de Gobiernu enantes del períodu vacacional. Con esta aprobación, ruempe’l silenciu d’ocho meses colos que l’alministración asturiana tenia bloqueada l’aprobación oficial de la toponimia.

L’alministración asturiana manifestaba con esta aprobación la so intención de seguir aprobando espedientes a partir del mes de setiembre. Esti nuevu emburrión na aprobación de la toponimia, y el compromisu de siguir alantre con ella una y buena que termine’l periodu vacacional, ye frutu de la recien valoración del pactu de gobiernu nel qu’una de les mayores taches foi precisamente les torgues que per parte de l’Alministración recibíen la Xunta Asesora de Toponimia y los propios conceyos pa ver aprobaos los sos espedientes.

Les mocedaes nacionaliegues de Darreu denuncien públicamente l’acusación fecha contra dos de los sos militantes ente la Fiscalía del Menor, ‘por decisión de l’alcaldesa de Llangreu -sigún informaciones de la propia Policia Local-‘. La denuncia, que ye tachada por Darreu como ‘una aición represiva por motivaciones polítiques’ y ‘descomanada’, vieno motivada pola pintada d’un mural dientro de la so campaña ‘100 murales pola oficialidá’.

Darreu empezaba a finales de mayu una campaña per 25 conceyos d’Asturies baxo’l títulu de ‘100 murales pola oficialidá’. Con más de 65 murales espardíos pelos conceyos de Noreña, Siero, Sariegu, Nava, Llangreu, Samartín del Rei Aurelio, Llaviana, Sobrescobiu, Casu, Mieres, Riosa, Morcín, Carreño, Gozón, Corvera, Illas, Xixón, Piloña, Parres, Ribeseya, Cuaña, Villalón, El Franco, Castropol y A Veiga, Darreu fai una valoración ‘mui positiva’ de la repercusión de la compaña, de la que dicen ‘ta cumpliendo los oxetivos d’esparder la reivindicación de la oficialidá pela xeografía del país’.

Sicasí, dende la organización nacionalista llamenten la denuncia ente la Fiscalía del Menor a dos de los sos militantes por daños, nuna decisión qu’achaquen a l’alcaldesa de Llangreu y que consideren ‘represiva por motivaciones polítiques y vese no descomanao de la so decisión y el que fuere ella la que lo ficiere por decisión personal’.

El coordinador xeneral d’Izquierda Unida, Gaspar Llamazares, manifestó ayeri nuna entrevista a Radio Llangréu que la so formación nun ‘se sitúa na perspectiva de volver editar necesariamente l’alcuerdu’ de gobiernu que tien col PSOE n’Asturies, ‘anque sí na posibilidá de sacar meyores resultaos’. Pal llider d’izquierdes, anque’l pactu ‘goza de bona salú’, IX tien demostrao ‘ser capaces de gobernar y de facelo bien’.

No tocante a la reforma del Estatutu d’Autonomía asturianu, Llamazares apuntó qu’esti puntu ta ‘paralizáu pol PP y un erru de cálculu del PSOE’. Esta problemática y la oficialidá del asturianu son, según coordinador xeneral, ‘los borrones’ del gobiernu autonómicu.

El pasáu sábadu 19 d’agostu, el Conceyu Abiertu pola Oficialidá (CAO), entidá formada por más de 170 asociaciones en favor de la oficialidá de la llingua asturiana, recoyó más de 500 firmes nuna xornada d’apoyu organizada nel paseu de la playa de Xixón. Baxo’l lema ‘Na reforma del Estatutu, l’asturianu llingua oficial’, miembros del CAO repartireron folletos ente los xixoneses pa desplicar la necesidá d’esti reconocimientu oficial pa la llingua.

El Conceyu pola Oficialidá vien organizando con munchu esitu nos últimos meses una serie de campañes reivindicatives per diferentes ciudaes asturianes. Ente elles, destaca la Caravana pola Oficialidá que yá recorrió dalgunes de les principales villes promocionando y treslladándo-y a la sociedá la necesidá de reconocer na prósima reforma estatutaria la oficialidá de la llingua.

La última, esta recoyida de firmes en Xixón que terminó con una actuación del tríu DRD na Plaza’l Parchís.