Sociedá

La norma ta solicitada pol colectivu de llagareros y tendría como fin regular la producción y consumu de la bebida asturiana. IX y PP quieren axuntar na mesma les diferentes regularizaciones esistentes sobre la sidra. Dende la FSA-PSOE contestóse que primero se tien de desenvolver una normativa estatal sobre l’alcohol.

Dende Izquierda Xunida s’afala a la redacción d’un Plan Integral qu’axunte, y coordine, les diferentes aiciones que se vienen desenvolviendo sobre la sidra poles diferentes alministraciones. Jesús Iglesias esplicó qu’el vino tien medíes similares que supusieron una dinamización del sector. Y ye que la sidra ye actualemnte’l tercer subsector de l’agricultura asturiana, por detrás de los subsectores llacteu y cárnicu, amás de representar un bon porcentaxe de les ventes del sector hosteleru del país.
El representante del Partíu Popular nel área rural na Xunta Xeneral Luís Pelaez considera que la llei propuesta necesita del consensu de les fuerces polítiques pa entamar la so redacción que nun traería problemes por ser “parte d’Asturies”. Dende la FSA-PSOE apúntase a esperar a qu’una llei estatal regule les bebides alcohóliques pa depués entamar la redacción específica pa una llei de la sidra..

Los tres grupos parlamentarios, PSOE, PP, IX, aprobaron esti mes una proposición non de llei na que s’instaba al Gobiernu asturianu a posicionase a favor de que la sidra reciba un tratamientu específicu.

Nuna sentida carta a la militancia d’Andecha Astur, unviada esti xueves 22 de febreru al Secretariu Xeneral del partíu nacionalista asturianu, Germán Abad, el que vien siendo candidatu dende va años, David Rivas, arrenuncia a encabezar la candidatura, faciendo entá más grave la crisis d’Andecha.

Sigún diz David Rivas, nesa carta a la militancia, “dempués de da-y vueltes a la situación pela que tamos pasando n’Andecha Astur y de falar con dellos collacios y delles collacies, comunícovos la mio decisión d’arrenunciar a encabezar la llista de la organización nes prósimes elecciones de mayu, pa lo que fora elixíu nel Conceyu Nacional entamáu n’Uviéu y fináu en Candás hai yá cuasi un añu”.

La carta, reproducímosla darréu na so totalidá: 2Nun voi calentavos la cabeza con argumentaciones ideolóxiques nin recurriendo a filosofíes polítiques porque nun ye’l casu. Si de daqué andamos sobraos ye d’ideoloxización estéril, al empar qu’andamos faltos de cintura estratéxica y d’una mínima sabiduría pa ponemos nos zapatos del otru. La mio decisión nun ye frutu d’un discursu teóricu, sinón de daqué tan cenciello como que ye imposible siguir asina ensin perder la racionalidá.

Nel conceyu –l’últimu celebráu conforme al reglamentu— tamién fora elexía una xunta executiva que ye llexítima n’orixe y n’exerciciu pero a la que dalgunos compañeros negáran—y esta segunda llexitimidá. Por eso, cuando hai dos o tres meses la convivencia pente nós entamó a facese perdifícile, precisamente por ser elixíu unánimemente como candidatu, creyera que’l mio deber, como representante tamién llexítimu, punxi tola fuercia posible nun intentu de mediación que, a la postre, nun llegó a bon puertu.

Pode que dalgunos nun atalantaran la mio posición o, al empar, yo nun supiera desplicala correchamente. Nin pretendí equidistancia –como escribí nun documentu internu que ye onde se debe delidiar nestos casos— nin muncho menos una ambigüedá calculada del tipu de “a ver quien gana” pa posicioname al final. Llevamos –porque nun tuvi solu nesa xera— dos meses o más intentando llegar a les elecciones de mayu careciendo de los menos güelpes posibles. Y trabayóse en silenciu, naguando polo meyor p’Andecha y pa la idega que toos defendemos. Paralelamente l’espectáculu de foros y páxines web ametía entá más problemes pa una salida pactada, una tregua, si queréis llamalo asina, na que yo, pola llexitimidá que’l vuesu votu unánime me diera en Candás, podía facer un serviciu importante. Nun fora posible. Una bona parte de la organización ya especialmente dellos siñificaos militantes prefirieran el conflictu.

Ye evidente qu’aquel consensu del Conceyu Nacional tá rotu y que, d’esta forma, la unanimidá d’entós queda tremendamente relativizao, por más que naide plantegó –polo menos onde tien que plantegase— un cambéu na candidatura. Non obstante, a los problemes surdíos d’esta rotura hai qu’ameter que’l fechu de tener decidía la candidatura a un nivel tan altu como ye un conceyu provocaba situaciones un tanto chusques nes negociaciones que se pudieren caltener. Total, que por hache o por be, la mio innegable llexitimidá d’orixe quedaba amenorgada a midía que s’exercía. Y, como colofón, de poco sirvieran los mios intentos –y, repito, tamién d’otres persones— p’algamar una mínima alcordada pente nosotros. Llegué a plantegar nun presentame a les elecciones y facer una llista de compromisu pa centramos namái que nes municipales, onde los problemes internos son prácticamente inesistentes. Nada fora posible.

Nun sé que pasará andaos unos meses. Los argumentos llegales y reglamentarios escápenseme porque, la verdá, nunca m’interesaran. Y los argumentos políticos tampoco nun me valen porque tán basaos, a lo menos la mayoría, en xuicios d’intenciones. Ya yo hai yá munchu tiempu que dexé de moveme por presunciones, por más qu’haiga vegaes que tengan una basa material más o menos defendible.

De toles formes, pase lo que pase, queden les sigles –¡probes sigles!— onde queden y permanezan n’activo unos, otros o los de más allá —dicir que n’Andecha hai dos llinies ye simplono a maza porque si nun hai cuatro o cinco habrá nueve o diez‐, lo que sí ye claro ye que tendremos que transitar per otres víes. Esi cambéu, que se va dar necesariamente, aconseya camudar tamién les cares y los perfiles de los que representaron o representamos estratexes anteriores. Yo siempres pensé qu’estes elecciones o, como muncho, les europees del 2010, sedríen les últimes pa min. Siguiendo un símil fubolísticu hai de mover bancu y tirar de cantera. El casu ye que la evolución de les circunstancies retírenme un poco enantes. Nada grave, nada que nun tenga igua.

Namái me queda agradecevos la confianza que siempres sopelexasteis haza mi ya espero que nun la traicionara munches vegaes; pero, si lo fixe, tenei la seguridá que nun fora a posta.

Un saludu caldial. ¡Puxa Andecha Astur! ¡Puxa Asturies soberana! ”
Carta de David Rivas a la militancia d’Andecha Astur

El secretartiu d’organización de la FSA, Jesús Gutiérrez, anunció la voluntá del so partíu de non someter a un referéndum la prósima reforma del Estatutu d’Autonomía. Gutiérrez dixo qu’el referéndum “nun ye necesario constitucionalmete y nun tien pies nin cabeza”, en contestación al lider de los populares asturianos Ovidio Sánchez.

Pal secretariu d’organización de la FSA-PSOE un referéndum sobre l’Estatutu “confundiría a los ciudadanos” y que “nada impide qu’Asturies tenga un Estatutu al mesmu nivel que les demás comunidaes”.

Ovidio Sánchez solicitó qu’el futuru referendum d’autonomía se someta a un referéndum popular pa la so aprobación, díes depués de la victoria del sí al nuevu estatutu andaluz, nuna xornada na que l’abstención fue la opción escoyida pola mayoría de los y les andaluces.

El prósimu llunes, 26 de febreru, finaliza na Casa de Cultura de Llanes el taller de Xíriga, la llingua de los teyeros llaniscos, que foi parte del programa de cursos municipales del conceyu de Llanes. Nel cursu, de calter divulgativu, participaron alumnos de delles parte del conceyu y d’ente 19 y 77 años d’edá.

El taller plantegóse al rodiu d’un de los aspectos más interesantes de la historia de Llanes, nel so tarrén etnográficu, y vertebróse nuna serie de meses redondes nes que s’abordaron los aspectos llingüísticos y sociolóxicos de la Xíriga. Dalgunos de los antiguos teyeros y tamargos participaron n’esti cursu sobre un de los llinguaxes de comunicación gremiales qu’entovía se sienten en dalgunos llugares del conceyu llaniscu.

El conceyal nacionalista Santiago Artime va presentar al plenu de la Casa Conceyu de Carreño la propuesta d’aprobación d’unes Ordenances Municipales que regulen l’usu del asturianu nes alministración municipal. La propuesta tramitaráse como d’urxencia ente la negativa del grupu mayoritariu, PSOE, a incluyir la propuesta nel orde del día.

Artime presentó unes propuestes d’Ordenances Municipales del Usu del Asturianu hai un añu algamando’l respaldu de la Unión Independiente de Carreño, y el rechazu de PSOE y PP mientres qu’Izquierda Xunida y URAS abstuviéronse na votación.
Les Ordenances Municipales del Usu del Asturianu establecen los derechos de los ciudadanos del conceyu a poder dirixise a l’alministración municipal n’asturianu, asina como faen la regulación de los diferentes éntes muncipales empobinaos a la normalización social del usu del asturianu.

El míticu xugador de fútbol asturianu y actual delegáu del Sporting de Xixón, Enrique Castro Quini, aconceyó güei xunta a dellos xugadores del equipu con representantes del Conceyu Abiertu pola Oficialidá pa tresmitir el respaldu de la plantiya sportinguista a la causa de la oficialidá de la llingua asturiana.

Esti nun ye’l primer de los apoyos públicos qu’el xugador sportinguista brinda a la Oficialidá del asturianu, asina n’avientu del añu pasáu Quini fue nomáu patronu d’honor de la Fundación Caveda y Nava. El Conceyu Abiertu pola Oficialidá tien ente los sos sofitos a bien de deportistes asturianos de fama mundial como Chechu Rubiera, Benjamín Noval o Manuel Busto.

El Día Internacional de la Llingua Materna foi proclamáu pola Conferencia Xeneral de la UNESCO nel mes de payares de 1999 cola fin de promover el multillingüísmu y la diversidá cultural. Nel documentu aprobáu pola UNESCO se faen recomendaciones a los estaos como crear les condiciones que conduzan a un pluralismu llingüísticu. Asina mesmo la UNESCO afita la promoción de la educación multillingüe, garantizando l’accesu democráticu al conocimientu de la llingua materna pa tolos ciudadanos como forma de construir un pluralismu llingüísticu.

La UNESCO tien catalogaes les más de 6.000 llingües del mundu. La mitá de les llingües tien menos de 10.000 falantes, y la cuarta parte tien menos de 1.000 falantes. Esta pérdida del patrimoniu llingüísticu agrávase por mor de la influencia llingüística de les llingües con más falantes como l’inglés o el castellano.
La situación de la llingua asturiana ye puntu d’observación de la UNESCO que cataloga al nuestru idioma dientro de los idiomes en peligru d’estinción. Nesti catálogu cítase qu’anque esistan neños y neñes falantes d’asturianu la contaminación llingüística del castellano provoca que nel futuru prósimu nun sean usuarios activos d’asturianu.

Un de los apartaos nos que s’incide dende la UNESCO ye la necesidá de facilitar l’estudiu de les llingües maternes por parte de los y les escolinos como preséu de conservación de la vitalidá, y futuru, de la llingua propia.

Llibru bermeyu de la UNESCO sobre les llingües amenazaes

La Ministra de Sanidá, Elena Salgado, echó p’atrás l’anteproyectu de la llei del alcohol que recibió grandes crítiques por parte de los productores de sidra. Salgado anunció la retirada del proyectu de llei pa evitar “que se coniverta nun instrumentu de confrontación electoral”.

La llei que se promovía dende’l Ministeriu de Sanitaria tenía como fin aplicar medíes restrictives del consumu de sustancies alcohóliques, axuntandoles dientro de los mesmos parámetros de riesgu ensin distinguir ente la graduación alcohólica o la tradición de la producción. Ente los asuntos más polémicos del proyectu, agora retiráu, figuraben la prohibición del consumu d’alcohol n’espacios recreativos lo que podría significar la desparición de les espiches o de les fiestes tradicionales asturianes.
La introducción de la sidra dientro de la normativa que s’impulsó dende’l Gobiernu español recibió grandes crítiques por ser la sidra una de les bebides alcohóliques de producción tradicional de menor graduación, 6 graos, en comparación col vino, 12 graos.

L’anteproyectu de llei tenía como fin evitar el consumu de sustancies alcohóliques por parte de menores pa lo que desenvolvía una serie de restricciones de la publicidá d’estes bebides dientro de los medios de comunicación. Asina imponía un horariu d’emisión de los espacios publicitarios de sustancies alcohóliques na televisión y radio pa evitar que na franxa horaria infantil estos anuncios comerciales nun se pudieren emitir.
La cercanía de la retirada del anteproyectu de llei de les elecciones autonómiques y municipales provoca que los sectores afectaos n’Asturies nun baxen la guardia énte la posibilidá de que pasáu’l periodu electoral el Ministeriu de Sanidá vuelva a presentar un anteproyectu de característiques similares al agora retiráu.

Dientro d’un especial de La Voz de Galicia sobre l’Informe de l’Academia de la Llingua sobre’l gallego-asturianu l’académicu de la Real Academia Galega (RAG) pal Eo-Navia, Carlos Varela Aenlle, denunció que la intención de l’Academia de la Llingua Asturiana y los partíos asturianistes “promueven una perspectiva reducionista y unificadora que falsea la realidad lingüística del occidente asturianu”.

L’académicu de la RAG denunció la esistencia de persones que “tienen miéu de falar en gallego, porque van a por elles”, poniendo asina de relieve la esistencia de galego-falantes en priváu que nel planu públicu nieguen esa condición. Denunciando asina mesmo que ye blancu d’amenaces y insultos, que siente especialmente doloroses porque afecten a la so vida personal y familiar. Varela denunció qu’el so nome tea denigráu nos foros d’internet y que yá tuvo que pidir a los sos moderadores la retirada de los comentarios pa evitar tresladalos a los tribunales.
L’académicu de la RAG pal Navia-Eo reclamó, nel marcu del artículu de La Voz de Galicia, una actuación más decidida de la Xunta Galiza. Asina propón la creación como medida básica d’una oficina lingüística pa la zona “bien seya pola propia Academia, bien por Política Llingüística”. Criticó l’ausencia de la cuestión llingüística de la cimera ente los presidentes d’Asturies y Galiza.

Asturnews y l’asociación cultural H.a Xareos acaben de facer el sortéu de les 10 revistes de Formientu, la revista de lliteratura mui moza. Los y les gandores pueden pasar pela llibrería Alborá de Xixón pa recoyer el so exemplar de la revista.

La llista de ganadores ye la que vien darréu:

• Anibal González Miyares
• Xuan Ramón Naves Rodríguez
• Ricardo González Menéndez
• Chechu García
• Xosé Arsenio Coto Pérez
• Abraham García González
• Lucía Cuervo Fandos
• Vanesa Parajón Pérez
• Xosé Nel Comba Paz
• Ana Belén Antón Fidalgo

Asturnews y Ha. Xareos feliciten a los y les gandores d’esti concursu.