Sociedá

Encarnación Rodríguez, anguaño xerente de la Orquesta Sinfónica del Principáu d’Asturies, y con un currículu de perfil dafechamente xestor, va ser la Conseyera de Cultura y Turismu del nuevu Gobiernu de Vicente Álvarez Areces, nomáu esti llunes Presidente namái que colos votos de los diputaos socialistes na Xunta Xeneral. L’anterior Conseyera de Cultura, Ana Rosa Migoya, pasa a dirixir Alministraciones Públiques y caltien la Portavocía del Gobiernu.

La nueva Conseyera de Cultura ye llicenciada n’Económiques y tien una llarga carrera na Alministración como xestora, ensin más contautu cola aición cultural que la xestión como Xerente de la Orquesta Sinfónica del Principáu (OSPA). El perfil d’Encarnación Rodríguez fai albidrar una política continuista nel ámitu cultural de la tercer lexislatura d’Areces como Presidente.

Les otres incorporaciones del Gobiernu de diez COnseyeríes anunciáu esti llunes por Areces son Pilar Rodríguez, como Conseyera de Bienestar Social, José Ramón Quirós, Conseyeru de Salú y Servicios Sanitarios, y Belén Fernández, nueva Conseyera de Mediu Ambiente y Desarrollu Rural.

Los conseyeros que siguen son María Jose Ramos, na Conseyería de la Presidencia ya Igualdá, Jaime Rabanal, n’Economía y Asuntos Europeos, José Luis Iglesias Riopedre, como Conseyeru d’Educación y Ciencia, Francisco González Buendía, en Política Territorial ya Infraestructures, y Graciano Torre, como Conseyeru d’Industria y Emplegu.

El coordinador xeneral d’Izquierda Xunida y voceru parlamentariu d’IX-BA-Los Verdes destacó del Gobiernu d’Areces el so “carácter continuista” y el fechu de que ye un executivu de “perfil políticu miu baxu” y de persones “afines a Areces”. Jesús Iglesias quiso dexar afitao que na opinión de la coalición, el nuevu Executivu tien una evidente “vocación de provisionalidá”.

El secretariu Xeneral d’IX tamién asoleyó que la composición del executivu “amuesa la nula voluntá de reforciar el Gobiernu”, porque nelli “hai pocos políticos y esa nun ye una bona garantía p’afrontar los problemes d’Asturies”.

La nueva guía de Telefónica del 2007-2008, que se repartió va poques feches, recueye tolos topónimos asturianos oficiales, tanto nel índiz alfabéticu del principiu, como nes direcciones qu’apaecen na propia guía.

La Oficina de Política Llingüística ocupóse en tou esti tiempu d’informar curioso a Telefónica de los cambios oficiales de les denominaciones toponímiques, pa la soaplicación.

Redacción.

La Xunta pola Defensa de la Llingua Asturiana informaba estos díes del momentu nel que ta’l procesu xudicial contra Xose Antón Cadierno, por una acción consistente na corrección d’un rótulu de carretera. El fiscal pide pa el una multa de 8483’94 euros, 7210€ de pena y 1283’94€ por desperfectos, o la sustitución por un añu de privación de llibertá.

Una pitición que pa la XPDLA ye “escandalosamente desproporcionada” y “ta basada nuna interpretación claramente tendenciosa del Códigu Penal, que fai rescamplar la so intencionalidá política en contra de la reivindicación llingüística”. Asinamesmo, la XPDLA recuerda que “la Llei d’Usu y Promoción del Asturianu recueye nel so artículu 15.1. que los topónimos de la Comunidá Autónoma del Principáu d’Asturies han tener el so nome oficial na so forma tradicional…”.

Anque la Llei foi aprobada va más de nueve años, los sucesivos gobiernos asturianos incumplen y vulneren sistemáticamente’l conteníu d’esti artículu. Lo que pa la Xunta ye “una imposición allegal pola vía de los fechos consumaos, una toponimia falsa, castellanizada y deformada col únicu oxetivu de facer desapaecer la llingua asturiana de los nomes propios de los nuesos llugares”.

La Xunta pola Defensa de la Llingua Asturiana “quier denuciar, en primer llugar, la dureza implacable cola que la fiscalía actúa contra un ciudadanu por correxir un rótulu de carretera que yá taría na forma correcta si les alministraciones respetasen la llei”. Amás, añaden que “la situación d’indefensión xenerada pola so dexadez y complicidá ente l’incumplimientu de la llegalidá per parte de les alministraciones”. La Xunta pola Defensa de la Llingua Asturiana va ufrir a Xose Ántón Cadierno “tol apoyu y solidaridá que fagan falta pa sacar alantre esti procesu”.

Redacción.

Los miembros del Aconceyamientu de Xuristes pol Asturianu presentaron estos díes les sos alegaciones a la cuestión d’inconstitucionalidá que’l Maxistráu del Xulgáu númberu 3 de lo Contencioso-Alministrativo d’Uvieu tien anunciada escontra tres artículos de la Llei del Principáu d’Asturies 1/98, d’Usu del Asturianu. Esti martes próximu fina’l plazu pa la presentación d’escritos d’alegaciones.

Énte esta cuestión d’anticonstitucionalidá plantegada pol xuez nel procesu abiertu ente’l Principáu d’Asturies y l’abogáu Xurde Blanco los miembros de Xuristes pol Asturianu entruguense “¿que va alegar el “gobiernu de la izquierda plural”, siendo asina que los dos “socios” aprobaron la llei na Xunta Xeneral del Principáu?”. Al mesmu tiempu y en clave estatal pregunten “¿que va dicir el gobiernu Zapatero pente medies del Ministeriu Fiscal?”.

En cuantes a los creadores de la Llei entruguen “¿dirá daque’l Partíu Popular -estramuries del procesu porque nun ye parte- que foi’l promotor de la llei?, ¿callarán y mirarán toos pa otru llau dexando solos al demandante y al Aconceyamientu de Xuristes pol Asturianu?”. Sobre’l xuez entruguen “¿atreveráse’l Maxistráu a siguir p’alantre?”.

Los miembros del Aconceyamientu entruge de Xuristes pol Asturianu dicen tar “percontentos y enfotaos en que l’asuntu llegue al Tribunal Constitucional pa que, d’una
vuelta pa toes, s’afite y perafite que la llingua asturiana y los sos falantes tamien tienen drechos y que yá ta bien de negáyoslos”.

Testu completu de les alegaciones (cast)

Redacción.

L’Asociación Cultural N´ast, acaba de presentar al Plenu Municipal una propuesta d’Ordenances Municipales sobre oficialidá de la llingua asturiana. Tamien pide que, acordies cola llexisllación vixente, se-yos reconoza’l drechu a defender delantre del plenu “el so paecer sobre la necesidá y procedencia d’estes ordenances”.

El presidente de N’ast, Xabel de Cea diz que esta decisión “Afítase en razones tan básiques como que se tien drechu a ser asturianos n’Asturies y a falar l’asturianu na nuesa tierra. Y qu’esti drechu democráticu tien de tar reconocíu y reguláu”. Amás “denuncien que’l Conceyu impón l’español comu única llingua nos actos municipales y na so rellación cola vecindá; por embargu, el Conceyu tien d’asegurar el futuru del nuesu país y nun pue facelo forciándomos a dexar de comportamos como asturianos”.

Pa los proponentes “nengún pueblu nun asegura’l so futuru arrenegando de la so identidá. Tolo contrario. Los pueblos qu’encariaron los tiempos modernos con menos problemes sociales, económicos, llaborales,… o con soluciones de más puxu pa esos problemes son aquellos pueblos que s’enfotaron na so cultura y na so identidá”.

Defenden que namás se pue falar “d’Alministración municipal democrática” si esta reconoz los drechos incluyíos nes Ordenances propuestes, esto ye, “los drechos a dirixise al Conceyu n’asturianu, recibir información municipal na llingua d’Asturies, potenciar lo asturiano nes actividaes municipales y en toles estayes de la vida comunitaria, recibir enseñances na nuesa llingua, respetar los nomes asturianos de les nueses cais y pueblos, nun tener que dexar de ser asturianu pa ser foncionariu o emplegáu municipal, y un especial compromisu municipal nel sofitu y sovención de les iniciatives que respeten la nuesa identidá y cultura”.

Dotramiente, los responsables de N´ast dicen tenese puesto en contactu colos cabezaleros d’Izquierda Asturiana pa pidir la so collaboración y defensa pa con estes ordenances en Piloña, onde gobiernen xunto al PSOE. Nel futuru N’ast va presentar les mesmes ordenances n’otros conceyos.

Redacción.

Mañana xueves les 21:30, la Xunta pola Defensa de la Llingua Asturiana va festexar con una espicha’l segundu aniversariu del chigre de la organización ‘La Casa Posafuelles’. El llocal abrió va dos año pa sustituyir al Chigre Naranco, anterior llocal de la XPDLA. La organización quixo facer d’esti, un llocal onde “lo primero fuere’l compromisu militante, d’actividaes y presentaciones venceyaes a la nuesa llingua y por supuesto tamien de bona folixa”.

El chigre de la Xunta abre de llunes a vienres a les 17:30. Los sábados a les ocho l tarde. El nome del chigre, espliquen na so web, “provien de les cases onde la xente paraba de tarde al volver de trabayar, o a cualquier hora si-yos queda de pasu, una casa d’un vecín cualquiera onde siempre hai xente na cocina y onde cualquiera puede entrar a dar parola”.

Redacción.

La Pita de la Xunta pola Defensa de la Llingua Asturiana tuvo ayeri ente la sede de la FSA, onde aconceyaben PSOE-IX-BA-LV pa zarrar un pactu de gobiernu pa los cuatro años próximos. Esta apaición súmase a les declaraciones feches pol Conceyu Abiertu pola Oficialidá, pola Asociación N’Ast y por otros coleutivos por mor d’estes negociaciones, nes que’l tema de la oficialidá de la llingua asturiana ta garrando protagonismu.

Na concentración delantre de la sede de la FSA pudieron vese cartelos colos lemes “La oficialidá nun ye un cromu” y “la oficialidá ye irrenunciable”. Pa la XPDLA “la Pita recordó-yos a los representantes políticos de dambes formaciones, la so responsabilidá pa cola llingua asturiana”.

Redacción.

L’Hospital de San Agustín n’Aviles va recibir el ‘Triángulu Rosa’, galardón que reconoz al equipu profesional responsable de la unidá de transexualidad del hospital avilesín “el so compromisu polos drechos d’esti colectivu”. Per otru llau, el profesor y filósofu Gustavo Bueno recibe’l galardón negativu de Xente Gai Astur “por manifestar qu’un gobiernu que llexisla sobre los casorios gais merecería namás por eso ser baltiáu”.

L’actu d’entrega va ser el próximu 28 de xunu, Día Internacional de Gais, Lesbianes, Bisexuales y Transexuales, a les ocho la tarde nel salón d’actos del Centru Cultura Antiguu Institutu de Xixón. Darreu, como tolos años, va celebrase la manifestación del Arguyu 2007 peles cais de la ciudá, pa la que Xega espera cerca d’un millar de persones.
El coordinador de Xega, Tino Brugos, va facer esi día una llamada d’alerta a la ciudadanía asturiana “pol incrementu de les agresiones contra homosexuales”. N’Asturies rexistráronse últimamente dos ataques a una pareya de lesbianes en Bimenes
y a un gai na capital del país.