Sociedá

L’Academia de la Llingua Asturiana y el Conceyu de Llangréu firmaron esti miércoles un conveniu “col envís de contribuir a la normalización social del usu del asturianu nel conceyu de Llangréu, y especialmente nel de la so alministración local” convirtiendo a l’Academia nel muérganu asesor cimeru nel ámbitu llingisticu nel conceyu llangreanu, calificáu de modélicu pola Presidenta de l’Academia, Ana Cano, nel actu nel que roblaba’l conveniu cola alcaldesa de Llangréu Esther Díaz García.

La firma tuvo llugar a les 13,30 hores nel salón d’Actos de la Casa Conceyu y cuntó cola presencia d’Esther Díaz García, Alcaldesa de Llangréu, Ana María Cano González, Presidenta de l’Academia de la Llingua Asturiana, y Eloy Antuña, responsable de la Oficina de Normalización de Llangréu.

La firma d’esti conveniu de collaboración aprobóse por unanimidá de tolos grupos políticos del conceyu en comisión de Cultura, Turismu y Política Llingüística pa dempués recibir tamién el preste en Xunta Gobiernu del conceyu de fecha 22 de xineru de 2008.

Ayuntamientu y Academia comprométense por esti conveniu a collaborar en materia de normalización social del asturianu cola puesta en marcha de midíes afayadices qu’aseguren el respetu de los derechos llingüísticos de tolos ciudadanos y ciudadanes del conceyu. L’Ayuntamientu comprométese a seguir nel camín de la normalización tanto na Toponimia, oficializada dafechu hai poco como nel ámbitu de la comunicación na qu’ufierta mucnhes campañes davezu n’asturianu dafechu. Y l’Academia, amás de garantizar l’asesoramientu en tou tipu d’estayes ufre una coleición completa de les sos publicaciones pala Casa de los Alberdi, que sedrá inaugurada na primavera como centru de cultura empobináu a la llingua y la cultura tradicionales.

L’Ayuntamientu de Llangréu, dicen los sos responsables “sigue faciendo apueste pola normalización de la Llingua Asturiana y pola consideración de la institución como axente dinamizador del procesu de normalización y promoción del usu del asturianu nel ámbitu del conceyu”.

L’Academia de la Llingua Asturiana ya’l Conceyu de Llangreu van collabrorar pa fomentar la normalización social del asturianu n’alministración del conceyu, según informaron en nota de prensa. L’alcuerdu; que l’Alcaldesa de Llangreu, Esther Díaz García y la Presidenta de l’Academia, Ana Cano van roblar el miercoles, recibió l’aprobación de tolos grupos del consistoriu y de la Xunta de Gobiernu.

Greenpeace incluí la planta avilesina d’Arcelor y la papelera d’ENCE en Navia ente los puntos negros de la contaminación na península. Nel informe tamien alvierte del peligru pa la salú humana ya’l mediuambiente que supón la construcción de la incineradora de Serín. “Esti tipu d’instalaciones son la peor forma de xestionar les basories ya qu’emiten ente otros contaminantes, dioxines y furanos”.

El trabayu de Greenpeace ta centráu nos sectores más contaminantes por comunidaes autónomes. Nesti sen la organización recordóa qu’Asturies cunta con un importante texíu industrial con industries papeleres, metalúrxiques y químiques amás de tar sometía a un gran tráficu marítimu, col riesgu de contaminación qu’esto supón.

No tocante a les consecuencies d’esta situación, Greenpeace sorayó que la contaminación tien gra rellación col altu númberu d’enfermos de cáncer na rexón.”Hasta un 12% de los casos puen debese a la esposición nel trabayu a contaminantes como disolventes orgánicos, compuestos de níquel, pesticides o hidrocarburos”. Otros tipos de cáncer igualmente frecuentes n’Asturies, según Greenpeace, son “los de boca, esófagu, y farinxe lo que demuestra la relación ente esti tipu d’enfermedaes y les árees industriales”.

Andecha Astur de Xixón estrena nuevu llocal. Ta na cai Prendes Pando de la capital xixonesa y van inauguralu oficialmente nun actu esti sábadu 9 de febreru de magar les siete la tarde. A un añu vista da la inauguración del Llar d’Andecha en Noreña, la organización continua cola so apuesta polos llares abiertos a la sociedá. Andecha Astur tenía, hasta gora, la so sede na cai Alvaro d’Albornoz.

“L’Ayuntamientu de Xixón nun fizo nengún avance significativu en nenguna de les estayes que conformen la política llingüística”. Esta ye la opinión que tien el Partíu Popular de Xixón del funcionamientu de les politiques de promoción de l’asturianu nel consistoriu xixones. Nun comunicáu, los populares critiquen asimesmo la non presentación d’una ordenanza municipal pal usu del asturianu, el funcionamientu precariu de la oficina municipal de la llingua y les torgues a l’aplicación de la toponimia del conceyu.

“L’usu del asturianu na publicidá institucional del conceyu, l’usu de los topónimos oficiales en señales, mapes y documentos o’l facilitar l’accesu de la ciudadanía a productos y servicios n’asturianu de tou tipu”. Estes son dalgunes de les midíes que plantega llevar al cabu’l PP de Xixón amás de potenciar la oficina de la llingua cola formación d’un nuevu conseyu asesor, crear un plan director de les polítiques llingüístiques o garantizar l’usu de l’asturianu nos documentos oficiales.

“La oficialidá nun pue ser un arma pa tirase a la cabeza unos a otros, sinón que ye un asuntu de derechos ciudadanos, un tema ensin resolver dende hai 30 años que sigue ehí”. Nestos terminos se pronunció la Xunta Pola Defensa de la Llingua Asturiana sobre l’usu ellectoralista que, al so xuiciu, tan faciendo del asturianu PSOE y PP nesta precampaña. Según denuncia XPDL nun comunicáu, esta situación nun beneficia en nada a algamar el consensu necesariu pa la defensa de los derechos de los asturfalantes.

El centru de les crítiques de la Xunta foron les declaraciones cruciaes ente Gabino de Lorenzo y Jesús Gutierrez alredor de la oficialidá. XPDL reprocho-yos la so actitú al candidato popular; “Gabino de Lorenzo, sigue cola so táctica de facer cantos d’amor al asturianu, pero ensin demostralo más allá de detalles anecdóticos”, y tamien al socialista; “Ye tanta la perceguera que-y da l’asturianu fuera de los ámbitos de la casa y del chigre que, cuando lu ve usase pa falar de política, Gutierrez ya se pon nerviosu”.

La Xunta tuvo asimesmo pallabres de rempuesta pa les actitudes pa col asturianu de la FSA y del diputáu popular Joaquín Arestegui, quien haz bien poco volvió a poner enriba la mesa’l tema de la obligatoriedá. Nesti sen, XPDL respuende-y con una entruga, ¿Va atravese Arestegui a falar d’obligatoriedá a los sos compañeros de Galicia y Valencia, comunidaes con abondos años de Gobiernu popular y onde les sos llingües son oficiales?”.

L’Aconceyamientu de Xuristes pol Asturianu ta acabante d’unviar una quexa a la Directora d’Expolangues por mor de lo que consideren doble política na manera de tratar l’asturianu nes actuaciones del gobiernu d’Asturies. AXA, al travies d’un comunicáu, calificó de falsura la participación del gobiernu nel salón Expolangues pa promocionar la llingua asturiana, al tiempu que torga la so presencia na educación infantil, pieslla los servicios de normalización que tan funcionales o prohibe’l so usu a los funcionarios de l’alministración.

Easyjet va poner en serviciu un nueva llínia aerea ente Asturies y Ginebra con tres vuelos selmanales a partir del 22 d’abril. Los aviones van salir dende l’aeropuertu d’Asturies los martes, xueves ya’l sábadu a les 12:10 hores. La compañía opera anguaño n’Asturies con rutes a Madrid y a Londres y, anque tovía nun ufre serviciu a Alemania, como prometió al llegar al Principáu, amplía agora la ufierta col serviciu a la capital suiza.

El presidente del Colexu Oficial d’Odontólogos y Estomatólogos d’Asturies y presidente del Conseyu Xeneral de Colexos d’Odontólogos y Estomatólogos d’España, Manuel Alfonso Villa Vigil, alvirtió esti martes a Europa Press de les “dudes” que xenera ente los profesionales la elección del modelu públicu pa les prestaciones de salú bucodental escoyíu pol gobiernu del Principáu d’Asturies.

“Si n’Asturies se pretende, como paez ser, atender la demanda apostando pol serviciu públicu nun se cómo va facer”, dixo Villa Vigil en declaraciones a Europa Press. “El Gobiernu asturianu nun va saber los recursos económicos que va apostar a esta actuación, porque si espera desarrollar el proyectu colos recursos de que dispón nesti momentu los neños van quedar ensin atender”, llamentóse.

Villa Vigil fizo estes declaraciones en relación col derechu publicáu nel BOE sobre la regulación de la concesión de sovenciones a les comunidaes pa la promoción d’actividaes pa la salú bucodental infantil de neños de siete y ocho años nel 2008. “Les midíes fomentaes pol Ministeriu de Sanidá son mui básiques y casi iguales a les que ya se taben dando na mayoría de les comunidaes”, dixo al respecto.

El Principáu va percibir 187.725 euros nel 2008 p’atender a la población infantil de siete y ocho años, que na comunidá s’asitia en 8.343 neños. El Ministeriu va financiar a les Comunidaes Autónomes con 22,5 euros por cada neñu, partiendo de la estimación de que’l coste individual pue ser de 45 euros por caún nun modelu capitativu –pautáu coles clíniques privaes– porque “nun modelu públicu d’asistencia colos propios recursos y profesionales ye bastante más caru”.

El diputáu d’Izquierda Xunida, Javier García Valledor acusó al gobiernu del Principáu de tener ensín presentar la evaluación del Plan de Normalización Llingüística y del retrocesu xeneral en política llingüística que vive la rexón en comparación colo que se fizo durante la llexisllatura na que IX tuvo nel executivu. “Ta percorriendose un camín inversu al de la llexislatura pasada”, declaro Valledor en rueda de prensa.

Según el diputáu los casos de desantención a la llingua son claros. No tocante al curriculu d’educación infantil y primaria, esti ta incumpliendo, según Valledor, la llei d’usu, al nun contemplar l’oxetivu esplícitu d’aniciación oral na llingua, el trabayu fechu cola toponimia ta paralizáu y los servicios de normalización nun funcionen con normalida o nin siquiera funcionen. Amás tamien acusó al gobiernu d’Areces desterrar la llingua de l’Alministración.

Por últimu tamien se refirio al espaciu qu’ocupa l’asturianu na televisión autonómica del Principáu, al so xuiciu restrinxíu a unos pocos programes, y a la presencia de la llingua asturiana nel Salón Internacional “Expolangues” de París, dalgo que Valledor ve como un intentu del Gobiernu de protexer l’asturianu más como un elementu de museu que como un idioma vivu y con derechos fundamentales a los qu’atender.