Sociedá

L’Academia de la Llingua Asturiana va unviar al presidente del Gobiernu, José Luis Rodríguez Zapatero, y al presidente del Partíu Popular, Mariano Rajoy, un escritu informando de la situación que se presenta na reforma estatutaria n’Asturies y l’incumplimientu de la FSA y el PP asturianu de les llinees xenerales de los dos partíos estatales no que cinca a les llingües que se falen nel Estáu.

La presidenta de la institución, Ana Cano, fizo esa anuncia na parte final del actu simbólicu qu’amosó la protesta unánime pola redaición del artículu cuartu del Estatutu que la selmana pasada roblaron PP y PSOE, y que escaez la oficialidá como estatus llegal pala llingua asturiana.

L’Observatoriu Oceanográficu Marees dirá allugáu en L.luarca, según anunció ayeri en rueda de prensa’l presidente del Principáu, Vicente Álvarez Areces, tres d’asistir al conceyu del Conseyu Xeneral de Ciencia y Teunoloxía que se celebraba na Universidá Llaboral de Xixón.

Esti organismu va ser un puntu de referencia estatal y européu no que cinca a la observación de los océanos y va cuntar con una inversión de 25 millones d’euros ente’l Principáu y el Ministeriu.

La Xunta Direutiva del Aconceyamientu de Xuristes pol Asturianu, col comunicáu darréu, quier reprochar públicamente a los partíos PSOE y PP el so intentu de desaniciar dafechu la llingua asturiana pente medies de la reforma del artículu 4 del Estatutu d’Autonomía.

Nel mesmu sen, pidi a tolos asociaos y simpatizantes qu’acudan xunto cola familia y amigos al actu públicu que sol llema ¡RESPETU P’ASTURIES! tendrá llugar el XUEVES 17, A LES 19 HORES, NA SALA DE CÁMARA DEL AUDITORIU “PRÍNCIPE FELIPE” D’UVIÉU.

Énte’l proyeutu d’artículu 4 pal Estatutu d’Autonomía apautáu por PSOE y PP, l’Aconceyamientu de Xuristes pol Asturianu considera un deber cívicu alvertir a tola ciudadanía que:

1. El so conteníu y espíritu ta sacáu del Decretu 2929/1975 (art. 1: “Las lenguas regionales son patrimonio cultural de la Nación española… Su conocimiento y uso será amparado y protegido por la acción del Estado”) pel que’l réxime franquista, yá nes boquiaes, intentó desaniciar les xustes reivindicaciones de la España plurillíngüe.

2. Empobínase a la escontra d’ún de los principales oxetivos de la Constitución, recoyíu nel so Preámbulo: “La Nación española proclama la so voluntá de protexer a tolos españoles y pueblos d’España nel exerciciu de les sos llingües”.

3. Desprecia los mandaos de la Carta Europea de les Llingües Rexonales o Minoritaries, tratáu internacional ratificáu por España que forma parte del denomáu bloque de constitucionalidá, onde se proclama, artículu 7.2, que “Les Partes (ratificantes) comprométense a desaniciar, si entá nun lo ficieron, tou distingu, esclusión, restricción o preferencia inxustificaes con repeutu al emplegu d’una llingua rexonal o minoritaria col oxetivu de desalendar o poner en pelligru’l caltenimientu o’l desendolcu de la mesma.

4. Ye una vergoñosa agresión a la llingua asturiana y a los drechos fundamentales de los sos falantes y un intolerable actu de discriminación pa con tolos asturianos que somos trataos por el PSOE y el PP, partíos qu’en toles otres comunidaes autónomes billingües sofiten la cooficialidá, como ciudadanos con menos valir que’l restu de los españoles.

Esti xueves 17 de xunetu, a partir de les 19 hores, na Sala de Cámara del Auditoriu “Príncipe Felipe” d’Uviéu, l’Academia de la Ltingua Asturiana tien convocáu un actu col que quier afitar la responsabilidá de los que tan condergando a la llingua asturiana al so desaniciu social al separtala otra vuelta del estatu llegal d’oficialidá que-y correspuende según el mandatu constitucional.

Nuna carta fecha pública esti día la Presidenta de L’Academia de la Llingua, Ana Cano, diz vese na obligación de dirixise a los asturianos pa tresmitir la so “gran deceición y preocupación énte’l resultáu de la reforma del Estattuto d’Autonomía que, a lo que paez, van roblar la FSA-PSOE y el PP, partíos mayoritarios na Xunta Xeneral del Principáu”.

Según afita Ana Cano nesa carta “son munchos los años que venimos trabayando (munches persones) pola diginficación de la llingua y la cultura d’Asturies y faciendo esfuerzos por tresmitir, convencer, argumentar y esixir que l’asturianu, como llingua del pueblu d’Asturies, algame l’estatus xurídicu qu’afite la so sobrevivencia. Pero, a lo que paez, tampoco nesta reforma estatutaria se va llograr. Inda más, el conteníu del artículu 4 que se propón ye mesmamente regresivu con respeutu a la situación actual”.

La presidenta de l’Academia reconoz que la mesma “nun gobierna nin tien capacidá política pa camudar esta situación, pero sí tien autoridá moral pa falar y va falr”. Lo que va dicise nel actu públicu convocáu pa esti xueves 17 a les 19 hores na Sala de Cámara del Auditoriu “Príncipe Felipe” d’uviéu ye que “tán intentado facer que l’asturianu desapaez como realidá social y, darréu, como problema cultural n’Asturies” y eso enxamás va permitilo l’Academia.

El Pabellón d’Asturies na Expo de Zaragoza recibió nos primeros venti díes d’actividá un total de 119.000 visites, según informó’l Gobiernu autonómicu. El so restorán ye ún de los más visitaos y según fontes gubernamentales, “supera nun 60% a los d’otres comunidaes autónomes”.

El 29 de xunu foi’l día nel que más vistantes pasaron pel pabellón asturianu, un total de 12.500 persones. El llugar recibió amás la visita d’un total de 30 autoridaes d’otres comunidaes autónomes dende que la esposición internacional abrió les sos puestes el 14 de xunu.

El pabellón tien capacidá pa 150 persones y dientro d’él y en tol recintu de la EXPO 2008 va celebrase’l 28 de xunetu, el Día d’Asturies na EXPO, actu que va cuntar cola presencia del presidente asturianu, Vicente Álvarez Areces, y la conseyera de Mediu Ambiente y Desenrrollu Rural, Belén Fernández González.

El guah.e, David Villa tamién da la cara pola oficialidá siguiendo los pasos del so mayestru “Quini” que ya se manifestare en delles ocasiones partidariu de la oficialidá de ka llingua asturiana. L’ésitu de la campaña «Doi la cara pola oficialidá», con más de 3.500 semeyes recoyíes sigue imparable depués de cumplir un mes.

Esta campaña, entamada pol Conceyu Abiertu pola Oficialidá, fíxose pa demostrar l’apoyu públicu a la oficialidá de la llingua asturiana y del gallego-asturianu nel próximu Estatutu d’Autonomía d’Asturies. David Villa, «El Guah.e», acaba de retratase col cartel «Yo doi la cara pola oficialidá» namás posar el pie n’Asturies de vuelta de la Eurocopa.

El retratu de David Villa va colgase na páxina web de la campaña(www.doilacara.net) nes próximes hores, porque tovía hai cientos de semeyes que tamién tán na cuenta de corréu y que tán siendo alministraespola organización de la web. La idea de la campaña ye que los ciudadanos y ciudadanes d’a pie seretraten col cartel «Yo doi la cara pola oficialidá», peró ente esa xente anónimo tamién hai abondes cares conocíes. Una d’elles va ser la de Villa.

Les estadístiques de la campaña son ablucantes no que se refier a visites feches nel web y na galería de retratos: nel mes que lleva funcionando fixéronse 15.000 visites a la web y 135.000 visualizaciones de les semeyes. El total de les visualizaciones de la web y de la galería de fotos hasta güei ye de 216.525.

La campaña entamada pol Conceyu Abiertu pola Oficialidá (CAO)pa recoyer apoyos pa la oficialidá del asturianu en forma de semeyes algamó yá cásique 3.000 semeyes unviaes al cumplise’l mes del so llanzamientu esti martes primeru de xunetu y continua col trabayu de recopilación na direición doilacaraarrobagmail.com.

El Conceyu Abiertu pola Oficialidá presentó hai un mes, el 3 de xunu, una campaña novedosa col oxetivu de llograr el reconocimientu de la oficialidá de la llingua asturiana na próxima reforma del Estatutu d’Autonomía. La campaña Yo doi la cara pola OFICIALIDÁ consiste na recoyida masiva y esposición de semeyes individuales de persones con un mesmu cartel que lleva’l testu que da nome a la campaña. Pa eso ta yá colgada na rede la páxina www.doilacara.net, onde se pue atopar la información sobre la campaña, enllaces pa descargar y imprimir la fueya del cartel, tanto n’asturianu como en gallego-asturianu, y un corréu electrónicu al que mandar les semeyes: doilacaraarrobagmail.com.

Ye una campaña diseñada pa llevar a tola ciudadanía asturiana la iniciativa de la defensa del nuesu patrimoniu llingüísticu: una propuesta abierta a la participación de toos y toes que dexa que cualquier ciudadanu o ciudadana pueda ser protagonista activu de la reivindicación de los derechos llingüísticos n’Asturies. Y lso asturianos tan dando la cara pola oficialidá y espardiendo la campaña ente les persones del so entornu, familiares, vecinos, compañeros de trabayu, asociaciones de tou tipu, etc.

Fotos de los 3000 asturianos que vienen dando la cara pola oficialidá

Ye una propuesta del Institutu Asturianu de la Mocedá pa mozos y moces asturianos de 18 a 30 años. Los seleccionaos por sortéu na primer fase viaxarán pela Unión Europea elixendo ellos mesmos l’itinerariu ente’l 1 d’agostu y el 31 d’ochobre, en tren y con abellugu n’albergues xuveniles, faciéndose cargi de los gastos l’Institutu Asturianu de la Mocedá. Ye necesario inscribise en grupos de 2 a 4 personas. La inscripción ye de baldre y pue facese en la OIJ del 14 al 30 de xunetu.