Sociedá

L’Ayuntamientu de Llangréu, al traviés de la Conceyalía de Mocedá y col envís de facilitar a tola xente mozo’l contactu cola naturaleza y la vida al aire llibre, convoca un CAMPAMENTU DE BRANU a celebrar nel ALBERGUE “EL FURACU” de La Isla (Colunga), na segunda quincena del mes d’agostu.

Esti alcuentru diríxese a chavales ente los 8 y los 15 años y cuenta con un total de 45 places. 30 d’elles valdrán a 150 euros y les 15 restantes van destinase a aquellos participantes qu’acrediten unos ingresos añales iguales o inferiores a 5.000 euros por integrante de la unidá familiar.

La cuarta edición de la Fiesta de les asociaciones entamó ayeri xueves na Playa de Pando de Xixón, organizada pol Conseyu de Mocedá de Xixón col envís de ser “un llugar abiertu a la participación de tola ciudadanía”. Na fiesta tienen el so espaciu asociaciones, xóvenes, colectivos y entidaes de tou tipu, que “enllenen de música fiesta, actividá y color el cementu del paséu de la Playa de Pando.

Hasta’l domingu va poder visitase y participar d’actividaes como conciertos, torneos deportivos, xuegos “pa grandes y pequeños”, arte y esposiciones, charres, alderiques y conferencies, percusión, flamencu, hip-hop, y otres actividaes.

Esti ye’l programa completu:

Vienres 1
12:30 hores Tertulia de LLABoral
La directora Rosina Gómez – Baeza Tinture, el comisariu xefe Erich Berger
13:30 hores Animación ManúManue
18:00 hores Alcuentru de Voluntarios europeos
19:00 hores Alcuentru col embaxdor de Nicaragua n’España. Organiza la Coordinadora de ONG´D d’Asturies.
20:00 hores Títeres
20:00 hores Conciertu de Vinilos. Dj Iván Lomas (Dj Pimp)
LLABoral. Centru d’Arte y Creación Industrial
21:30 hores Conciertu de Kozmics
23:00 hores Conciertu de CANTECA DE MACAO

Sábadu 2
12:00 hores Concursu de perros ensin raza. Proyecto Darko
12:00 hores Presentación de trabayos espuestos en Banquete_Nodos y Redes y Homo Ludens Ludens y películes del ciclu d’animación. LLABoral Centru d’Arte y Creación d’arte y creación industrial
17:00 hores Espectáculu de ManúManue (zapatones, percusión y trucos de maxa)
18:00 hores Presentación del Cuadernu de Diálogos pa la Cooperación colos pueblos indíxenes. Acsur las Segovias
18:30 hores Mesa sobre la situación actual de los pueblos indíxenes en Llatinoamerica. Coordinadora d’ONG´D
Presenta: Jordán Suárez Garea. Presidente del Conseyu de Mocedá de Xixón
Intervienen:
Sr. Augusto Cesar Zamora. Embaxador de Nicaragua n’España
Sr. Montes Estrada. Conceyal de Cooperación del Ayuntamientu de Xixón
Representante de la Coordinadora d’ONG´D d’Asturies
Sr Pablo Gutierrez Vega. Profesor Universidá de Sevilla
Sra. Aida María Quinatoa. Presidenta de la Coordinadora d’Ecuatorianos n’España. CONADEE
20:00 hores Performance colos xuguetes lletrónicos convertíos n’oxetos musicales del taller Soundtoys. LLABoral. Centru d’Arte y Creación Industrial
21:00 hores Conciertos: Finde Terrible (Hip- hop y Breakers)Solokolo y Fat Club
Básico
Eduakapenn1
Dj y Breakers
23:00 hores SHUGA WUGA Y LOREN

Domingu 3
17:00 hores Desfile de perros ensin llar. Proyecto Darko
18:00 hores Xuegos y deportes Tradicionales Asturianos. Tertulia Cultural El Garrapiellu
19:00 hores Exhibición de batuka. Ximnasiu Xtreem
19:30 hores Entrega de premios a les actividaes deportives
19:30 hores Proyección sobre Asturies
20:00 hores Mesa redonda “Música en Llingua de güei”
22:00 hores Conciertos de LA TARRANCHA Y SKAMA LA REDE

La ciudá d’Avilés ta acabante ver ñacer una asociación cultural que busca primordialmente afondar nel conocimientu de les civilizaciones orientales, especialmente les del ámbitu islámicu. El nome de l’asociación “L’Arabuya”, respuende al d’un topónimu avilesín “de clara resonancia árabe”.

Ente los sos oxetivos va tar dar a conocer la importancia d’estes cultures y la so rellación cola Península Ibérica “ensin inorancia nin prexuicios”.

L’Arabuya felicitó al Centru Niemeyer por acoyer na so programación a la cultura islámica cola recepción de Fátima Mernissi ya Imán Al-Hindawi, conocíes intelectuales del mundiu musulmán.

L’ayuntamientu de Samartín del Rei Aurelio, al tresviés de la so Oficina de Normalización Llingüística, pon en marcha una campaña de promoción y normalización social de la llingua asturiana ente la xente más pequeño, col enfotu de que les xeneraciones más nueves consigan mantener encesa la llingua asturiana.

La campaña, sacada en xunto con otros ayuntamientos y mancomunidaes que cuenten con Oficines de Normalización Llingüística, consta de los siguientes materiales: El llibru del naciatu, un volume a tou color con tapes dures onde dir anotando la información principal de los primeros meses de la vida de los recién nacíos y el kit Medrando n’asturianu, compuestu por una carpeta con información, una añada, una pegatina pal coche, un baberu y un crecederu. Estos materiales son de distribución gratuita. L’Ayuntamientu de Samartín del Rei Aurelio pon en marcha esta campaña con un claru enfotu de promoción y sensibilización llingüística al empar que promueve la recuperación y normalización del asturianu ente les xeneraciones más nueves pa que la llingua asturiana nun se pierda y asegure asina’l so futuru nel añu en que la Unesco dedica a les llingües maternes.

La Mancomunidá d’El Cabu Peñes, informó ayeri al traviés del so Serviciu de Normalización Llingüística, de dos nueves campañes en llingua asturiana, una al rodiu les sos fiestes y festivales y otra empobinada a los neños y neñes de 0 a 3 años. Les campañes tán coordinaes dende la REDE y sofitaes pola Conseyería de Cultura y Turismu del Principáu d’Asturies.

La primer campaña, “De mariaxe peles nuestres tierres” ye “un convite a les nuestres fiestes: momentos de charres y allegríes, de música y dances, de gocie de bones comíes y compañes; y too añerao pola meyor de les regaces: la mar”. Apúrrese tamién un vocabulariu de pexe y mariscu en tres llingües y una tabla marees pa los meses de branu y que col eslogan “Ensin pone-y portielles a la mar”, quier dar la bienvenida a tol que visita estes tierres.

Per otru llau, la campaña “Medrando n’asturianu” cuenta con un material bien prestoso que consiste nuna carpeta con testos de xuegos y que contién: un baberu, un mididor, una pegatina pal coche y una ficha con una añada y vocabulariu afayadizu. Y ye qu’asina como recueye la campaña na so carta presentación: “El mundu ye guapu porque ye diversu y reconocer esa diversidá y valorala fainos meyores persones”. Esti ye’l megollu d’esta campaña dirixida a lo más “piquiñino” de la casa.

El filósofu asturianu Carlos X. Blanco analiza na so obra cabera, les claves identitaries de la nuestra tierra. Casería y Socialismo: nación asturiana y marxismo nacionalista ye’l segundu ensayu de Carlos Xabel Blanco, profesor de filosofía asturianu afincáu en Ciudá Real, y el primeru qu’espubliza con Glayíu Editorial. La obra analiza en clave marxista la evolución socioeconómica d’Asturies a lo llargo de la so hestoria, “sacando como idees-fuerza la diferenciación del modelu económicu tradicional asturianu, afitáu na autosuficiencia y la llibertá de los individuos, frente al modelu espansivu-esclavista castellanu y mediterráneu”, comenten dende la editorial.

Blanco destaca tamién la casería tradicional como unidá económica básica de la nuestra tierra hasta va bien poco, y plantea la necesidá que tien Asturies de desendolcar la so propia democracia económica si nun quier sucumbir como pueblu dientro del actual modelu de globalización transnacional.

La obra cuenta con prólogu de José Carlos Loredo Narciandi, profesor asturianu d’Hestoria de la Psicoloxía na UNED, tituláu “¿Se puede ser de izquierdas y nacionalista?”. Con Casería y Socialismo: nación asturiana y marxismo nacionalista, Glayíu Editorial estrena la coleición Orbayu, na que verán la lluz obres que dende xéneros y enfoques estremaos tengan como exe principal Asturies y los asturianos.

Na tarde d’ayeri, la Pita foi otra vuelta al encuentru del presidente Areces. N’esta ocasión foi nel partíu inaugural del campeonatu européu de h.oquéi sobre patines que ta xugándose n’Uviéu. Nel momentu nel que’l presidente de la Federación Española de Patinaxe, Carmelo Paniagua, taba entamando’l so discursu, entamaron a oyise los glayíos reivindicativos de la pita y los sos acompañantes. L’alcalde d’Uviéu, Gabino de Lorenzo, llevantóse nel palcu dirixéndose a los manifestantes “queréis boicotear un actu de nivel internacional”.

El Presidente de la Federación Española de H.oquéi siguió’l so discursu inorando la situación y elevando’l tonu de voz pa compensar el ruxir xeneráu pola pita y los sos acompañantes.

La Xunta pola Defensa de la Llingua Asturiana amuésase contenta porque “se llograra facer bien visible la reivindicación llingüística nun eventu del máximu nivel deportivu”.

La organización espardió, amás, a los medios presentes un comunicáu esclariando qu’esta acción “nun persigue xenerar molesties a la organización del campeonatu, simplemente busca facer rescamplar la situación gravísima de marxinación y retrocesu que carez una llingua europea, acosada por un gobiernu qu’actúa conscientemente pa llograr la so desapaición”.

Andecha Astur informó de qu’estes pasaes selmanes la formación tuvo conocencia de delles denuncies ciudadanes por torgues que teníen a la hora d’anovar el DNI énte la negativa de los “funcionarios” de camudar los nomes de los pueblos polos toponimos asturianos tradicionales y oficiales aprebaos recien. La negativa yera acompañada de la petición de los documentos del padrón de los llugares onde viven ya incluso de los camudamientos nes partíes de nacencia afitando qu’ehí ye onde vien el nome del llugar onde residen.

Andecha Astur quier espresar qu’estos intentos “nun son más qu’un pasu más pa torgar el drechu de los asturianos a vivir n’ASTURIANU, intentos españolistes” qu’amuesen que nun ye posible vivir con normalidá nun país onde nun se reconocen los drechos humanos más básicos y onde nin siquiera se pueb poner en tolos documentos el nome “oficial” del llugar onde vives o ú nacisti.

Nun ye de recibu responsabilizar a la población de camudar esos nomes cuando deberíen ser les propies alministraciones les que los emplguen de forma correuta.

Andecha Astur, una vegada más dexa claro que la única midía efeutiva pa salir d’estos ataques al nuesu idioma ye la OFICIALIDÁ de la llingua d’Asturies comu reconocencia de los drechos llingüísticos del pueblu asturianu. Andecha Astur quier amosar el so apoyu a toles presones afectaes.

La campaña entamada pol Conceyu Abiertu pola Oficialidá (CAO)pa recoyer apoyos pa la oficialidá del asturianu en forma de semeyes algamó esta selmana les 4.000 semeyes unviaes al cumplise’l mes y mediu del so llanzamientu y continua col trabayu de recopilación na direición doilacaraarrobagmail.com.

El Conceyu Abiertu pola Oficialidá presentó’l 3 de xunu una campaña novedosa col oxetivu de llograr el reconocimientu de la oficialidá de la llingua asturiana na próxima reforma del Estatutu d’Autonomía. La campaña Yo doi la cara pola OFICIALIDÁ consiste na recoyida masiva y esposición de semeyes individuales de persones con un mesmu cartel que lleva’l testu que da nome a la campaña. Pa eso ta yá colgada na rede la páxina www.doilacara.net, onde se pue atopar la información sobre la campaña, enllaces pa descargar y imprimir la fueya del cartel, tanto n’asturianu como en gallego-asturianu, y un corréu electrónicu al que mandar les semeyes: doilacaraarrobagmail.com.

“Doi la cara pola oficialidá” Ye una campaña diseñada pa llevar a tola ciudadanía asturiana la iniciativa de la defensa del nuesu patrimoniu llingüísticu: una propuesta abierta a la participación de toos y toes que dexa que cualquier ciudadanu o ciudadana pueda ser protagonista activu de la reivindicación de los derechos llingüísticos n’Asturies. Y los asturianos tan dando la cara pola oficialidá y espardiendo la campaña ente les persones del so entornu, familiares, vecinos, compañeros de trabayu, asociaciones de tou tipu, etc.

Fotos de los 4000 asturianos que vienen dando la cara pola oficialidá

Nuna fecha tan difícil como la vacacional na que nos alcontramos, mediu millar d’asturianos representantes de la sociedá civil que dende distintes estayes vien promoviendo dende hai décades la normalización del asturianu abellugó a l’Academia de la Llingua nel actu celebráu na Sala de Cámara del Auditoriu Príncipe Felipe d’Uviéu, col que la institución quixo afitar que seguirá defendendo los derechos de los asturfalantes más allá d’un estatutu “muertu enantes de nacer”.

L’actu entamó con un discursu de la Presidenta de l’Academia de la Llingua, Ana Cano, que se refirió en primer llugar al testu que pautaron la FSA-PSOE y el Partíu Popular (PP) n’Asturies p’asitiar la llingua asturiana dientro del marcu llegal que fixa l’Estatutu d’Autonomía d’Asturies y que calificó de “una burlla non solo a la llingua sinón tamién a la dignidá del pueblu asturianu”.

Ana Cano desplicó darréu que “ye una burlla porque nel Estatutu nun se respuende a la entruga de qué ye l’asturianu, que ye peronde deberíen emprimar porque, esclariáu esi puntu, lo demás, acordies colo afitao na Constitución, vendría de so. ¿Qué ye l’asturianu pa los redactores del citáu artículu? ¿Un idioma, un dialeutu, un conxuntu de fales? ¿Sábenlo realmente? Cuido que non. Pues, señores políticos, col mayor de los respetos y la mayor de les firmeces, l’asturianu ye una llingua, la llingua secular d’Asturies. Y eso dizlo la Llei d’usu y promoción del asturianu del añu 98 (artículu 1) y el propiu Gobiernu del Principáu que, ente otres coses, nel so día inxertó l’asignatura de «Llingua Asturiana y lliteratura» nos currícula d’Educación Primaria, Secundaria y Bachilleratu; y dizlo la Xunta Xeneral, muérganu cimeru d’autogobiernu d’Asturies (remito al so Diariu de Sesiones); y dizlo la Universidá que, amás de lo conseñao nel artículu 6.2 de los sos Estatutos, ufre, tanto nes titulaciones oficiales como nes propies, asignatures con esta denomación; y dizlo la comunidá científica internacional; y dicímoslos munchos investigadores y enseñantes, universitarios o non; y sobre too dicímoslo y querémoslo asina los asturianos, los que la falaron y la caltuvieron nesti territoriu dende va más de mil años, y los que tamos enfotaos en que siga siendo asina a lo menos otros mil años más”.

Esmolecida pola nueva redaición del artículu cuartu Ana Cano entrugóse tamién si “¿acasu ye democrático “blindar” el desendolque llegal d’una disposición, nel sen que s’afita nel puntu 3 esixendo na votación final los dos tercios pa regular lo qu’apellen “la proteición, usu y promoción”? Nun escaezamos que na práutica, nel nuesu casu, ello supondría algamar l’alcuerdu de los dos partíos mayoritarios. O dichu d’otru mou, sin el votu conxuntu y pautáu del PP o del PSOE nun habría nada que facer”.

La presidenta de l’Academia tamién se entrugó si nun valió, entós, pa nada’l desendolque de la lliteratura asturiana con unos escritores traducíos a otros llingües, conocíos y valoraos en tol Estáu o cómo ye qu’hai una música n’asturianu que conocen y consumen miles d’asturianos, mozos, sobre too, que “supón non sólo una ferramienta de normalización social de la llingua sinón tamién un gabitu importante nada despreciatible pa la llastimosa situación económica de la comunidá”.

Tres de recordar “que más del 60% de la población ye favoratible a la oficialidá como afiten una y otra vuelta los estudios sociollingüísticos serios, los fechos polos especialistes reconocíos nel Estáu”, Ana Cano fizo un repasu a dellos otros argumentos bien conocíos y “a pesar de la gravedá de la situación hai que facer, facemos, un llamáu a la esperanza porque hai munchu camín andáu, muncha secha abierta, demasiáu pruyimientu y enfotu consumíos; y porque nun-yos va a resultar nada fácil desfacer el trabayu de tantos años, de tantos y tantes asturianos y asturianes. Podrán sacar alantre esi artículu 4u, cola redaición que-y dieron, pero lo qu’enxamás llograrán sedrá valtar los sentimientos del pueblu asturianu y esti pueblu ye llibre y ta arguyosu de la so llingua y cultura y quier siguir viviendo llibremente n’asturianu”.

Tres de les pallabres d’Ana Cano falaron una bona riestra de representantes de la sociedá civil asturiana qu’emplega cotidianamente la llingua y vive n’asturianu: el xeógrafu Xosé Nel Riesgo foi l’encargáu de pesllar un garapiellu d’intervenciones ente les que se contaron la del humorista y dibuxante gráficu Neto, el cantante Chus Pedro, l’inxenieru informáticu y profesor universitariu Xabiel Pañeda, el direutor de Radio Sele Juanjo Mariño, la profesora d’Asturianu Iris Díaz, la presidenta de la Xunta de personal docente Beatriz Quirós, l’escritor Pablo Rodríguez Medina, el representante del CAO Daniel Gutiérrez y el representante de la Xunta pola Defensa de la Llingua Carlos Iglesias.