Sociedá

L’Academia de la Llingua Asturiana va celebrar güei martes la inauguración del I Conceyu Internacional de la Llingua Asturiana, sotitulada “Más de mil años d’historia d’una llingua nel país de los ástures”. L’actu va celebrase a les 12 hores nel Salón d’Actos de la Facultá de Filoloxía, n’El Milán. Nel actu inaugural intervendrán el Rector Vicente Gotor; la Direutora Xeneral de Promoción Cultural y Política Llingüística, Consuelo Vega; el Conceyal de Cultura d’Uviéu, Xosé Suárez Arias-Cachero y la Presidenta de l’ALLA, Ana Cano.

Esti Conceyu, que tendrá llugar na Facultá de Filoloxía de la Universidá d’Uviéu los díes 4, 5 y 6 de payares de 2008, inxértase dientro de les Xornaes Internacionales d’Estudiu que tolos años entama l’Academia de la Llingua Asturiana. Nél participarán un bon númberu de profesores ya investigadores de distintes universidaes españoles y europees que fadrán les sos aportaciones en dos grandes estayes: la histórica y la llingüística.

La conferencia inaugural tará al cargu del Dr. Francisco Javier Fernández Conde, que falará de «Particularidá histórica del País Ástur».

El programa ye’l que va darréu:

Martes 4

12:00 Entamu Inaugural

Conferencia. Francisco Javier Fernández Conde (Universidá d’Uvieu, ALLA).

Particularidá histórica del País Ástur.

Descansu

16:00 Ponencia. Michael Metzeltin (Universidá de Viena, ALLA)

El latinorromance asturiano del siglo XIII.

16:45 Comunicación. Mª Cristina Egido Fernández (Universidá de Lleón)

Variantes diatópicas en documentos leoneses.

17:00 Comunicación. Mª Nieves Sánchez Glez. de Herrero (Universidá de Salamanca)

Manuscritos medievales asturiano-leoneses no literarios.

17:15 Comunicación. Hector García Xil (Universidá de Lleón)

Notes sobre’l romance medieval na ciudá de Lleón nel primer terciu del sieglu XIV (1301-1330).

17:30 Alderique

17:45 Descansu

18:00 Ponencia. Margarita Fernández Mier (Universidá de Lleón)

L’arte de la Monarquía Asturiana: una llectura socioecómica.

18:45 Comunicación. Pablo Suárez García

A la gueta’l coritu: d’El Picu Curitu trubiecu a la Eneida de Virxilio.

19:00. Comunicación. Xurde Blanco Puente. (ALLA)

L’analís del drechu políticu nel Fueru Xulgu y la so aplicación na Asturies medieval.

19:15 Alderique

19:30 Presentación de llibros

Fueru de Lleón y Conceyu de Coyanza (Edición facsimilar de dos testos del sieglu XIII na nuesa llingua), X. Ll. García Arias / Javier Fdez. Conde (Univ. d’Uvieu, ALLA).

Documentos orixinales del dominiu llingüísticu ástur. I (1244-1299), J. Menendez Gómez (Univ. de Caen)

Estudios de diacronía asturiana, Ana María Cano González (Univ. d’Uvieu, ALLA).

20:00 Ponencia. Nicolás Bartolome Perez

El Derechu del Reinu de Lleón nel sieglu XIII: fontes, lliteratura xurídica y llingua.

Miercoles 5

16:00 Ponencia. Max Pfister (Universidá de Saarlandes)

La importancia del asturiano para el Lessico Etimologico Italiano (LEI)

16:45 Comunicación. Clara E. Prieto Entrialgo (Universidá d’Uvieu)

“Vierbo por vierbo”: les inserciones documentales y los sos problemes filolóxicos (un exemplu asturianu de 1295)

17:00 Comunicación. Vicente Jose Marcet Rodríguez (Universidá de Jaen)

La configuración de los usos gráficos romances en las escribanías leonesas durante la Edad Media

17:15 Comunicación. Francesc González i Planas (Universidá de Girona)

Aspeutos de la sintaxis de la documentación medieval lleonesa.

17:30 Alderique

17:45 Descansu

18:00 Ponencia. Isabel Torrente (Universidá d’Uvieu, ALLA)

Más entrugues sobre Uvieu na temprana dómina medieval.

18:45 Comunicación. David García López.

Estado lingüístico de Senabria y La Carbayeda a comienzos del siglo XXI.

19:00. Comunicación. Paul O’Neill (Universidá d’Oxford)

El preteritu y tiempos averaos nel dominiu llingüísticu ástur: Formes comunes pero una evolución dixebrada.

19:15 Alderique

19:30 Presentación llibros

Testos asturianos de lo cabero del sieglu XIV), Mª Josefa Sanz (Univ. d’Uvieu)

Documentos orixinales nel Monesteriu de San Vicente (1239-1250), Andrea Miranda Duque / Celia Álvarez Arias.

Propuestes etimolóxiques (3), Xose Lluis García Arias (Univ. d’Uvieu, ALLA)

20:00 Ponencia. Margarita Torres Sevilla (Universidá de Lleón)

Monarquía y nobleza: las transformaciones en el territorio leones de los siglos X y XI.

Xueves 6

16:00 Ponencia. Jose Ramón Fernández González (Universidá d’Uvieu)

La formación de palabras compuestas en asturiano. Estudio morfosintáctico y semántico.

16:45 Ponencia. Jose Ramón Morala (Universidá de Lleón)

El proceso de castellanización al sur de la cordillera

17:30 Descansu

17:45 Ponencia. Jeannick Le Men(Universidá de Lleón)

Sobre algunas áreas lexicas

18:30 Ponencia Ana María Cano González (Universidá d’Uvieu, ALLA)

La llingua asturiana na documentación de los primeros años del sieglu XIV.

PIESLLE DEL CONCEYU

20:00 Alderique. «La llingua nes tierres ástures: Propuestes de collaboración llingüística y cultural».

Nel Club de Prensa de La Nueva España

Emilio Gancedo (Lleón)

Alfredo Hernández (Zamora)

Antonio Bárbolo (Miranda do Douro)

Xose Antón González Riaño (Asturies)

Empobina: Javier Rodríguez Muñoz.

L’Academia de la Llingua Asturiana inaugura mañana martes el I Conceyu Internacional de la Llingua Asturiana “Más de mil años d’historia d’una llingua nel país de los ástures”.

Les xornaes van tener llugar na Facultá de Filoloxía de la Universidá d’Uviéu dede’l martes al xueves próximu.

Nél participarán un bon númberu de profesores ya investigadores de distintes universidaes españoles y europees que fadrán les sos aportaciones en dos grandes estayes: la histórica y la llingüística.

Amás, van presentase delles obres de recuperación como “El Fueru de Lleón y el Conceyu de Coyanza”.

L’español ye anguaño la tercer llingua más falada del mundu, tres del chinu y l’inglés, según un estudiu de la Fundación Telefónica fechu pa cuantificar l’impautu del idioma español nes economíes de los países de fala hispana y la repercusión mundial de la llingua.

La conclusión pertenez a los datos de dos documentos, “Economía del español” y “Atlas de la Llingua española”, que se presentaron nel V seminariu sobre “El Valor Económicu del Español: una Empresa Multinacional”, que se desenrrolla en Méxicu.

El primer llibru afita’l valir económicu de la llingua no que cinca a les esportaciones españoles col conxuntu de los hispanofalantes y l’atles presenta les últimes estimaciones sobre’l númberu de falantes nativos d’español, qu’alluga na cifra de 399 millones. Esta cifra asciende a 438 millones si se-y sumen los estranxeros residentes, falantes d’español como segunda llingua. y los aprendices d’español como llingua estranxera.

Efectivo de la Guarda Civil multaron va dellos díes a dos asturianos por “asturianizar” la matrícula del coche. Esta ye la primer vegada que llega a los medios de comunicación la noticia de que camudar l’E pol AS na matrícula, trai consecuencies económiques.

90 euros por tapecer les sigles españoles y poner les asturianes enriba. Les multes punxéronse nos conceyos de Xixón y Carreño.

La organización SOFITU anunció que va facese cargu “de los gastos”, y amás fai un llamáu a “nun aceutar qu’impongan unes sigles y una nacionalidá que nun mos representen”.

La Casa Conceyu de Xixón acoyó ayeri la presentación de la Ier Escuela de Formación de Monitores de Deportes y Xuegos Tradicionales. Un cursu entamáu por El Garrapiellu y el Conceyu de Xixón que va entamar el llunes 3 de payares y que va tener llugar nel Pueblu d’Asturies de Xixón. El responsable del cursu, Carlos Suari, y la encargada de la estaya de deportes tradicionales d’El Garrapiellu, comentaron ayeri diferentes aspectos del mesmu. Asturnews ufre los vidios de les intervenciones.

Intervención de Carlos Suari:

Intervención de Sabel Tuñón:

El Garrapiellu tien abiertu’l plazu pal cursu de xuegos y deportes tradicionales

El Conseyu de Gobiernu aprobó esti martes 28 d’ochobre’l decretu colos topónimos oficiales del conceyu de Miranda. Miranda conviértese nel conceyu númberu 33que recupera la so toponimia tradicional.

La Mocedá asturiana ye la más adelantada y activa sexualmente d’España y la más precavida nes sos rellaciones primeres nes que predomina la “monogamia sucesiva”, según l’informe “Mocedá n’Asturies 2008”, presentáu esti día nuna rueda de prensa pola Conseyera de Cultura y Turismu, Encarna Rodríguez Cañas y el director del Institutu Asturianu de la Mocedá, Guillermo Martínez.

Los mozos asturianos tienen amás sueldos mayores que la media del Estáu, pero Asturies presenta la mayor diferencia de sueldos ente varones y muyeres con un 31%, escontra’l 23% estatal.

El rector de la Universidá d’Uviéu, Vicente Gotor, afitó ayeri el so compromisu y el de la institución pa cola llingua y la cultura asturianes, nel actu de presentación nel Aula Magna del Atlas sonoru de la Llingua Asturiana, pero fízolo dafechu en castellán. Asturnews ufre nes páxines que vienen darréu la totalidá de les intervenciones nel actu, al travies de la so canal de You Tube.

El rector dixo que la Univerisdá “tiene que ser muy sensible con la llingua” y nun pudo escaecer “los meses críticos que van a venir con la nueva estructura de los grados”, cola decisión que tien de motar la Xunta de Facultá de Filoloxía alrodiu de la presencia del asturianu nel mapa titulaciones.

Vicente Gotor facía compaña al profesor ayudante de la Universidá Fernando Álvarez-Balbuena, qu’amosó na so intervención la importancia del proyectu, y a Jesús Suárez López, investigador del Muséu del Pueblu d’Asturies y director de la obra, que tamién faló en castellán.

L’Atlas Sonoru de la Llingua Asturiana tien como oxetu enllenar esta carencia y amosar la diversidá llingüística d’Asturies “de viva voz”, pente medies de l’audición de testimonios orales: mitos y lleendes, cuentos populares, romances, cantares, rellatos yvivencies de la vida cotidiana, narraos por falantes naturales de cada zona.

Esta obra concíbese como un proyectu interdisciplinar y abiertu a la edición de grabaciones de campu feches por investigadores de diversos ámbitos académicos — historia, filoloxía, musicoloxía, socioloxía, etnoloxía, antropoloxía—, y tamién por profesores y alumnos de llingua asturiana, en particular, y toa mena de persones interesaes nel folclor, la lliteratura oral y la cultura tradicional d’Asturies.

Ente los años 2003 y 2008, el Muséu del Pueblu d’Asturies (Rede de Museos Etnográficos d’Asturies) tien editao cuatro CDs qu’abarquen una ventena de conceyos asturianos, cubriendo, en xunto, un terciu de la rexón. La edición d’esta serie de documentos sonoros espurriráse a entregues sucesives hasta algamar les cuatro grandes árees llingüístiques d’Asturies (oriental, central, occidental y gallego-asturianu), nun total de 12 volúmenes.

Presentada la Ordenanza d’Usu del Asturianu de Xixón, Unidá Nacionalista Asturiana presentó una alegación na que se solicitaba “la incorporación de compromisos económicos a la ordenanza”, según esplicó’l conceyal xixonés Santiago Martínez Argüelles. Presentóse amás otra alegación, que según informó’l conceyal, “nun se debatió por tar fuera de plazu”.

La propuesta de la UNA foi debatida y a la fin refugada porque, y según pallabres del conceyal, porque “ye al traviés de los presupuestos municipales y de la rellación de puestos de trabayu colo que s’otorguen medios económicos y humanos”. Eso, dixo Argüelles, “nun ye oxetu d’una ordenanza municipal”.

A la fin y dempués de dellos meses d’espera, nos que se llegó a anunciar en La Gazeta de Xixón que la ordenanza taba yá aprobada, esti reglamentu municipal y el so plan de normalización y usu llingüísticu van ser aprobaos, según fontes municipales, “nel plenu del mes de payares”.

Cola normativa nueva y según los sos impulsores nel ayuntamientu “van evistase problemes que surdíen por mor de que nun taba recoyíu’l drechu de dirixise al Ayuntamientu n’asturianu”.

El Plan de Tresporte Públicu a Los Llagos de Cuadonga foi usáu, no que va d’añu, por 121.001 usuarios, según informó’l Conseyeru d’Infraestructures, Política Territorial y Vivienda, Francisco González Buendía, qu’acompañáu pol Director Xeneral del Consorciu de Tresportes d’Asturies (CTA), Carlos González Lozano, y pol Director Xeneral de Tresportes y Asuntos Marítimos, Julián Bonet, fixo balance de les cifres d’esti serviciu nel periodu de regulación estival y l’acumuláu d’usuarios del añu respecto al 2007.

Buendía destacó que na temporada de branu de 2008 contabilizáronse un 13,66 por cientu más d’usuarios que l’añu anterior. Asina, el númberu de viaxeros qu’usaron el serviciu ente’l 1 d’agostu y el 8 de setiembre foi de 98.043 persones, frente a les 86.261 del añu 2007.

Esti añu, el númberu de pasaxeros mayor rexistróse’l día 20 d’agostu, cuando se desplazaron en tresporte públicu al Parque Nacional un total de 5.480 visitantes. Esta cifra ye la más alta dende que se punxera en funcionamientu’l Plan de Tresporte a Los Llagos va cuatro años y bastante superior a la de mayor afluyencia del 2007, que tuvo batura el día 9 d’agostu con 5.034 viaxeros.