Sociedá

El ministru de Trabayu y Inmigración, Celestino Corbacho, entregó güei martes la Medalla d’Oru al Méritu nel Trabayu a José Ángel Fernández Villa,secretariu xeneral del SOMA-FIA-UXT, na sede del ministeriu, según informó a Delegación del Gobiernu n’Asturies al traviés d’una nota prensa.

Na nota de prensa de la Delegación del Gobiernu recuéyense les pallabres de Corbacho considerando que José Ángel Fernández Villa “representa’l movimientu obreru, la llucha pola democracia, pola llibertá y la meyora de les condiciones de los trabayadores. Güei esa medalla ye a esi reconocimientu colectivu al traviés d’esa persona”.

L’ex vicepresidente del Gobiernu, Alfonso Guerra, tamién presente nel actu, destacó’l merecimientu d’esta medalla per parte de Villa, y consideró que cualquier cosa que se diga d’esta persona “queda pequeña” porque “ser consecuente cola vida política y la vida sindical ye un llabor mui difícil que güei nun hai munchos que lo faigan”.

José Ángel Fernández Villa nació en Tuilla (Llangréu), nel corazón de les cuenques mineres asturianes. Entamó la so actividá llaboral a temprana edá y en 1970 ingresó nel PSOE y na UXT. Participó na constitución de la primer representación democrática de los trabayadores, la comisión de los 16, lo que supunxo la so elección como Delegáu de los Trabayadores del Pozu Candín (Hunosa) nes primeres elecciones sindicales de la democracia y la so trayectoria foi decisiva nel procesu de reconstrucción de les organizaciones democrátiques socialistes n’Asturies.

Anguaño ye diputáu na Xunta Xeneral del Principáu.

A Trabanco abulta-y que puea superar el millón de kilos de mazana asturiano na so collecha d’esti añu, de los que’l sesenta por cientu, cásique dos de cada tres mazanes, van recoyese nes sos pumaraes.

El llagar, con sede de Llavandera (Xixón), prevé collechar nes sos propies plantaciones sobre 600.000 kilos de mazana de sidra de delles variades y según asoleyó nuna nota prensa, esto supón un incrementu del 50 por cientu frente a la collecha del 2008, añu en que Trabanco recoyó 400.000 kilos de mazana nes sos propies plantaciones.

En total, Trabanco espera algamar el milllón de kilos gracies a los contratos comerciales que caltién con distintos collecheros de mazana de sidra de toa Asturies. D’esta manera, Trabanco aumentará un 25 por cientu la collecha de mazana asturiana frente a les cifres algames nel 2008.

La conceyalía de Cultura de Ribeseya ta acabante convocar el II certmae ‘Caleyando per Asturies’, concursu que ve entamar en payares y que tien como ún de los sos oxetivos principales el potenciar la llingua y la cultura asturianes nel conceyu.

El certame tien formatu de lliga y nel mesmu ha respondese a entrugues culturales feches n’asturianu, anque con posibilidá de traducción al castellán, pudiendo retrucase n’asturianu o en castellán.

Los responsables de l’actividá van facer preguntes a los equipos sobre historia, xeografía, lliteratura, llingua, gastronomía, el conceyu Ribeseya o actualidá del país, ente otros, que van tener que responder correctamente pa poder sumar puntos que-yos permita llegar a la final, na que van participar los dos primeros clasificaos. El plazu pa inscribise nél yá ta abiertu y va finalizar el 31 d’ochobre, pudiendo facelo na Casa la Cultura o na Casa Conceyu.

La Fonte’l Cai foi l’equipu ganador del añu pasáu.

L’escritor y presentador de televisión Sánchez Drago visita Asturies estos díes pola mor de la so participación nel xuráu del Premiu Príncipe d’Asturies de les lletres, y aprovechó la visita pa echar contra l’asturianu nuna alcuentru dixital colos llectores de La Nueva España.

Énte la pregunta d’un llector sobre la necesidá o non d’oficializar l’asturianu, l’escritor contestó rotundu: “Non, Los idiomes ñacen d’abaxo a arriba, non d’arriba p’abaxo. Y l’asturianu, por más que s’empeñen los d’arriba ye namás un dialectu”.

Según l’autor “Esta afirmación va traeme dolores de tiesta. Siénto”. Y xustificó “Estudié filoloxía”.

L’autor recordó que nos sos estudios deprendió que “N’España hai namás cuatro llingües: castellán, catalán, gallegu y vascuenciu”.

Dragó echó tamién escontra los premios institucionales, magar de que participa nel xuráu de los Premios Príncipe, y encamentó a estos gallardones “permanecer xordos al clamor mediáticu y nun premiar por sistema a quien anden encaramaos na cresta de la fola d’esi clamor”.

L’autor reafirmóse amás nes declaraciones que ficiera va tiempu nes qu’afirmare “nun toi abondo enfiláu como pa cantar l’asturies, patria querida”, comentando que dientro de lo que de noma “borrachera ibérica”, hai delles fases “consistiendo la última en cantar “Asturias patria querida”, lo que según l’autor “ye un homenaxe ensin voluntá d’ofiensa”.

Boligrafos, camisetes, taces y otros productos col lema “Universidá d’Uviéu” apaecíen va dellos meses pa la venta na so tienda universitaria y agora, y nun tiempu bien curtiu, tán escosaos dafechu na tienda de la Universidá. Una amuesa del ésitu d’esta iniciativa normalizadora dientro de la institución educativa, entamada pol equipu de gobiernu del Rector Vicente Gotor.

Según pudo saber la redacción d’Asturnews, nes próximes selmanes la Universidá d’Uviéu va recibir nueves tiraes d’estos productos rotulaos n’asturianu, que nel futuru van siguir medrando en variedá.

El llocal Cambalache d’Uviéu celebra estos díes delles actividaes. Güei miércoles, a les 19:30 hores, van presentar un periódicu feminista, proyectu d’un grupu de muyeres asturianes.

Amás, el vienres 25, a les ocho la tarde va celebrase una charra-alderique “15 años glayando”, coincidiendo col 15 aniversariu de l’Asociación El Glayu.

L’Agrupación llangreana del Partíu Asturianista celebra que la empresa Mercadona use la toponimia tradicional na propaganda del so centru comercial, que va abrise a nun tardar en Ciañu. Los asturianistes amuesen la so “simpatía y felicitación” a Mercadona pola utilización del topónimu Ciañu, “qu’amás ye l’oficial”, recuerden. Mercadona asesoróse nesti tema, según comenten dende la formación, nesta agrupación asturianista.

Amás, l’agrupación presidida por Xosé Avelino Devesa agradez tamién a la empresa distribuidora “la inversión y creación d’empléu nel conceyu”.

La Estaya de la Llingua del Conceyu d’Avilés abre esti llunes el plazu pa matriculase nel Cursu d’Aniciu de Llingua Asturiana p’adultos. El cursu va durar 30 hores, celebrándose ente’l 29 de setiembre y el 17 de payares, n’horariu de 19:00 a 21:00 hores, martes y xueves.

Los interesaos n’apuntase o recibir más información pueden facelo nel teléfonu 663 820 132, n’horariu de 8:00 a 15:00, pel corréu ellectrónicu estayallingua@ayto-aviles.es o nel primer pisu de la Casa Municipal de Cultura d’Avilés.

Los llocales de la CSI na Casa Sindical de Xixón acoyeron la presentación de la campaña “SOS Asturies”, na que participen una veintena de organizaciones polítiques sindicales y sociales col envís d’entamar “un procesu d’alderique conxuntu” al rodiu la necesidá de xenerar un espaciu de xunidá d’aición “plantegando únicamente’l lema SOS ASTURIES como puntu d’aniciu”. La campaña quier facer rescamplar “les persones y partíos políticos responsables de la situación llaceriosa na que s’afaya Asturies (FSA-PSOE, IU-LV-BA y PP)”.

`

Les organizaciones que roblen esta declaración convoquen a la sociedá asturiana a manifestase esti 8 de setiembre con un baberu principal compartíu baxo’l llema SOS ASTURIES y convocatoria individual de cada organización magar les 13 hores na Estación del Norte d’Uviéu.

Esi mesmu día va presentase la campaña formalmente cola presencia d’organizaciones miembru como Andecha Astur, PCPE-Asturies, Corriente Sindical d’Izquierda (CSI), Coleutivu de Mocedaes Comunistes (CMC), Darréu, Cordinadora Antifacista d’Asturies, Partíu Carlista d’Asturies, amás d’asociaciones xuveniles y culturales como N’AST, El Roblón, Bilortu, Atenéu Cultural Xuan María Acebal, Riscar Roxu, Ensame Sidreru, Remanecer, L’Ayalga, o la Fundación Asturies XXI y la Fundación Obrera d’investigación y Cultura, ente otres.

Manifiestu fundacional SOS ASTURIES

El chigre de la Xunta pola Defensa de la Llingua Asturiana n’Uviéu, “La Casa Posafuelles”, va facer una espicha popular pa celebrar esta nueche, na víespora, el Día d’Asturies. Como tolos años nel chigre va sirvise una espicha con tortiella, güevos cocíos, embutíu y quesu del país, dalgunes llabionaes y sidra. La música va ponela Cantaruxare. La folixa entama a les nueve y media la nueche na Cuesta la Vega 10.