Sociedá

La Tertulia Pachín de Melás, organizada pol grupu d’Unidá Nacionalista Asturiana nel conceyu de Xixón, va celebrar una mesa redonda al rodiu del mundu sindical. La tertulia, que se presenta sol títulu “El sindicalismu del sieglu XXI” va cuntar cola presencia de Juan Manuel Martínez Morala, militante hestóricu del sindicatu CSI; José Luis Llera, secretariu xeneral del sindicatu USO en Xixón y Beatriz Quirós, vocera del sindicatu SUATEA.

Como yá ye habitual la tertulia va tener llugar na Cervecería Astuera (asitiada tres del mercáu San Agustín de Xixón) a les 20.30 hores del xueves 5 de payares.

La Tertulia Pachín de Melás quier dar con esta nueva convocatoria un pasu más “pa convertise nun referente nel tratamientu de los temes sociales y culturales qu’afecten a Asturies y nun alcuentren foros afayadizos de discusión pelos calces habituales”. Asina, la pasada tertulia, na que participaron representantes d’Atlántica XXII y Diagonal, cuntó, según declaren los organizadores “con una granible presencia de públicu”.

Dende los años 90 la empresa HC Energía quier construyir un parque eólicu na sierra de Carondio n’Allande. Un colectivu trabayar agora pa paralizar el parque y los trazaos de llinies d’alta tensión, recordando que “según el decretu 42/2008 pol que s’aprueban las Directrices Sectoriales d’Ordenación del Territoriu pal aproveitamientu eólicu, trátase d’una “zona d’exclusión” na que ta prohibío construir instalaciones d’esti tipu”.

El colectivu entamar una recoyida de firmes col evnís de “demostrar la oposición de la sociedá hacia’l parque eólicu de Carondio” pola mor de “La riqueza ecolóxica, arqueolóxica ya patrimonial en xeneral de la redolada de Carondio”. Pa protexer la zona piden tamién la declaración definitiva del “Paisaxe Protexíu de las Sierras de Carondio ya El Valledor” ye el pautu ente la población y l’alministración d’un modelu sostenible que beneficie la conservación del padremuñu ecolóxicu y cultural al mesmu tiempu que promueva’l crecimientu y modernización de les actividaes agropecuaries.

Fueya de firmes

La Fundación Caveda y Nava anunció güei’l nomamientu de Vicente Gotor, rector de la Universidá d’Uviéu, como patronu d’honor de la organización. L’actu va oficializase’l 28 de payares, nuna ceremonia que se va facer, como ye vezu, en Villaviciosa. La Fundación quier reconocer asina’l compromisu de Gotor cola llingua y l’actitú que vien mostrando hacia l’idioma del país dende que se convirtió na máxima autoridá de la institución académica.

Los actos del 28 de payares van empezar a les doce del mediudía con una ufierta floral na casa natal de Caveda y Nava, en Villaviciosa. Media hora depués, la Casa la Oliva –sé de la Fundación Cardín– va acoyer el actu d’acoyida al rector. Nesi mesmu marcu va proyectase un videu ellaboráu pola propia Fundación onde se recueye la propuesta que fai’l colectivu pa desbloquiar la situación del idioma asturianu, incluyendo lo que podía ser un modelu pa la redacción del artículu IV del Estatutu d’Autonomía. El discursu del presidente de la Fundación Caveda y Nava, Inaciu Iglesias, y de José Suárez Arias-Cachero –conceyal de Cultura d’Uviéu–, que va ser l’encargáu de facer la presentación de Gotor, van preceder al ingresu definitivu del rector na nómina de patronos d’honor del colectivu.

Nestos últimos años, la llista de patronos d’honor de la Fundación Caveda y Nava vieno sumando nomes como los de Pilar Fernández Pardo, Hugo Morán, Enrique Castro Quini, Carmen Ruiz-Tilve, Gabino Díaz Merchán o Isidro Martínez Oblanca. A los actos del 28 de payares, que van concluír con una espicha de celebración, van poder asistir toles persones que quieran.

Yolanda González, vocera d’Unidá Nacionalista en Xixón, llamenta que la nueva campaña de promoción de la ciudá nun tenga nengún elementu del calter asturianu de la mesma.

Unidá Nacionalista Asturiana, critica la nula presencia de la llingua asturiana na nueva imaxen promocional de Xixón, lo qu’otra vuelta, y nun va ser la última, espeya que “l’apueste que l’equipu de Gobiernu diz facer en rellación a la promoción de la llingua asturiana, ye claramente insuficiente y puramente testimonial”.

Tamién sorraya “l’ausencia total de de les señes d’identidá de la propia ciudá y d’Asturies, señes de les que tendríemos de tar arguyosos, pero que dalgunos prefieren escaecer conscientemente faciendo qu’esta campaña, que se llama paradóxicamente “Amor propiu” pueda perfectamente tar referida a esta ciudá o a otra cualesquier”. Gónzalez sorraya’l marcáu interés del equipu de Gobiernu por facer de Xixón una ciudá “neutra” modelada namás “pola imaxen que se tien de nosotros que polo que somos en realidá”. Asina, nun-y estraña “pa nada” que se den paradoxes como la sustitución de “dir a tomar unes botellines o unos culinos” por “ir de sidras” o “l’apropiación de nomes horteres como playa de Poniente en cuenta de playa del Natahoyo o Centro Integrado Gijón-Sur en llugar de Centru Municipal de Pumarín”. “Tal paez” afirma “que los gobernantes de la ciudá tuvieren avergoñaos de la ciudadanía de Xixón y les sos señes d’identidá”.

Yolanda González exemplificó les sos pallabres pente medies de la web de la campaña (www.amorpropio.info). Pues, “como yera d’esperar” afirmó “nun ha versión n’asturianu de la web, nin del logo de “Xixón”, nin mención dala al Muséu del Pueblu d’Asturies, llugar onde la cultura asturiana ye la protagonista. Nun dexa de ser irónico que precisamente una campaña titulada “Amor Propio” lleve implícito precisamente tolo contrario, no que ye una nueva y escandalosa amuesa del provincianismu inorante y retrógradu d’un Ayuntamientu que prefier esconder los sos rasgos más asturianos, perdiendo d’esti mou tolos criterios diferenciadores que precisamente tendríen de potenciase. Y ye que lo qu’a otros-yos prestaría tener pa diferenciar a les sos ciudaes y meyorar el so atractivu, equí despréciase”, acabó.

El martes 4 de payares l’Academia va inaugurar na Facultá de Filoloxía d’Uviéu la edición XVIII de les sos Xornaes Internacionales d’Estudiu. Les xornaes, de llibre asistencia, y con certificáu d’asistencia pa los que s’apunten, van entamar esi mesmu día, a les 16:45 cola ponencia de Fernando Sánchez Miret “La hipótesis de la diptongación asturiana ante yod y wau a la luz de la Romanística” pa sentir darréu a Clara E. Prieto Entrialgo col so estudiu “Reflexones sobre la marcación preposicional del OD n’asturianu. Dellos datos medievales”.

A les 17:45, Xabiel Fernández García y Fernando Quintas González van falar, na so comunicación, de “Toponimia y territoriu. Antrotoponimia y haxotoponimia como fontes d’estudiu de la estructura feudal del espaciu nel noroeste peninsular”, darréu va celebrase un alderique y va dase descansu a los asistentes.

A les 18:30 l’escritor, cantautor y académicu Carlos Rubiera Tuya va lleer la so ponencia “Asturianu y castellanu nun inventariu de bienes d’una casa d’aldea del añu 1906”, siguiéndo-y Rubén Fernández Martínez con “L’aire n’Asturies: un averamientu a la cultura del aire al traviés del léxicu”.

La filóloga inglesa y escritor Laura Marcos Domínguez va abrir a les siete l’alderique cola so comunicación “Cómo facer té n’asturianu: dificultaes léxiques, morfosintáctiques y culturales na traducción inglés-asturianu”.

A les 19:30 Xosé Martínez González y Xuan Xosé Llastra Menéndez van comenta dellos aspectos de los “Nomes asturianos de dalgunes plantes de güerta”, pesllando la xornada l’ex presidente de l’ALLA, Xosé Lluis García Arias, cola comunicación “Continuadores del llat. -ULUS” y un alderique alredor del tema.

La xornada del miércoles va abrila a les cuatro y media, el profesorVicente J. Marcet Rodríguez de la Universidá de Jaén, con “La representación de las sibilantes en la documentación notarial leonesa en el paso del latín al romance”, siguiendo darréu Miguel Ramos Corrada con “La poesía asturiana a xuiciu del modernismu” y Xuan Santori Vázquez-Azpiri con “La lliteratura de les escritores asturianes. Perspectives d’un trabayu d’investigación sociollingüística”, a la que va siguir un alderique.

Dempués del descansu de les seis, Vicente García Oliva va lleer dellos “Apuntes pa una Historia de la Lliteratura Infantil y Xuvenil n’asturianu”. A les 18:30 Paula Pulgar Alves y José Antonio Calzón García van falar de los “Patrones temático-formales na narrativa curtia de Xosé Álvarez ‘Pin’”.

“La cama de Vanessa Gutiérrez: la escritura como revelación”, hiel tema escoyíu por Marta Mori d’Arriba pa la so comunicación, pesllando’l día Aurelio González Ovies con “Locus amoenus et classicus nos poetes contemporáneos d’Asturies” y un alderique.

La última de les xornaes, la del vienres, va entamar cola ponencian de Michele Loporcaro, de la Universidá de Zürich, “Sobre el origen del neutro asturiano: evidencia comparativa”. A les 17:15 Montse Machicado Compañy va falar de la “Llingua asturiana nel Llibru d’acuerdos del Conceyu d’Avilés (1479-1492)”, siguiendo darréu a les 17:30, la comunicación de Cristina García-Sampedro Clérigo, “Contribución de la toponimia al debate sobre el origen romano de Uviéu”, siguida d’un alderique y descansu.

Les últimes conferencies de les Xornaes Internacionales van entamar a les 18:15 cola comunicación de Francisco Fernández-Guisasola y Joaquín Fernández García sobre les “Claves etnollingüístiques pa entender la melecina popular asturiana”. Más tarde Rodrigo Fernández Alonso y José Martínez González van lleer la conferencia “Paremioloxía asturiana del nacimientu, vida, pasión, muerte y resurrección del guchu”.

A les 18:45 Nicolás Bartolomé Pérez va falar de l’asturianu al otru llau del cordal, con “La regulación xurídica de la nuesa llingua en Castiella y Lleón”, a la que va siguir un alderique. Ángel Iglesias Ovejero, de la Universidá d’Orléans va falar alredor de la “Situación actual del habla de El Rebollar, analogías y contrastes con las hablas extremeñas”, celebrándo a les ocho, el pieslle de les Xornaes.

Programa completu de les Xornaes

El Vicerrectoráu d’Estensión Universitariu, Cultura y Deportes organiza, con motivu de los Premios “Príncipe d’Asturies” 2009, dellos alcuentros. El primeru dpellos va ser col ganador del Premiu d’Investigación Científica y Tecnica: Martin Cooper, el miércoles, día 21 d’ochobre, a les 11 hores. Na mesma va falase sobre “La telefonía móvil: una revolución na mano”. Será na E.P.S. d’Inxeniería, nel Campus de Viesques – Xixón.

D’otra banda, el Premiu de les Lletres, Ismaíl Kadaré, va falar de delles cuestiones de lliteratura, el xueves, día 22 d’ochobre, a les 12 hores nel Salón d’Actos de la Biblioteca del Campus d’Humanidaes del Milán.

El Premiu de Comunicación y Humanidaes, qu’esti añu foi pa la Universidá Nacional Autónoma de México (UNAM) va celebrase na universidá, el xueves, día 22 d’ochobre, a les 13 hores nel Paraninfu del Edificiu Hestóricu de la Universidá.

El gallardón d’Investigación Científica y Tecnica, que foi pa Martin Cooper y Raymond Samuel Tomlinson , va tener el xueves 22 el so actu, a les 17 hores nel Patiu Central del Edificiu Hestóricu de la Universidá.

Mesmo que’l de la Concordia, que foi pa la Ciudá de Berlín, nel XX aniversariu de la cayida de la Muria de la vergoña. A les ocho, nel mesmu llugar va celebrase un alderique cola participacón de Walter Momper (Alcalde de Berlín nel añu 89) y varios periodistes. “Berlín 1989-2009. Venti años d’Hestoria”.

Güei martes, 20 d’ochobre, a les 19.30 hores, nel Salón de Actos de la Cátedra Gaspar Melchor de Xovellanos d’Estensión Universitaria, el Xefe de Medicina Preventiva del HUCA, Juan Caunedo, va pronunciar la conferencia “¿Qué ye la gripe A?”, onde dará respuesta munches de les entrugues plantegaes na sociedá y nos medios de comunicación nos últimos meses.

Esta asociación va celebrar trenta años d’actividá ente los díes 16 y 24 d’ochobre. Pa ello, güei vienres, a les 20 hores, l’etnomusicólogu y intérprete asturianu Héctor Braga va dictar la conferencia “Instrumentos musicales: orixe y forma”.

Ente otros actos, va celebrase una charra sobre la Situación actual de la Llingua Asturiana, a cargu de Xosé Ramón Iglesias Cueva, miembru de l’Academia de la Llingua Asturiana, el martes 20, a les 20 hores.

El miércoles, 21, a les 19.30 hores, l’etnomusicólogu y presentador de televisión Xosé Antón Fernández Ambás va falar de “Trabayu de campu e investigación”.

L’asocación va ortorgá-y el so premiu Distinción, al gaiteru José Ángel Hevia.

Tolos actos van celebrase nel Centru Cultural de Lliceñes, en Valdesoto, y son d’entrada llibre, nun siendo la espicha onde va entregase’l premiu a Hevia, a la qu’hai qu’apuntase enantes.

El númberu 18 d’esta revista d’información llingüistica ta nes casi. Esti númberu de la publicación trimestral de l’asociación “Furmientu” pue descargase na web ya inclúi noticies, bases de la IV edición del Concursu de Vocabularios, una artículu sobre los asemeyos del asturlleonés y el portugués: y una torna al asturlleonés d’El Soldadicu de Chombu de Hans Christian Andersen en versión de Javier López.

El Llumbreiru 18

La Universidá de Chicago, nos Estaos Xuníos d’América, organiza esta fin de selmana un xornada dedicada a la hestoria d’Asturies, tocando temes mui estremaos, que van dende la filoloxia al cómic. La xornada va entamar con una “Oda a Asturies” y una conferencia sobre la llingua asturiana.

Nel actu collaboren dellos departamentos y centros de la Universidá de Chicago, l’Academia de la llingua asturiana y el Gobiernu d’Asturies.

Pela parte de la comitiva asturiana, van participar Taresa Lorences, Ramón d’Andrés, Helena Carretero Suárez, Próspero N. Gacía, Chechu García, Ignacio Fernñandez Sarasola y María José Álvarez Faedo.

Programa na web de la Universidá de Chicago