Sociedá

El sustitutu d’Abel Pardo al frente de la Conceyalía de Cultura Lleonesa na capital de Lleón, Javier Chamorro (UPL), fizo delles declaraciones al Diario de León, nes que comentó “el principal oxetivu de la nuestra formación ye consiguir l’autonomía pa Lleón”, amás de velar “poles señes d’identidá del ùeblu”. Chamorro diz que “va siguir usándose’l lleonés na Conceyalía, pero siempres al llau y en pie d’igualdá col castellán” la llingua que diz “usamos davezu los ciudadanos”. Y ye que’l nuevu responsable de la estaya quier “que l’estudiu de la llingua lleonesa se vea como daqué amable y que mos arriquez y non como una imposición”.

El conceyal quixo dexar claro que ye “totalmente lleonesista, como nun pue ser d’otra manera” y ve mui bien “les clases de cultura llleonesa que se tán dando nos colexos, y que tán siendo tou un ésitu” y nes que “nun s’imparte llingua como tal, sinón que s’espliquen les pallabrtes más comunes, eses que solemos emplegar toos en casa como prestar, mancar, los diminutivos en –ín”.

Chamorro reconoz les crítiques al modelu llingüísticu de Pardo, lo qu’achaca a “la falta d’un acaemia o insitutu como los qu’esisten n’otros territorios” lo qu’impide “la so normativización” y fai que “determinaos tipos d’escritura nun seyan compartíos por tol mundu”.

El conceyal reconoz “nun soi llingüísta” pero ta falándose “con persones del ámbitu científicu que seyan reconocíes y respetaes por toles partes, eses persoes pueden facer muncho”. Pa Chamorro ta claro “hai que dexar de llau cualesquier sectarismu”. Lo idela sedría tener un “institutu del lleonés o una entidá académica”.

L’Asociación Cultural “El Garrapiellu” fizo pública estos díes la so Memoria d’Actividaes 2008-2009. Un documentu nel que faen analís de les sos actividaes a lo llargo de los dos años últimos, faciendo “necesaria autocrítica” en delles cuestiones. Ún de los temes esaminaos nel mesmu tien que ver coles sos rellaciones con asociaciones como’l Conceyu Abiertu pola Oficialidá (CAO).

Nel documentu, l’asociación xixonesa llamenta’l rechazu per parte del CAO d’un documentu presentáu por Sixto Armán, en representación d’El Garrapiellu, nel que se facía “autocrítica de la parálisis a la que nos taba llevando la dinámica seguía hasta’l momentu proponiendo llínees alternatives de trabayu p’abrir la xestión de la Plataforma a les asociaciones participantes y democratizando’l funcionamientu de la mesma pa involucrar la másima cantidá de xente”. Una propuesta, que recuerden, “foi rechazada pol C.A.O.”, lo que foi pa l’asocación “una desilusión” pa con esta organización.

Ente los llogros que destaquen nestos tiempos últimos tán les escursiones culturales, concursos lliterarios, cursos de deportes tradicionales… Recordando sicasí, les dificultaes organizatives que viven, anque comenten, “ye cierto y tristemente palpable’l momentu de parálisis que vive’l mundiu sociu-cultural asturianista”. Sicasí, conscientes “de qu’anguaño ye precisamente nel asociacionismu onde vive de modu más intensu la brega pola defensa de la cultura asturiana”, ven necesario “siguir nel camín”.

El Garrapiellu recuerda, no que cinca a la prensa, “que ye bien triste comprobar día a día ensin enquivocase nos pronósticos cómo cualquier escritu unviáu n’asturianu queda perdíu y non apaez espublizáu enxamás”, cuando, pudieron comprobar “que les dos cartes y un comunicáu que sí se enviaron a la prensa en castellano apaecieron publicaos rápido y ensin torgues”.

El Garrapiellu tien como principal oxetivu pal próximu cursu d’actividaes, la celebración del venti aniversariu de la organización “cola máxima notoriedá”, amás de “trabayar no posible cola Alministración amás d’escontra d’ella cuando seya necesario”, presentando “un documentu de propuestes pa ser presentáu a la Conceyalía de Cultura del Ayuntamientu de Xixón y a los grupos políticos con representación municipal, amás de la Conseyería de Cultura del Principáu d’Asturies”.

Memoria d’Actividaes 2008-2009 d’El Garrapiellu

El Congresu convocáu pola Universidá d’Uviéu, al traviés del Seminariu de Filoloxía Asturiana, y el Muséu del Pueblu d’Asturies na Facultá de Filoloxía termina güei, na so segunda xornada. El programa entama a les 10:00 hores coles conferencies “Otros xéneros de la tradición oral: refranes, retafiles y adivinanzas”, de Xuan Xosé Sánchez Vicente; “Posibilidaes de los corpus orales pa la investigación llingüística asturiana”, de Xulio Viejo Fernández y “Asturiano y castellano en la literatura de tradición oral en Asturias” de Juan Carlos Busto Cortina.

Darréu va presentase’l llibru “Folk-lore de Proaza. Notas y apuntes recogidos y ordenados por L. Giner Arivau (1886)”. Yá pela tarde, a partir de les 16:30 hores, la primer conferencia va ser “Archivos y centros de documentación sobre’l patrimoniu oral n’España” por Carmen Sierra Bárcena, siguida de “L’Archivu de la Tradición Oral d’Asturies”, de Jesús Suárez López, rematando con “Patrimoniu oral y Patrimoniu etnográficu” al cargu del director del Muséu del Pueblu d’Asturies Juaco López Álvarez.

Xulio Arbesú resultó ganador de la decimoquinta edición del Premiu d’ensayu en llingua asturiana “Máximo Fuertes Acevedo”, que concede la Conseyería de Cultura y Turismu d’Asturies. El xuráu tuvo formáu pola Directora Xeneral de Política Llingüística, Consuelo Vega Díaz, y cuntó cola participación de los escritores y investigadores María Cueto, María Antonia Mateos y Xurde Sierra. Otros cuatro ensayos presentáronse a esti premiu, dotáu con 7000 euros.

Ente les obres presentaes, el xuráu decidió conceder el Premiu al testu tituláu El destín treshumanu, al valorar que se trata d’un ensayu “de gran guapura llingüística y lliteraria qu’aborda un tema orixinal dende una suxetividá abierta”.

Xulio Arbesú (L’Entregu, 1957) ye llicenciáu en Ciencies Empresariales. Diose a conocer nes lletres asturianes al llograr coles noveles Misión Pelayo y Un raposu en Tresmonte dos premios de narrativa de l’Academia de la Llingua Asturiana. Nel añu 2002 ganó’l Premiu “Xosefa Xovellanos”, que convoca la Conseyería de Cultura, con Potestas, una obra cola que s’adientra nel sieglu XII pa contar la historia del conde Gonzalo Pelaiz. Nel añu 2002 volvió ganar esti premiu con El pisu d’enriba, ex aequo con Imagod’Adolfo Camilo Díaz, onde se cuentes les vicisitudes d’una muyer que vive enriba d’un disco-pub. Tamién tien publicada una colección de relatos curtios,Cuentos con neños, l’ensayu en castellanu La informatización del transporte y la obra teatral Les siete novies del Rei, qu’acaba d’apaecer con Suburbia Ediciones.

Güei, miércoles 18 de payares, en Xixón y dientro de les Xornaes Antifascistes, Rafael Rodríguez Valdés, hestoriador y director de la revista Erada, va dar una charra titualada “Ut uulgi utar sermone more patrie. Llingües y clases sociales n’Asturies”, na Casa Sindical, a partir de 20:00 hores.

Les Xornaes van celebrar amás, el vienres, una manifestación dende l’astilleru de Naval Xixón, a les 19:00 hores. A les 20:00 hores un conciertu tituláu “Asturies Antifa Attack” con Dixebra, A Quemarropa, Gomeru, Doris y Ganga Sound con Nebula Selektah.

El recién nomáu Caderalgu de Dialectoloxía, García Arias, ta acabante espublizar cola ALLA, la cuarta entrega de les sos “Propuestes etimolóxiques”, col que suma propuestes pal futuru “Diccionariu etimolóxicu de la llingua asturiana” que l’autor yá tien enforma avanzáu.

Xosé Lluis García Arías naz en Teberga en 1945. Llicencióse en Filoloxía Románica na Universidá d’Uviéu cola tesis doctoral “El habla de Teberga. Sincronía, diacronía e introducción a la toponimia”. Foi un de los trés fundadores de Conceyu Bable y presidente de l’Academia de la Llingua Asturiana dende 1980 hasta’l 2000, cuando la institución presentó’l diccionariu completando la normativización básica del asturianu.

L’asociación cultural zamorana “Furmientu” va organizar les xornaes de la cultura tradicional de Zamora qu’esti añu llega a la so octava edicción, amás, l’asociación ta acabante espublizar el primer númberu de la revista “Faceira”, de calter lletrónicu y en pro de la llingua y la cultura del ámbitu asturlleonés.

En cuantes a les Xornaes, sofitaes pola Diputación Provincial de Zamora, van celebrase’l sábadu 12 d’avientu na sala de conferencies de la obra social de Caja España, na Cai San Torcuato de Zamora, coles conferencies de dellos estudiosos del dominiu llingüísticu ástur.

Xosepe Vega Rodríguez va dar llectura, a les seis, de la conferencia titulada “La moderna reivindicación de la llengua asturllionesa en Llión y Zamora”. A les siete, l’espaciu va ser pa Xosé Lluis García Arias, que va falar alredor d’“El léxico zamorano y su interés en el conjunto ástur”, con un alderique pa finar la xornada.

Descarga’l númberu 1 de Faceira

La Facultá de Filoloxía de la Universidá d’Uviéu va acoyer a partir de güei martes la celebración del Congresu Internacional El patrimoniu oral d’Asturies, onde van poder sentise delles conferencies sobre la tema en cuestión. Los actos tán dirixíos pol Seminariu de Filoloxía Asturiana de la Universidá d’Uviéu y l’Archivu de la Tradición Oral del Muséu del Pueblu d’Asturies. Nel Congresu va facese balance “de lo fecho hasta’l momentu y proponer los retos del futuru pa la recuperación y dignificación d’esti patrimoniu”.

L’actu inaugural va celebrase güei a les 9:30 hores de la mañana y, depués, va ufiertase la primer conferencia, a cargu del profesor de la Universidá de California Samuel G. Armistead, con una ponencia sobre’l romanceru tradicional asturianu. El programa completu pue consultase nel folletu del Congresu.

Programa completu del Congresu Internacional

El 3 de xunu del 2008, el Conceyu Abiertu pola Oficialidá presentó una campaña bien novedosa: “Doi la Cara pola Oficialidá”, que consiste na recoyida masiva y esposición per Internet de semeyes individuales de persones retratándose con un mesmu cartel, que lleva’l testu que da nome a la campaña. Esta iniciativa creóse col oxetivu de llograr el reconocimientu de la oficialidá de la llingua asturiana na próxima reforma del Estatutu d’Autonomía.

Un añu depués, la respuesta de la xente foi mui positiva y yá son 10.000 les persones concretes que dan la Cara pola Oficialidá, dende xente anónimo hasta deportistes, músicos… Por eso, al llegar a esta cifra significativa, va facese un actu de celebración que va tener como escenariu La Pola Siero, el día 28 d’esti mes de payares.

Dientro de les Xornaes Antifacistes organizaes pola Cordinadora Antifacista d’Asturies pa esti mes de payaeres, l’hestoriador Rubén Vega va falar güei, llunes 16 de payares, del “Desenrollu y crisis del movimientu obreru asturianu nel tardofranquismu y na transicion”. L’actu va ser na Casa Sindical de Xixón a partir de les ocho la tarde.

El miércoles, nel mesmu llugar y tamién a les ocho la tarde, Rafa Valdés va dar llectura a otra conferencia dientro d’estes xornaes.