Sociedá

El Rexistru de la Universidá d’Uviéu estrenó nel mes de xunetu un Reglamentu d’Usu del Asturianu que permite la presentación d’escritos n’asturianu. Dende entós y hasta’l mes de payares, y según pudo saber Asturnews, el Rexistru recibió dos escritos n’asturianu, que fueron tramitaos ensin problema dalgún. Ún d’ellos diba empobináu al Rector y l’otru yera un permisu pidíu por un mimebru del personal d’alministriación y servicios.

Entra en vigor el Reglamentu que permite dirixise n’asturianu a la Universidá d’Uviéu

Teresa Sanjurjo, madrilana de madre asturiana, sustitúi yá a Graciano García como nueva directora de la Fundación Príncipe d’Asturies. Foi escoyida por unanimidá. Con diez años d’esperiencia nel sector fundaciona amosábase güei feliz d’encarar esti nuevu compromisu, la so intención ye “siguir los fines del Patronato de la meyor forma posible”. Graciano García foi nomáu director eméritu y vitaliciu.

Nacido en 1972, ye especialista en xestión d’entidaes non lucrativas y el so réxime xurídicu y fiscal. Estudió na Universidá Pontificia Comillas (ICADE), onde llogró en 1995 la Llicenciatura en Derechu y la titulación de Lletráu Asesor d’Empreses. Tres otros estudios xurídicos y de xestión, en 1999/2000 curs’l Máster n’Alministración y Dirección de Fundaciones y otres Entidaes non Llucrativas pola Universidá Autónoma de Madrid.

Nel añu 2007 cursó’l Programa de Dirección Xeneral del Institutu d’Estudios Superiores de la Empresa (IESE). Incorporóse a la Confederación Española de Fundaciones, organización de la que foi nomada directora técnica en 2001. A partir d’esi momentu y hasta l’actualidá participó como profesora tanto nel máster n’Alministración y Dirección de Fundaciones y otres Entidaes non Llucratives como n’otros cursos y seminarios especializaos del sector. Nel añu 2003 produxo la fusión de la Confederación Española de Fundaciones col Centru de Fundaciones, frutu de la cual nació l’Asociación Española de Fundaciones, organización de la que foi directora xeneral.

Dende l’añu 2003 hasta 2009 l’Asociación Española de Fundaciones multiplicó por dos el númberu de fundaciones asociaes, que financiar directamente más del 90 por ciento del presupuestu de la mesma, algamando’l grau de prestu de los asociaos del 95 por ciento. Amás, foi miembru del Foru d’Espertos de Responsabilidá Social de les Empreses del Ministeriu de Trabayu y Asuntos Sociales. Ye vocal de la Xunta Directiva de l’Asociación Española de Directivos, miembru del Conseyu de Redacción de la Revista Española del Tercer Sector (Fundación Luis Vives) y miembru del Conseyu de Redacción del “Anuario de Derecho de Fundaciones”.

Güei, xueves 17 d’avientu a les 20.30 hores, va tener llugar una nueva Tertulia Pachín de Melás, que nesti casu xirará al rodiu de les problemátiques y los retos que tienen d’encarar les persones con dalgún tipu de discapacidá. La Tertulia, que se plantega sol títulu “Carreres d’obstáculos. Discapacidá ya Igualdá”, cuntará cola presencia d’Ignacio Baizán, representante de l’asociación APTA (Asociación de Antiguos Alumnos del Sanatorio Marítimo); Enrique Fernández Garrido, persona mui venceyada al ámbitu de les persones con discapacidaes pente medies de la so participación nel grupu “Iniciativas”, la Confederación Coordinadora Estatal de Minusválidos Físicos d’España (COCEMFE) y elcentru Ángel de la Guarda; Juan José Maté de l’Asociación Nora d’ayuda a persones con parálisis celebral; y Felipe Orviz, de la Fundación ALPE Acondroplasia.

La Tertulia tendrá llugar na Cervecería Astuera de Xixón, local asitiáu na cai Joaquín Fernández Acebal, tres el Centru San Agustín. Los organizadores de la Tertulia, el grupu d’Unidá Nacionalista Asturiana (UNA) nel conceyu de Xixón, camienten que l’espaciu facilita la recuperación del espíritu de les tertulies participatives y abiertes. Nesta llinia, la Tertulia Pachín de Melás, que yá cuenta con más d’un añu de vida, tien trataos temes como “El Sindicalismu del sieglu XXI”, “Los medios de comunicación alternativos n’Asturies” o “Regasificadora: necesidá y peligros que comporta”.

Les Segundes Xornaes sobro la India, pretenden dar continuidá a un alcuentru que surdió nel ámbitu de la Universidá d’Uviéu y que va centrase en dos bloques: el dictáu d’estremaes conferencies sobro distintos aspectos culturales de la India y per otra parte, una serie de talleres con llibros, música y danza, semeyes, cine forum, carteles, restauración, etc. Celébrense nel salón d’actos de Filoloxía, nel Campus del Milán.

L’apartáu d’intervenciones cuntará cola presencia de personal invitao espertu na materia, y nesta segunda edición, pretende atender al procesu d’internacionalización nel que s’atopa inmerso el panorama universitariu, nel que ensin dulda les potencies emerxentes asiátiques han xugar un papel de relevancia.

La organización cuerre a cargu del Departamentu de Filoloxía Angloxermánica y Francesa de la Universidá d’Uviéu, cola collaboración de los vicerrectoraos d’Estensión, Cultura y Deportes, Internacionalización y Cooperación al Desenvolvimientu; amás del Decanatu de la Facultá de Filoloxía, la Embaxada de la Republica Federal de La India nel estáu español, la Cámara de Comerciu d’Uviéu. Too ellos embaxo la coordinación de Carmen Escobedo de Tapia.

Programa completu de les Xornaes

Con motivu de la celebración el 10 de payares del Día Mundial de la Ciencia pa la Paz y el Desenrrollu, la Dirección Xeneral de Política Llingüística preparó un programa d’actos onde se venceyen el saber científicu y el so desenrrollu en llingua asturiana, yá qu’hai una interesante actividá científica n’asturianu que ye necesario poner en valor.

Asina les coses, la Facultá de Bioloxía de la Universidá d’Uviéu organizaron de manera conxunta una celebración protagonizada por Xosé María Fernández (Institutu Européu de Bioinformática), onde l’investigador pronunció la conferencia “¿Ónde tamos dempués de venti años col xenoma humano?”.

El testu ampliáu d’esa conferencia onde repasa los últimos avances nel ámbitu de la investigación xenómica publicóse nuna edición non venal pola Dirección Xeneral de Política Llingüística, qu’agora ufre la oportunidá de descargar de baldre’l pdf del testu.

Descarga’l llibru de baldre

El Conceyu Universitariu pol Asturianu (CUPA) participó güei d’una sesión del Claustru de la Universidá d’Uviéu polémica pola mor de los cambios na ordenación de les facultaes na institución. Una discusión que llevó la sesión de ruegos y entrugues acullá de les dos de la tarde.

Nesa ronda, Inaciu Galán, miembro del Claustru y voceru de los representantes del CUPA na cámara universitaria intervino con una declaración alredor de la xestión de la política llingüística fecha nel primer añu y mediu de mandatu del rector Vicente Gotor, al que la organización que preside apoyó nes elecciones universitaries.

Según les pallabres de Galán, el CUPA reconoz “los pasos daos na institución a favor del asturianu” especialmente “l’usu del asturianu per parte del Rector, l’impulsu de les enseñances d’asturianu en Filoloxía y Maxisteriu, per primer vez na hestoria oficiales y la creación d’un Reglamentu d’Usu del asturianu nel Rexistru de la Universidᔠque calificó “d’insuficiente pero avance”.

El CUPA, dixo’l so representante, “va siguir collaborando col equipu rectoral nestos avances”, y entiende’l que’l principal llogru d’esti “ye’l cambiu d’actitú de la dirección de la Universidá d’Uviéu”, que pa los universitarios partidarios del asturianu “yá nun vive d’espaldes a la llingua asturiana, sinón qu’entiende la so normalización como parte del so trabayu”.

El Rector y el so equipu abieron, según Inaciu Galán “importantes espectatives” pero’l Conceyu Universitariu pol Asturianu entiende “qu’agora ye’l momentu d’acelerar estes polítiques llingüístiques na Universidá, con nueves midíes que sirvan pa normalizar l’asturianu na Institución”.

El voceru del CUPA reconoció saber “que se trabaya nesos pasos, pero l’equipu rectoral nun pue dexar esi llabor pa muncho más alantre”, recordó al rector, que presidía l’actu.

Pal CUPA, sicasí, la normalización del asturianu “nun pue quedar namás en manes del equipu rectoral, tien que participar tola comunidá universitaria, faciendo pola normalización del asturianu: Conseyu d’Estudiantes, Facultaes y Escueles, PAS, Defensor Universitariu…”.

El representante del CUPA remató la so intervención reiterando l’apoyu de la so organización “en toles iniciatives que supongan avances pa la llingua asturiana dientro de la Universidá asturiana” y convidando a tolos miembros del Claustru “a trabayar na mesma dirección, con una collaboración crítica pero lleal, el consensu ye imprescindible nesta cuestión”.

El rector Vicente Gotor respondió al ruegu del colectivu asturianista recordando que l’equipu rectoral “ta demostrando trabayar pol asturianu y pola cultura asturiana”. Gotor dixo tamién que van siguir dándose pasos “adulces” y que se ta preparando “una Comisión pa la Normalización Llingüística na Universidᔠanque, recordó “a quien-y correspuende oficializar l’asturianu ye al Gobiernu del Principáu”.

La Xunta pola Defensa la Llingua Asturiana vieno acabante anunciar esti día los ganadores de los Premios Andrés Solar na so XXV edición. Nesta ocasión el Pegollu foi pa la “Ruta del Quesu y la Sidra d’Asiegu”, iniciativa empresarial de calter turísticu. El Madreñazu foi pa Mercedes Álvarez González, Conseyera de Cultura y Turismu del Principáu d’Asturies.

Los Premios Andrés Solar algamen nesti 2009 la so XXV edición. Como nos sos 25 años de vida, los premios tienen una vertiente doble: per un llau, la Xunta premia a una entidá o persona que rescamplara nel últimu añu pol so llabor en defensa o promoción del asturianu. Esti reconocimientu materialízase n’El Pegollu, que nesta ocasión foi pa la “Ruta del Quesu y la Sidra d’Asiegu”. La Xunta quier reconocer l’usu que fai esta iniciativa empresarial de la llingua asturiana, nun exemplu de normalidá y puesta en valor de les nuestres señes d’identidá. La Ruta incorpora l’asturianu como un elementu más, usándolu y valorándolu, na actividá divulgadora que realicen na Ruta del Quesu y la Sidra, actividá turística na que la empresa ufierta a los sos clientes un recorríu alredor del quesu Cabrales, la sidra y el paisaxe rural asturianu. La empresa tamién apuesta pol asturianu nel etiquetáu de los sos productos, como ye’l casu de la “Sidra Pamirandi”. Pol so apueste decidíu a lo llargo de 10 años de vida, ensin complexos, y pol so exemplu de que l’asturianu nun ye un llastre, sinón daqué que xuega al nuestru favor, la Xunta pola Defensa de la Llingua Asturiana decidió concede-yos esti 2009 El Pegollu de los Premios Andrés Solar.

Los Premios Andrés Solar tienen tamién una versión negativa, que reconoz a la persona o entidá que rescamplara pol so llabor negativu pa cola llingua asturiana. Esti duldosu honor represéntase con un “Madreñazu”, que na edición de 2009 va pa la Conseyera de Cultura y Turismu del Principáu d’Asturies, Mercedes Álvarez González. Como responsable máxima na Conseyería de Cultura de la política llingüísitca que ta desenvolviendo’l Gobiernu asturianu, la Xunta topa un cientu de razones poles que castigala con esti premiu. La Xunta considera la política llingüística del Principáu como inexistente, porque namás se ven determinaes iniciatives, les más de les veces bastante probes, que busquen principalmente ser coartada d’un Gobiernu qu’amuesa un despreciu y inoperancia absoluta énte’l preocupante futuru del nuestru idioma. Una política llingüística na que nun se trabaya nel avance de la llingua asturiana nos medios de comunicación, nel enseñu o na alministración nun merez esi nome, colo que la Xunta pola Defensa de la Llingua Asturiana considera que Mercedes Álvarez ye bona merecedora del antipremiu.

La entrega de los Premios va facese’l día 19 d’avientu a les 19:30 hores nel Salón d’Actos del Antiguu Institutu de Xixón. L’actu va contar cola actuación musical de Lucas 15. Nesta ocasión dos miembros del grupu, Nacho Vegas y Xel Pereda, interpretarán temes del so primer discu.

Páxina web de la iniciativa premiada

L’asociación cultural Furmientu, a comuña cola Diputación Provincial de Zamora remata mañana, sábadu 12 d’avientu, les VIII Xornaes de la Cultura Tradicional Zamorana a partir de les 18.00 hores, na sala de conferencies de la Obra Social de Caxa España.

Nesta xornada última, van participar l’escritor Xosepe Vega cola ponencia “La moderna reivindicación de la llingua asturllionesa en Llión y Zamora” y a les 19.00 hores, Xosé Lluis García Arias con una conferencia sobre’l léxicu zamoranu y el so interés nel conxuntu ástur.

García Arias: “Los fracasos del asturianismu diéronse pola fosca oposición de los políticos y la curtia organización na reinvindicación”

L’Aconceyamientu de Xuristes pol Asturianu ta acabante anunciar la inauguración d’un Rexistru de la Discriminación Llingüística n’Asturies, que vien a ufrir una memoria “que permita l’espardimientu de la vergoñosa y permanente agresión llingüística escontra’l pueblu asturianu” que según AXA “se niega al amparu de que la memoria ye feble y el pasu’l tiempu favoratible al escaezu”. L’asociación pide la collaboración de les víctimes de discriminación llingüística pa da-y vida a esti Rexistru.

L’asociación cunta yá con un informe qu’atropa cientos de casos de discriminación, na dómina 1979-2009, nun total de más de doscientes páxines. Pa da-y continuidá al llabor AXA ta sofitando la igua d’una asociación –Observatoriu de la Discriminación Llingüística n’Asturies- na que conviden a asentar, col grau de compromisu qu’escueyas, acordies col conteníu de la fueya que s’axunta.

Espaciu pa la denuncia de casos de discriminación llingüística

Ente decenes de ciudaes españoles, n’Uviéu va cellebrase una concentración escontra la Llei de la Patada nel Router. Va ser frente a la Xunta Xeneral, na Plaza Escandalera, esti vienres 4 d’Avientu a les 20:00 hores.