Sociedá

La cadena vasca de supermercaos ya hipermercaos Eroski recibió a entamos d’esti mes el Premu a la Promoción de la Realidá Plurillingüe “por desenrrollar una función exemplarizante en materia de plurillingüismu y difundir les llingües cooficiales del mesmu, xunto col castellán”. El premiu otórguenlu la Generalitat de Cataluña, el Gobiernu d’Euskadi, el Govern de les Islles Baleares y la Xunta de Galicia dende l’añu 2008, cuando se premió a Microsoft.

El presidente del grupu Eroski, Constan Dacosta, recoyó’l premiu nun actu celebráu nel Círculu de Belles Artes de Madrid, cola presencia de les máximes autoridaes de la política llingüística de les comunidaes convocantes del premiu.

El Premiu establecióse dientro del conveniu de collaboración ente los gobiernos autónomos de les comunidaes vasca, gallega, catalana y balear, y que ñació en 2007, nel contestu de la celebración per parte de la UNESCO del “Añu Internacional de les Llingües”. Daquella, los gobiernos participantes declaron que “la diversidá llingüística ye unu de los pegollos de les sociedaes modernes y constitúi un indicador esencial de la salú de los sistemes democráticos”.

Eroski, sicasí, nun rotula los sos centros n’Asturies en llingua asturiana, nin tampoco inclúi nos sos productos, la denomación del mesmu na nuesa llingua.

L’11 d’abril del 2009 dexábanos la decana de les lletres asturianes, la escritora valdesana Nené Losada Rico, a la edá d’87 años. Pasó yá un añu de la muerte y Asturnews recuerda la so figura con un artículu de Xuan Pandiella, que s’espubliza güei na estaya d’opinión del diariu, y que fai tamién alcordanza de la escritora Corín Tellado, muerta va agora tamién un añu.

La escritora ñació en L.luarca’l 10 de payares de 1921. Tres años depués, al morrer la madre, llévenla a Sanfliz de Trevías, pa cola güela. Ellí diba vivir hasta que, con diecinueve años, casa y torna pa L.luarca, onde vivió hasta los sos últimos díes. De formación autodidacta, amuésase como una temprana escritora de rellatos y poemes en castellán. Tiempu más tarde, empezará a facelo na llingua del so llugar, utilizando formes poétiques mui cercanes a les de la poesía oral popular. En 1992 recoyó bona parte de la so obra en versu nel volume Cantares valdesanos, n’edición de Consuelo Vega, que se completa col nuevu llibru poéticu apaecíu en 1997 col títulu de Entre apigarcios, dende entós espublizó tamién la so obra en castellán nun volume completu.

L’autora recibió numberosos homenaxes y premios. Col so nome convócase cada añu un premiu de poesía. Nel añu 2000 recibió l’Urogallo 2000, entregáu pol Centru Asturianu de Madrid, al que nel 2005 se-y sumó la medaya de plata del Principáu d’Asturies. En 2007 recibió’l Premiu Timón que concede l’Arribada, pola mor de la so trayectoria lliteraria, y en 2008 foi nomada Fía Predilecta del Conceyu de Valdés.

A les escritores asturianes Corín y Nené

La Casa Cultura de Navia va acoyer la presentación d’un nuevu colectivu en defensa de la llingua del Eo-Navia. La organización, formada por xente nuevo de la fastera, quier trabayar “por un futuro cultural máis amañoso prá nosa terra” y denuncia la situación actual del gallego-asturianu como “intolerable”.

Protesten pola “nula presencia” del gallego-asturianu na RTPA, pola falta d’un estatus llegal, “a oficialidᔠy pol lentu procesu d’oficialización de la toponimia, yá que namás cuatro de los dieciocho conceyos de la fastera eonaviega oficializaron yá los sos topónimos.

Reclamen l’usu del gallego-asturianu como “llingua vehicular nel sistema educativo” y el cumplimientu de la llegalidá no que cinca a les clases d’esta llingua, que tovía ta ausente de munches escueles de la zona.

Pero tamién tien otros oxetivos esta asociación, sinón tamién “el noso patrimonio material” qu’opinen “tamén s’esfarrapa pouquín a pouco”. Pa Trafego “toda a cultura milenaria d’Asturias vei quedando cuberta baxo el esqueizo”.

Otra de les esmoliciones de la organización son “as dificultades da nosa mocedá pra botar raigaños na súa propia terra” qu’afirmen “fain imprescindible qu’esta mocedá nun se quede parada, espectante ante este panorama”.

Esti grupu de mozos entama a trabayar pa “ufertar úa resposta a todas estas situacióis que queremos cambiar, pra trabayar na reivindicación llingüística, pra trabayar pola conservación del noso medio cultural, natural y etnográfico, pr’axudar a dignificar as nosas manifestacióis culturales, a nosa tradición oral y escrita…”.

Blogue del colectivu

Yá hai llogotipu y cartelu pal Campeonatu d’España que’l Conceyu de Xixón ta va organizar en 201. L’Ayuntamientu afirma que nun quier “que dambos campeonatos pasen a espaldes de la ciudá y de la comunidá autónoma que los va acoyer” y por ello, ente otres midíes, la páxina oficial (www.duatlongijon.org) tien yá la so versión n’asturianu, amás d’en castellán, a la que va sumase l’inglés, cuando la ciudá celebre’l mundial d’esti deporte en 2011.

Amás, y como ta afitao nes disposiciones llegales d’anguaño, el llogotipu va llevar la toponimia oficial del conceyu, Gijón-Xixón, anque tovía pueden vese nos cartelos de la mesma la utilización de topónimos yá desaniciaos, como’l del llugar onde se celebra la competición, el complexu deportivu de Les Mestes, afitáu na toponimia unicamente con esa forma, pero nel cartelu cola doble Las Mestas-Les Mestes, según la llingua que s’use.

El duatlón consiste nuna prueba onde se compite en carrera a pie y en bicicleta. Davezu practícase n’ivernu (10 km de carrera a pie, 40 en bicicleta y 5 de carrera a pié), esistiendo una modalidá d’esprín, con distancies de 5-20-2,5 quilómetros y Llarga distancia (10-60-10).

Páxina web del campeonatu (n’asturianu)

L’arzobispu d’Uviéu, Jesús Sanz Montes, vieno acabante comunica-y al Bloque por Asturies que va tener en cuenta los pidimientos que-y faigan sobre la llingua, nuna contestación a la felicitación que-y univara la formación política pol so usu de l’asturianu.

L’arzobispu, namái aportar a Asturies, encamentóse a la Santina con un pruyimientu: “Santina de Cuadonga, ayúdamos nel camín pa llegar al to fíu; préstame tanto llegar hasta vosotros” Y eses pallabres na so toma de posesión, el pasáu 30 de xineru, alendaron al Bloque por Asturies a escribi-y una carta onde agradecíen el so esfuerzu porque “naciendo fuera d’Asturies y nun teniendo’l nuestru idioma como llingua materna, demostró que la intención de ser respetuosu y facer por integrase ta penriba del sitiu de nacencia de cualaquier persona”.

L’Ayuntamientu de Lleón y l’asociación El Teixu, Rede pal Estudiu y Defensa de la Llingua Asturllionesa van entamar ente abril y mayu un cursu con venti hores de práctiques peles comarques occidentales de Lleón y venti hores nel Auditoriu “Ciudá de Lleón”, asitiáu nel númberu 4 de l’Avenida Reis Lleoneses. El preciu de matrícula ye de diez euros, con un númberu máximu de venticinco places.

El cursu inclúi conocimientos sobre recoyida de toponimia, lliteratura oral, dialectoloxía, técniques d’investigación de campu y música. Como profesores del cursu van tar Fernando Álvarez-Balbuena, María Cueto Fernández, Andrés Menéndez Blanco, Xosé “Ambás” y Nicolás Bartolomé Pérez.

Pa más información pue consultase la web del Ayuntamientu o ponese en contactu cola Conceyalía de Cultura y Patrimoniu del conceyu.

Páxina web del Ayuntamientu de Lleón

El Muséu del Pueblu d’Asturies, asitiáu en Xixón, acueye dende güei les actividaes del primer “Asturianada y Sidre”.

Güei, a les cinco la tarde entama’l programa con Mariluz Cristóbal, Carlos Rubiera, Andrea Cueli y Francisco Queipo, tando a la zanfona Celia González, y a la gaita Llorián García.

Mañana sábadu, 3 d’abril, va ser el turnu d’Anabel Santiago, Héctor Braga, Noemí Torrado y Raúl Díaz, que van siguir la música de Llorián García a la gaita, y del propiu Braga al arpa. Les actividaes entamen tamién a partir de les cinco.

La xornada va termina el domingu, nesti casu con entamu a les 12 y coincidiendo cola celebración del Rastru de Xixón na redolada. Van cantar nesta ocasión Marisa Valle y el so hermanu Fernando, Lorena Corripio y José García. A la instrumentación van tar Xaime Arias col pianu, y Llorián García de nuevu a la gaita. Les actuaciones va presentales Xosé Mª García “Llábana”.

Hasta’l 9 d’abril ta abiertu’l plazu p’apuntase a esti cursu entamáu pol Colexu Oficial de Trabayu Social y que va tener llugar los díes 12 y 13 d’abril, de 17:00 a 20:00 hores.

El cursu ta pensáu pa colexaos y estudiantes de Trabayu Social con una cuota de 40 euros pa los colexaos, y de 70 pal restu. Más información en Plaza d’América 10, 2 Dcha, Uviéu.

L’Aconceyamientu de Xuristes pol Asturianu (AXA) y la Xunta pola Defensa de la Llingua Asturiana (XDLA) presentaron güei nuna rueda prensa nel Llar Solidariu d’Uviéu l’entamu d’una rellación de collaboración formal ente les dos organizaciones, pa llevar alantre en común campañes pa la defensa de los derechos llingüísticos n’Asturies. Na primera campaña, pala defensa de los derechos llingüísticos, participen ya 25 asociaciones más.

La primera d’estes campañes ye una consecuencia directa del Informe del Comité d’Espertos del Conseyu d’Europa que recomendaba al gobiernu español l’apertura d’un diálogu colos falantes d’asturianu pa meyorar l’estatus llegal del idioma. Siguiendo esta recomendación, dende AXA y XDLA va promovese dende güei una iniciativa empobinada a recoyer apoyos ente’l texíu asociativu asturianu rellacionáu cola llingua p’articular la interlocución de la comunidá de falantes de llingua asturiana col estáu español y col propiu Conseyu d’Europa, y trabayar asina de forma organizada pola meyora del nivel de reconocimientu llegal de la llingua asturiana, como recomienda’l propiu Conseyu d’Europa.

Esta primer iniciativa conxunta va valir tamién p’afitar un mecanismu útil qu’informe regularmente a tolos organismos públicos competentes en materia llingüística, especialmente los rellacionaos cola Carta Europea de les Llingües Minoritaries, sobre la situación de marxinalidá llegal y indefensión que carez la llingua asturiana y les persones que la falen, asina como sobre l’incumplimientu n’Asturies del marcu llegal afitáu pol Conseyu d’Europa y pol Estáu Español pa la protección de les llingües minoritaries.

La campaña que presentaben esti día ye una reacción defensiva necesaria énte la inhibición que’l Gobiernu asturianu vien demostrando frente a les sos responsabilidaes. La gravedá de los fechos denunciaos pol Aconceyamientu de Xuristes pol Asturianu sobre l’orixe del informe distorsionador que l’Estáu español unvió al Conseyu d’Europa, evidencia una actitú irresponsable y bochornosa de los responsables de la política llingüística n’Asturies, una actitú que concasa cola política llingüística n’Asturies del actual gobiernu de coalición, que nuna política continuista col anterior, conculca tolos díes los derechos llingüísticos de los asturianos y asturianes.

Independientemente d’estes iniciatives, la Xunta pola Defensa de la Llingua Asturiana asoleyó nun “poder dexar de pidir la dimisión inmediata de la Directora Xeneral de Política Llingüística Consuelo Vega, -por mentir y ocultar información sobre les consultes que l’Estáu Español, a iniciativa del Conseyu d’Europa, dirixó al Gobiernu Asturianu pa la ellaboración del últimu informe sobre’l siguimientu n’Asturies de la Carta Europea de les Llingües Minoritaries- y desixir responsabilidaes polítiques d’estos fechos tanto a los cargos políticos, conseyera y viceconseyeru, de los que depende la dirección Xeneral de Política Llingüística como a los partíos del gobiernu firmantes del pautu nel que s’enmarca y que permite la política llingüística nefasta que carecemos”.

El Muséu del Pueblu d’Asturies, asitiáu en Xixón, acoyer les actividaes del primer “Asturianada y Sidre”, que se celebrará ente los díes 2 y 4 d’abril cola presencia de la meyor música del país. Ente los representantes de la tonada van tar Mari Luz Cristobal Caunedo, Carlos Rubiera y Anabel Santiago.

Pero’l programa ye muncho más ampliu. Entama’l vienres 2 d’abril, a les cinco la tarde, con Mariluz Cristóbal, Carlos Rubiera, Andrea Cueli y Francisco Queipo, tando a la zanfona Celia González, y a la gaita Llorián García.El sábadu, 3 d’abril, va ser el turnu d’Anabel Santiago, Héctor Braga, Noemí Torrado y Raúl Díaz, que van siguir la música de Llorián García a la gaita, y del propiu Braga al arpa. Les actividaes entamen tamién a partir de les cinco.

La xornada va termina el domingu, nesti casu con entamu a les 12 y coincidiendo cola celebración del Rastru de Xixón na redolada. Van cantar nesta ocasión Marisa Valle y el so hermanu Fernando, Lorena Corripio y José García. A la instrumentación van tar Xaime Arias col pianu, y Llorián García de nuevu a la gaita. Les actuaciones va presentales Xosé Mª García “Llábana”.