Sociedá

Esta tarde, de magar les ocho menos cuartu, va tener llugar l’Homenaxe al Profesor Xosé Lluis García Arias, que cumple 65 años pol so, según l’Academia, qu’organiza l’actu, “perestimable llabor investigador a lo llargo d’estos años”. Nel homenaxe intervendrán el Rector de la Universidá, Vicente Gotor, el decanu de la Facultá de Filosofía y Lletres, Jesús Menéndez Peláez y la presidenta de l’Academia Ana Mª Cano González.Con esti homenaxe van pesllase les XXIX Xornaes Internacionales d’Estudiu, qu’entamen la so tercer parte güei a les cuatro y media la tarde.

Nesta cabera xornada participen como conferenciantes los profesores Gerold Hilty (Universidá de Zurich) con “¿Existió en la lengua del siglo XII un pronombre personal io/ia con la misma función que gelo/gela?”; Dieter Kremer (Universidá de Treveris) con una conferencia titulada “(R)espigando en ladocumentación altomedieval de León”; Jean Germain (Universidá de Louvain-la-Neuve) falando alredor de “Les termes génériques à base dialectale dans l’odonymie officielle de Wallonie” y James Fernández McClintock (Universidá de Chicago) sobre “La presencia de lo categórico y la revitalización de la cultura”.

El primeru de los díes de les Xornaes Internacionales d’Estudiu, que tienen llugar na Facultá de Filolosía y Lletres d’Uviéu, abrióse con una conferencia Miguel Ramos Corrada alredor de los personaxes femeninos nel teatru asturianu, onde fizo analís de la presencia de la muyer na obra d’Antón Marirreguera y Pachín de Melás. Del primeru dixo “trata a la muyer de la mesma forma que los saineteros de la so dómina, el sieglu XVII, el so papel ye secundariu”. Una visión que nun camuda muncho según Ramos Corrada na obra de Melás, del que diz “quería facer personaxes populares, realistes, pero nun lo facía, la so muyer arquetipu ye sumisa y obediente, poco que ver cola realidá rural d’Asturies”.

Santiago Fano Méndez continuó cola xornada con un estudiu alredor de los cuentos tradicionales asturianos fechu cola obra “Contáronmelo pa que lo contara”, de Milio’l del Nido”, na qu’analizó l’apaición de temes al traviés d’un estudiu estadísticu, que se destacó nel alderique que lu siguió “podría servir pa estudiar el corpus total de cuentos tradicionales d’Asturies”.

La tarde xiró darréu hacia cuestiones etnomédiques, cola presencia na mesa de conferecnies de Francisco Fernández-Guisasola Muñiz, Joaquín Fernández García, Xosé Martínez González y Xuan Xosé Lastra. Na mesa esplicóse como esisten más de mil términos pa referise a les cayíes y golpes nel llinguaxe coloquial asturianu, que los autores dixebren n’estremaes estayes, según con qué se da’l golpe, a la zona qu’afecta y otres cuestiones.

Darréu fízose un repás a les plantes diurétiques y cardiotóniques na etnomedicina asturiana, falando de los sos posibles usos actuales. Peslló esta estaya temática Joaquín Fernández García faciendo un repás pelos “Remedios d’orixe humanu na melecina popular asturiana (usu real y simbólicu)”, ente los que destacó les cures con “lleche materno, pelo y mexu”.

La muyer protagonizó la conferencia d’Elisabeth Felgueroso López, que recordó l’apaición, “la mayor parte de les vegaes poco positiva” del xéneru femenín na música asturiana. Felgueroso destacó como “la música más tradicional ye la que recueye un tratu más correctu”, mientres qu’otres composiciones más nueves desprecien a la muyer.

La xornada rematóla Xosé Ramón Iglesias Cueva con un trabayu sobre la presencia de la llingua asturiana n’l Eco de Avilés (1866-1868) del que destacó “en cerca de dos años d’actividá d’esti periódicu namás cunta con trés collaboraciones n’asturianu y unes poques pallabres y espresiones sueltes más”.

El Salón d’Actos de Filoloxía nel Campus del Milán de la Universidá d’Uviéu va acoyer los díes 2, 3, y 4 de payares estes xornaes, que lleguen a la so edición XXIX. Nes mesmes participarán un bon númberu de profesores ya investigadores asturianos xunto con otros de distintes universidaes europees. El xueves 4 de payares, como fin de los actos, a les 19:45 tendrá llugar l’Homenaxe al Profesor Xosé Lluis García Arias, que cumple 65 años, “pol so perestimable llabor investigador a lo llargo d’estos años”, espresen dende l’Academia.

Ente les ponencies que van presentase nes Xornaes destaquen les ponencies “Los personaxes femeninos nel teatru asturianu” de Miguel Ramos Corrada, “¿Existió en la lengua del siglo XII un pronombre personal io/ia con la misma función que gelo/gela?” de Gerold Hilty (Universidá de Zurich), “(R)espigando en la documentación altomedieval de León” de Dieter Kremer (Universidá de Tréveris), “Les termes génériques à base dialectale dans l’odonymie officielle de Wallonie” de Jean Germain (Universidá de Louvain-la-Neuve) y “La presencia de lo categórico y la revitalización de la cultura” de James Fernández McClintock (Universidá de Chicago).

Programa completu de les Xornaes

Esti vienres entamen los actos de Republicastur 2010, nel Vieyu Institutu de Xixón. La primer conferencia va celebrase a les siete la tarde col comandante Robert. Yá’l sábadu, a les 12 va celebrase una charra-alderique titulada “Construyendo República/s: democracia y plurinacionalidad”, con representantes de BNG, UNA, Nafarroa-Bai, Izquierda Castellana, Rede de Conceyos pola III República y la Federación Estatal de Foros pola Memoria.

A les cinco la tarde van entregase los gallardones valores republicanos al Comandante Robert, Dolores Cabra, Manolín el de Llorio, Lorenzo Cordero, Faustino Zapico, Felipe Matarranz y Samuel Fdez “El cabritu”.

A les ocho la tarde el pabellón d’El Llano va acoyer un conciertu con Reincidentes, Fe de rata, Excomunión y Galán.

El presidente d’Asturies, Vicente Álvarez Areces, particiapó esta mañana na inauguración del llar nuevu de l’Academia de la Llingua Asturiana, asitiáu nel monesteriu de les pelayes d’Uviéu. Nel actu, nel que participó tamién la presidenta de la institución, Ana Cano, el presidente asturianu dixo tar “arguyosu” del “vultable” trabayu desenvueltu nos sos once años de gobiernu pa la normalización y dignificación de la llingua asturiana.

Areces recordó que’l 56 % de los alumnos de primaria de los centros públicos del país cursen anguaño llingua asturiana y qu’en secundaria son más del 17 por cientu.

Les obres d’acondicionamientu del edificiu tuvieron un costu d’unos 110.000 euros que financió’l Gobiernu. Según el presidente asturianu, el llaru nuevu de l’Academia de la Llingua ye reflexu del “tratu dignu” que se da al asturianu, con un presupuestu, afirmó, “de más de trés millones d’euros”.

La presidenta de l’Academia de la Llingua, Ana Cano, reconocó al presidente que cumpliera’l so compromisu d’ameyorar les sos instalaciones y aseguró que col llar nuevu “van poder desenvolver d’una manera muncho más digna’l so trabayu y van disponer de capacidá pa acoyer más alumnos en práctiques, tantu de la Universidá d’Uviéu, como d’otros centros europeos”.

Ana Cano afirmo tamién que nel monesteriu van entendese bien coles pelayes “porque nos xune l’so amor a la llingua y la cultura”.

El Vieyu Institutu Xovellanos de Xixón acueye ente’l 21 y el 23 d’ochobre “Optica, festival internacional de vidioarte”, que vien de celebrase en Madrid y Córdoba. La presentación va facese’l xueves 21 a les seis de la tarde. Nel festival van poder vese directos audiovisuales, performances, ponencies, proyecciones. alcuentros con artistes… La entrada a les actividaes ye de baldre.

Programa completu

El colectivu República Asturiana celebra esti sábadu una manifestación contra la celebración de los Premios Príncipe d’Asturies que califca d'”humildación” pal pueblu asturianau. Pa esta organización los premios fueron crearos “por vieyos herederos del franquismu”, ciando a Graciano García, Pedro Masavéu o Sabino Fdz. Campo. Pa la organización los Premios faense como “un intentu de llavase la cara y xustificar, y democratizar, una institución como la casa real que ye heredera del franquismu”.

Critiquen que se presenten estos premios “como populares cuando la presencia a los mesmos ta suxeta a invitación, invitación que nel casu de los empresarios que quieren codease cola “flor y nata” de la burguesía y de los politicos, paguen a 3000 euros l’asientu”. Protesten tamién pol papel del Ayuntamientu d’Uviéu “que tién una delda de 140 millones d’euros, mas 41 millones de cinturón verde, gaste les perres en llimpiar a fondu la ciudá o contratar a grupos de baille tradicional pa dar a les cais un aspectu de solemnidá”.

Recuerden que “la Fundación Principe, que nació con un presupuestu d’once millones de pesetes hai 30 años y agora manexa un presupuestu de 20 millones d’euros (3300 millones de pesetes)” y que se-y cedieronterrenos publicos n’Avilés “pa la construcción de los sos chiringuitos”.

Amás consideren otra humildación que la cultura asturiana “brille pola so ausencia, y que pa un premiu que repercute n’Asturies, el del pueblu exemplar, sía financiáu al 50% pol gobiernu d’Asturies y que’l mesmu fora creáu 10 años mas tarde pa llavase la cara ante los asturianos que daben la espalda a los premios”.

La manifestación va facese’l sabadu 23 d’ochobre a les 13 hores na Estación del norte d’Uviéu.

L’Academia de la Llingua Asturiana organiza por 29 añu consecutivu, les Xornaes Internacionales d’Estudiu, que van tener llugar na Facultá de Filolosía y Lletres, de recién creación pola fusión de les vieyes facultaes d’Humanidaes. El martes 2 de payares, a les 16:30 va inaugurase, cuntando darréu cola ponencia de “Los personaxes femeninos nel teatru asturianu” por Miguel Ramos Corrada. Trés cuartos d’hora más tarde Mª Cristina García García va estudiar “Delles constantes temátiques na poesía del Surdimientu. Una güeyada a l’antoloxía Palabres Clares”.

Pesllando la primer parte de la xornada Santiago Fano Méndez con un estudiu alredor de los cuentos tradicionales asturianos, tituláu “Un averamientu a la cultura asturiana al traviés de los cuentos de tresmisión oral na obra Contáronmelo pa que lo contara, de Milio’l del Nido”. La primer parte va cuntar con un alderique.

Tres la posa, la tarde va tar dedicada a la medicina y los usos llingüísticos nesti campu. A les seis y media Francisco Fernández-Guisasola Muñiz y Joaquín Fernández García van estudiar les “Cayíes y golpes nel llinguaxe coloquial asturianu”, siguiendo una comunicación de trés autores, Xosé Martínez González, Xuan Xosé Lastra Menéndez y Joaquín Fdez. García, col títulu “Plantes diurétiques y cardiotóniques na etnomedicina asturiana”.

La última comunicación de la segunda parte la tarde va tar al cargu de Joaquín Fernández García y Francisco Fernández-Guisasola Muñiz que van facer un repás pelos “Remedios d’orixe humanu na melecina popular asturiana (usu real y simbólicu)”.

Tres un nuevu alderique, Elisabeth Felgueroso López va comentar cuestiones alredor de “La muyer na tonada: representaciones de la muyer nes canciones tradicionales asturianes”, rematando la tarde a les 19:45, Xosé Ramón Iglesias Cueva con un trabayu sobre la presencia de la llingua asturiana n’l Eco de Avilés (1866-1868) y l’alderique posterior.

Segunda xornada: Filoloxía y futuru del asturianu.

El segundu día de comunicaciones de les Xornaes va tener por centru los estudios filolóxicos y el futuru del asturianu. A les 16:30 abre la xornada Xosé Lluis García Arias con un trabayu sobre les trminaciones asturianes en -uga, -úa. Darréu Xabiel Fernández García va comentar “Los llugares de pasu. Una aproximación antrópica cola toponimia”.

A les cinco la tarde Ángel Fernández Barredo y José Antonio Longo Marina van facer un averamientu hestóricu a la parroquia de Carda al traviés de la toponimia. Pela so parte, Cristina García Sampedro va falar na so comunicación sobre l’estudiu codicolóxicu d’El Libro del Prior. Celebrándose darréu un alderique sobres les cuestiones trataes.

A les seis y cuartu, dempués de la posa, Pablo Suárez García echa la so comunicación “Asturianu 2.0: l’asturianu énte la dómina dixital”, siguíu por Rubén Fernández Martínez con un estudiu sobres torgues y propuestes nel usu de la terminoloxía matemática na llingua asturiana. La xornada van pesllala María del Mar Martín Martín, cuntando la esperiencia de la Biblioteca virtual Mª Josefa Canellada: Lliteratura infantil y xuvenil (www.canellada.com); y Marta Mori d’Arriba que va estudiar na so intervención “La traducción nel sistema lliterariu asturianu”.

Xornada cabera: Homenaxe a Xosé Lluis García Arias.

La tercer y cabera xornada va dedicase a les ponencies de los filólogos internacionales convidaos. Gerold Hilty que tien preparada la ponencia “¿Existió en la lengua del siglo xiii un pronombre personal io/ia con la misma función que gelo/gela?”; Dieter Kremer que va dar llectura a “(R)espigando en la documentación altomedieval de León”; Jean Germain que va poner en cuestión “Les termes génériques à base dialectale dans l’odonymie officielle de Wallonie”; y l’académicu d’honor de l’ALLA, James Fernández McClintock que va tratar na so ponencia, la cabera de les xornaes, sobre “La presencia de lo categórico y la revitalización de la cultura”.

A les 19:45 celébrase un homenaxe al Profesor Xosé Lluis García Arias, que llega esti añu a la edá de xubilación como Caderalgu, dempués de qu’una decisión estraacadémica lu dexara ensin la Cátedra nos años ochenta. El filólogu, ún de los más prestixosos d’ente los romanistes, va siguir col so trabayu d’investigador y docente, pero l’ALLA quixo facé-y igualmente un homenaxe al que fuera presidente de la institución a lo llargo de venti años.

Programa completu de les Xornaes

La Xunta pola Defensa de la Llingua Asturiana (XPDLLA) felicítase pola sentencia de la Sala de lo Contencioso-Alministrativo del Tribunal Superior de Xusticia d’Asturies, que declara nulu “por ser contrariu a derechu”, l’artículu de la resolución del 16 de mayu del 2008, pola que yeren necesarios 8 alumnos pa facer grupos d’asturianu en secundaria.

La Xunta felicita a quien llevó alantre la reclamación y esixe que se cumpla la sentencia “y d’esta manera s’entame’l camín de la normalización llingüística y el cumplimientu de la llei nel sistema educativu”.

El domingu 24 entama l’actividá del grupu de monte Chigre La Casa Posafueles, y los escursionistes pueden apuntase hasta’l vienres 22. Les inscripciones pueden facese nel propiu chigre, nel so horariu habitual.