Política

Nuna entrevista concedida por Joaquín Aréstegui al selmanariu Les Noticies, el políticu conservador aclarió la posición del Partíu Popular d’Asturies sobre la posibilidá de qu’Asturies se sumara a la petición del presidente Touriño, de más financiación por mor de la llingua propia de la so comunidá. Una petición que comparten delles fuercies nacionalistes d’Asturies, pero que pa Aréstegui ye “insensato”.

Una propuesta que-y paez “la primer tontería que se-y ocurre” al llíder gallegu. Pal popular esto ye “un disparate”, y añade “Madrid, entós, ¿va pidir más financiación por tener la llingua común?”.

P’Aréstegui “nun val querer preservar la llingua propia y depués pidir una sobrefinanciación”. Camienta que les comunidaes con llingua propia “yá tienen competencies sobre ello, yá reciben dineru por ello, y lo que tienen que facer ye racionalizalo”. Pal popular, lo contrario diba ser “como si los de La Rioja pidieran más perres porque ellí nació’l castellanu y argumentaren que gracies a ellos los españoles disponen d’una llingua común”.

El popular cree que la reforma de la financiación va facese “según el modelu qu’impriman los catalanes”, lo que “nun beneficia a los asturianos” y amás considera “absolutamente insolidariu”. Cree amás Aréstegui que “los socialistes asturianos nun tienen nenguna fuerza en Madrid” polo que sentencia “Asturies nun tien nengún pesu”.

El Bloque por Asturies (BA) pidió güei a los dirixentes de la Federación Socialista Asturiana (FSA-PSOE) que faigan casu a les declaraciones realizaes esti fin de selmana en Galicia pol presidente José Luis Rodríguez Zapatero, nuna nota de prensa na que ficieron alcordanza de la frase del cabezaleru del Estáu:”onde haya una llingua propia, va tener el mió apoyu”.

El Bloque por Asturies señaló nesti comunicáu qu’espera que la FSA-PSOE supere la “esquizofrenia llingüística na que ta instalada dende munchu tiempu”, y qu’asuma’l discursu del PSOE español, aplicando les polítiques defendíes polos máximos dirixentes del so partíu, respetando a la llingua asturiana.

La editorial Espublizastur ta acabante sacar al mercáu “Intervenciones”, de Noam Chomsky, la so primer obra tornada al asturianu y la primer entrega de la colección “Camilo Cienfuegos”. Nel llibru apaecen dellos artículos onde analiza “de forma contundente” la política internacional de los Estaos Xuíos y los temes más d’actualidá nel mundu dempués del 11 de setiembre.

Intervenciones atropa 45 artículos tornaos dende l’orixinal por Llucía Fernández en 230 páxines. Los artículos espublizáronse dende 2001 a 2007 nel New York Times “cola fin de retar al poder y esponer les consecuencies globales de la política y aiciones militares d’Estaos Xuníos en tol mundu”.

N’ellos analícense dende la invasión y ocupación d’Iraq y la presidencia de Bush hasta la invasión de Llíbanu per parte d’Israel o la creciente amenaza de guerra nuclear.

Na nueva colección “Camilo Cienfuegos” la editorial Espublizastur cunta con asoleyar obres de calter global y “d’autores pernomaos”, traducíos al asturianu. Tres “Intervenciones” de Noam Chomsky, el segundu númberu d’esta coleición va ser “Histories” de James Petras.

El fiscal del Tribunal Superior de Xusticia d’Asturies (TSXA), Gerardo Herrero, archivó les dilixencies abiertes de magar la denuncia d’Asciz contra l’alcalde d’Uviéu, Gabino de Lorenzo, en rellación al so participación na sociedá ‘Yeguada de Picos d’Europa’.

Al paecer, eEl fiscal entiende que De Lorenzo ye “ayenu” a la propiedá y a l’actividá de la sociedá de magar la donación de les sos participaciones polo que “nun existe la obligacion d’incluyilu na so Declaración Pública de Bienes nin nes sos declaraciones tributaries”.

Herrerno tampoco nun atopa indicios de “tráficu d’influyencies”, según consta nel decretu nel que comunicó l’archivu de les dilixencies.

Magar de que se cuntaba con una interprete, Pilar Fidalgo, secretaria de l’Academia de la Llingua Asturiana, la xueza de la sala cuarta de l’Audiencia Nacional nun permitió al independentista asturianu acusáu d’intentu d’atentáu contra una sede del PSOE en L’Infiestu, declarar n’asturianu.

El que fuere candidatu d’Andecha Astur nel añu 1999 negóse a declarar nun siendo n’asturianu, lo que dio llugar a una polémica ente la defensa y la xueza Ángela Murillo, que dixo “el bable no es ningún idioma oficial, así que hable usted en castellano”, añadiendo darréu que “Es como si quiere hablar en castúo, no es una lengua oficial”.

L’acusáu contestó a la primer pregunta “¿Ratifica el acusado su declaración ante la policia”, con un “Sí., ratifícola” que supunxo la suspensión temporal del xuiciu nel que’l fiscal Carballo pide pa González Rodríguez 8 años de cárcele y 15 d’inhabilitación absoluta.

La vista quedó aplazada hasta’l 29 de xineru.

O polo menos eso pue dase a entender de les sos últimes declaraciones, feches en Galicia, onde comentó que “guste o non, la mio visión d’España ye qu’ellí onde haya una llingua propia vais tener siempres a un presidente del Gobiernu d’España apoyando esa llingua y esa identidá”. Unes declaraciones feches nel contextu de les elecciones gallegues nes que’l Presidente gallegu, Touriño, va xugase la continuidá del so gobiernu.

El Presidente español defendió amás que’l nuevu repartu de la financiación “incluya una aportación adicional pa les comunidaes con llingua propia”, como propunxo Touriño.

Sicasí, nel PSOE, non tolos llíderes paecen tan d’alcuerdu con esta defensa de les llingües minorizaes fecha pol presidente Zapatero. Amás de les opiniones a la escontra del presidente Areces n’Asturies, el vicesecretariu xeneral del PSOE, Xosé Blanco, afitó nuna entrevista na canal “Intereconomía” que se siente tan español falando castellán o gallegu, la que según esclarió ye la so llingua materna, añadiendo que recuerda “cuando nel colexu la xente lu señalaba por falar en gallegu”, lo que según el políticu gallegu “ye lo contrario de lo que ta pasando anguaño”, insinuando la persecución del castellán nes comunidaes con llingües cooficiales.

Zapatero confirmó’l vienres qu’Asturies va perder financiación por nun declarar la oficialidá

Ángel González, Secretario d’Organización d’IX d’Asturies, reitera que’l nuevu modelu de financiación tien de garantizar la igualdá ente los ciudadanos, independientemente de la rexón onde vivan. Como yá manifestó IX d’Asturies en numeroses ocasiones, la financiación autonómica tien de garantizar los servicios públicos básicos como la sanidá, la educación, los servicios sociales y otros como la xusticia, amás d’atender les especiales característiques de la nuesa rexón como son les dificultaes orográfiques, l’avieyamientu de la población y la intensidá del usu de los servicios públicos. “Na nuesa comunidá autónoma tampoco nun podemos escaecer que tovía tenemos una asignatura pendiente: la reindustrialización dempués de les reconversiones de los años 80 y 90 del sieglu pasáu, y eses dificultaes que siguimos teniendo tienen de ser resueltes con recursos”, asegura Ángel González.

El nuevu modelu de financiación, como asegura’l Secretariu d’Organización d’IX d’Asturies, nun pue crear una España a dos velocidaes na qu’esistan comunidaes más dinámiques que xeneren más empléu y recursos y otra, na que podría encontrase Asturies, con menor desenrrollu y recursos pa salir d’esa situación. Cataluña nun tien qu’escaecer que la población avieyada d’Asturies y la so escasa natalidá van necesitar de recursos pa frenar la fuxida de xóvenes a otres rexones, como yá ocurre agora, porque ésta supondría una desigualdá añadida a la d’una economía menos dinámica que la de so.

“El modelu de financiación nun pue ser el resultáu del chantaxe nin la bilateralidá. Tendrá de ser un alcuerdu de toles autonomíes o, dende llueu, nun sedrá”, conclúi Ángel González.

El presidente del PP d’Asturies y voceru del Grupu Popular na Xunta Xeneral del Principáu, Ovidio Sánchez, responsabilizó güei a PSOE y IX de la paralización del procesu de reforma del Estatutu d’Autonomía asturianu. Sánchez fizo estes afirmaciones nuna rueda prensa nel Parlamentu na que acusó al PSOE y a Izquierda Xunida de nun querer tratar la reforma porque “dificulta’l so trabayu de Gobiernu” tres del pautu algamáu ente les dos formaciones d’izquierdes pa dirixir n’Executivu autonómicu.

L’ex Arzobispu d’Asturies, Carlos Osoro, recién nomáu Arzobispu de la Diócesis de Valencia, ta acabante sorprender a munchos declarando que dende va un mes, cuando supo’l so destín nuevu, deprende “valencianu”. Unes pallabres que llamaron l’atención del Bloque por Asturies que recordó que’“a lo llargo del so llabor al frente del Arzobispáu d’Uviéu, dende xineru del añu 2002, non sólo nun tuvo nengún interés por acercase a los sos fieles al traviés de la llingua asturiana, sinón que prohibió esti idioma en toles celebraciones relixoses”.

El Bloque por Asturies univó un comunicáu nel que comenta qu’Osoro “tendría d’aplicar los valores del cristianismu y respetar los drechos humanos de toa persona y comunidá”, ente los que cita “la so llingua propia”, acusando al mesmu tiempu al ex Arzobispu de “hipócrita” poles sos declaraciones.

Como ún de los exemplos más significativos d’esti comportamientu pa cola llingua asturiana, el BpA recordó’l funeral del xesuita asturianista Federicu Fierro, “nel que vetó l’usu del asturianu pa les sos esequies”.

D’otra banda, el Bloque tresmitió “los sos meyores deseos” al próximu Arzobispu d’Uviéu, naguando porque “demuestre compromisu y respetu pa cola cultura y la llingua d’Asturies”.

A pesar d’esti refugu pa col asturianu que siempres mostró’l cántabru, comentó a la prensa que va llevar ellí onde vaiga, “el conceptu d’asturianía”. Al mesmu tiempu tuvo un recuerdu pa la Santina y dixo ponese en manes de la “Mare de Deu dels Desamparats”, patrona de los valencianos.

La Estaya Cuarta de la Sala de lo Penal de l’Audiencia Nacional va xulgar güei llunes al independentista asturianu Fernando González Rodríguez “Fer”, acusáu d’intentar atentar contra una sede del PSOE en L’Infiestu el 13 de setiembre del añu 2005.

Según l’acusación del fiscal Miguel Ángel Carballo, González Rodríguez sedría culpable d’estragos de calter terrorista en grau de tentativa y pide pa él ocho años de cárcele y 15 d’inhabilitación absoluta.

Según la declaración de la policia, l’acusáu foi deteníu na redolada de la sede del PSOE en L’Infiestu cuando supuestamente se disponía a colocar nel citáu edificiu un artefactu esplosivu compuestu por una garrafa de gasolina, un aerosol, dos petardos y dos meches d’activación. L’artefactu taba yá prendíu, según los testigos policiales, y tuvieron d’apagalu, incautándo-y al acusáu, amás, una octaviella na que podía lleese: “Puxa Asturies dixebrá, puxa Asturies socialista y Puxa la República Popular Asturiana”.

Non ensin sorpresa, va unes selmanes, la sala 4ª de l’Audiencia Nacional garantizaba que Fer tuviera un interprete d’asturianu, pa poder facer la so declaración na so llingua materna, drechu que tienen los falantes de toles llingües oficiales del Estáu.