Política

El Bloque por Asturies vieno acabante pidir a la Delegación del Gobiernu n’Asturies y al Sporting S.A.D. que tomen midíes escontra los Ultras del Sporting pol comportamientu racista y xenófobu que demuestren lo mesmo n’El Molinón como fuera de Xixón. Pal BPA “los insultos racistes y xenófobos son el pan de cada día, igual que símbolos como calaveres nazis o pancartes contra los inmigrantes, Y lo más triste ye ver cómo l’Sporting consiente estes actitues y permite qu’esistan estos grupos dando-yos too topu de facilidaes como acuta-yos una zona específica nel campu y precios populares pa que nesa zona se faiga apoloxía del racismu y del fascismu, dando una imaxe de l’afición sportinguista que nun tien nada que ver cola realidá, y que fai que los socios y aficionaos tean avergonazaos de la imaxe que se da d’una institución centenaria”.

Esti consentimientu choca tovía más pal Bloque en viendo como la Delegación del Gobiernu español n’Asturies persigue a los antifacistes que se manifestaron escontra una concentración en Cangues d’Onís de la organización fascista y ultraderechista Democracia Nacional, pa los que se piden penes de 35 años de carcel mientres se consienten concentraciones d’esti tipu.

Por eso, el BPA “pidi a la Delegación del Gobiernu español n’Asturies, la directiva del Sporting y la comisión antiviolencia que tomen cartes nel asuntu yá, y que nun se tenga que volver a escuchar insultos contra los xitanos, contra los fubolistes negros nin estranxeros, nin ver pancartes nin banderes que fomenten la violencia”.

El Grupu Muncipal d’Izquierda Xunida-Bloque por Asturies-Verdes nel Ayuntamientu de Samartín del Rei Aurelio presentó güei una moción pa proponer que seya’l Conceyu’l que financie la Oficina de Normallización Llingüística, pa evitar el pieslle mentantu s’espera la sovención autonómica que permite’l so funcionamientu.

Na cruzada que vien faciendo dende l’añu pasáu nesti sen xunta UPyD, el Grupu Popular rexistró esti martes nel Congresu los diputaos una proposición de Llei de Reforma de la Llei Orgánica d’Educación col enfotu d’inxertar un capítulu empobinaú a garantizar la enseñanza “del castellán y en castellán”, en toles etapes educatives.

en rueda prensa na Cámara Baxa, la vocera del Grupu Popular, Soraya Sáenz de Santamaría, desplicó que cola presentación d’esta iniciativa la so formación cumple’l mandatu que-y dieron hai poco los militantes nel so Foru Abiertu y el compromisu col que Mariano Rajoy se presentó a les elecciones xenerales del 2008.

La intención del PP ye camudar la llei vixente pa que los pas puean elixir la “llingua na que s’educa a los sos fíos” nes comunidaes billingües.

El temporal valtó estos díes ún de los güés publicitarios qu’Osborne tien instaláu nel conceyu de Llanes. Andecha Astur “considera intolerable que se gaste un solu euru en recostruyir esta amuesa d’españolismu cañí, mentes el padremuñu asturianu sigue esfarrapándose por falta presupuestu”.

Andecha Astur pide a les autoridaes competentes “que s’aproveche la circustancia y se proceda a la retirada de los restos de semeyante amuesa de mal gustu y españolismu cañí”.

La formación independentista recuerda que “yá se manifestara nel so momentu escontra la sentencia del Tribunal Supremu del 30 d’avientu de 1977 que-y apurría valir cultural a esti antiguu reclamu publicitariu, espresión del tardofranquismu y de la falta de gustu”.

Izquierda Xunida de Llaviana quier qu’esti Conceyu vuelva declarar la oficialidá de la llingua asturiana, recuperando’l movimientu que nesti sen punxeron en marcha en 1998 dellos conceyos asturianos. Darréu d’ello va plantegar al próximu plenu la propuesta aprobada naquella ocasión, anque renovada y redautada n’asturianu, y nun sólo en castellán como nel 98.

IX asoleyó esta propuesta nuna nota prensa na que José González, conceyal d’IX y teniente alcalde nel Ayuntamientu amuesa la so intención ye volver “dar puxu” a les polítiques en favor de la llingua asturiana porque, a pesar de que nesti conceyu l’asturianu ye “oficial”, esto sólo se cumplía “a medies” y queden munches cose por facer, como la necesidá de que de magar agora, “tolos vecinos del conceyu se puean dirixir al Ayuntamientu n’asturianu”. Pa eso, IX pretende que se tornen al asturianu un altu porcentaxe d’impresos y documentos alministrativos que s’ofrecen a públicu pa la so presentación. Tamién fala de facer campañes de promoción, cursos, emplegu de la llingua nos carteles, rotulaciones y campañes publicitaries, asina como la utilización de los topónimos tradicionales.

L’ex alcalde d’Avilés, Santiago Rodríguez, facía anuncia esti día de la so renuncia al puestu de xerente de la Sociedá de la Innovación poles diferencies que caltién cola sociedá Infoinvest, acusando al so presidente de “retrasar” actuaciones previstes.

Santiago Rodríguez Vega renunció al puestu de xerente de la Sociedá Isla de la Innovación d’Avilés pola esistencia de diferencies abondes con Infoinvest, y más concretamente col so presidente Juan José Puerta. Rodríguez Vega diz nun entender l’actitú de Puerta sobre’l proyeutu y acusalu de “retrasar acutaciones” y dedicase a crear tensión.

Vega nun asistió esti llunes al conceyu del Conseyu d’Alministración de la sociedá na que diba tomar posesión como conseyeru delegáu y dixo tomar la decisión al camentar que la sociedá “nun taba funcionando d’acordies a los oxetivos” pa los que se pensó.

El presidente de la Eurocámara en Bruseles, Hans-Gert Pöttering, escandalizó al arcu paralamentariu d’izquierdes al refugar l’usu de les llingües rexonales nel Parlamentu de Bruseles, motivu pol que lu criticó ente otros l’eurodiputáu d’ICV, Raül Romeva, que consideró les sos afirmaciones como “llamentables”.

Pottering fizo unes declaraciones a la prensa señalando que s’algamara un “compromisu xustu” nesti tema y que si s’almitiere l’usu nos plenos de “toles llingües rexonales, por mui importantes que seyan, el sistema nun diba poder funcionar”.

Los críticos cola decisión de Pottering pedíen como Romeva “un apoyu decidíu, claro y firme” de los gobiernos nesta cuestión: “Hai munchu tiempu que munchos diputaos reclamamos un derechu fundamental y llexístimu como ye l’usu de la nuesa llingua nel Parlamentu Européu, pero topamos continuamente con dellos frentes opositores”.

Güei, vienres 23 a les 20:00 hores el Conceyu Abiertu va acoeyer la charra “La regasificadora a debate” onde van intervenir Leopoldo García y Paco Ramos, miembros de la plataforma: ¡Regasificadora non!.

El Conceyu Abiertu ta asitiáu na Cai La Gascona 12 baxu-A, Uviéu y el teléfonu de contactu ye’l 985 203 122

La organización política Andecha Astur ta acabante presentar nel Congresu los Diputaos, al traviés d’Esquerra Republicana de Catalunya (ERC), partíu sociu de la formación asturiana na coalición Europa de los Pueblos, una entruga na que-y esixe al Gobiernu español que dea les desplicaciones oportunes “sobre les mentires treslladaes al Conseyu d’Europa no que cinca a la situación actual de la llingua asturiana y que se recueyen nel informe sobre les llingües minoritaries asoleyáu va unes selmanes”.

Ente les mentires denunciaes por Andecha Astur ta la de que’l “non reconocimientu d’oficialidá del asturianu debíase a la falta de normalización de la llingua y d’una lliteratura escrita afayadiza”, lo que pa la formación independentista “amuesa la mala intención pela parte de les autoridades competentes y que contrasta colo que se diz dende l’organismu européu”.

Andecha Astur recuerda que “demientres la visita nel territoriu informóse al Comité d’Espertos que l’Academia de la Llingua Asturiana tenía finada la versión normalizada de la llingua (diccionariu, gramática, nomenclatura de los topónimos) y que tamién hai consensu social sobro l’emplegu de la llingua (el 60% de la población ta a favor de la cooficialiá)”.

Andecha Astur, amás de pidir al Gobiernu español qu’esclariase a la ciudadanía asturiana “por qué se mintió nel informe unviáu al Conseyu d’Europa”, pidió tamién que cumpliere cola Carta Europea de les Llingües Rexonales o Minoritaries, que tien roblada, y colos encamientos del organismu européu, presionando nesti casu al Gobiernu d’Asturies pa que declare la oficialidá de la llingua asturiana.

El presidente de la Xunta de Galicia, Emilio Pérez Touriño, desplicó güei en Zamora que confía en que la emponderación de los costes derivaos de la normalización de la llingua propia gallega, al traviés de los recursos que prometió l’Estáu nesti sen, beneficie económicamente a Galicia, en cuanto a financiación autonómica

.

Lles declaraciones fízoles Touriño a los medios de comunicación, tres celebrase’l conceyu ente los presidentes de comunidaes fronterices con Portugal, nel marcu de la XXIV Conceyu Hispanu-Lusu.

Touriño comentó les ayudes a la normalización de la llingua, además d’otros temes como l’espardimientu y l’avieyamientu poblacional. Estos dos últimos criterios tamién pide tenelos en cuenta’l Gobiernu asturianu que, sin embargu, nun ta interesáu en recibir fondos por tener una llingua propia como Galicia.