Política

El diputáu d’IX, Francisco Javier garcía Valledor, pidía esti sábadu nun comunicáu qu’asoleyaba pela tarde, la destitución de la Directora Xeneral de Política Llingüística pola so “indiferencia, dexadez, infravaloración o despreciu hacia l’asturianu” no que cinca a la denuncia que Xuristes pol Asturianu ficiere esta selmana pola actuación del Principáu nel informe del Conseyu d’Europa. Bloque por Asturies y UNA tamién criticaron en dellos comunicaos esa actuación mientres que Consuelo Vega negaba esti domingu nun artículu en La Nueva España les acusaciones d’omisión consciente de datos.

Nel comunicáu de Valledor señálase la confirmación de que “la responsabilidá de la desidia y del despreciu a la nuesa llingua nun yera, como quería facer ver Doña Consuelo Vega, responsabilidá del Gobiernu d’España, sinón del Gobiernu asturianu al traviés de la Dirección Xeneral que ella dirixe”. Según el diputáu d’IX-BA-LV “aparte de comprometese a revisar de nuevo tola documentación nel periodu de recoyida de documentación por parte del Comité Europeo y siguir afirmando que ‘nun aportamos información porque nun hubo nenguna petición’, afirma nun recordar una carta del 29 d’ochobre de 2008 que foi remitida al so nome pol Ministeriu d’Administraciones Públiques firmada pol Director Xeneral de Cooperación Autonómica Fernando Gurrea onde s’adxuntaba’l documentu provisional y solicitaba qu’unviáse’l parecer de la Comunidá Autónoma. La carta nun tuvo respuesta, la Directora Xeneral de Política Llingüística dio la callada por respuesta. Y si hubo esta carta n’ochobre de 2008 resulta poco creíble que dende’l mesmo departamentu del Ministeriu nun se consultare previamente”. Valledor afita que “la indiferencia, dexadez, infravaloración o despreciu hacia l’asturianu o’l gallego-asturiano, amosada por Doña Consuelo Vega, xunto coles falsedaes que treslladó a la sociedá asturiana tratando d’escusar la so inaceptable actitú” tien de llevar arreyao “responsabilidaes polítiques, que nesti casu resulten evidentes”, y darréu d’esto pidi la destitución como Directora Xeneral de Política Llingüística de Consuelo Vega.

El Bloque por Asturies y Unidá Nacionalista Asturiana tamién asoleyaron esti día les sos critiques. Dende’l Bloque llamenten “la incompetencia y l’abandonu de la señora Directora Xeneral de Política Llingüística Consuelo Vega col casu de la llingua asturiana y el Comité d’Espertos en Llingues Minoritaries y Rexonales que depende directamente del Conseyu d’Europa” y piden “a la señora Vega que rectifique, se ponga a trabayar y mande al Conseyu d’Europa y al Ministeriu d’Alministraciones Públiques tola documentación sobre la situación de la llingua asturiana”.

La fin de selmana vieno cargada de polémica dende que se filtraren los conteníos de la carta que’l Ministeru d’Alministraciones Públiques-y remitiere a la Dirección Xeneral de Cultura y Política Llingüística p’axuntar información de cara a la redacción del documentu del Comité d’Espertos sobre Llingües Rexonales y Minoritaries del Conseyu d’Europa, nel qu’a la fin apaecíen datos ensin actualización dende 1991. La publicación de los conteníos d’esta carta fizo que se multiplicaren les protestes, declarando Consuelo Vega, responsable del departamentu al que s’unvió la carta dende’l Ministeriu, que “nun recordaba que llegare a les sos manes”.

Énte estes declaraciones, el diputáu d’IX-BpA-Verdes na Xunta Xeneral, Francisco Javier García Valledor, pidió la destitución de Consuelo Vega, anguaño cabezalera de la Política Llingüística n’Asturies, pola so “indiferencia, dexadez, infravaloración o despreciu pa col asturianu y el gallego-asturianu”, amás de poles “falsedaes que treslladó a la sociedá asturiana tratando d’escusar la so inaceptable actitú”, lo que pa Valledor, “ha conllevar responsabilidaes polítiques, que nesti casu resulten evidentes”.

El diputáu asturianu recordó que “Vega negó que fuere consultada sobre la información remitida pa la ellaboración del documentu”, lo que resulta pa Valledor “inesplicable ya inaceptable”, yá que Vega “escaeció’l llabor de normativización fechu pola Academia de la Llingua”, confirmando, pal miembru d’IX “que la responsabilidá de la desidia y del despreciu a la nuesa llingua nun yera, como quería facer ver doña Consuelo Vega, responsabilidá del Gobiernu d’España, sinón del asturianu”.

Col envís de zarrar la polémica, Consuelo Vega remitió una carta a los medios, na que da esplicaciones sobre esta polémica y la so participación nel casu. Vega recuerda nel mesmu que’l 4 d’abril de 2008 aprobóse un informe nel que nun participaron redactándolu o aprobándolu”, yá que “naide ta más interesao que’l Gobiernu asturianu n’aportar los sos datos sobre l’aplicación n’Asturies de la Carta de les Llingües”, que según Vega “ta cumpliéndose dende’l Gobiernu asturianu”. Sicasí, la Directora Xeneral recordó que l’informe, “nun afeuta a la situación del asturianu, la so financiación, la so consideranza o’l so desenrrollu llegal o programes de normalización”.

Asturnews ufre la carta completa de Consuelo Vega na so versión orixinal en castellán.

Artículu completu de Consuelo Vega sobre la Carta de les Llingües Rexonales o Minoritaries (castellán)

La Xunta Xeneral refugó esti día, colos votos del PSOE y IU-BA-Verdes, una proposición non de llei del PP que pidía la eliminación de la tarifa autonómica del impuestu sobre ventes minoristes de determinaos hidrocarburos, más conocíu como ‘céntimu sanitariu’ dao que l’orixe de la creación del tributu ye financiar la Sanidá. El PSOE caltuvo que nun existe denguna razón pa eliminalu calificando de “frívola” la propuesta.

IU-BA-Verdes reonoció que nun-y presten los impuestos indirectos, pero que ye la única alternativa güei pa caltener el gastu en sanidá.

El Gobiernu d’Asturies ta acabante facer oficiales los topónimos tradicionales de Cangues, Mieres y Sobrescobiu. Dende la toma d’esta decisión, la denomación oficial na so forma tradicional ye la única oficial y les Alministraciones Públiques tienen que dir adecuando, de manera progresiva, les rotulaciones en víes públiques y carreteres de los trés conceyos, asina como de mapes y planos oficiales a les formes toponímiques establecíes nos Decretos.

Con estos, yá son 36 los conceyos asturianos cola toponimia tradicional oficializada.

Según informaba ayeri’l Diario de León, lo mesmo la Conseyería de Cultura que la d’Educación, “de les que tendría de depender l’estudiu y protección del patrimoniu llingüísticu de la comunidá”, nun tienen “nenguna regulación sobre esti tema, un añu dempués de l’aprobación del nuevu Estatutu d’Autonomía de Castiella y Lleón”.

Un Estatutu nel que pue lleese, nel so artículu 5.2 que “El lleonés va ser oxetu de protección específica per parte de les instituciones pol so particular valir dientro del patrimoniu llingüísticu de la comunidá. La so protección, usu y promoción van ser oxetu de regulación”.

La realidá ye que la Xunta, informa’l diariu lleonés, “admite que nun dispón de planificación dala, nin a curtiu nin a llargu plazu, pa llevar alantre precisamente esi llabor de protección, usu y promoción”.

La Conseyería de Cultura respondió a Diario de León que “el tema ye más bien competencia de la Conseyería d’Educación y que l’Institutu Castellanu y Lleonés de la Llingua tamién estudia el lleonés, dedicando cursos monográficos al mesmu”.

La estaya d’educación castellanolleonesa declaró epla so parte qu’el so ámbitu d’acción ye la “educación reglada”, polo que “nun entren dientro de les sos competencies les clases de lleonés, optatives, n’horariu estraescolar, que se tán impartiendo actualmente en dalgunos colexos de la capital, o otros cursos p’adultos”. Anque añadieron que “otra cosa sería qu’hubiere los suficientes alumnos como pa formar un grupu na Escuela Oficial d’Idiomes”.

La Conseyería nun ve “probable” que se lleguen a impartir clases “realmente oficiales y curriculares rellacionaes cola llingua y la cultura propia nos colexos ya institutos de les zones nes qu’entá se fala lleonés”, comenta’l periódicu. Unes declaraciones qu’Educación sofita en que “el lleonés nun ye una llingua cooficial”. “El casu del gallegu nel Bierzu y el vascu en Miranda d’Ebro, ye distintu, ellí son cooficiales n’otres comunidaes coles que collaboramos pa dar les clases” añaden na Conseyería. Amás, nun argumentu que recuerda a los daos por dellos políticos asturianos, comentaron que “l’enseñu del lleonés dependerá de la demanda social qu’haya”.

Andecha Astur denuncia que la ZALIA “va suponer la destrucción del valiosu padremuñu etnográficu y arqueolóxicu d’esta collación xixonesa”.

Pa la formación “Nun ye denguna novedá el desenfotu de la Conseyería Cultura haza’l Padremuñu asturianu y nel casu de San Andrés de los Tacones, amiéstase amás el despreciu del Ayuuntamientu Xixón pol nuesu padremuñu”.

Andecha Astur vien faciendo un seguimientu de la desapaición de varies paneres, dos d’elles de 1805, y horros a istancies de l’Asociación de Vecinos de San Andrés que punxo en conocencia de la organización política la so sospechosa esapaición de la nueche a la mañana, según comenta la organización, que reconoz que “yá nel mes de setiembre del añu pasáu, y tres dos meses de silenciu de la Conseyería Cultura al escritu de denuncia de los vecinos, Andecha Astur interesóse directamente pol tema obteniendo rempuestes evasives por parte los téunicos de Padremuñu de dicha Conseyería, que manifestaron desconocer el paraeru de les paneres y ensiquiera si fueren destruyíes o treslladaes”-

A xuiciu d’Andecha Astur “les entrugues que tienen plantegaes agora la Conseyería Cultura y l’Ayuntamienu Xixón son ¿Qué piensen facer pa que nun esapaezan los horros y paneres de San Andrés qu’entá queden en pie? ¿Cómu piensen conservar el castru d’El Cuetu? ¿Piensen sacrificar el Padremuñu Cultural de San Andrés que ye de tolos asturianos pa costruyir la ZALIA?”.

El Congresu de los Diputaos refugó ayeri, colos votos de PP y PSOE, sendes proposiciones non de lei de CiU y ERC poles que s’encamentaba al Gobiernu a modificar la normativa pa que les sociedaes pudieren inscribise nel Rexistru Mercantil en cualquiera de les llingües cooficiales y non sólo en castellán. Dambes iniciatives contaron sólo con dos votos a favor, los de los proponentes, frente a 35 a la escontra.

Nuna rueda de prensa celebrada esti martes, el Bloque por Asturies amosó la calificación de “inaceptable” pa l’actitú que ta calteniendo la Universidá d’Uviéu pa cola llingua asturiana, en referencia a la propuesta d’especialidaes de la direición de la Escuela de Maxisteriu, qu’escluyía l’asturianu, y qu’a lo postrero foi refugada en votación de la Xunta d’Escuela.

El voceru del Bloque por Asturies, Pablo Fernández, refirióse tamién nesta rueda de prensa a la situación de la llingua asturiana en xeneral, y criticó tres aspeutos: “el tratu universitariu, el de la Conseyería de Cultura y el políticu y económicu, no que cinca al sistema de financiación autonómica”.

Pablo Fernández acusó tamién a la Conseyería de Cultura del Gobiernu asturianu de mentir al Conseyu d’Europa, en referencia a la respuesta que l’Alministración autonómica dio a la demanda d’información sobre la llingua per parte de la comisión d’espertos encargada d’evaluar el cumplimientu de la Carta Europea de Llingües Minoritaries.

El representante del Bloque recuerda que l’Executivu asturianu dixo que “la llingua nun tenía nin lliteratura, nin gramática, lo cual ye una mentira”. “Y si mienten ye porque nun quieren que se conoza la verdá”, señaló, p’acabar diciendo que los aturianos “nun merecen un gobiernu que mienta”.

La propuesta presentada apocayá por un grupu de claustrales ente los que taba la profesora opositora Paz Andrés, foi refugada por mayoría na Comisión d’Estatutos de la Universidá d’Uviéu, que celebró estos díes un conceyu ordinariu. La propuesta del grupu de claustrales proponía que l’asturianu tuviere reglao d’esti xeitu: «el so usu va ser el de llingua propia de la Universidá d’Uviéu, siendo emplegada n’igualdá de condiciones y garantizándose la non discriminación de quien la emplee en cualesquier contestu universitariu».

El secretariu xeneral de la Universidá, José Francisco Fernández, comentó que’l testu yera “prácticamente idénticu al d’universidaes en comunidaes onde esisten dos llingües oficiales, que nun ye’l casu d’Asturies”. Amás, recordó delles sentencies xudiciales a la escontra de que “determinaes instituciones tengan capacidá pa declarar la oficialidá d’una llingua, como ye’l casu de los conceyos”.

Una enmienda transaccional plantegada, que pretendía treslladar a los estatutos de la Universidá lo que diz la llei d’Usu de 1998 proponía redactar «tolos miembros de la comunidá universitaria tienen drechu a emplear el bable asturianu, yá seya espresáu de pallabra o per escrito», pero refugóse tamién por una amplia mayoría.

Nos estatutos actuales señálase que «la llingua asturiana va ser oxetu d’estudiu, enseñanza ya investigación nos ámbitos que correspuendan».

Énte l’anunciu de l’agrupación llocal d’Izquierda Xunida en Llaviana de querer aprobar una nueva declaración d’oficialidá nel conceyu , Andecha Astur considera que la propuesta ye “una llimpieza de cara y una nueva cortina de fumu cola que tentar tapecer la conculcación sistemática de los drechos llingüísticos que fai en tolos conceyos nos que tien responsabilidaes de gobiernu”.

Andecha Astur pide a IX “que dexe d’engañar a los ciudadanos asturianos diciendo que defende la oficialidá del asturianu, cuando los fechos dexen bien nidio que cada vegada que tuvo la oportunidá de sofitar un estatus xurídicu d’oficialidá pa la llingua asturiana que garantizara los drechos llingüísticos de los asturfalantes, tanto nel parllamentu asturianu, como nos propios conceyos, prefirió vender los sos compromisos y promeses elleutorales a cambiu de puestinos y perres”.

La formación nacionaliga encamienta a los grupos políticos presentes na Casa Conceyu de Llaviana “y n’especial a Izquierda Xunida pa qu’aprueben a la fin unes Ordenances Municipales d’oficialidá de la Llingua Asturiana que garanticen y respeten los drechos llingüísticos de los vecinos y que dignifiquen la llingua propia d’Asturies”.

La formación propone nesi sen la so propia vía, y va presentar “nuevamente” nel rexistru de la Casa Conceyu la so propuesta “d’Ordenances Municipales d’oficialidá y pidirá defendeles en plenu”.