Política

Izquierda Unida d’Asturies denunció esti día na Xunta Electoral la existencia de carteles xenófobos y racistes del Frente Nacional pala campaña de les elecciones europees del 7 de xunu.

Estos carteles, que “tán pegaos en gran parte d’Asturies”, amuesen conseñes como “España no necesita parches”, siguíes del llogotipu del Partíu Popular, o “Tú eliges”, nel que se fai una división ente les propuestes del presidente del Gobiernu y el presidente del PP: “inmigración masiva, ayudas a los bancos, delincuencia y miedo, paro y empleo precariu”. Tamién s’amuesen les propuestes del Frente Nacional: “los españoles primero, ayudas a las familias y pymes, seguridad ciudadana, empleo y derechos sociales”.

El presidente del Gobiernu, José Luis Rodríguez Zapatero negó esti martes que’l castellán tea prohibíu o les llingües minoritaries marxinaes, contestando-y al voceru del PNV nel Senáu, Joseba Zubia, que-y entrugaba na sesión de control al Gobiernu pol apoyu d’esti a les llingües minoritaries.

El presidente del Gobiernu aseguró nel Senáu que la “realidá” llingüística española ye un “puntu d’equilibriu, un puntu intermediu” ente los que piensen que’l castellán “ta prohibíu nuna parte del territoriu nacional” y los que ven “marxinaes” les llingües cooficiales, pero nun fizo referencia denguna a la proteición de les llingües minoritaries nun declaraes oficiales como’l casu l’asturianu.

Joseba Zubia acusara al presidente de nun cumplir coles sos intenciones de 2004, emplegando l’informe del comité d’Espertos del Conseyu d’Europa qu’analiza la situación d’estes llingües nel Estáu.

La campaña entamaba a les 00:00 del vienres 22 de mayu y Andecha Astur facíalo con pegaes de cartelos cola conseña “¿Vamos quedar paraos? ¡Asturies [r]esiste!” en delles llocalidaes del país demientres tol día. Esti sábadu l’actu central d’apertura de campaña ta incluyíu dientro de los actos d’Andecha Astur pal XII DIA D’ANDECHA que se va desendolcar en Ribeseya.

Andecha Astur ye una organización política asturiana, d’izquierda y nacionalista. Nos últimos 5 años venimos trabayemos n’Europa, al traviés del nuesu eurodiputáu, problematiques asturianes abondo como’l sobrecoste del musel, la ZALIA, cuestiones ambientales, culturales… y nestes elleiciones del 7 de xunu presentamos la nuesa candidatura al Parllamentu Europeu ufriendo una opción asturiana a tolos asturianos y asturianes que residen nel estáu español.

L’Ayuntamienu de L.lena vieno acabante poner como requisitu l’usu l’asturianu na convocatoria de sovenciones p’asociaciones y colectivos del conceyu, na que s’inclúi’l requisitu d’usar la llingua asturiana nos carteles y folletos de publicidá de les actividaes que se desarrollen.

Nun comunicáu espublizáu esta selmana, el Conceyu desplica que na convocatoria recuéyese, como obligación, “facer publicidá billingüe o sólo n’asturianu”, en tola promoción o información que se faiga de les actividaes sovencionaes. Pa eso ponse a disposición de les asociaciones l’usu del Serviciu de Normalización Llingüística de L.lena, y dexa claro que “l’incumplimientu de les obligaciones pue sancionase cola perda de la sovención”.

La propuesta “tien por oxetivu reforzar y dir inxertando la presencia de la llingua asturiana y la so varidá l.leniza. Amás, los colectivos y asoc; venlo con bonos güeyos como midida de recuperación y de dir encaminaos hacia la normalización social de la llingua”.

Una web qu’acaba arrancar sofita un intentu ciudadanu d’algamar la xunidá del tol nacionalismu asturianu d’izquierdes, entamando pola xuntanza d’UNAy Andecha.

Sigún se diz na presentación de la web “anque ye bien cierto que nin UNA nin ANDECHA ASTUR son los únicos partíos nacionalistes d’izquierdes, camentamos que la xunidá ha de pasar pel entendimientu y xuntanza, nun primer momentu, d’estos dos partíos, másimos exponentes d’ello”.

La situación anguaño n’Asturies ye llaceriosa, poro, esta páxina naz col enfotu d’algamar esa xuntura, “de facer pensar a los integrantes d’ambes formaciones pa que dexen de llau les sos diferencies (más bien pequeñes no que cinca a lo político) y faigan una xuntanza de fuercies. Namás asina podrá Asturies cuntar con una formación nacionalista de pesu”.

Pa ello, esta web ye una manera d’amosar toles anuncies sobre UNA y ANDECHA ASTUR qu’apaecen na prensa dixital o llugares d’información afayadizos. Albidramos que ye una manera de facer ver que les xeres d’estes formaciones polítiques tan lloñe de ser estremaes y que bien pueden facer camín n’andecha.

Pola Xuntanza

Esti próximu sábadu, 23 de mayu, la formación nacionalista va celebrar una nueva edición del “Día d’Andecha” que nesti añu llega a la so XII edición y que s’entama en Ribeseya.

El día d’Andecha ye, según espresen los responsables d’AA, la so conmemoración de la declaración de soberanía de la Xunta Xeneral el 25 mayu de 1808. El día va entamar con descensu reivindicativu del ríu Seya y va siguir con partida de bolos y taller de cuatreada, pasucais de gaiteros, espicha con música del país, mitín y conciertu.

El XII Día d’Andecha coincide col entamu de la campaña electoral, polo qu’esta edición tien una mayor relevancia política al quedar incluyida dientro de los actos de campaña que va desendolcar Andecha Astur, anque comenten, “ensin perder de vista que ye’l día de la organización y la nuesa conmemoración d’un fechu hestóricu de tanta relevancia como la declaración de soberanía de 1808”.

Nel actu políticu van intervenir Mario Arbesú, candidatu d’Andecha Astur a les eleiciones europees, Iván Martínez, voceru d’Andecha Astur en Ribeseya y Marcos Ménendez, voceru de la organiación xuvenil Darréu.

Nel conciertu van participar los grupos folk “Pa musquis” y “Taranus”, y les formaciones rock y punk “Trueba” y “Agua Cero”.

Depués de qu’esta tarde la Fiscalía confirmare definitivamente que la candidatura d’UNA nun presenta nengún problema llegal, la Xunta Executiva Nacional d’UNA quier tresmitir la nota que vien darréu:

UNA ye una organización política asturiana, que tien un ámbitu d’actuación esclusivamente asturianu, polo que son insultantes y ridícules dafechu les informaciones que faen referencia a la posible vinculación de la so candidatura con intereses ayenos a los asturianos.

“UNA débese a los sos militantes y dirixe la so actividá política a la sociedá asturiana, y nunca permitiría vese instrumentalizada por naide. Nesi sen, cualquier bilordiu na llinia de que la llista d’UNA ta siendo usada por cualquier sector pa presentase a las eleiciones europees, ye falso, una babayada, un absurdu de dimensiones descomanaes que nun tien nenguna base”.

UNA alvierte que va denunciar por difamación a tol que faiga por esparder un bulu de semeyantes dimensiones que nun tien base nenguna.

UNA presentó 58 avales de cargos electos representativos de tola xeografía estatal y de tol espectru ideolóxicu, pa los que pidimos el máximu respetu ya que gracies a ellos pudimos tar presentes nestes eleiciones adaptándonos a la llexislación vixente. Estos avales namás representan el sofitu d’eses persones a que la UNA pueda exercer el derechu a presentase a las eleiciones, y en nengún casu suponen nengún tipu de vinculación, afinidá política o condicionamientu con respectu a les distintes y variaes organizaciones a les que pertenecen cada una de les 58 persones.

UNA pide el máximu respetu tamién pa los 55 asturianos y asturianes que conformen la so llista, ya que nun se pue poner en cuestión en nengún momentu la honorabilidá de les personas que la componen con insinuaciones tan graves como les que tán sufriendo y que van tener consecuencies irreparables pa delles.

Per otru llau, Unidá Nacionalista Asturiana (UNA) quier agradecer el apoyu que tarecibiendo nes últimes hores dende distintos sectores de la sociedá asturiana que, al igual que UNA, asisten con indignación e impotencia a esta caza de bruxes, a esti auténticu esperpentu que pon nel más absoluto de los ridículos a los que lu esparden.

La Comisión de Cultura del Conceyu d’Avilés aprobó aprobó’l dictame de toponimia pol que los nomes tradicionales van pasar a ser los únicos oficiales.El documentu inclúi la reconocencia de la siguiente denominación pa les sos seis parroquies: Avilés, Miranda, San Cristóbano o San Cristóbal d’Entreviñas, San Xuan de Nieva, Navarro o Valliniello y La Madalena o Corros.

Amás, incorpórense otros términos de pueblos o barrios, como L’Arbolón, Les Arobies, Les Meanes o El Parche, en referencia a la Plaza del Ayuntamientu. Tamién apaecen El Poblao de La Carriona, El Poblao de Llaranes o La Xuncarosa, que tamién se podrá llamar Barrio de La Luz.

Nel BOPA de 13 de mayu del 2009 publíquense les bases reguladores y la convocatoria de subvenciones en visu a fomentar l’usu del asturianu y del gallego-asturianu n’iniciatives particulares, empresariales o asociatives, y en xeneral como vehículu d’espresión cultural.

Ente elles alcuéntrense les ayudes económiques pal desarrollu d’actividaes específiques d’asociaciones y otres entidaes ensin ánimu de lucru; les ayudes dirixíes a estudios que, tratando de dalgún tema d’interés, tean redactaos n’asturianu o en gallego-asturianu, o que traten d’estos idiomes nes sos dimensiones llingüística, lliteraria, sociollingüística, musical o cultural en xeneral, independientemente de la llingua en que tean redactaos; les ayudes pa la creación lliteraria n’asturianu o gallego-asturianu nes modalidaes de poesía, narrativa, teatru y ensayu; ayudes a empreses qu’usen l’asturianu o’l gallego-asturianu n’actividaes destinaes al públicu; ayudes pa empreses dirixíes a la realización d’actividaes cinematográfiques y de videu de tipu creativu; ayudes a empreses cola fin de promocionar la música n’asturianu o en gallego-asturianu que se faiga en distintos soportes; y ayudes a medios de comunicación pa la producción d’espacios onde s’use l’asturianu, o’l gallego-asturianu nel so ámbitu.

L’últimu día pa presentar proyectos ye’l 12 de xunu de 2009.

La Xunta Electoral Central vieno acabante proclamar esti día les candidatures que van concurrir a les elecciones europees del próximu 7 de xunu y ente les que s’alcuentren les de 3 asturianos: UNA, Andecha Astur y el Bloque por Asturies, estos caberos en coalición con Izquierda Xunida.

Como ya ficiere anuncia Asturnews, UNA, Andecha Astur y Bloque por Asturies, son los partíos d’ámbitu asturianu que van presentase finalmente a les elcciones europees de xunu. Unidá Nacionalista Asturiana y Andecha Astur diran en solitariu, y Bloque por Asturies en coalición con Izquierda Xunida.

La segunda d’estes formaciones pudo a lo último inscribir la so candidatura, pese a que de primeres una resolución xudicial torgára-ylo tres suspender provisionalmente les sos actividaes.

Les formaciones figuren na llista de partíos políticos que se van presentar al procesu européu, publicada esta selmana oficialmente nel Boletín Oficial del Estáu (BOE) pola Xunta Electoral Central.

La llista d’Andecha Astur ta encabezada por Mario Arbesú, que yá fora candidatu a l’alcaldía de Noreña por esta organización, allugándose nel númberu dos Arturu Xosé Bermeyu y nel númberu trés Paloma García Fernández. Pela so parte, UNA yá informare nun comunicáu de l pesentación del so militante xixonés Daniel Fernández Blanco como cabezaleru, siguíu por Yolanda González Huergo, y Fernando Ornosa, ex voceru del Conceyu Abiertu pola Oficialidá, nel númberu trés. A dambes organizaciones torgó-yos el Bloque Nacionalista Galego la posibilidá de tomar parte na coalición Europa de los Pueblos.

Per otru llau, el Bloque per Asturies ta incluyíu na llista de la coalición La Izquierda, de la que formen parte tamién Izquierda Xunida, Iniciativa Per Catalunya-Verds, Esquerra Unida i Alternativa.