Política

El diputáu del grupu parlamentariu d’IX-BA-Verdes Francisco Javier García Valledor acusó esti dia nuna rueda de prensa al PSOE de deslleal porque “incumple de nuevo dalgunos acuerdos incluyíos nel pactu de gobiernu ente dambes formaciones”. Valledor refiríase a l’aprobación pel Conseyu de Gobiernu de la llinia d’ayudes a la compra de llibros de testu que sigue les mesmes bases d’anteriores convocatories y nun recueye’l carácter progresivu reclamáu por IX ya incluyíu nel pactu, según el diputáu.

La Federación Norte de Ciudadanos – Partido de la Ciudadanía albidra como una incoherencia y un grave error políticu la iniciativa del Partíu Popular n’Asturies “p’avanzar na cooficialidá de la llingua asturiana”, en referencia a la propuesta presentada pol PP na Xunta Xeneral la selmana pasada.

Dende Ciudadanos consideren sorprendente y engañosa “la doble política del Partíu Popular nes distintes Comunidaes Autónomes. Mientres Alberto Nuñez Feijoo “trata de poner frenu al procesu d’inmersión llingüística que l’anterior gobiernu instalarr en Galicia, n’Asturies, el so mesmu partíu da los primeros pasos p’hacia un sistema asemeyáu al promovíu polos nacionalistes gallegos”.

Nel comunicáu, firmáu pol presidente de ciudadanos nel noroeste, Pablo Yañez González, alvierte “del error que supón imponer artificialmente una llingua que nun tien nin la oficialidá reconocida, no que supón l’iniciu de la creación d’ una realidá de artificial con evoluciones como les yá vistes en Galicia, Baleares o Cataluña.

Ciudadanos nun cree amás, “que seya’l momentu más afayadizu pa xenerar gastos nuevo ya innecesarios a una Alministración Pública que malpenes ye viable pa sufragar el gastu públicu yá establecíu”.

El Bloque por Asturies, al traviés del so voceru, Pablo Fernández, pidió al Partíu Popular que seya “coherente colo que diz” porque piden la creación d’especialidá del asturianu, cuando “son los primeros que criminalicen a los que defenden la llingua”.

Pal BpA la posición del PP “y falsa” y namás quier “facer una resquiebra nel Gobiernu d’Asturies”.

“El PP usa l’asturianu pa pone-y una boina a Gabino de Lorenzo (alcalde d’Uviéu) o pa criminalizar a los que defenden el so usu”, espresó’l voceru del Bloque, y añadió qu’ellos tán d’alcuerdu cola propuesta del Partíu Popular, “pero nun ye creíble por que la presenta”.

“Ye una contradicción, porque lo que busca nun ye que s’apruebe la especialidá docente, sinón abrir una brecha nel Gobiernu, y lo diz xente que ta siempre a la escontra del asturianu y que mos comparen col ‘abertzales’ o etarres”, recalcó’l voceru del Bloque.

Pablo Fernández señaló que dende’l Bloque por Asturies, conviden al Ayuntamientu d’Uviéu a qu’apruebe la toponimia o a crear la oficina del serviciu de normalización llingüística, dao qu’estos dos fechos “diben avalar la postura que tenten de treslladar dende’l PP a la opinión pública”.

“El día qu’entiendan la defensa del asturianu como un exerciciu llexítimu y un derechu humanu, esti país va tener domesticao a una de les clases dirixentes más salvaxes y más antidemocrátiques que tien Asturies”, apuntó’l voceru del Bloque por Asturies.

El PP pide na Xunta reconocencia oficial pala especialidá docente de Llingua Asturiana

El Procurador del Común de Castiella y Lleón, cargu equivalente al Procurador Xeneral d’Asturies, remitió una resolución a la Xunta d’esta comunidá pa que llexisle la protección, l’usu y la promoción de la llingua lleonesa, como resultáu d’una quexa presentada pola asociación zamorana Furmientu, el pasáu mes de payares.

Furmientu señala que l’Estatutu d’Autonomía de Castiella y Lleón, aprobáu en payares de 2007 recoyó per primer vegada una reconocencia esplícita del lleonés como parte del patrimoniu cultural de la comunidá pero, «pasáu un añu dende la so aprobación, ye evidente que l’Alministración autonómica nun llevó alantre, nin tan siquiera anunciao, nengún tipu d’acción empobinada al mencionáu desenrrollu llegal».

La Xunta tien un plazu de dos meses p’aceptar o refugar la resolución. Furmientu

El gobiernu de L.lenizu, va denunciar a la Xunta Ellectoral de zona pol incumplimiento de Decretu de Toponimia aprobáu nel añu 2005, no referente a los nomes de los l.lugares del Conceyu, sigún comunicaba esti sábadu’l conceyal de Cultura, David Suárez nun comunicáu de prensa.

Suárez diz al respeutive que “cuando s’aprobó l’espediente de toponimia, al traviés del Serviciu de Normalización, púnxose en contactu col INE pa notificar los cambios nos nomes de los pueblos y qu’actualizasen el nomenclátor vieyu col decretu de toponimia puesto que cualisquier cambiu que se faiga nel padrón hai que lo notificar al INE.”

“Depués de dos años, más o menos, de nun saber qué pasaba col espediente nuestru, vulévese a investigar y foi cuando se descubre que l’INE nun actualizaba’l nomenclátor, porque nun admite’l puntu como grafía, pa les “L.l”. Toles actualizaciones que se pudieran facer con un topónimu que tuviera puntu, daben error, colo cual ta paráu tol censu.”

Tres varios alcuntros cola Dirección Xeneral de Política Llingüísitca, y viendo que dende ellí nun se facía ná, L.lena vuelve a ponese en contactu col INE. Dende l’INE dícen que teníen que pasar esi problema al Conseyu d’Empadronamientu y entá nun se sabe nada.”

Esti ye un problema grave que dende’l Conceyu de L.lena nun se pue resolver. Polo que dende’l municipiu va facese una protesta a la Xunta Electoral de Zona pol incumplimientu y al organismu que tien qu’actualizar los topónimos pa que trabaye pola almisión de les grafíes, naquellos topónimos que la lleven y a que dende la Dirección Xeneral de Política Llingüística, se ponga en marcha con estes cuestiones d’una vegada yá inste al resto d’Alministraicones del Principáu que la Toponimia qu’el Gobiernu aprueba, ye d’obligáu cumplimientu.

La cosa ye que nun ye un problema esclusivu de L.lena. Tolos conceyos que tengan “l.l” o “h.” tamién lu tienen.

El Tribunal Superior de Xusticia del País Vascu (TSXPV) suspendió preventivamente’l conteníu de los artículos de los decretos d’Educación Infantil y Bachilleratu qu’afitaben l’eusquera como llingua de comunicación na enseñanaza n’Euskadi. Los decretos aprobáralos na llexislatura anterior el Gobiernu vascu, cuando’l Departamentu d’Educación yera dirixíu por EA.

Les persones que tomaron esti añu la iniciativa d´abrir un espaciu na rede, col envís d´algamar una xuntanza del nacionalismu d´esquierdes n´Asturies, vienen acabante apurrir a los llectores d´esti mediu informativu, y a la sociedá asturiana en xeneral, lo siguiente:

“a) Tenemos por cosa segura y sabida qu´hai espaciu social abondo pal xorrecimientu d´un nacionalismu ástur que tenga xeitu d´apurrir aire nuevo a la sociedá y manera d´algamar una representación institucional digna nes instituciones polítiques asturianes, na Xunta y en bayura de conceyos. Cuidamos qu´esta opción sedría la única pola que se va poder llegar al oxetivu d´una Oficialidá de la Llingua Asturiana y, per aciu d´ella, d´una Oficialidá y puxu de la Fala Asturiana que tenemos al Occidente del Navia. Tenemos la seguridá de qu´una opción nacionalista asturiana pue sacar al País del ablayu económicu y demográficu nel que s´atopa, frutu d´un dominiu colonial descomanáu a cargu del Estáu español, que trai como consecuencia l´esaniciu de les nueses señes culturales, paisaxístiques, identitaries y de toa castra que siempres mos definieron como país, el País Asturianu.

b) Sabemos que, en teniendo en forma una base social pa una sola Formación Política o Frente unitariu pa la defensa y puxu de la llingua, la cultura y la nacionalidá asturiana, esa base social nun se traduz nuna representación institucional digna y nin tan siquiera nuna visibilidá social abondo por cuenta de la división cainita, d´espantibles consecuencies pal futuru nacional nuestru, ente formaciones polítiques qu´ocupen un mesmu espaciu políticu, que lluchen escontra los mesmos oxetivos, que nagüen poles mesmes coses: el fortalecimientu de la nacionalidá de los asturianos, su reconocencia como nación dotada de llingua propia. Somos optimistes y sabemos que, per baxu de ruxerruxes de pocu fundamentu, los militantes y simpatizantes de les formaciones nacionalistes d´esquierda n´Asturies son conocedores del parentescu recíprocu colos otros grupos hermanos no ideolóxico y no estratéxico. Ye evidente qu´un pasáu de desalcuentros nun pue condicionar un futuru d´aliances.

c) El nuestru esmolecimientu afalóse por cuenta de los xabaces asocedíos de les últimes selmanes, onde s´amosaron les graves deficiencies de la Democracia Formal nel Estáu español. Los intentos d´impugnación de candidatures estatales y asturianes fecha con argumentos xurídicamente discutibles y de mui duldosa llexitimidá esquitaron a la lluz pública xunto con una bultable estratexa mediática de criminalización del nacionalismu asturianu d´esquierda. Esta vegada tocó-y el turnu a UNA, pero podía tocá-y mañana otru día a AA o cualesquier otra organización de la esquierda nacionalista asturiana. Por fortuna, nesti últimu episodiu diose a la pública conocencia un comunicáu de solidariedá con UNA a cargu d´Andecha Astur, lo qu´amuesa que, más alló de les diferencies coxunturales, les agrupaciones nacionalistes saben de sobra que nun futuru de represión política creciente a cargu del españolismu mediáticu y el xudicial, la diana escontra la que va apuntase podía ser cualquier otra dientro´l nacionalismu ástur. Ye´l nuestru deséu un xorrecimientu d´un Frente nacionalista que, pencima de les actuales diferencies (y desencuentros) pueda atropar llueu a la mayor parte de la sociedá civil asturiana p´ampliar les bases y tener espacios de referencia onde xuntase y amestar esfuerzos.

d) Nun entamu, vamos escomenzar pol enfotu de debater la Xuntanza deseada de les dos organizaciones nacionales d´Asturies que cumplen los requisitos de ser dafechu asturianes y non sucursales d´otres formaciones estatales, ser d´esquierdes, por cuenta de la falta real d´un nacionalismu de centru o derecha n´Asturies, y por facer un bon llabor crítico (coles sos llimitaciones propies de ser fuerces minoritaries) col actual Réxime Clientelar impuestu pola FSA y so “esquierda plural”. Nel nuesu análisis vemos qu’otros grupos políticos asturianos o nun son nacionalistes, o nun son d´esquierda, o son (a fecha de güei) collaboracionistes col Réxime colonial qu´impera sobre´l País. Con too y con eso, si hai cambeos nes otres formaciones al marxe d´UNA y AA, nun escluyimos a denguna y en tou casu pueden unvianos a la web les sos crítiques, opiniones y comunicaos, que siempre van ser bienllegaos.

e) Nun queremos remanar l´aición y el llabor de nengún partíu o agrupación. Nun vamos facer otro qu´apurrir un espaciu de reflexón. Con ésti solamente nun s´algama la Xuntanza, pero ye un entamu, y somos sabedores d´ello. Reflexonar y aldericar llibremente, con nome y apellíos, pidir al proyectu´l vuestru sofitu a la idea, a nivel particular, asociativu, o otru: esa ye la nuesa convidada. Podéis escribir a polaxuntanza@gmail.com, o ponese en contautu cola web: http://polaxuntanza.webcindario.com/.
Web de Pola Xuntanza

La pasada selmana Unidá Nacionalista Asturiana (UNA) presentó énte la Xunta Electoral Central – l’organismu competente nes eleiciones europees- un modelu de papeleta electoral d’esta formación, igual que’l que s’usa nel restu de les comunidaes con llingua propia, na que figuraba’l testu en castellanu y n’asturianu, daqué que la Xunta Central permitiere nes pasaes elecciones estatales a Andecha Astur. Sicasí, nesta ocasión, la decisión foi la contraria, nun permitir l’usu de la llingua propia a los asturianos.

Con esta iniciativa dende UNA pretendíen ufiertar un modelu válidu de papeleta “a tolos asturianos y asturianes que quixeren exercer el so derechu al votu utilizando la nuesa llingua y pretendíase (nel momentu de la so validación) unviala a tolos votantes que a traviés de la webwww.unida.as la solicitaren pa votar asina a UNA n’asturianu”.

UNA recibió la negativa a da-y como válida la papeleta propuesta al incluyir testu n’asturianu y “nun ser ésta una llingua oficial”. El serviciu xurídicu d’ UNA tramitó yá un recursu “pa facer por tornar una decisión que Daniel Fernández (númberu 1 na llista a les eleiciones) calificó de discriminatoria y que coloca a los falantes d’asturianu y a toles persones que quieran utilizar la llingua propia d’Asturies, nuna situación d’inseguranza xurídica ya indefensión”.

El candidatu d’UNA afitó tamién que “hasta que nun hebia oficialidá la ciudadanía asturiana nun va tener los mesmos derechos que’l restu de les persones con llingua propia” y afirmó que “con fechos como esti demuestrase que tolo que nun seya a oficialidá ye un parche inútil que nos conderga a ser ciudadanos y ciudadanes de segunda”. Asina memo pidió’l voto pa UNA el 7-J “ya que ye necesario afitar una fuerza asturiana, una voz asturiana, que consiga torgar esti tipu d’atropellos”.

El presidente de Cantabria, mostró esti martes, na so sección nel programa Buenafuente, de laSexta, el so respetu pa cola llingua asturiana y pa con Asturies. Revilla, que yá amosó muestres de conocer bien la cultura asturiana cantando tonada n’asturianu nesti mesmu programa, utilizó en delles ocasiones el topónimu “Xixón” al dar ánimos al Sporting de Xixón, el segundu equipu, según comentó.

El fechu llama l’atención, sobremanera conociendo’l nulu usu de la toponimia tradicional, y anguaño oficial, que faen la mayor parte de los políticos asturianos, inda dientro del territoriu y los medios d’Asturies.

Unión Asturianista, la coalición del PAS y la URAS, convoca una concentración pal próximu sábadu 30 de mayu, a les 12:00 hores na plaza La Escandalera d’Uviéu. La convocatoria quier axuntar a particulares, fuerces polítiques, sindicales, sociales y cualesquier tipu d’organización que, según anuncien dende la organización “quiera sumase pa pidir respetu y dignidá p’Asturies”.

La concentración contra’l PP, PSOE ya IX, afítase según la Unión Asturianista en que’l PSOE “promovió, aplaudió y votó l’Estatutu catalán y la financiación condicionada por él, que ye dañible pa los asturianos”, en que’l PP “promovió, apoyó o votó los estatutos de Valencia, Andalucía o Baleares, que tienen cláusules asemeyaes a les catalanes y que condicionen tamién el conxuntu la financiación autonómica”.

Unes razones a les que se sumen los planes d’estos partíos no que cinca al AVE, que “col proyectu del gobiernu d’Asturies conderga al país a un tren de segunda”.