Política

La Comisión de Siguimientu del Pactu Antitransfuguismu, presidía pol ministru de Política Territorial, Manuel Chávez, declaró esta selmana seis nuevos casos de transfuguismu, ente los que s’alcontra’l del conceyal d’Izquierda Asturiana nel Conceyu de Piloña, José Ángel García, ‘Allende’, que fore denunciáu pol so partíu por mor del pautu qu’algamare col PSOE y permitiere algamar l’alcadía a los socialistes en Piloña.

La Comisión d’Espertos Independientes consideró que l’edil ye un “tránsfuga” darréu de la denuncia d’IAS y del PP de que l’alcalde del PSOE caltenía nel equipu de Gobiernu a un conceyal espulsáu de la organización pola que se presentó a les elecciones.

IAS suspendiera hai tiempu yá de militancia a García por diferencies cola so xestión como sociu políticu del PSOE.

Nuna respuesta del Gobiernu al diputáu d’ERC nel Congresu, Joan Tardá, afitase qu’Asturies perdió y pierde en cada llexislatura cási un millón d’euros que l’Estau destinaría a la l’Academia de la Llingua si hubiere oficialidá.

El Gobiernu destinó en total 8,5 millones a les Academies de Llingües cooficiales dende’l 2004, cola institución catalana como la más beneficada con cásique cinco millones. L’Institut d’Estudis Catalans, l’Academia de la Llingua Vasca-Euskaltzaindia, y la Real Academia Galega repartiéronse esos 8,42 millones d’euros.

Hasta’l 2006 les trés Academies recibíen dineru estatal per mediu de sovenciones, pero, de magar esta fecha les instituciones catalana y vasca entamaron a algamar fondos con cargu a los Presupuestos Xenerales del Estáu

L’Institut d’Estudis Catalans algamó 4,94 millones d’euros, el 58,75 por cientu del fondu destináu a les Academies,Euskaltzaindia, recibió 2,65 millones d’euros y l’Academia gallega 820.192 euros.

El Gobiernu dedicó-y a la Real Academia Española un total de 22,2 millones nos Presupuestos Xenerales y 1,2 millones en sovenciones por gastos.

Andecha Astur recuerda la so postura “tocántenes a financiación, que nun ye otra que la de xestionar los propios recursos ensin tener que vivir de les miseríes que mos unvíen dende la metrópoli, de la dependencia, mientres nos someten al traviés d’una economía colonialista”. Dende Andecha Astur asoleyen el so posicionamientu énte’l nuevu módelu de financiación del Estáu español y el papel xugáu polos gobernantes asturianos que pa la formación demostraron el so “miserabilismu políticu” de los políticos asturianos representaos na Xunta Xeneral.

AA denuncia’l papel d’Areces y la FSA-PSOE, “cuyu servilismu torna a quedar n’evidencia de nueu y ye qu’enantes siquiera de saber cifres yá-yos paecía perfechu’l tratu”.

Sobre los partíos políticos, albidren “qu’almiten un sistema de financiamientu que por definición ye contrariu a los intereses d’Asturies y del Pueblu Asturianu”.

Pa los independentistes asturianos “Queda bien claro que’l poder de negociación del “Principado” col Estáu español ye nulu y qu’Areces y la FSA ye una simple marioneta del PSOE, qu’antepón los intereses del partíu a los d’Asturies”. La solución, opinen, ta en qu’Asturies garre “pesu políticu nel Estáu y qu’esto namás s’algama al traviés de posicionamientos nacionales”.

Andecha recuerda amás “que la militancia antiasturiana de Vicente Álvarez Areces y la FSA-PSOE ta costándomos percara. Por negase a reconocer un derechu humanu al Pueblu Asturianu, como’l que la so llingua seya oficial, perdemos namás y ná menos que 29 millones d’euros añales. Simplemente un escándalu”.

Asturies va perder como mínimo los 29 millones d’euros que-y van corresponder a Galicia (cásique un 5% del total de la financiación gallega) por ser una comunidá billingüe. Asturies perderálo por nun declarar l’asturianu llingua oficial. El modelu financiación pales Comunidaes Autónomes contempla una aportación extra por billingüismu y ye acetáu dafechu pol presidente asturianu, Vicente Álvarez Areces.

Toles comunidaes que cuenten con una llingua oficial, como Cataluña o la Comunidá Valenciana van tener una financiación extra entá nun afitada pero que nel casu gallegu tien como referencia’l comrpomisu del del Gobierno, José Luis Rodríguez Zapatero, d’ufrir 29 millones por esti conceutu.

El profesor Fernández de Castro, que se dio a conocer nos medios de comunicación por oponese a la creación d’un maior d’asturianu en Filoloxía, comentó nel conceyu de la Comisión d’Estatutos de la Universidá d’Uviéu, celebráu ayeri, que “nun se pue dicir qu’haya llibertá pa opinar sobre l’asturianu n’Asturies”. Unes declaraciones que llamen l’atención teniendo en cuenta los amplios espacios que dellos medios asturianos-y dieron a los sos artículos y declaraciones escontra l’asturianu.

Nel conceyu de la Comisión, que decidió dexar les votaciones pal entamu del cursu que vien, non ensin polémica y cola oposición de Paz Andrés, el Rector Vicente Gotor comentó que “se sigue progresando nos conteníos de la llingua asturiana”.

Félix Fernández de Castro va volver a intentar sacar a la llingua asturiana de los estudios universitarios

Una de les reivindicaciones hestóriques de l’Academia de la Llingua Asturiana, la de cuntar con un llar dignu pa les sos actividaes, va poder cumplise nos próximos años, de confirmase les informaciones filtraes estos díes, qu’afirmen que’l Gobiernu d’Asturies va treslladar una riesta d’organismos públicos qu’anguaño tán en llocales d’alquiler a los edificios xudiciales que van treslladar la so actividá al nuevu edificiu que va construyise n’Uviéu.

El nuevu edicificiu xudicial va cuntar con 60.000 metros cuadraos, lliberando tolos edificios qu’ocupen sedes xudicionales n’Uviéu, sacantes la del Tribunal Cimeru de Xusticia d’Asturies.

Los posibles destinos de l’Academia pasen pelos xulgaos de Comandante Caballero, el Xulgáu de vixilancia penitenciaria, el Xulgáu y fiscalía de menores, y el Xulgáu de primer instancia númberu 10, amás del llar de la Unidá Adscrita de la Policía y el xulgáu de Llamaquique.

Gracies a esta operación, el Gobiernu aforraría alredor de 710.000 euros añales, yá que va treslladar tamién otres doce entidaes públiques: l’aula de la Dirección Xeneral de Modernización, l’Axencia de la Discapacidad, la Inspección y la Unidá Territorial de la Conseyería de Bientar Social, el Serviciu de Prevención de Riesgos Llaborales, la Sección de Programes y Siguimientu de Formación Profesional, el Conseyu d’Asturies de Formación Profesional, la tercer unidá de Promoción y Desenrrollu d’Asturies, el Serviciu d’Alumnáu, Participación y Orientación Educativa, la Dirección Xeneral de Trabayu, Seguridá Llaboral y Empléu, la comisión rexonal del Bancu de Tierres y el Conseyu de Comunidaes Asturianes.

La moción presentada pol Partíu Popular en Carreño pa camudar a billingües (na so forma tradicional y na castellanizada) dellos topónimos, oficiales yá nel conceyu, nun consiguió l’apoyu de nengún grupu municipal. Unión Asturianista, Izquierda Xunida, UICA, UNA y PSOE, votaron a la escontra de la propuesta de los conservadores, anque los socialistes alvirtieron “si la propuesta la presenten los vecinos, vamos votar en positivo”.

El PP defendió nel plenu l’usu de les formes castellanizaes de Quimarán, Llorgozana, Prevera, El Pieloro y Priendes, a les que queríen axuntar con una barra en mediu les formes Guimarán, Logrezana, Pervera, Piedeloro y Prendes, desaniciaes oficialmente dende 2005.

El Partíu Popular de Carreño, va presentar güei una moción pola que piden que dellos topónimos del conceyu, yá oficiales anguaño namás n’asturianu, recueyan una forman billingüe. Ye’l casu de los topónimos de les parroquies de Quimarán, Llorgozana, Prevera, El Pieloro y Priendes, a los que los conservadores quieren axuntar con una barra les formes Guimarán, Logrezana, Pervera, Piedeloro y Prendes.

Según la formación “la disconformidá con dalgunos d’estos topónimos débese a qu’una gran mayoría de vecinos de les parroquies del Conceyu, nun compriende por qué nun son oficiales les formes toponímiques qu’emplega la inmensa mayoría”. Los populares encamienten a la la Conseyería de Cultura y Turismu la tramitación del espediente de modificación pa “adautala a los usos de la inmensa mayoría de los vecinos de Carreño, conservando la denominación tradicional, querida y emplegada polos carreñenses”, daqué que nun comparten los estudiosos de la toponimia de la zona, qu’atoparon nos meyores informantes les formes yá oficiales. Xurde Fernández indica que ”cuando se consultó en 2005, el 90 por cientu utilizaben Quimarán”.

El PP diz, por embargu, que “lo que se pretende ye respetar los derechos llingüísticos de tolos vecinos, adoptando’l topónimo billingüe”.

Consuelo Vega, responsable d’esti area nel Gobiernu d’Asturies, recordó qu’enantes de l’aprobación d’estos topónimos “hubo un tiempu pa reclamaciones” y que’l problema “ye de vezos, nun tán de ver estes formes tradicionales na señalítica”. Sicasí, añadió, “si quieren camudalos, tán abiertes les víes alministratives”.

El Conceyal de Cultura, Paulino García, cree que la polémica de “Guimarán o Quimarán va durar tola vida”. El conceyu va discutilo nel plenu güei mesmo.

Moción completa del PP de Carreño (en castellán)

La organización d’esquierda soberanista ye entrevistada nel primer númberu de “El Pegoyu”, la revista política de la organización d’esquierda llionesa “Agora País Llionés” cola que Fai! caltién unes perbones rellaciones y que yá fuere entrevistada n’Asturies nel programa Ixuxú!!-Magacín Sonoru Contrainformativu emitíu per Radio Sele.

Dende Fai! quieren agradecer a Agora País Llionés el brinde pa participar na so revista, deseándo-yos lo meyor pa les sos reivindicaciones que tamién facemos nuestres, esperando caltener per munchu tiempu esti bon clima de sintonía ente organizaciones d’esquierda soberanista de dambos llaos del cordal.

La Xunta de galicia aprobó esti martes la eliminación del esame obligatoriu de gallegu nes oposiciones, xustificándolo con que se desaniciar torgues a la escoyeta de los meyores pa los puestos que se convoquen.

La reforma de la Llei de Función Pública pola que se suprime l’esame obligatoriu en gallegu de les oposiciones foi aprobada colos votos del PPdeG, mentantu que’l PSdeG y el BNG refugáronla por suponer un “atentáu escontra la llingua gallega”.