Política

La Comisión de Cultura de la Xunta Xeneral recibió ayeri a la conseyera de Cultura y Turismu d’Asturies, Mercedes Álvarez, pa dar esplicaciones sobre’l descensu de cuasi’l 20% na cantidá asignada a estes polítiques. Álvarez quixo tranquilizar a a los sectores cultural y turísticu, porque garantizó que son unos de los “principales activos” d’Asturies y “van siguir siéndolo, caltiénse ayudes ya inversiones”.

La conseyera califica la política de la so Conseyería d’”autoesixencia” pa sacar “el mayor partíu de los recursos”.

Sicasí, el PP, na voz del diputáu Emilio Pérez Cueva calificó’l presupuestu d”etéreu”, y aseguró que d’esti mou “el patrimoniu dirá a la ruina”, yá que nesti apartáu, el descensu ye del 35%.

Pal diputáu del PP Alfonso Román “la cultura dexó de ser prioridá pal Principáu”, reprochando que “pierde 30 millones d’euros”, mientres el Presupuestu del Principáu caltién “una cuantía asemeyada con dalgo de crecimientu”.

El PP entrugó pola promoción del asturianu cuando se rexistra una reducción del 11,3 por cientu nesti apartáu. La conseyera pidió respetu pa estes actuaciones ya instó al PP a que “nun desprestixe” la llingua. Del mesmu mou, Consuelo Vega, directora xeneral de política llingüística, apuntó que’l so departamentu esiste porque “ye prioritariu que se desenrrolle política llingüística eficaz, con un presupuestu modestu pero suficiente”. Amás, apuntó qu’otres conseyeríes tienen tamién partíes venceyaes a la llingua, con un presupuestu superior a los 10 millones d’euros en total”.

Pal representante d’IX-Bloque por Asturies na Comisión, “La cultura ye necesaria, pero enantes hai qu’abordar otres polítiques más urxentes”.

Izquierda Xunida-Los Verde de Uviéu, “felicita” irónicamente al Conceyal de Cultura d’Uviéu, José Suárez Arias Cachero “Felechosa”, pola desapaición de la traducción al asturianu de la páxina web del Ayuntamientu. Esta irónica felicitación, respuende a que la nueva páxina web municipal, implantada la selmana pasada, “fixo somorgiar la yá escasa y deficiente presencia de la llingua asturiana nel preséu de comunicación del Ayuntamientu uviedín n’Internet”.

L’asturianu nun foi, según denuncien los responsables d’IX, “la única víctima de la remodelación de la información municipal na rede, una y bones l’antigua páxina tamién ufiertaba dalgunos conteníos traducíos al inglés, opción que se somorgió na nueva web”.

La formación d’izquierdes recordó amás que “los conteníos n’asturianu de l’antigua páxina web del Ayuntamientu yeren llindaos y bien meyorables, tanto pola so estensión como polos numerosos errores de traducción o trescripción que contenía”y albidre la situación actual como “un nuevu alarde na xestión de Suárez Arias Cachero al mandu de les sos responsabilidaes nel Gobiernu llocal” y de manéra irónica “de la so destacada y incesante llabor de promoción de la cultura y la llingua asturiana dende’l so ingresu nes files del Partíu Popular, procedente del ámbitu del asturianismu políticu”.

IX-Los Verde considera necesaria la inclusión del asturianu y d’otros idiomes na web del Ayuntamientu de Uviéu, “de forma análoga al diseñu y funcionamientu de les páxines web d’otros conceyos asturianos, onde xuntu cola versión en castellán o español atopen accesibles distintos conteníos informativos y de xestión en llingua asturiana y en otros idiomes estranxeros”.

Darréu entama una concentración esti domingu delantre la Xunta Xeneral coincidiendo col Día de la a partir de les 13 hores n’Uviéu.

La Mocedá Independentista Revolucionario, Darréu, entama esti domingu 6 d’avientu una concentración delantre la Xunta Xeneral a les 13:00 hores. L’actu coincide col 31 aniversaríu de la constitución impuesta n’Asturies por España.

Animamos especialmente a la mocedá a acudir p’asina espresar la nuesa refuga a esta constitución foriata que nun garantiza dengún drechu fundamental a los asturianos y asturianes. Tolo contrariu mos sitúa como subditos d’un reinu y mos impón un principáu que nadie decidió democraticamente.

Asina, animamos a la mocedá a romper con esti constitucionalismu, fiu del franquismu más puru, que nun apara de vender Asturies dende hai 31 años. Denunciamos que’l constitucionalismu d’anguañu ye’l franquismu d’antañu, una simple reforma d’esti franquismu. Facemos un llamáu a organizase por un futuru ensín imposiciones. Un futuru socialista y republicanu asturianu.

El vicesecretariu de Comunicación del Partíu Popular, Esteban González Pons, dixo esti vienres en declaraciones a la Cadena Ser que la ministra de Cultura, Ángeles González-Sinde, tendría dimitir xunto con tol so equipu pola desautorización que fizo d’ella Rodríguez Zapatero. Pons dixo que “garantizaron que’l proyectu de Llei nun diba cambiar un res y agora’l presidente diz qu’igual lu cambia”.

La formación Andecha Astur, al traviés de les sos agrupaciones en zones salmoneres, comunicó que la nueva normativa de pesca ye pa ellos “insuficiente pa protexer el salmón asturianu” yá que según afirmen “pesie a les restriciones nel periodu captures con muerte y nel cupu captures por pescador, nun s’afronten les principales amenacies la especie: furtivismu, contaminación de les agües, accesos a los llugares de desove, pesca n’agües marines, insuficiente conocimientu sol ciclu de vida la especie…”. P’AA, “una vegada más el Gobiernu’l Principau reacciona tarde y mal”.

Pablo Álvarez-Pire de Santiago (Uviéu, 1986) foi escoyíu como presidente de Nuevas Generaciones d’Asturies, les mocedaes del Partíu Popular. Ayeri miércoles, el programa “La Lupa” de Canal10 entrevistábalu y énte les preguntes de Juan Neira, el xóven políticu, Álvarez-Pire, comentó que pa él “el bable es un dialecto que hay que conservar pero no al nivel de una lengua oficial”.

Unes declaraciones que confirmen el camín tomáu pol PP nos tiempos últimos, nos qu’abandonó postures más favoratibles a la reconocencia de la oficialidá del asturianu, que llegare a defender abiertamente Gabino de Lorenzo, al que por ciertu, el nuevu presidente de Nueves Xeneraciones tien como “personaxe de referencia en política”, según la so respuesta a una entrevista espublizada estos díes en La Nueva España, yá que según diz “es un político que da soluciones y no crea problemas”.

Los miembros del PP de Mieres “nun entienden l’asturianu”

Unidá Nacionalista Asturiana per aciu del so portavoz nacional, Faustino Zapico, comunicó l’entamu de la campaña institucional que va llevar alantre la organización nacionalista pa esixir a los partíos políticos parllamentarios asturianos qu’asuman de forma urxente la reforma estatutaria “pol grave perxuiciu que vien suponiendo p’Asturies el paralizar tala reforma”.

Faustino Zapico destacó que “dempués de 30 años d’autonomía, fai falta una actualización de les instituciones básiques d’Asturies al igual qu’actualizar la normativa a les nueves realidaes sociales, económiques y culturales”. Los nacionalistes ven un riesgu inaceptable nel retrasu de la reforma estatutaria porque “ta marxinando a Asturies en temes básicos como nel del financiacimientu autonómicu, onde volviemos a ser una de les grandes perdedores”.

Según UNA, l’egoísmu de los partíos parllamentarios asturianos fixo imposible la reforma estatutaria porque “taben más esmolíos polos sos porgüeyos partidistes que polos intereses de les asturianes y los asturianos y con esa actitú ye imposible llevar alantre acuerdos fundamentales pal desendolcu d’Asturies”.

Pa UNA la reforma estatutaria tien que s’afitar en tres pegoyos básicos, el primeru, el financiamientu darréu que “tenemos que garantizar los recursos necesarios pa ser a facer les polítiques que se precisen pa sacar Asturies de la crisis social, cultural y económica na que tamos sumíos dende los años ochenta” al igual que garantizar “una soberanía fiscal que garantice l’autonomía política d’Asturies y podia asumir el so propiu futuru faciéndonos responsables de los nuesos aciertos y errores”.

Un segundu aspectu fundamental ye una carta de derechos y obligaciones porque “les asturianes y los asturianos tenemos que conocer tanto los nuesos derechos como ciudadanos d’Asturies como les nueses obligaciones y hemos d’abrir el debate sobre temes como la renta social básica, la igualdá efectiva de xéneru y por orientación sexual, los problemes de la emigración y inmigración, derechos medioambientales y de la salú y un llargu refileru de temes que va 30 años nun teníen la vixencia de güei en día”.

Pa cabu como tercer aspectu a tener en cuenta na reforma estatutaria ye la “oficialidá del asturianu, que vien siendo una esixencia social que yá reclamen hasta les instituciones internacionales como la Unesco o la propia UE”. Pa UNA nun inxertar la oficialidá del asturianu ye “caltener nel tiempu una situación de discriminación inalmisible pa los falantes d’asturianu que namás esixen ser ciudadanos como los demás y non de segunda como asocede anguaño” concluyó Faustino Zapico.

La campaña va entamase nos Conceyos de Nava y Carreño presentando la moción los grupos d’Asturianistes por Nava y UNArespectivamente, inda que van buscase más conceyos onde se queria sofitar esta campaña, tan necesaria pa tener una Asturies preparada pa facer frente a les necesidaes del sieglu XXI.

Nun comunicáu fechu públicu esti llunes, dende l’Asociación de Trabayadores de la Normalización Llingüística quieren manifestase delles observaciones:

“El fomentu de la llingua asturiana nun ye un lluxu. Ye un drechu fundamental d’una parte de la ciudadanía cotizante y un valor de la comunidá asturiana. N’otres comunidaes autónomes supieron saca-y rindimientu a esi potencial en munchos planos, políticu, social, cultural, pero tamién económicu: como promoción esterior, atracción turística, producción cultural, etc.”

“N’Asturies tovía nun escomencipiemos a sacar tol rindimientu potencial aesti bien cultural. Lo mesmo qu’otros padremuños comunes precisa d’inversión pública pa poder convertise nuna fonte xeneradora de riqueza, emplegu y afitase como bien cultural de la sociedá asturiana. Son tiempos p’apostar polos valores y potenciales propios.”

“Y si hasta agora dexar d’ingresar perres yera fato, agora resulta más sangrante. Toles comunidaes con llingua oficial reciben grandes tresferencies económiques del Estáu. Equí, como’l gobiernu asturianu ye tan grandón, asume cierta promoción de la llingua asturiana, pero al nun proclamar la oficialidá dexa de recibir una montonera perres. Amás d’una cuestión de drechos ciudadanos, de xusticia social, la oficialidá podría ser rentable. Pero’l gobiernu del Principáu nun tien problemes económicos, ¿o sí?”

L’Agrupación del Partíu Asturianista -PAS- de Xixón solicitó al equipu de gobiernu de Xixón que la Plaza Mayor del conceyu pase a nomase Plaza de D. Isidro del Río n’homenaxe al primer alcalde la segunda República “pola mor de l’aplicación de la Llei de Memoria Hestórica”.

El PAS sofita esta propuesta como “reconocimientu al llabor desendolcáu por tan insigne ciudadanu na defensa de los valores democráticos y de la llibertá pa colos ciudadanos de Xixón”. Asina, la formación pide la fion “de tan llaceriosu escaezu nel nomenclator xixonés”.

L’asociación zamorana Formientu protestar pola mor de que “pesie l’interés mostráu pol Procurador del Común y el sou celu nel desempeñu de la sua función”, l’artículu 5.1 del Estatutu, el que diz “El lleonés será oxetu de protección específica per parte de les instituciones pol so particular valor dientro del patrimoniu llingüísticu de la Comunidá. La so protección, usu y promoción serán oxetu de regulación”, sigue pa los lleonesistes “ensin ciumplise”.

El Procurador, comenten, “unvió a las Conseyerías d’Educación y Cultura una resolución instándolas a poner en práctica las acciones percisas pal sou cumprimientu. Ante l’ausencia de respuesta, envióula dues veces más, nel mes de setiembre y a finales d’outubre, con igual resultáu negativu”. Furmientu agradez la iniciativa y denuncia “l’actitú inxustificable de l’alministración autonómica que sigue xorda ante lo que ye un imperativu llegal aprobáu polas nuesas Cortes y una creciente demanda social”.