Política

Énte la próxima parada militar que s´entamará nel conceyu de Sieru a petición del PP y col sofitu del equipu de gobiernu del PSOE.

Andecha Astur, que se define como “organización antimilitarista”, amosó estos díes “la so más fondera refuga a esti tipu d´actos que pretenden militarizar la sociedá civil y presentar a los exércitos como instrumentos modernos al serviciu del ciudadanu tapeciendo los valores represivos, imperialistes, machistes, capitalistes y antidemocráticos que representen”.

Andecha considera vergoñoso que “cola crisis permanente que carez Asturies, con una de les tases de paru más altes de toa Europa, condergada al desmantelamientu industrial y en procesu de desaniciu cultural, llingüísticu y ñatural, un conceyu asturianu se dedique a entamar actividaes belicistes y alitar parafernalies propies del españolismu más ranciu”.

Asina mesmo Andecha Astur quier denunciar especialmente cómo dende les instituciones oficiales “se pretende aprofitar la llaceriosa situación de la mocedá asturiana , condergada a la emigración forciada y a la esplotación y precariedá llaboral, pa ufiertar l´exércitu español como una salida”.

Unidá Nacionalista Asturiana (UNA) va celebrar so II Congresu Nacional los díes 6 y 7 de marzu d’esti 2010, embaxo’l lema “Construyendo l’alternativa asturiana”, pa ufrir una alternativa social y electoral n’Asturies a PSOE, IX y PP. El Congresu va celebrasde nel Auditoriu Príncipe Felipe d’Uviéu.

Según informó esti día’l coordinador de UNA, Miguel Ánxel Díaz, la militancia yá ta recibiendo nestos díes la ponencia base qu’ha marcar la llinia política de la organización nos próximos años. La ponencia tien trés partes y fai un análisis de la realidá asturiana, plantegando de manera xenérica l’alternativa d’UNA a la situación, al tiempu que debuxa la estratexa electoral pa les elecciones del 2011.

El presidente d’Asturies, Vicente Álvarez Areces, fizo esti xueves na Feria Internacional de Turismu (FITUR,) que se celebra en Madrid, l’anuncia de que pue apautase “de forma inminente” un compromisu nuevu nel ámbitu promocional qu’ufra nueves conexones colos vuelos con destín estatal que parten d’Asturies.

Areces visita’l recintu ferial por mor del Día de la Comunidá na Feria y na so comparecencia cola prensa desplicó que nes últimes selmanes y nel trescursu de la Feria xorecieron enforma los contactos con operadores aéreos.

Na visita a FITUR y al estand asturianu na Feria, el presidente tuvo acompañáu pola conseyera de Cultura y Turismu, Mercedes Álvarez; la directora rexonal de Turismu, Elisa Llaneza, la presidenta de la Xunta Xeneral del Principáu, María Jesús Álvarez; el delegáu del Gobiernu n’Asturies, Antonio Trevín; el presidente de la FADE, Severino García Vigón; y dellos alcaldes asturianos, cola alcaldesa de Xixón, Paz Fernández Felgueroso, como representante cimera.

Air Europa anunció amás al presidente del Gobiernu asturianu, Vicente Álvarez Areces, la so intención de connectar Asturies y Madrid con trés frecuencies diaries de magar el próximu 1 de xunu, lo que supón un refuerzu importante de les comunicaciones aérees ente la comunidá autónoma y la capital española, pero ensin que se confirmare si esta yera l’anuncia de la que falara Areces.

El Bloque por Asturies amosó esti día la so preocupación pol fechu de qu’Asturies seya una de les Comunidaes Autónomes onde tán xorreciendo enforma los grupos neonazis, según los datos d’un estudiu asoleyáu pola Policía Nacional y la Guardia Civil, nel que se diz que’l perfil de les persones que conformen estos grupos ye d’ente 15 y 45 años.

L’estudiu tamién afita les característiques de los miembros d’estos grupos: ensin estudios universitarios, paraos recientes y con trabayos poco cualificaos, qu’usen un discursu escontra los inmigrantes, escontra l’Islam y de calter antisemita.

La organización d’esquierda soberanista FAI va celebrar esti vienres día 8 de xineru una asamblea abierta na Casa la Cultura de Posada (Llanera) a les 19 hores pa tratar “temátiques de tipu vecinal, escontra la especulación y el tren d’alta velocidá, pola defensa de la tradición cultural, rural, agricultura ecolóxico y pa aldericar al rodiu de la situación del idioma asturianu nel conceyu”.

Esti conceyu abiertu tien como enfotu “l’averamientu dende la base a les problemátiques de los conceyos, faciendo por ufrir una visión alternativa dende l’asamblearismu y la esquierda soberanista a munchos de los problemes que carecen fasteres como Llanera, de tradición rural, pero avocaes anguaño a tener núcleos importantes de tipu ciudá dormitoriu, que ruempen los vínculos cola vida tradicional, mesmo nes rellaciones col entornu, como llaborales, como de texíu social”.

Cataluña da pasu a la oficiliadá del aranés, dempués que’l Conseyu Executivu de la Generalitat aprobare esti martes l’anteproyectu de Llei del Aranés, que dexa la puerte abiert a l’emplegu de’esa llingua delantre toles alministraciones nel territoriu catalán.

Cataluña va ser el “únicu territoriu de tola península ibérica” onde habrá trés llingües oficiales: el catalán, el castellán y l’occitanu na so variante dialectal aranesa.

Cola oficialidá del aranés, cualquier falante d’esta llingua podrá usala tamién na xusticia, y consagraráse l’occitanu como “llingua preferente” n’Arán

La sede del RIDEA, asitiada nel Palaciu del Conde Toreno d’Uviéu, va acoyer el llunes 21 d’avientu una conferencia organizada pol Institutu Asturianu d’Alministración Pública “Adolfo Posada” en collaboración cola Conseyería de Cultura y Turismu y el diariu La Nueva España.

Fernando Reinar va ser l’encargáu de dar llectura a la conferencia, empobinada al personal de l’Alministración Pública y abiertu al conxuntu de la ciudadanía y va entamar a les siete y media nel Salón d’Actos de la institución.

El diputáu d’Izquierda Xunida-Bloque por Asturies-Verdes, Francisco Javier García Valledor, fizo anuncia esti xueves de la so dimisión como parlamentariu de la Xunta Xeneral y amosó les causes nuna rueda de prensa na qu’afitó que torna a la so xera profesional como profesor.

Valledor presentó nel rexistru de la Xunta la so dimisión pa ufrir darréu una rueda prensa, amosando otra vuelta la so posición contraria al pautu de gobiernu qu’IX-BA-Verdes caltién col Partíu Socialista nel Gobiernu autonómicu. Les diferencies con tolos dos socios nel executivu foron a peor nestos caberos meses.

Valledor dixo que los sos desalcuerdos cola direición son públicos dende va un añu y destacó que yá espresare delles vegaes a los muérganos de direicón les sos diferencies colos presupuestos del 2009 y sobre otres cuestiones. Nesi momentu punxo la so renuncia a disposición de la direición y dende ehí trató d’algamar que nun se dieren diferencies públiques hasta’l puntu de que, según declaró, nun participara nes comisiones sobre los presupuestos del 2010, como venía asocediendo davezu.

El secretariu xeneral del Bloque por Asturies (BA), Roberto Colunga, va ser el primer diputáu d’esta formación nacionalista na Xunta xeneral, ocupando l’escañu d’Ix-BA-Verdes que dexa vacante Frnacisco Javier García Valledor (IU), que recién presentara la so dimisión. Les úniques formaciones nacionalistes que tuvieron diputaos na Xunta foron la Unidá Nacionalista Astur (UNA) y el Partíu Asturianista (PAS) va dellos años.

El Grupu Parlamentariu d’IX-BA-Verdes, va quedar formáu agora por Jesús Iglesias (IX), Diana Camafeita (IX), Emilio Vázquez (IX) y Roberto Colunga (BA). Colunga diba nes anteriores elecciones autonómiques del 2011 nel puestu númeru 7 de la coalición. Tien 39 años y venía ocupándose en Xixón de cuestiones referentes al asesoraimientu a Política Llingüística.

El PAS asoleya un númberu más de la so revista oficial “L’Asturianista”, cuntando con delles secciones de noticies, llibros y otres cuestiones venceyaes a l’actividá del partíu, la so mocedá y la coalición permanente Unión Asturianista.

Nel entamu d’esti númberu cuatro la formación asturianista califica de “problema” pal esposigue del nacionalismu asturianu y la so consolidación “el mesmu nacionalismu asturianu, y el so murniu empobinamientu haza’l guetu” (autoalimentándose), y non haza la sociedá asturiano, haza la xente de la cai (haza’l Pueblu Asturianu)”.

Dende’l PAS camienten necesario llegar a la ciudadanía y “desplica-yos les nueses propuestes” y, remanenta sobremanera “nun engarranos ente nós, ente los pocos que trabayamos por esti país, que tien un nome: Asturies (anque dellos quieran escaecelu)”.

La revista cunta amás nesti númberu con dos artículos d’opinión de Xuan Xosé Sánchez Vicente ya Inaciu Galán.

Descarga’l númberu 4 de L’Asturianista