Política

La coalición Bloque por Asturies-UNA: compromisu por Asturies, presentó en Xixón la so candidatura pa esti conceyu, que va encabezar Roberto Colunga, anguaño diputáu del grupu mistu na Xunta Xeneral y ex asesor del conceyal del conceyal xixonés Jesús Montes Estrada en cuestiones de llingua y cultura asturianes. Darréu van ser candidatos Daniel Fernández, Nuria Rodríguez, Iris Díaz Trancho, Balbino Cano, Xosé María García Sánchez, Xaime Aranda y asina hasta 27 persones más, “venceyaes al texíu asociativu del conceyu, cola presencia de xente vinculao al movimientu feminista, sindical, llingüísticu y cultural”.

Ente los nomes, María Xosé Rodríguez, anguaño responsable de la Oficina de la Llingua de Xixón, Sabel Tuñón, vicepresidenta de l’Asociación de Vecinos de Vega-La Camocha, Dubardu Puente y Xabel Vegas, del ámbitu de la música, l’actor Antón Caamaño o’l periodista Xicu Ariza.

El Salón d’Actos de la Biblioteca Xovellanos de Xixón foi escenariu de la presentación de Conceyu Abiertu y del so manifiestu fundacional. El nome de Conceyu Abiertu vindica esta institución de la tradición comuñal asturiana “como una ferramienta coleutiva que nel momentu presente tien que sirvir pa sumar voluntaes y que, nel futuru, tendrá de ser el pilpayu d’una Democracia participativa n’Asturies”.

Conceyu Abiertu confórmenlu, según espliquen responables de la organización, “ciudadanos y ciudadanes procedentes de distintos ámbitos políticos, sociales, sindicales, culturales y de movimientos populares de diversu tipu” que, “conscientes de la ineficacia de les polítiques d’anguañu y de la pergrave cris permanente que carez la sociedá asturiana”, piensen que “llegó’l momentu de buscar nueves maneres de facer política entamando un movimientu de reconstruición nacional y social dende la base”.

Esti movimientu ciudadanu nagua pola “ellaboración dende abaxo de nueves metodoloxíes, dinámiques y ferramientes polítiques a curtiu y llargu plazu” estructurándose como “una rede de plataformes asamblearies d’ámbitu llocal” y trabayando pa desbloquiar l’actual situación, “promoviendo nueves dinámiques d’organización y aición dende la izquierda soberanista”. Nesi sen, apuesta “pol municipalismu participativu como garantía d’una democracia plena y del control popular de la xestión institucional”.

Nel actu comparecieron una decena de persones promotores, pa presentar la iniciativa, énte unes 70 persones presentes na sala, interviniendo David Álvarez, Paloma García y Mariu Arbesú. Álvarez foi l’encargáu de presentar l’actu y agradecer l’asistencia a la presentación y dar pasu a Mariu Arbesú que fizo una intervención política y García que lleó’l manifiestu fundacional de Conceyu Abiertu.

Arbesú fincó na idea de l’apueste pola xunidá d’aición que “ye posible y ye necesaria tolos dies del añu y en diferentes ámbitos de llucha”, ún d’esos ámbitos, dixo Arbesú son les elleiciones, “creemos na xunidá d’aición elleutoral” y Conceyu Abiertu “ye una espresión práutica” de que dende la izquierda asturiana “tamos dimpuestos a continuar con esta propuesta. Tamos dimpuestos a ser xenerosos, a superar dogmatismos, a superar diferencies personales, a superar sigles. Tamos dimpuestos a entamar un movimientu popular ensin que nadie renuncie al so proyeutu políticu dende la Xunidá d’aición”, afirmó. Na so intervención, quixo dexar claro tamién lo que nun ye Conceyu Abiertu, “nun ye una marca elleutoral especifica pa unes elleiciones concretes” ya que pretende tener una continuidá a llargu plazu y “nun ye una organización política”, pretende ser “un movimientu popular” faciendo política d’abaxo arriba, dende la bas y dende los conceyos”.

Pa rematar , Arbesú desplicó qu’hai muncha xente organizándose yá por conceyos” pero que Conceyu Abiertu entama “cola voluntá de dir medrando como movimientu politicu, medrando como pueblu y medrando como país”.

Manifiestu fundacional de CA

Los territorios hestóricos de l’actual comunidá autónoma del País Vascu acaben de camudar de nome gracies a un alcuerdu del PNV col PSOE. Ye por ello que dende esti momentu los nomes oficiales van ser Bizkaia, Gipuzkoa y Araba-Álava, como yá asocediere enantes con otros territorios como Girona, Lleida, Ourense o Illes Balears, que tienen los nomes propios como los únicos oficiales. El PP anunció’l votu en contra d’esta decisión nel Congresu de los Diputaos.

Tres d’un recursu del Aconceyamientu de Xuristes pol Asturianu, la Procuradora Xeneral d’Asturies corrixe un “error” na convocatoria d’un Premiu nel que se discriminaba la llingua asturiana.L’Aconceyamientu de Xuristes pol Asturianu manifiesta tar fartucu de tantes inxustes agresiones escontra la ciudadanía asturfalante protagonizaes pol gobiernu Areces.

La situación denunciada anicia en data 29 d’avientu del caberu añu, cuando’l Boletín Oficial del Principáu d’Asturies (BOPA), asoleyaba una resolución de la Procuradora Xeneral llamando a la Primera Edición del Premiu denomáu “Amparu de Derechos y Llibertaes”. Nella facíase de menos a la llingua tradicional del pais al desixir que les solicitúes y documentación axuntada teníen que se presentar “necesariamente” en castellán.

Tres del recursu del Aconceyamientu de Xuristes pol Asturianu, el día 5 de febreru de 2011 el BOPA espubliza una igua d’erros pa qu´onde se dicía “ las solicitudes y documentación adjunta se presentarán necesariamente en castellano” diga “Las solicitudes y documentación adjunta se presentarán en castellano. También serán admisibles, de conformidad con la normativa de aplicación, las solicitudes y documentos que se formulen en bable/asturiano”.

Tomando en cunta que la “normativa de aplicación” ye, nada menos, que la Declaración Universal de los Derechos Humanos, el Conveniu Européu de Derechos Humanos y la Constitución Española, nun ye de plasmar que l’Aconceyamientu de Xuristes pol Asturianu manifieste tar fartucu de tantes inxustes agresiones escontra la ciudadanía asturfalante protagonizaes pol gobiernu Areces y los sos satélites, siendo asina que lo menos que se pue pidir a les autoridaes públiques ye una actitú bonal nel acatamientu de les lleis, xustamente tolo contrariu d’esta permanente rebeldía no que cinca al cumplimientu de la probe normativa que protexe l’usu de la llingua propia. Rebeldía y desacatu a les lleis que mos desixe a les organizaciones cíviques l’andar tres d’ellos, como la xusticia, una y otra vuelta, per xulgaos y tribunales. Resolución de 28 de enero de 2011, de la Procuradora General del Principado de Asturias, por la que se rectifican errores detectados en la Resolución de 17 de diciembre de 2010

La plataforma ciudadana Conceyu Abiertu informóde que l’actu de presentación d’esti proyectu políticu va facese’l próximu sábadu, 19 de febreru de magar les 13.00 hores nel Salón d’Actos de la Biblioteca Xovellanos de Xixón. Nél va dase llectura a un Manifiestu fundacional, esplicándose de siguío el procesu que fizo posible y necesaria la criación de Conceyu Abiertu asina como la nueva metodoloxía política que va dir desendolcando esti movimientu.

Conceyu Abiertu ta estructurándose “como una rede de plataformes asamblearies a nivel de conceyu” col oxetivu de dir arrexuntando a curtiu y a mediu plazu a toos aquellos seutores sociales de la esquierda combativa qu’apuesten pola reconstruición nacional d’Asturies como País.

Dempués del actu políticu, al que tán convidaes toles persones interesaes, va celebrase una espicha nel Centru Social L’Ayalga de Xixón.

Fontes cercanes a Conceyu Abiertu adelantaron yá a Asturnews, que Conceyu Abiertu ta incorporando “tanto a militantes d’Andecha Astur como a militantes procedentes del sindicalismu alternativu de clas y de los movimientos sociales qu’enxamás militaron naquella formación política”.

Nel conceyu qu’Unidá Nacionalista asturiana celebró’l caberu día de xineru prodúxose la dimisión de Faustino Zapico como voceru y polo tanto miembru de la Xunta Executiva d’UNA al tener discrepancies de fondu a la hora d’interpretar el mandáu Congresual pa la creación del Espaciu Políticu Asturianu.

Unidá Nacionalista Asturiana (UNA) celebró’l pasáu 31 de xineru un Conceyu Abiertu, órganu previstu nos sos congresos pa dar el preste a aliances electorales, nel que s’aprobó por amplia mayoría la propuesta de xuntura electoral col Bloque por Asturies.

Hasta la renovación de la Xunta Executiva Nacional exercerán como portavoces de la organización el secretariu d’organización, Roberto Holgado, y la númberu dos de la candidatura de la coalición pola circunscripción central, Yolanda González Huergo, que sedrá propuesta por UNA como portavoz de la coalición col Bloque por Asturies.

La coalición eleutoral BLOQUE POR ASTURIES-UNA va facer la presentación a los medios de so candidatura’l próximu sábadu día 12 de febreru a les 11:00 hores nel Hotel NH d’Uviéu allugáu na C/ San Francisco, Nu6.

Nel actu daránse a conocer más detalles sobre los candidatos, denominación y principales llinies programátiques.

Va más d’un añu que l’Agrupación de Xixón del Partíu Asturianista (PAS) venía pidiendo al Ayuntamientu de Xixón la dedicación d’un espaciu públicu (una plaza, unos xardinos, una cai o un parque) a la figura d’Isidro del Rio, un políticu, ex alcalde de la ciudá que nun tenía nengún tipu de reconocencia per parte d’esti conceyu.

El Partíu Asturianista, dempués de que’l Conceyu decidiera facer oyíos sordos a los pidimientos fechos por rexistru, decidió convocar una concentración énte la Casa Conceyu. Isidro del Río “por ser el primer alcalde federalista de la y una persona bien importante que quería progresu, democracia, llibertá y autonomía pa Xixón y Asturies”.

Dende’l PAS queremos feliciten a la familia por esta noticia y allegrénse “porque’l Conceyu paez facer casu al pidimientu que fiximos yá fai casi un añu pa una persona que merecía un espaciu públicu ante la falta de memoria hestórica de PSOE-IU y PP”.

Bloque por Asturies y Unidá Nacionalista Asturiana anunciaron yá la firma del alcuerdu electoral pa les elecciones de mayu de 2011. Les direcciones de dambes formaciones polítiques punxéronse d’alcuerdu pa presentase en coalición a les elecciones autonómiques y de conceyos de mayu de 2011 “nuna plataforma electoral conxunta qu’incorpore a las dos organizaciones asina como a colectivos y persones de la izquierda, l’asturianismu y l’ecoloxismu”.

Amás les formaciones designaron a como candidatu a la Presidencia del Principáu d’Asturies y polo tanto cabeza de llista na circunscripción central a Rafael Palacios, miembru de la Dirección Nacional del Bloque por Asturies, y como puestu segundu na llista que correspuende a la circunscripción central a Yolanda González Huergo, miembru de la Xunta Executiva d’UNA.

Dambes formaciones, xunto a independientes, representantes de la esquierda, l’ecoloxismu, y de dellos movimientos sociales, que van conformar la plataforma ellectoral, van presentar la candidatura’l sábadu 12 de febreru nun actu nel que se van dar más detalles sobre’l restu de los candidatos, nome concretu de la coalición y principales llínies programátiques.