Política

El Conceyu d’Unidá Popular de Xixón, formáu por Conceyu Abiertu, Izquierda Anticapitalista y Frente de la Izquierda presenta güei’l so programa electoral nel Quioscu de Begoña. Dende la coalición planteguen que toles publicaciones del conceyu vaigan en castellán y asturianu, “conxugando artículos nes dos llingües n’igualdá de condiciones”, amás quieren “emplazar” a los representantes municipales a facelo tamién nes sos intervenciones públiques.

Programa completu del CUPX

El candidatu de Foru Asturies, Francisco Álvarez-Cascos, afirmó nuna entrevista que-y ficieron Naciu Varilas y Montse Martínez nel espaciu “El Tren” de Radio Llangréu, a una entruga sobre la so postura alredor de la oficialidá del asturianu. El que fuera ministru de fomentu col PP respondió qu’“enantes de contemplar la oficialidá de la llingua del país ye necesario acometer otros asuntos”, en referencia a la Llei d’Usu del Asturianu de 1998, recordó qu’entá “falta desenrrollala”, comentando amás que “los qu’amen l’asturianu la Llei d’Usu ta a medio desenrrollar”.

Asina, Cascos comprometióse a desenrrollar esta Llei de convertise nel próximu presidente del país.

El Bloque por Asturies-UNA propón crear n’Asturies una entidá de calter públicu como alternativa a la Sociedá Xeneral d’Autores y Editores (SGAE) pa la xestión de derechos d’autor, dientru de les sos propuestes electorales en en materia musical qu’inclúin tamién l’habilitación de llocales d’ensayu y la creación d’una programación d’actuaciones de tou tipu baxo xestión pública, amás de mayor presencia de la música asturiana na RTPA.

La formación xustificó la so propuesta sobre la xestión de derechos d’autor nel calter “abusivu y monopolísticu” qu’al so entender tien el venir de la SGAE que dirixe Tedy Bautista.

El candidatu la coalición, Rafael Palacios, foi l’enc en rueda prensaargáu de presentar les propuestes nuna rueda de prensa na que tuvo acompañáu pol responsable del programa musical de BA-UNA, Xicu Ariza, integrante del grupu Fala Non Caduca y responsable del portal d’información musical n’asturianu Fnast.

Dempués de refugar nun primer momentu les llistes de Bloque por Asturies-UNA y Conceyu Abiertu, por tar n’asturianu la documentación unviada, la Xunta Electoral de Llaviana aceptó a la fin les candidatures de en Samartín del Rei Aurelio y Llangréu, yá que sobre esti asuntu yá se declarare’l Tribunal Constitucional na sentencia del 48/2000 de 24 de febreru, onde se daba la razón a Andecha Astur nel mesmu casu.

Les formaciones Bloque por Asturies-UNA y Conceyu Abiertu denunciaron dellos casos nos que l’usu del asturianu pa presentar candidatures nes elecciones a conceyos del próximu 22 de mayu. La Xunta Electoral de Llaviana, a les que pertenecen los conceyos de Samartín del Rei Aurelio y Llangréu, refugó les llistes d’estes dos formaciones por dir escritos n’asturianu los documentos requeríos pal procesu.

Conceyu Abiertu dio a conocer l’argumentación de la Xunta Electoral de Zona de Llaviana, que-yos a los representantes de Conceyu Abiertu énte la mesma que nun daba por válides les candidatures presentaes nos conceyos de Samartín del Rei Aurelio y Llangréu porque “nun s’utiliza nenguna de les llingües oficiales del Estáu español”.

Un problema que “pel momentu” nun tuvo esta formación n’otros conceyos nin na Xunta Electoral Provincial, onde se presenten les candidatures pa les elecciones nacionales. Conceyu Abiertu “llamenta” que los responsables de la XEZ de Llaviana tovía nun conozan la sentencia 48/2000, de 24 de febreru, del Tribunal Constitucional (BOE nº 76, 29 de marzu de 2000) qu’anulaba’l determín de la Xunta Electoral Provincial d’Asturies de nun proclamar les candidatures de la organización política Andecha Astur al Congresu los Diputaos y al Senáu pola mesma razón, al considerar que se taba vulnerando’l drechu de les persones a acceder a los cargos públicos en condiciones d’igualdá, sentando un precedente hestóricu.

Nos mesmos conceyos, la coalición Bloque por Asturies-UNA, denunció tamién el mesmu casu, y recuerden que presentaron “18 candidatures con formularios n´asturianu, toes elles fueron almitíes ensin nengún tipu de problema”.

La decisión ta recurrida en dambos casos y s’espera qu’a lo llargo del llunes 25 se dea respuesta al recursu contra esti nuevu ataque al usu del asturianu.

Cinco axencies de publicidá opten a consiguir el contratu de la campaña institucional que licita’l Gobiernu d’Asturies destinada a informar sobre les elecciones nacionales del próximu 22 de mayu, según esplicó la conseyera de Presidencia, Xusticia ya Igualdá, María José Ramos, nuna comparecencia na Xunta Xeneral. El diputáu de Bloque por Asturies, Roberto Colunga reprochó al Gobiernu que s’escaeciera del asturianu nesta campaña con un presupuestu de 50.000 euros, IVA incluyíu.

Los lemas y sublemes de los cinco propuestes de les que va salir la escoyida son, anque en castellán, ‘Tu yes Asturies. Domingu 22 de mayu, el futuru escuéyeslu tu’, ‘Pon-y voz. El 22 de mayu Asturies fala’, ‘Ente toos y toes escoyemos’, ‘El 22 de mayu va ser como decidas tu’ y ‘Tu decides. Hai munches maneres de ver la vida, el 22 de mayu puedes escoyer la tuya’.

Nel conceyu del Patronatu de la Fundación “Caveda y Nava”, del pasáu 9 de marzu del 2011, celebráu n’Uviéu, decidióse’l cambiu na composición de la Xunta Directiva. Inaciu Iglesias, que va ser candidatu de Foru Asturies a l’alcaldía de Noreña, dexa la presidencia a favor del profesor Ramón d’Andrés. Amás, la Fundación cunta con un secretariu nuevu, Manuel Lafuente Robledo, que sustitúi a José Rogelio Álvarez Hevia.

La Fundación “Caveda y Nava”, ye una entidá formada por persones representatives de distintes actividaes y estremaes sensibilidaes ideolóxiques, que trabaya pol llogru d’un consensu políticu y social de sen positivu alredor de la llingua asturiana y el so adecuáu estatus llegal.

El nuevu presidente de la Fundación anunció que nes próximes selmanes la Fundación “Caveda y Nava” va entamar una ronda d’entrevistes colos candidatos de los distintos partíos políticos a les Elecciones Autonómiques de mayu, “col envís de tresmiti-yos el nuestru mensaxe alredor de la llingua asturiana: cumplimientu de la llei y necesidá d’un estatus de cooficialidá algamáu por consensu, planificación gradual y respetu a la llibre opción llingüística”. Pa ello distribuiráse un pequeñu cartafueyu esplicativu que, anuncien, “nel so momentu se dará a conocer”.

Foru Asturies, el partíu formáu pol ex vicepresidente del Gobiernu d’España, Francisco Álvarez-Casco, vien sumando nos meses últimos a destacaos miembros del asturianismu políticu y cultural. Foru Asturies anuncia agora que’l candidatu a l’alcaldía de Noreña pola so formación va ser Inaciu Iglesias, empresariu y editor del selmanariu Les Noticies.

Amás, en Xixón, la llista de FAC inclúi a Carlos Rubiera, cantautor n’asturianu y co fundador del Partíu Asturianista como númberu cinco de la so candidatura.

Noemí Martín destacó l’actividá de los mayores asturianos nel III Foru “Comunicación y Escuela” d’A Veiga, onde la Conseyera participó nel actu d’homenaxe a seis mayores del conceyu y visitó los talleres intergeneracionales instalaos na cortil ferial d’A Veiga.

La conseyera de Bienestar Social y Vivienda, Noemí Martín, participó ayeri xueves nel homenaxe a seis güelos y güeles d’A Veiga nel marcu del III Foru “Comunicación y Escuela” del Institutu d’Educación Secundaria “Elisa y Luis Villamil”.

Nel actu, nel que tamién participaron los nietos de los homenaxaos, fíxose entrega a los güelos y güeles una estauína conmemorativa del alcuentru que representa a un güelu con un neñu sobre les piernes.

La coalición del Bloque por Asturies y la UNA anunció yá a los sos cabeza de llista pa les circunscripciones oriental y occidental, que van ser respectivamente, Xuan Fdez. Castañón y Fernando González d’Álvaro. Dambos comprometiéronse na rueda de prensa de la so presentación, “a lluchar contra’l procesu de despoblación planificada del oriente y occidente d’Asturies”.