Política

El diariu ASTURNEWS va siguir toles incidencies de la xornada electoral y los resultaos al traviés de la so canal de Twitter @asturnews y del propiu diariu. Tola información de los primeros avances de datos, conceyu a conceyu, datos nacionales… El domingu n’Asturnews.

Sigui Asturnews en Twitter y conoz tola información electoral en tiempu real

Esti domingu celébrense elecciones nacionales n’Asturies. 17 candidatures preséntense nesta ocasión col envís de gobernar Asturies. Nel día caberu de la campaña Asturnews fai un repás a los programes de política llingüística de tolos partíos. IX-Verdes, Bloque-UNA, URAS-PAS y Conceyu Abiertu son les úniques fuercies que recueyen la oficialidá pal asturianu nel so programa, anque otres formaciones como IDEAS amosaron la so voluntá de buscar un consensu nesi sen, mientres Foru Asturies fala de “desenrrollar la Llei d’Usu”.

FSA-PSOE: más de lo mesmo.

La so postura “siempres foi clara”, dicía estos dicía estos díes en Les Noticies, Javer Fernández. La FSA-PSOE sigue refugando la posibilidá d’otorgá-y al asturianu l’estatus d’oficialidá. Nel so programa dedica un espaciu al asturianu baxo’l lema “El futuru del asturianu”, nel qu’apuesten por siguir coles actuales polítiques desenrrollaes principalmente dende la Conseyería de Cultura “col oxetivu de favorecer la recuperación, conservación y puxu de la nuesa llingua autóctona.

Partíu Popular: profesoráu d’asturianu reconocíu.

Pela so parte’l Partíu Popular, que se declara contrariu a la oficialidá del asturianu, según pallabres de la so llider actual, Isabel Pérez-Espinosa, inclúi dos propuestes dientro del so Programa d’Educación 2011-2015 que cinquen al asturianu: Xeneralizar la ufierta del asturianu nos centros educativos y reconocer la especialidá d’asturianu pal profesoráu.

Izquierda Xunida-Los Verdes: cola oficialidá.

Nel programa d’Izquierda Xunida-Los Verdes d’Asturies recuéyese’l deséu d’un nuevu Estatutu d’Autonomía, “que contemple la oficialidá de la Llingua Asturiana”.

Bloque por Asturies-UNA: llingua vehicular en medios públicos y enseñanza.

La coalición nacionalista d’izquierdes recueye nel so programa la oficialidá de la llingua asturiana como la “ferramienta imprescindible”.

Amás recuéyse una llarga riestra de midíes pa la normalización del idioma: un Plan de Normalización Social, medios de comunicación públicos nos que l’asturianu seya llingua vehicular, asturianizar la enseñanza, normalizando la enseñanza del y nel nuesu idioma, o valorar el conocimientu del asturianu nel accesu a la función pública, ente otres.

Unión URAS-PAS: l’asturianu y la cultura como una industria

La coalición del Partíu Asturianista y la Unión Renovadora Asturiana recueye nel so “compromisu cola cultura y la industria cultural” la so promesa d’establecer la “cooficialidá nel Estatutu”, compromentiendo amás, “desenrrollar la normalización social del idioma”, aplicando la Llei d’Usu, con midíes nos medios de comunicación públicos o, por exemplu, na enseñanza.

Foru Asturies: desenrrollar la Llei d’Usu

La formación lliderada por Francisco Álvarez-Cascos, na que participen asturianistes destacaos como Carlos Rubiera o Inaciu Iglesias, comprométese nel so programa a “desenrrollar la vixente regulación llegal (Llei d’Usu del Asturianu)”.

Conceyu Abiertu: la llingua de la nación.

La coalición Conceyu Abiertu denuncia nel so programa “La ñegación y desaniciu de los elementos culturales que configuren la nuesa identidá como nación hestórica y la non oficialidá de la llingua asturiana”.

IDEAS: a la gueta d’un consensu pa la oficialidá.

Anque’l programa d’IDEAS nun recueye nenguna mención a la oficialidá de la llingua asturiana. El so llider, Juan Morales, amosó apocayá’l so “compromisu” de buscar un “consenseu que tenga como puntu final la inclusión de la oficialidá del asturianu na próxima negociación del Estatutu d’Autonomía”.

UPYD: zarraos a la posibilidá d’oficialidá.

La formación españolista UpyD da anuncia nel so programa pa tol estaú, de la so propuesta de restricción nes midíes de normalización y drechos llingüísticos de los falantes de llingües oficiales estremaes del castellán. Nel casu del asturianu, ye la única formación política que nel so programa recueye una cita específica refugando la posibilidá de dotar al asturianu d’un estatus llegal d’oficialidá. Nun estraña, sabiendo que la so llider estatal, Rosa Díez, dixo en referencia al asturianu: “nun ye una llingua ye una forma de falar”.

Esta ye la cita del so programa: “Una determinación pa sostener l’esfuerzu financieru destináu al sostenimientu y el caltenimientu del importante patrimoniu históricu, artísticu y cultural. Como parte del mesmu, el bable asturianu, nes sos distintes variantes, va ser oxetu de protección. Unión, Progresu y Democracia oponse a la cooficialidá del asturianu”.

Conceyu Abiertu considera “vergoñosu y ofensivu”, el gastu millonariu de los grandes partíos na campaña electoral mientres Asturies, afirmen, “en crisis dende’l sieglu XX, tien una tasa de paru cercana al 20%, miles de families pasen grandes dificultaes pa sobrevivir y la mocedá tien qu’emigrar”.

Pa CA “el gastu desproporcionáu na maquinaria publicitaria de marketing y engañu d’estos partíos ye asquerosu” y tien que llevar, según la formación “a una reflexón sobre la necesidá de regular el gastu en campaña a la mínima espresión, garantizando a la ciudadanía tar informada de les propuestes y posicionamientos de les diferentes opciones, pero tamién asegurando asina la igualdá de toles candidatures pa poder informar a la ciudadanía del so proyectu”.

Por ello reclamen “que ficieren público a cuanto asciende’l so gastu de campaña, cómo se paga esi gastu, ónde gasten les perres,…”, y recuerden que “Conceyu Abiertu nun pidió dengún creditu a neguna entidá bancaria, nin tien sovenciones públiques, nin gasta miles y miles d’euros en campaña”.

La Plataforma Democracia Real Yá tien convocaes pa esti miércoles 18 de Mayu a partir de les 18 hores na Plaza del Ayuntamientu en Xixón y dende les 20 hores na Escandalera n’Uvieu dos acampaes pa seguir sofitando’l movimientu democráticu que xurdiere estos díes y que na nueche del martes s’espardiera per toa España.

Los simpatizantes de les plataformes Democracia Real Yá!, y el restu de los grupos que taben tres de les movilizaciones del domingu pasáu acaben de decidir n’asamblea pasada la medianueche qu’ellí se queden.

Nel manifiestu que lleeron esclariaron a quién representen: “Representamos a paraos, mileuristas, ames de casa, ya inmigrantes, a ciudadanos polo xeneral”. Y esplicaron qué los mueve: “Creemos que la clase política vive llueñe de la ciudadanía. Tenemos derechu a indignanos”. El voceru aseguró que “hai cinco menores deteníos a los que nun soltaron”.

Afirmen qu’otra política ye posible y son contrarios al bipartidismu A les ocho de la tarde dellos centenares de persones concentraes na Puerta del Sol empezaron a xiblar y aplaudir. Segundos dempués, les primeres cantaraes contra’l Gobiernu y los partíos políticos dieron pasu a un movimientu espontáneu que va facer obligada una nueva llectura de les eleiciones del 22 de Mayu.

Pa les 3,30 de la madrugada convocárase un conceyu de toles comisiones formaes na Acampada de Sol pa preparar un comunicáu que diba asoleyase pela mañana nos medios de comunicación.

“Como fuerza política que cree na oficialidá de la llingua asturiana”, Jesús Iglesias quiso dexar afitau esti vienres so compromisu “non solo a defendela, sinón a dar tolos pasos entemedies pa consiguir la reconocencia de los derechos llinguísticos de los asturianos”.

El candidatu d’IX Verdes a la presidencia d’Asturies, Jesús Iglesias, señaló que: “como fuerza política que cree na oficialidá de la llingua asturiana, comprometemosnos non solo a defendela, sinón a dar tolos pasos entemedies pa consiguir la reconocencia de los derechos llinguísticos de los asturianos, nel usu y normalización de la llingua fundamentalmente onde da más problemes: na relación coles Alministraciones Públiques asturianes”.

Según la nota de prensa asoleyada esti día por IX, Iglesias ta seguru de que: “l’asturianu va tener plena garantía de ser llingua oficial cuando negar esa reconocencia tenga un costu electoral” asina falaba nel contestu d’un alcuentru calteníu col Presidente de la Fundación Caveda y Nava, Ramón d’Andrés, y Manuel Lafuente, secretariu de dicha Fundación.

El candidatu d’IX Verdes a la presidencia d’Asturies, Jesús Iglesias, señala que’l fechu de que nun haya inda una reconocencia de la oficialidá del asturianu nun puede convertise en coartada o escusa pa nun dar pasos que faciliten la normalización y l’usu del asturianu na sociedá d’esta Comunidá Autónoma.

Primero cola Lley d’Usu y Normalización que “tien un grau de desenvolvimientu bastante atuñáu” apunta Iglesias, añediendo: “ nun fai falta la oficialidá del asturianu por que se reconoza a los docentes la especialidá del asturianu, y eso ta ensin faer, lo único necesario ye cenciellamente voluntá política porque los docentes yá tán ende, yá tán impartiendo l’asturianu. Tamién ye posible amontar la presencia del asturianu nos medios de comunicación ensin necesidá d’esperar a que sía oficial la llingua. Échase de menos la presencia del asturianu especialmente l’ente públicu de comunicación d’Asturies (RTPA)”.

El coordinador d’Izquierda Xunida d’Asturies considera que nesta llexislatura avanzóse pocu na reconocencia del usu del asturianu.

“Los dos remanes que pueden considerase más positives son la dignificación de la see de l’Academia de la LLingua y la continuidá cola iniciativa impulsada por el mesmu Ramón d’Andrés, dende’l puestu de responsabilidá que tenía entós en Gobiernu d’Asturies, de la reconocencia de la toponimia de los Concellos asturianos” apunta Ilesies tocantes a les acciones realmente positives y escases llevaes a cabu nesta llexislatura. “Considero que fuimos abondo esixentes al respective de la llingua. Cuando unu da una batalla tien que mirar alredor y ver con cuanta tropa y con cuanta fuerza se pue cuntar. Ello ye que fuimos esixentes percima de la tropa cola que cuntábamos”, dexó afitaol Jesús Iglesias, candidatu d’IX Verdes a la presidencia d’Asturies.

Rafael Palacios, candidatu de Bloque-UNA, afirmó que la so formación quier que na próxima llexislatura la oficialidá y normalización del asturianu sía un tema central del debate políticu. El líder asturianista dixo qu’esti yera un tema fundamental que se basaba na defensa de los derechos humanos. Amás, indicó que les zones más desarrollaes del Estáu tienen un idioma oficial distintu del castellanu, «polo que ta demostrao que la oficialidá favorez el desarrollu d’un país».

La formación nacionalista apues ta porque l’asturianu seya llingua vehicular na RTPA y na enseñanza, el reconocimientu de la especialidá d’asturianu o la meyora de les condiciones del profesoráu, «midíes que tienen l’oxetivu de recuperar la tresmisión del idioma y revitalizalo a tolos niveles».

Les declaraciones produciéronse nel marcu d’un conceyu d’esta coalición cola Xunta pola Defensa de la Llingua Asturiana, la selmana pasada.

Esi llunes, 9 d’abril, a les siete la tarde, Unión URAS-PAS presenta’l so programa electoral nel Ateneú Xovellanos de Xixón, que tien la so sede na vieya Escuela Comerciu, na cai Francisco Tomás y Valiente de Xixón. La presentación del actu va tar a cargu de Sergio Marqués, ex Presidente d’Asturies, cuntando col candidatu asturianista, Xuan Xosé Sánchez Vicente, candidatu de la coalición URAS-PAS, como ponente del programa. La entrada ye llibre.

Dientro de los alcuentros de los llectores de La Nueva España colos candidatos, van tar esta selmana, Xuan Xosé Sánchez, candidatu d’URAS-PAS, esti llunes 9, a les 12 hores; Rafael Palacios, del Bloque-UNA, el martes 10 a les 12 la mañana; Jesús Iglesias, d’Izquierda Xunida-Los Verdes, el miércoles 11 de mayu a la mesma hora.

El xueves 12, a les 12:30 hores, sedrá’l turnu de la candidata conservadora, Isabel Pérez-Espinosa. El vienres 13, a les 12:30, tará nel alcuentru colos llectores Javier Fernández, candidatu de la FSA-PSOE.

Yá se recueyen entrugues pa los candidatos a Presidente d’Asturies.

Canal de los alcuentros en Lne.es

El Conceyu d’Unidá Popular de Xixón presentó ayeri nel Paséu de Begoña, na cai, la so candidatura y propuestes pa les elecciones del conceyu. L’eventu foi según cunten los organizadores “pocu protocolariu, nada de mítines personalistes con somníferes parolaes del llíder de turnu, o con conseñes fáciles que busquen l’aplausu”, el CUPX ayeri denunció “la situación que vive’l pueblu trabayador en Xixón y realizó propuestes concretes de llucha”, espliquen.

L’actor David Acera, fizo de maestru de ceremonies y presentó a los candidatos y candidates, un total de 30 “muyeres y homes lluchadores”, dalgunos de tola vida como la cabeza de llista Boni Ortiz, o como Cándido Carnero que, esplicaron “nun tán na llista porque la xusticia nun-yos dexa, anque yá nun tán ente rexes, los sos derechos ciudadanos entá nun tán restituyíos, nun van poder votar, nun pueden ser escoyíos, esa ye la verdadera cara d’esta democracia”, denuncien dende’l CUPX.

El presidente del Gobiernu asturianu, Vicente Álvarez Areces, participó per primer vegada na llectura institucional de testos n’asturianu qu’estmiércoles, como se fai davezu tolos años, se celebraba na Xunta Xeneral del Principáu, por cuenta de la Selmana de Les Lletres.

Esta yera la primer vegada, nos sos dolce años de presidencia, qu’Areces participaba nesti actu, lo que fai entá más llacerosia la so presencia nel mesmu, xustamente nel momentu nel qu’abandona pela puerte d’atrás la política.

Nel actu tomaron parte diputaos autonómicos, amás de representantes d’organismos públicos, como la presidenta de l’Academia de la Llingua, Ana Cano, el rector de la Universidá d’Uviéu o la directora xeneral de Política Llingüística, que lo vienen faciendo dende hai años.

Areces tomó la palabra de segundes, tres la presentación y llectura de la presidenta de la Xunta, María Jesús Álvarez, pa lleer ‘Acabación’, del poeta llangreanu Mánfer de la Llera, al que se-y dedica esta Selmana de Les Lletres.