Política

Nuna entrevista espublizada en La Voz de Asturias la presidenta de l’Academia de la Llingua Asturiana, Ana Cano, faló de “novedá importante” al referise al discursu del nuevu Presidente d’Asturies, Francisco Álvarez-Cascos, “un interés en proyectar una Asturies asturianista”.

Cano espera que’l brinde de Cascos al diálogu coles fuercies polítiques pol consensu en temes importantes, “énte los qu’espera que s’atope l’asturianu”.

La presidenta espera que Cascos cumpla la so promesa de desenrrollar la Llei d’Usu del Asturianu. Sicasí Cano afirma que “xulgar polítiques ye inda prematuru”.

Ana Cano espera que Cascos use l’asturianu “Cualesquier presidente del Principáu tendría d’utilizar en dalgún momentu la llingua asturiana y especialmente nun discursu tan importante”.

Nun comunicáu asoleyáu esti día, N’Ast considera probes los compromisos llingüísticos del discursu istitucional de Cascos, cualisquier midía que nun incluya la oficialidá de la llingua asturiana ye insuficiente y va a la escontra de los drechos humanos más ellementales.

Na opinión de l’Asociación Francisco Álvarez Cascos, nel discursu institucional que pronunció’l martes na Xunta Xeneral como candidatu a la presidencia d’Asturies, tuvo lliteralmente la viniente referencia a la llingua asturiana: “como parte muy importante de la cultura asturiana desarrollaremos la Ley de Uso y Promoción del Bable/Asturiano de 1998 y apoyaremos a la creación literaria de nuestros escritores”.

Dende N’Ast si bien valoren de manera positiva que’l futuru presidente d’Asturies asuma la necesidá d’avanzar na actual rialidá xurídica del asturianu, nun puen dexar de considerar insuficiente cualesquier midida que nun contemple una declaración d’oficialidá, pos el “problema” de l’actual realidá del asturianu nun pue amenorgase a dellos aspeutos ins- titucionales o lliterarios, sinón qu’implica la reconocencia política de los asturfalantes como suxetos efeutivos d’unos derechos humanos y civiles de primer orde como son los derechos llingüísticos.

El candidatu a la Presidencia d’Asturies, Francisco Álvarez-Cascos (FAC), amosó esti martes na Xunta Xeneral del Principáu d’Asturies les principales llinies del programa de gobiernu a aplicar na so primer llexislatura al frente del executivu rexonal y fizo de la Universidá una de les exes del so discursu. A la propuesta de crear una Universidá Politécnica en Xixón axuntó’l compromisu de dotar a la Universidá en 100 díes de los recursos pa Bolonia.

La propuesta de la Universidá Politécnica sedría d’excelencia y supondría la creación de nuevos centros y la xuntura voluntaria de dalgún esistente, lo que fai pensar que trataría d’adientrar nella los centros qu’anguaño tien la Universidá d’Uviéu en Xixón, anque ensin esclarialo.

La propuesta tamién ufría novedaes pala Universidá d’Uviéu, a la que se-y prometíen nos próximos 100 díes tolos recursos que necesitep contratar el profesoráu que l’adaptación a Bolonia requier y que’l Gobiernu d’Areces y negare cola conxelación de profesoráu apautada pa estos años.

Avilés tamién tuvo nel discursu del candidatu a presidente col aportar d’un campus como’l de Mieres pala Villa del Adelantáu que sedría dependiente de la Universidá Politécnica de Xixón, encadarmada al estilu del MIT de Massachusets col qu’entamaría faciendo un conveniu.

Nel so discursu, que tuvo una duración de dos hores con delles cites a Xovellanos, Cascos destacó tamién la so apuesta clara por un “cambiu” dafechu na xestión autonómica proponiendo ente delles medíes polítiques y económiques la baxada d’impuestos y un modelu de xestión pa los sistemes educativu y sanitariu nel que se trabayaría dende la collaboración público-privada.

La llingua asturiana malpenes tuvo presencia nel discursu institucional del candidatu a presidente d’Asturies esti martes na Xunta. Francisco Álvarez Cascos namái que dixo lliteralmente que “como parte muy importante de la cultura asturiana desarrollaremos la Ley de Uso y Promoción del Bable/Asturiano de 1998 y apoyaremos a la creación literaria de nuestros escritores”.

El fechu de que nun se concretaren midíes notres fasteres de la propuesta de gobiernu fai albidrar qu’entá nun hai una idega nidia de como facer esi desendolcu y que nun se quieren dar más referencies mentantu nun se dibuxe finalmente la composición del Gobiernu y l’encaxe d’esta fastera nel organigrama de la futura Conseyería de Cultura.

El caberu Conseyu del Gobiernu en funciones d’Areces alcordó esti martes dexar en manes del futuru executivu d’Asturies la cesión d’usu del Centru Cultural Internacional Oscar Niemeyer, faciendo prevalecer la opinión al respeutive d’IX. El Gobiernu saliente considera procedente por razones de llealtá institucional dexar esti acuerdu pa que lu adopte’l Gobiernu surdíu del procesu electoral celebráu’l pasáu 22 de mayu del 2011, anque Areces manifestare públicamente’l llunes que la cesión yera urxente si nun se quería perxudicar la programación de la Fundación Niemeyer.

L’asociación pro llingua N’ast, unvió una nota de prensa al traviés de la que quixo felicitar “a tolos cargos políticos eleutos qu’a lo llargo d’estos díes tomaron posesión de los sos escaños y conceyalíes utilizando la llingua asturiana”. Un fechu que consideren “d’especial importancia” pues camienten que “la necesaria rexeneración democrática y moral que rique’l nuesu País nun ye realizable ensin la plena normalización social de la llingua del pueblu asturianu”.

Nes pasaes selmanes xuraron o prometieron el so cargu n’asturianu cargos a lo llargo de toa Asturies. Nel casu de Noreña, los conceyales Inaciu Iglesias (FAC) y Pablo Pérez (Conceyu Abiertu), en Xixón, José Ramón Tuero, hasta agora Conceyal de Deportes FSA-PSOE; Carlos Rubiera, de Foru Asturies, y Jorge Espina, cabeza de llista d’Izquierda Xunida-Los Verdes nel conceyu; en L.lena, Ramón Argüelles, xuró’l cargu de conceyal n’asturianu y el cargu d’Alcalde en castellán; Rolando Díaz d’Izquierda Xunida-Los Verdes, y Agripino Pérez, de Bloque Por Asturies-UNA, tamién xuraron n’asturianu. En Casu Felix González Noriega de FAC tamién xuró n’asturianu, y estos son namás unos pocos exemplos.

Na Xunta Xeneral: María Pilar Alonso Alonso, númberu 7 de la llista de la FSA-PSOE y Emilia Vázquez Menéndez d’Izquierda Xunida, xuraron dambes dos cola fórmula “Faigo promesa”. Unos fechos que pa N’ast son perimportantes “yá qu’un futuru dignu pal idioma asturianu pasa pol so usu ensin complexos en tou tipu de situaciones y contestos”.

Yolanda Huergo considera que ye’l momentu de la reflexión, análisis y autocrítica pa consolidar un proyectu políticu asturianu, sigñún diz nuna nota de prensa asoleyada esti vienres na que la Executiva d’UNA agradez tamién el votu y l’apoyu durante la campaña y considera que’l resultáu de les elecciones tuvo perbaxo de les espectatives y posibilidaes de la coalición.

La portavoz d’UNA Yolanda Huergo, tres de la reunión de la Xunta Executiva celebrada ayeri, na que se valoraron los resultaos de les pasaes elecciones, señaló que “UNA agradez fondamente la confianza de los casi 7.000 asturianos y asturianes que dieron el so apoyu a les distintes candidatures municipales o autonómiques de la coalición Bloque por Asturies-UNA a les elecciones del 22 de mayu y a los cientos de persones que trabayaron y nos sofitaron na campaña d’una o otra manera”.

Según Huergo “ye’l momentu d’un fondu análisis d’unes elecciones nes que los resultaos tuvieron perbaxo de les nueses posibilidaes y espectatives, y esi análisis tenemos que facelu tanto UNA como’l Bloque con humildá, fonda autocrítica y siempre de forma constructiva”.

Respective al panorama políticu qu’escoyeron los asturianos y asturianes el domingu pasáu, Huergo comento que “dende la Executiva d’UNA constatamos que n’Asturies había una demanda importante de cambiu polos años de gobiernu de redes clientelares y la xestión nefasta del bipartidismu PSOE-IU y PP, que traxeron la subordinación d’Asturies, la so invisibilidá y l’acentuación de la crisis”. La portavoz d’UNA comentó que “esi descontentu canalizólu mayoritariamente la opción casquista, convirtiéndose na receptora d’un votu protesta énte la situación política asturiana, xenerando una falsa sensación de cambiu”.

Huergo comentó amás que “dende la Executiva d’UNA felicítase especialmente a los conceyales de Carreño,Nava y L.lena y llaméntase que n’otros conceyos nos que se sacaren mui bonos resultaos nun se pudiere algamar la representación, anque se dexa una bona base de trabayu pa los próximos años”.

Pa finar la portavoz d’UNA comentó que “esta organización ta inda más comprometida que’l día 22 pa consolidar y ampliar los espacios de suma, de diálogu y d’alcuerdos que tán abiertos nesti momentu y pa siguir construyendo de forma afayadiza’l proyectu asturianu, d’izquierda y ecoloxista y non subsidiariu, qu’Asturies precisa y que nos demanda una parte de la sociedá”.

La Executiva decidió convocar una Xunta Xeneral de la organización, máximu órganu de la organización ente congresos, na próxima semana pa definir la fueya de ruta nos próximos meses.

L’Asociación Cultural N’Ast, con motivu de la victoria del Foro Asturias nes eleiciones autonómiques, asoleyó un comunicáu nel que desixe a la formación d’Alvárez Cascos la oficialidá. Pa N’Ast, el nuevu escenariu políticu “presenta la gran nota positiva de francer cola dinámica bipartidista y sucursalista de los pasaos trenta años” asistiendo por primer vez “a una seria posibilidá de que la xestión de les instituciones autonómiques respuenda a analises, polítiques y oxetivos centraos nes necesidaes y problemes específicos de la sociedá asturiana”.

Poro, pa N’Ast el Foro Asturias, y el so principal dirixente, Francisco Álvarez-Cascos Fernández, tienen “la gran responsabilidá d’entamar un procesu de reestructuración qu’encare los grandes retos del nuesu País en tolos campos: social, económicu, cultural, etc” y no que se refier al campu cultural y llingüísticu, “si’l Sr. Francisco Álvarez-Cascos Fernández quier ser mínimamente consecuente col discursu rexonalista qu’utilizó nos caberos meses, tien que dar un xiru de 180º a les polítiques públiques esistentes anguaño” y nesi sentíu una midida “urxente, central ya imprescindible” pa recuperar “l’arguyu de ser asturianos” y poner fin a una situación “d’esquizofrenia identitaria y de negación de los derechos civiles de los asturfalantes, ye’l dotar a la llingua asturiana del estatus xurídicu de la oficialidá”.

N’Ast remata la so nota prensa afirmando que “si’l rexonalismu manifestáu pol Sr. Francisco Álvarez-Cascos Fernández ye sinceru y nun respuende a una simple maniobra d’oportunismu eleutoralista, nestos momentos tien la obligación moral d’asitiar como ún de los puntos prioritarios de la so axenda política’l negociar un procesu de reforma estatutaria qu’incluya la Oficialidá de la llingua”.

Foro Asturies, el partíu lideráu por Francisco Álvarez-Cascos, desanició ayeri toles encuestes que falaben del caltenimientu del PSOE nel escenariu rexonal, algamando una victoria nes urnes impensable dos meses enantes y poniendo na so mano’l Gobiernu autonómicu. La izquierda quedó abondo alloñada de los 23 escaños que dan la mayoría absoluta y el PP, pela so parte, sufrió un escalabru dafechu al pasar de los 20 diputaos con que cuntaba hasta agora a namái que 10.

Los principales cabezaleros del PP, la candidata, Isabel Pérez-Espinosa, y l’alcalde d’Uviéu, Gabino de Lorenzo, abrieron darréu la puerta, una vegada conocíos los datos, a un entendimientu con Foru que convierta a Cascos en presidente.

Foro Asturies pasa con estos resultaos a convertise nel principal partíu del arcu parlamentariu con 177.588 votos, lo que-y dexa sumar 16 escaños. Estos diputaos dexen a Álvarez-Cascos como candidatu direutu a ocupar el edificiu presidencial de la cai Suárez de la Riva, por cuenta d’algamar dalgún tipu d’alcuerdu col Partíu Popular, ya inclusu ensin esi alcuerdu al ser la fuerza más votada.

La cayida del PSOE, que foi xeneralizada en toa España, amenorgó na rexón nel casu de les elecciones locales. Sicasí, los socialistes caltienen la mayor parte del poder municipal, pero sufren perdes bien sensibles, sobremanera la de la mayor ciudá del Principáu, Xixón, onde fueron el partíu más votáu pero la suma de Foru y PP tien la mayoría absoluta, con ventaya pa llograr l’Alcaldía pa la candidata del partíu de Cascos, Carmen Moriyón, que llogró nueve conceyales, por cinco de la popular Pilar Fernández Pardo, que sufrió tamién un duru cstigu.

El PSOE pierde tamién Mieres en favor d’IX, que dobló en conceyales a los socialistes. Izquierda Xunida tien mayoría tamién en L.lena, onde repetirá alcaldía, en Castrillón ya Illas, onde ya gobernaba, y en Cangas del Narcea onde quedó penrriba de PP y PSOE.

N’Uviéu, Gabino de Lorenzo perdió la mayoría absoluta pero’l rexidor uvieín compareció na nueche electoral abriendo les puertes a un alcuerdu con Foro Asturias que, nel so casu, dexaría-y caltener el cayáu de mandu. Avilés, onde podrá reeditase el pactu ente les fuerces de la esquierda, ye agora la principal plaza municipal pa los socialistes, qu’amás podríen recuperar l’Alcaldía de Siero si son capaces de reeditar el pactu múltiple que suscribieron va cuatro años, magar paez más futurible que pacten FAC y PP colos dos conceyales del Partíu de La Fresneda y gobierne darréu FAC.

El PSOE algamó la mayoría absoluta en 28 de los 78 conceyos asturianos y venció con mayoría simple n’otros 25.

Los resultaos nacionalistes foron curtios y Bloque-UNA nun pudo algamar tan siquier el 1%, lo mesmo qu’asocedió cola coalición PAS-URAS que desapaez del panorama políticu práuticamente. Bloque-UNA algamó en toa Asturies 5.460 votos, un 0,91%, y URAS-PAS 3.023 votos y un 0,50%. Les dos coaliciones llograron dos conceyales caúna.

UPyD tamién quedó llloñe d’algamar el diputau que se-y pronosticaba y como IDEAS viéronse perxudicaos pola mareona que xurdió de la candidatura de Cascos.

Güei vienres 20 de mayu de 2011, a les 19.00 horesna plaza de Begoña los coleutivos que sofiten el movimientu DemocraciaReal Yá en Xixón fadrán una concentración ciudadana amenizada pola Charanga El Ventolín. A partir de les 20.00 hores, los asistentes celebrarán una asamblea ciudadana na Plaza Mayor de Xixón y a partir de les 22.30 hores sirvirase una cena solidaria, na que los concentraos van ufiertar una paella a tou aquel que s’avere, convidando tamién a que tol que quiera xunise apurra los sos propios alimentos.

Dende Xixón informen qu’entá nun saben qué fadrán el sabadu, anque’l sentir xeneralizáu ye quedase. De l’asamblea d’esta tarde puede salir un llamamientu a una sentada pacífica, quizas silenciosa, apelando especialmente a la xeneración de la Transicion “pa que defendan aquello polo que tanto llucharon y que día ente día nos estan usurpando”.

Per otra parte, na concentración d’Uviéu ta pensáu faer una acción simbólica sobre la crisis y los bancos esti vienres a les 12.30, pero en qué va consistir va ser una sorpresa. Pela tarde, a les 18.00 va haber una conferencia sobre “Causes y Consecuencies de la crisis n’Asturies”, centrada sobremanera nel racismu y l’especulación inmobiliaria. Darréu, la hermana de José Couso va compartir les sos palabres colos concetrados y a les 20.00 hores va haber asamblea ciudadana abierta como cada tarde.

Avilés xunióse güei a les concentraciones anque nesti momentu nun tenemos confirmación sobre si van faer acampada o non.