Política

La presidenta de l’Academia de la Llingua Asturiana denunció nuna rueda de prensa la situación que puede carecer institución que preside, faciendo un llamáu al Presidente d’Asturies, Francisco Álvarez-Cascos “pa qu”intervenga y torgue”l retayu” d’hasta un 40% de los presupuestos de la institución, que se plantega col presupuestu prorrogáu. Una situación que Cano calificó de “mui inxusta”. La presidenta de l’ALLA fizo tamién un llamáu a tolos partíos pa que s’enfrenten a esti retayu que-y confirmó, según esplicó, el propiu Director de Política Llingüística, Alfredo Álvarez. L’ALLA pasaría, si acaba cumpliéndose esta previsión, de los 230.000 euros colos que cuntaba nel 2011 a 134.000 euros nel 2012.

La presidenta esplicó que les actividaes de l’Academia diben vese torgaes en casu de qu’esti presupuestu se confirmare. Yá que con esta cantidá malapenes daría pal pagu del personal y de la organización del Día de les Lletres Asturianes.

Ana Cano recordó que’l presupuestu de l’Academia en 2011 yá taba “axustáu n”estremu” y esplicó cómo esta decisión pon en “gravísimu peligru” el procesu y normalización y de recuperación llingüística que se vien llevando a cabu n”Asturies y supón l”escenariu “más grave” al que l’Academia tuvo d’enfrentase nos sos trenta años d’actividá.

Gaspar Llamazares, diputáu d’IX d’Asturies nel Congresu, hores primero que’l Gobiernu de Rajoy aprobara, por decretu llei, la nueva reforma llaboral refeiriose a ella como “una agresión a los derechos de los trabayadores ensin precedentes” que nun va crear emplegu sinón que va destruyir el pocu emplegu que tenemos. Va Significar “toos paraos o precarizados” alvirtió en rueda de prensa n’Uviéu.

Llamazares alvirtió qu’IX va ser batallosa con esta reforma yá que “si apuesta pola agresión a los trabayadores”, IX va responder cola movilización.

A xuiciu de Llamazares el Ministru de Guindos “arrodillose ante’l Comisariu Européu d’Asuntos Económicos”. Esa imaxe, aseguró, faltando a los trabayadores españoles y falando d’una reforma agresiva ye la del fuerte colos débiles y de débil colos fuertes, y nun ye precisamente “d’un ministru democráticu”.

Llamazares llamentó’l cambéu esperimentáu polos responsables del Gobiernu central que “demientres un momentu paecía que buscaben posiciones nel centru pero qu’agora les adopten más estremes”. “Amás pretende un nuevu contratu de calter temporal y pasar una llínea colorada que dixeron que nunca pasaríen, la ultra-actividá de los contratos”, esplicó.

A lo último, consideró qu’esta imaxinaria llínea colorada pasa inclusive percima de lo alcordao polos axentes sociales y económicos y adelantró qu’esta reforma va traer más paru y “va sustituyir el pocu emplegu calidable esistente pol precariu”.

Conceyu Abiertu por Noreña presentó-yos al resto d’organizaciones polítiques del conceyu (PSOE, IPÑ, PP, FDLI, FAC ya IDEAS) una propuesta d’Ordenanza municipal pal usu de la llingua asturiana nel Conceyu de Noreña pa que la puean estudiar y facer propuestes de cara a llevala a los órganos de decisión del conceyu nes próximes selmanes. La propuesta tien como referencia otres ordenances d’usu del asturianu vixentes anguaño n’otros conceyos asturianos.

Conceyu Abiertu por Noreña espera poder aconceyar con representantes de toles organizaciones, “de cara a recoyer les sos impresiones y propiciar l’aprobación d’una ordenanza por unanimidá”, espliquen. D’aprobase, esta sedría la primer vegada que Noreña se dote d’una normal llocal sobre la llingua propia del conceyu, se reconozan los drechos llingüísticos de tolos vecinos y vecines, se regule l’usu nel ayuntamientu y dalgunes midíes de promoción y normalización. Ye por ello que dende Conceyu Abiertu albidre que “sedría preferible aprobalo tolos grupos, siendo amás la llingua patrimoniu de tolos noreñenses independientemente de la so ideoloxía”.

Mientres los últimos meses, espliquen, “en Conceyu Abiertu por Noreña venimos estudiando les ordenances sobre l’asturianu vixentes n’otros conceyos d’Asturies, de cara a llevar alantre esti puntu del nuesu programa ellectoral”.

Recuerden la necesidá d’estes ordenances con un casu asocedíu va unos meses, cuando pa Conceyu Abiertu “volvió a vese claramente nel conflictu llingüísticu que se vivió en Noreña a finales del añu pasáu”, en referencia a la negativa del alcalde a almitir mociones n’asturianu y el rechazu a una propuesta posterior de solución provisional, que presentaron dende Conceyu Abiertu.

Aquella polémica fizo que l’Academia de la Llingua Asturiana amosara’l so descontentu pola actuación del alcalde, xunto a otres organizaciones de defensa de la llingua y cultura asturianes.

Conceyu Abiertu alvierte que presenta “unes ordenances axunstaes a la llexislación vixente y asumible por tolos grupos municipales y pol propiu gobiernu municipal (PSOE-IDEAS)” y recuerden que’l PSOE “tien aprobao ordenances d’esti tipu n’otros conceyos asturianos”, recordando amás que “les ordenances nun supondríen un coste económicu al Conceyu, dependiendo gran parte de les actuaciones de la voluntá política y que tres aprobala, diría poniéndose en práctica paulatinamente, según los medios disponibles”.

Pa la formación nacionalista “l’aprobación de la ordenanza, amás de ser un actu de dignificación de la llingua y cultura asturianes, supón un necesariu avance democráticu”.

Un grupu de miembros de dellos partíos nacionalistes asturianos d’izquierda vienen acabante firmar una carta abierta “al asturianismu, al nacionalismu asturianu, a los movimientos sociales, ecoloxistes y a tola sociedá asturiana” na que piden “una alternativa política” pa les elecciones del viniente 25 de marzu n’Asturies. La docena de firmantes d’esta carta pública piden a Bloque por Asturies, UNA y Andecha Astur “qu’abran un procesu de diálogu nes próximes hores” pa crear “una única y amplia coalición electoral de la que formen parte tolos partíos asturianistes, nacionalistes d’esquierdes, verdes y a la que se sumen persones independientes y organizaciones sociales”.

Esti ye’l comunicáu completu y la llista de firmantes, que se fizo pública esti domingu pela nueche.

CARTA ABIERTA AL ASTURIANISMU, AL NACIONALISMU ASTURIANU, A LOS MOVIMIENTOS SOCIALES, ECOLOXISTES Y A TOLA SOCIEDÁ ASTURIANA

Los abaxo firmantes, persones esmolecíes dende va tiempu, social, cultural y políticamente pol nuesu país MANIFESTAMOS:

La necesidá imprescindible de facer un esfuerciu pa presentar nes eleiciones del 25 de marzu de 2012, una ALTERNATIVA POLÍTICA A LES ORGANIZACIONES PRESENTES NA XUNTA XENERAL, poles que nun mos sentimos representaos y qu’antroxen la vida de los asturianos y asturianes, condergándonos a un abismu del que nun vamos poder salir en décades.

Afalamos a toles organizaciones del espaciu políticu del nacionalismu d’esquierda (UNA, Andecha Astur y Bloque por Asturies) a qu’abran un procesu de diálogu nes próximes hores, cola urxencia que necesita esti momentu políticu de fonda crisis social, cultural, medioambiental y política.

Pidimos la presentación nos prósimos díes d’una única y amplia COALICIÓN ELECTORAL de la que formen parte tolos partíos asturianistes, nacionalistes d’esquierdes, verdes y a la que se sumen persones independientes y organizaciones sociales. Pidimos que nun haya esceiciones, escaecer el pasáu y que se faiga un exerciciu de responsabilidá política pa ver lo esencial: PRESENTAR UNA ALTERNATIVA POLÍTICA DENDE ASTURIES PA SOLUCIONAR LOS PROBLEMES D’ASTURIES.

FIRMEN:

Mariu Arbesú

Fernando Ornosa

Antón Fuertes

Inaciu Llope

Iyán González

Xune Elipe Raposo

Xulio Llaneza

David Rivas

Dulce Xil

Xosé Ambás

Xicu Mata

Pablo Pérez

L’asociación N’Ast considera una desvergoña l’usu del asturianu que fai Gaspar Llamazares nel Congresu de los Diputaos. La organización remembra lo que califica de “situación predemocrática que carez la nuesa llingua” y señala como culpables “ente otres cuestiones, l’incumplimientu de les promeses electorales per parte d’Izquierda Xunida”, formación a la que pertenez Llamazares.

Pa N ’Ast ye “hipócrita y contradictorio” lo que califica como “usu mediáticu de la reivindicación llingüístico” que, según esta asociación se fai dende Izquierda Xunida.

N’ast señala a esta formación política copmo culpable de que l’asturianu nun seya llingua oficial n’Asturies, y per ende, de llibre usu nel Congresu español, pues según espliquen “IX dempués de prometer la oficialidá de la llingua asturiana en diverses convocatories electorales, incumplió sistemáticamente esti compromisu a la hora de negociar la so participación nel gobiernu d’Asturies col PSOE”, convirtiéndose asina, “en cómpliz de la represión llingüística a cambiu d’una riestra de prebendes polítiques y económiques”.

Por ello N’ast fai “un llamamientu, sinon a la coherencia per parte d’IX, sí a lo menos a un mínimu de dignidá y vergoña, de tala miente que los que son responsables en primer grau de la situación predemocrática que carez la nuesa llingua, nun se pretendan presentar agora como defensores de la mesma”.

Otra vuelta, problemes col cumplimientu de la toponimia oficial n’Asturies. Énte la instalación de señalización toponímica nel enllaz de Noreña cola Autovía Minera Conceyu Abiertu por Siero y Conceyu Abiertu por Noreña denuncien que “nun se respeta la toponimia oficial, dándose’l casu que la oficial “Ferrera” se convierte en “La Ferrera”, apaeciendo amás “La Ferrera de Abajo” y “La Ferrera de Arriba”, en llugar de les denominaciones oficiales “Ferrera de Baxo” y “Ferrera de Riba””. Los miemros de CA recuerden que la toponimia tradicional ye la oficial del Conceyu de Siero dende 2009, cuando s’espublizaó nel BOPA’l correspondiente decretu.

Pa CA ye “surrealista” que más de dos años más tarde nun se señalice respetando la toponimia oficial, “llegando al esperpentu d’inventar topónimos como “La Ferrera”, espliquen. Recuerden que nel casu d’esti topónimu, parte “pertenez al Conceyu de Noreña, siendo oficial el topónimu dende 2007”, cuando s’espublizó’l decretu de toponimia del conceyu condal.

Conceyu Abiertu por Noreña, que cunta con representación nel Plenu Municipal va solicitar que’l Conceyu de Noreña tome la iniciativa y pida que se respete, como sedría lóxico, la toponimia oficial nes instancies que correspuendan y que contacte col Conceyu de Siero de cara a faer causa común. Fadrálo yá en forma de ruegu nel Plenu que se celebra mañana, xueves 26.

Amás d’esto, recuerden que “na señalización del enllaz esisten erros más graves si cabe y los cartelos indicativos nun recueyen la forma oficial de la capital del Conceyu de Siero, “La Pola Siero”, señalizándose erroneamente “Pola de Siero”.

Conceyu Abiertu califica de “chambonada” la señalización y considera que los Conceyos tienen que tomar cartes nel asuntu de cara a que l’enllaz recueya la señalización correcta. Recuerden que “quiciabes si los responsables municipales tuvieren sollertes al desenvolvimientu de les obres y tuvieren comenenciudos na bona señalización de les llocalidaes, agora nun taríamos énte esta aberración, qu’amás xeneró indignación ente los vecinos noreñenses y sierenses de Ferrera”.

Gaspar Llamazares, diputáu d’IX d’Asturies, va demandar nel Congresu de los diputaos la reconocencia del asturianu como especialidá pal profesoráu asturianu qu’imparte l’asignatura. El diputáu asturianu va utilizar dos víes: una primera que va consistir nuna batería d’entrugues sobre por qué nun se cumplió l’encamientu del Conseyu Escolar estatal fechu en 2008 y sobre por qué tando reconocíu oficialmente’l grau y el master nos estudios universitarios, los alredor de 260 maestros y profesores qu’imparten l’asignatura, siguen condergaos a la interinidá y ensin tener oposiciones pa la especialidá, amás de preguntar pa cuándo la so reconocencia. La segunda vía va consistir nuna proposición non de llei por que se ponga fin “de manera inmediata” a a décades de falta de considerancia. Llamazares anunció que diba usar l’asturianu, xunto col castellán, nes sos intervenciones sobre esta cuestión.

Llamazares realizó estes declaraciones tres una xunta cola Presidenta de l’Academia de la Llingua Asturiana, Ana Cano, y l’académicu Xosé Antón Fernández Riaño. Na mesma’l diputáu tamién adelantó que va utilizar l’asturianu tantu nes entrugues como la intervención pa defendeles, conxuntamente col castellán, anque’l reglamentu del Congresu non prevéa l’usu d’otru idioma que nun seya’l castellán. Ye, a xuiciu del diputáu, una forma “de dar visibilidá y normalidᔠa la llingua asturiana.

Ana Cano sorrayó que la reconocencia de la especialidá del asturianu ye una de les cuestiones más urxentes que tien de resolvese y pallo namás fai falta “voluntá política” una y bones el profesoráu yá ta dando clases, ye una materia que forma parte del curriculu escolar y les titulaciones que capaciten a los maestros y profesores son tamién oficiales. “Ye una contradicción qu’esista un oficiu que nun se reconoz como tal y que caltien al profesoráu en precariu, en situación d’interinidá y ensin poder concursar, de manera que, dende’l puntu de vista llegal son invisibles pa l’alministración”.

Preguntada pola rebaxa del 24% del presupuestu de l’Academia de la Llingua Asturiana, anunciada pol Gobiernu asturianu, Cano considera que va afectar “sustancialmente” al llabor de la Institución. Ello ye que afirmó que los fondos van dar xusto pa pagar la plantiya de cuatro persones, los gastos de caltenimientu y les actividaes que “nun podemos dexar de facer”: ‘Xornaes d’Estudiu’, la Universidá de Branu y el Día de les Lletres Asturianes. Ve difícil la continuidá de los estudios, acciones d’informatización, la presencia de becarios, les publicaciones y el restu de xeres que se desenvuelven dende l’órganu. El presupuestu de l’Academia va ser anguaño d’unos 167.000 euros, unos 60.000 menos que nel exerciciu anterior, lo que lu asitia nos niveles de 1998.

La falta de compromisu de los conceyos y la inesistencia d’un conveniu cola Direición Xeneral de Política Llingüística, que dexa en situación de total indefensión a los trabayadores, llevó al pieslle de trés Servicios de Normalización Llingüística –Llaviana, Corvera y Mancomunidá Ozcos-Eo- a los qu’hai que sumar el casu del SNL peslláu n’agostu y a los continuos parones nestos servicios dende’l so nacimientu, según denuncien dende Iniciativa pol Asturianu, que s’opón “al retrocesu que supón dexar ensin normalización a los conceyos nos que trabayen estos servicios y la consiguiente perda de puestos de trabayu que remanez d’ello”.

Los Servicios de Normalización Llingüística (SNL) son los departamentos que desendolquen el trabayu téunicu de cara a avanzar nun consensuáu procesu de normalización del idioma asturianu y del eonaviegu. Un trabayu que califiquen de “necesariu, xustu ya ilusionante” de fomentu del asturianu y del eonaviegu “nun nivel de contautu más direutu cola ciudadanía”.

Pa Iniciativa pol Asturianu, la Direición Xeneral de Política Llingüística “tien la obligación y la responsabilidá de cumplir cola normalización llingüística, calteniendo estos servicios, afalando a los conceyos a la estabilidá de los mesmos y faciendo que la Rede llegue al 100% de la población asturiana, ampliando esta rede a los llugares a los qu’agora nun llega”.

Dende Iniciativa pol Asturianu piden tamién, al igual que los trabayadores, “da-y personalidá xurídica propia a la Rede de Normalización Llingüística nos Conceyos”, dalgo que, espliquen “facilitaría la coordinación y qu’anguaño esiste únicamente pola voluntá de los téunicos”.

El Conseyeru de Cultura, Emilio Marcos Vallaure, fizo un parte pequeña de la so intervención usando l’asturianu y el gallego-asturianu. Foi na presentación énte la Comisión de Cultura de la Xunta Xeneral de los presupuestos pal añu que vien, nos que Política Llingüística tien un retayu del 24%, que’l Conseyeru dixo “ va compensase con voluntá política”.

L’Academia de la Llingua Asturiana ve retayáu’l so presupuestu nun 27%.

Esti miércoles 11 de xineru conociéronse les etapes de la Vuelta Ciclista a España pa esti añu 2012, con dos llegaes n’Asturies: nos llagos d’Enol y La Ercina (Cangues d’Onís), y nel picu de Cuitunigru (L.lena). Nos medios de comunicación yá s’espardió dende va años la forma ensin base popular “Lagos de Covadonga” pa la primera de les llegaes, pero agora añádese una forma nueva: “Cuitu Negru” o “Cuitu Negro” pa la segunda.

El problema, espliquen dende la Xunta “nun se reduz a los finales d’etapa, sinón que los pasos per otros altos popularicen formes deturpaes como “Alto de San Lorenzo” (San L.lourienzu), “Alto de Tenebredo” (Tenebreo), “Alto de Ortiguero” (H.ortigueru), etc.”

La Xunta pola Defensa de la Llingua Asturiana (XDLA) considera que ye’l momentu de que la Xunta Asesora de Toponimia intervenga énte los organizadores de La Vuelta pa que se respeten los nomes auténticos igual que se fai nes etapes gallegues, catalanes, vasques, etc., porque depués de la popularización nos medios de formes enquivocaes ye mui difícil volver a recuperar les reales, les qu’usó la población local hasta que se fixeron famoses. Si nel casu de L’Angliru se respetó la forma tradicional, nun s’entiende que nel casu de Cuitunigru namás se respeta na primer metá del topónimu.

La XDLA considera “que ye una bona oportunidá de facer llegar a un bon númberu de xente’l valor de la toponimia tradicional asturiana”. De la mesma manera, quieren “animar” a la Xunta Asesora de Toponimia “a completar los espedientes toponímicos de tolos conceyos y ponese a trabayar con otru tipu de topónimos con menos implicaciones llegales o reglamentaries como son los accidentes xeográficos”.