Política

Anque nel pasáu yá tuvieren ente los sos principios la defensa de la oficialidá del asturianu, va años que les Mocedaes Socialistes d’Asturies, la xuventú de la FSA-PSOE, abandonare esta cuestión. Agora, nel congresu celebráu esta fin de selmana en Llangréu, onde s’escoyó a Unai Díaz Noval, conceyal del PSOE en Noreña, como secretariu xeneral, les MSA vuelven a incluyir la defensa de la oficialidá del asturianu ente los sos principios políticos. Iniciativa pol Asturianu felicitó a la organización por “incluyir la defensa de la oficialidá del asturianu ente los sos oxetivos como organización”, pidiendo al mesmu tiempu a la FSA-PSOE “que siga l’exemplu de les sos mocedaes y defendan la oficialidá del asturianu”.

Pa Iniciativa pol Asturianu esta midida “entra en consonancia cola opinión d’una mayoría bien importante de la sociedá asturiana y vien a sumase a la vindicación d’otres organizaciones polítiques que lleven años demandándola”.

Dende Iniciativa pol Asturianu recuerden que trabayen “pa que’l consensu políticu énte la necesaria oficialidá seya cada vegada más ampliu” y, poro, solicitaron yá un conceyu con Unai Díaz Noval -Secretariu Xeneral de Mocedá nuevu- “pa tresllada-y les sos inquietúes na materia”.

La formación política Conceyu Abiertu por Xixón encamientó al Conceyu de Xixón, al traviés d’un comunicáu, “un mayor usu de símbolos asturianos nes aiciones públiques”. Dende la organización camiente que se fai un usu “descomanáu de la bandera estatal nel conceyu de Xixón, y non solo por mor d’eventos deportivos”. Dende Conceyu Abiertu por Xixón ven “una preocupante desapaición de la bandiera asturiana nes fiestes populares y actos entamaos por esti ayuntamientu”.

Ye por ello que dende Conceyu Abiertu por Xixón, encamienten a la población en xeneral, les asociaciones vecinales y autoridaes “a da-y un usu y protagonismu mayor, aprovechando eventos tan afayadizos pa ello como son les fiestes populares, el festival Atlánticu o la selmana grande de Xixón”.

Entienden esta petición “como evidente, pero necesaria, yá que dende la casa conceyu nun se cumplen nin les lleis mínimes de protocolu colos símbolos asturianos nin el usu de la toponimia llariega nos actos entamaos nin siquier na propaganda de talos”.

Yera una de les poques direcciones xenerales que quedaben por decidise y güei el gobiernu socialista resolvió. El Conseyu de Gobiernu d’Asturies decidió’l nomamientu de la maestra llangreana Ana Fueyo Llaneza como nueva Directora Xeneral de Política Llingüística del Principáu d’Asturies, en sustitución d’Alfredo Ignacio Álvarez Menéndez, que fuere nomáu pol gobiernu de Foru.

Ñacida en Les Bories, Llangréu, en 1951, Ana Fueyo ye profesora especializada en Ciencies Sociales y ta venceyada al enseñu del asturianu dende entamos de los años ochenta. En 1983 y dientro de los cursos pa enseñantes d’asturianu de l’ALLA, foi una de les fundadores del Coleutivu Pedagóxicu “La Puela-83”, formáu por profesores que collaboraben na creación de materiales pa les clases d’asturianu nes entós primeres esperiencies nes escueles asturianes.

Tien el títulu de capacitación pa la enseñanza d’asturianu otorgáu naquellos años pola ALLA, amás de cursos d’Antropoloxía y Cultura Asturiana. Desde 1982 ye profesora nel colexu públicu de Cabueñes, en Xixón, onde reside.

Foi una de les autores del llibru “Al riscar : llibru de testu pal Ciclu Medio d’EXB”, asoleyáu pola Academia de la Llingua Asturiana en 1985.

La vocalía de dominiu llingüísticu d’Iniciativa pol Asturianu, coordinada por Denis Soria, espresó al traviés d’un comunicáu “el so maltar énte la negativa de discutir una moción n’amparu del patrimoniu llingüísticu na Diputación de Zamora”.

La iniciativa defendida pol grupu ADEIZA que daba un primer pasu na conquista de los drechos llingüísticos básicos (con midíes de proteición, promoción, recuperación toponímica o refuerzu institucional de la creación cultural y lliteraria de la llingua asturiana/lleonesa y gallega na Provincia de Zamora) partió del coleutivu Furmientu, una de les organizaciones qu’integren el movimientu de reivindicación llingüística al sur del cordal y cola qu’Iniciativa pol Asturianu aconceyara’l pasáu 31 de marzu n’Estorga (Lleón).

El representante de los independientes zamoranos y diputáu provincial, Antonio Juanes García, defendió esta moción que nun se llegó a debatir al cuntar colos votos en contra del PP y a favor d’ADEIZA, PSOE ya IX.

Iniciativa pol Asturianu púnxose en contautu tanto con Furmientu como con AZEIZA “p’apoyar el so compromisu en favor del idioma y ofrecer tola collaboración posible nesti ámbitu, al ser un sector importante de la sociedá zamorana y asturiana parte d’una mesma comunidá llingüística.”

El PP refuga midíes a favor del patrimoniu llingüísticu de Zamora

La fastera más al sur del dominiu llingüísticu asturlleonés y onde l’asturianu vive una situación peor nun va tomar nenguna midida pol idioma. Los votos a favor d’ADEIZA, PSOE ya IX nun sirvieron pa evitar que’l PP refugara siquiera aldericar na Diputación de Zamora una moción pal establecimientu de midíes en favor del patrimoniu llingüísticu d’esti territoriu. El grupu ADEIZA axuntare díes enantes de presentar esta moción cola asociación cultural Furmientu, que treslladó les sos moliciones al respective de “la diversidá llingüística que caracteriza a esta provincia, principalmente nes contornes asitiaes nel oeste provincial”, onde se fala, según la zona, gallegu y asturianu.

El Representante de los independientes zamoranos y diputáu provincial, Antonio Juanes García, defendió la protección del patrimoniu llingüísticu de la provincia, conforme se recueye na Constitución, la Carta Europea de les Llingües Minoritaries del Conseyu d’Europa, la Llei de Patrimoniu Cultural de Castiella y Lleón y, especialmente, l’Estatutu d’Autonomía de Castiella y Lleón, que nel so artículu 5 establez “la protección del lleonés y el gallegu falaos na comunidá”.

Dende ADEIZA plantegóse que la Diputación Provincial “trabaye na promoción del gallegu y lleonés, nes contornes onde se falen, y sofite a la creación cultural y lliterario nestes llingües, ensin escaecer la recuperación de la toponimia autóctona de la provincia”. Nesti sentíu, lo que se pretendía ye que la institución zamorana encamentara a la Xunta de Castiella y Lleón al desenrrollu llegal del artículu 5 del Estatutu d’Autonomía, como fizo va namás unos meses el Procurador del Común de la comunidá.

Esti colectivu, que lleva años defendiendo les llingües tradicionales de la provincia de Zamora, llamenta que la presencia d’estes modalidaes llingüístiques nestes fasteres “pueda vese güei amenaciada por una situación de desprestixu que les avera a la so desapaición, si nun se tomen midíes que lo eviten”.

Moción completa presentada na Diputación de Zamora (cast.)

La Charanga Ventolín, de Xixón, dio anuncia al traviés d’un comunicáu del so maltar pola decisión del Conceyu de Xixon de nun permitir la celebración de la Ventolera Republicana nel Muséu del Pueblu d’Asturies, el próximu 16 de xunu . Dende la organización espliquen qu’esta celebración “venía faciéndose nesti espaciu dende va años” y que nunca tuvieren problemes. Según afirmen, “a principios d’abril, al nun recibir respuesta al pidimientu fechu en xineru, ponemos en contactu colos responsables del Muséu quien nos deriven al Director de la Fundación Municipal de Cultura (FMC), Xosé Nel Riesgo”, que-yos negó la posibilidá, denuncien.

La Charanga afirma que Riesgo-yos anunció que nun dexaba l’usu del Pueblu d’Asturies pa la realización de la Ventolera Republicana yá que se trata d’una actividá con “conteníos políticos”. La decisión yera del propiu Riesgo, según cuenten, anque esti afitó que “ta sofitada pol conceyal de Cultura, Carlos Rubiera, y otros miembros del equipu de gobiernu del Conceyu de Xixón”.

La sida pa nun dexar esti espaciu foi, siempres según Ventolín “que si dexara l’usu del Pueblu d´Asturies a la nuesa fiesta nun tendría argumentos pa refugala a otros colectivos d’otru signu poniendo como exemplu actividaes d’homenaxe al franquismu”.

Sicasí, dende la FMC entá nun llegó un escritu oficial col resolvimientu negativu a la solicitú, polo que “trescurríu mas d’un mes d’esa xunta, ensin recibir respuesta per escritu, contactamos telefónicamente el 22 de mayu con Xosé Nel Riesgo quien vuelve comprometese a contestanos por escritu esi mesmu día”. Ventolín denuncia que “a día de güei, 28 de mayu, entá nun recibimos dicha respuesta”.

Dende la Charanga Ventolín manifiesren que l’usu d’espacios públicos municipales “nun puede tar sometíu a criterios personales de los responsables municipales”, recordando que nos dos años que celebraron la Ventolera nel Pueblu autoxestionaron l’actividá “con participación d’unes 300 persones ensin nengún tipu d’incidente nin problema”.

La Charanga Ventolín ye una asociación musical con 30 años de funcionamientu al llombu. Según espliquen van celebrar la Ventolera Republicana en Casa Sarita, en Granda, el 16 de xunu, de magar les siete la tarde.

La necesidá d’avanzar na xunidá d’aición del nacionalismu asturianu y el reforciamientu de la cadarma interna de la organización centrarán el discursu políticu de la celebración del XV Díi d’Andecha esti vienres 25 mayu d’Ovín, Nava, con un actu políticu nel qu’intervendrá, ente otros, el Secretariu Xeneral de la organización y que finará con una espicha nel Llagar Alonso.

Demientres el trescursu d’esta celebración, que como ye vezu faise na fecha na que tuvo llugar la declaración de Soberanía de la Xunta Xeneral asturiana, amás de los avezaos conteníos d’arruelu, tendrá llugar un actu políticu, que se centrará fundamentalmente no qu’AA albidra “necesidá inaplazable d’avanzar haza la xunidá d’aición del nacionalismu asturianu, cola esperiencia de Conceyu Abiertu como espresión hasta la fecha más acertada del mesmu”.

Andecha Astur recuerda que ye anguaño “la formación decana n’activu del nacionalismu asturianu, con 20 años d’hestoria ininterrumpía defendiendo los drechos ya intereses colleutivos del Pueblu Asturianu”.

Les organizaciones Bloque por Asturies-UNA, Bloque de la Mocedá Asturianista, Xunta Cultural Rebelgu, Axenda Alternativa Asturiana, Darréu, Asociación Cultural N’ast y Andecha Astur tán acabante roblar un manifiestu conxuntu por mor del aniversariu del 25 de mayu de 1808 nel que reclamen que nun s’use a Asturies “como llaboratoriu de pruebes pa una recentralización del estáu”.

MANIFIESTU 25 DE MAYU 1808-2012

Un 25 de mayu de 1808 foi proclamada la soberanía asturiana nel contestu de la invasión bélica francesa. Entós la Xunta Xeneral d’Asturies proclamose soberana dafechu, como consecuencia de la movilización y presión d’unes clases populares que tomen la pallabra como actores políticos n’arena pública, siendo asina demientres esi periodu la institución política cimera d’esti País ensín nenguna interferencia d’instituciones foriates. Asina la Xunta Xeneral asumió tolos atributos de poder soberanu: entamó l’Exércitu Popular Asturianu, que lluchó hasta la victoria escontra les fuercies de Napoleón, foi creada la la bandera de la nuesa Patria y foron unviaos embaxadores internacionales a Inglaterra p’algamar un alcuerdu de collaboracción d’Estáu a Estáu escontra’l común enemigu francés.

Anguañu, esi 25 de mayu de 1808 ta escaecíu pol Pueblu Asturianu gracies a la manipulación hestórica y l’esborriamientu identitariu fechu demientres sieglos pol sucursalismu españolista. Pocos de los nuesos paisanos y paisanes saben qu’hai 204 años Asturies foi una estatalidá dafechu soberana y articuló unes estructures polítiques y militares al marxe de cualesquier marcu español. Poca xente conoz esi capítulu perimportante de la hestoria del nuesu País, esa manifiestación d’un pueblu, l’asturianu, qu’arguyosu de sí mesmu y naguando la llibertá escoyó’l camín de la soberanía y la autoorganización. Esti llamentable escaezu de la nuesa hestoria nun ye casualidá, respuende a los intereses de les élites oligárquiques asturianes y del estatalismu español afitáu dientru y fuera d’Asturies.

Poro, en viendo que los nuesos políticos y cabezaleros oficiales escaecen y sienten vergoña pola nuesa identidá y la nuesa hestoria, les organizaciones y colectivos Axenda Alternativa Asturiana, Andecha Astur, BA-UNA, Bloque de la Mocedá Asturianista, Darréu, N’ast y Xunta Cultural Rebelgu pidimos qu’esti día seya reconocíu pola so importacia hestórica y esiximos que los conceyos y la Xunta Xeneral entamen actividaes de cellebración, recuperación hestórica y reivindicación del 25 de mayu como día nel que les asturianes y los asturianos, arguyosos del so País y amando la llibertá, proclamaron la soberanía de les sos instituciones nacionales por mor de la llucha ya axitación popular. Amás, nestos díes tamos viendo como’l Gobiernu del Reinu d’España sigui coles imposiciones y quier emplegar a Asturies como llaboratoriu de prebes pa una recentralización del Estáu, lo que fai que l’espíritu y el valor del 25 de mayu como día clave pa una Asturies que quiera decidir por sí mesma siga siendo pernecesariu y clave pal nuesu futuru.

¡PUXA’L 25 DE MAYU!

¡PUXA ASTURIES!

Jesús Iglesias refirióse a la situación del asturianu nel plenu d’investidura celebráu güei na Xunta Xeneral d’Asturies. El llíder d’Izquierda Xunida d’Asturies pidió al candidatu socialista a Presidente, Javier Fernández, que ficieran “lo mesmo que cola circunscripción única”, solicitándo-y qu’anque “nun son entusiastes de la oficialidá, nun seyan una torga”. Iglesias reprochó-y a Fernández que “nun dixo un res sobre l’asturianu” na sesión del martes.

Refirióse tamién a la necesidá d’iguar la situación de los docentes d’asturianu, cola creación de la especialidá, y al desenrrollu de la Llei d’Usu del Asturianu.

Javier Fernández apostó por “siguir defendiendo l’asturianu ensin llegar a la oficialidá”.

El sábadu próximu, 26 de mayu, dende les 13 hores, va celebrase una concentración na cai Fruela d’Uviéu énte’l edificiu la Xunta Xeneral baxo’l lema “Asturies Decide”. La concentración quier responder a les amenaces del estáu central d’intervención a Asturies, que pa los organiozadores d’esta convocatoria abierta “suponen el mayor ataque dende’l franquismu a la yá de por sí percurtia autonomía asturiana y un fechu ensin precedentes que dexise ensin dubia una rempuesta popular”. Na concentración denunciaráse que s’use a Asturies “como llaboratoriu onde enseyar les sos politiques de recentralización”.

Nel documentu unviáu a los medios pola organización afírmase tar “fartucos de la falta respetu cola que’l Estáu español trata al Pueblu Asturianu y a les sos instituciones de gobiernu”, y recuérdase que “el Pueblu Asturianu tien capacidá p’autogobernase y decidir por sí mesmu”.

Amás, denúnciase tamién “la incapacidá de la clas política qu’angüaño ocupa los escaños na Xunta Xeneral pa defender con dignidá los intereses asturianos y conséñase la responsabilidá del conxuntu los partíos políticos ellí representaos que mos empobinaron a esta situación de crisis política, social y económica.

La concentración faise concidir cola fecha hestórica del 25 de mayu de 1808 cuando un movimientu popular llevó a la Xunta Xeneral a proclamase soberana.