Política

Compromisu llama esti 8 de Setiembre a nun se resignar y lluchar por una Asturies soberana y xusta, na voz de Yolanda Huergo, que rescampla que la convocatoria “Asturies Decide” amuesa que dalgo se mueve nuna sociedá cansada col sistema políticu actual.

Yolanda Huergo, como vocera nacional de Compromisu por Asturies, fixo un llamamientu a la ciudadanía pa participar na manifestación “Asturies Decide: Pola soberanía y el cambiu social”, que va salir el domingu 8 de setiembre de la Plazuela San Miguel a les 12:30 hores.

Dende Compromisu rescamplen que “diferentes fuerces polítiques, col sofitu de sindicatos y colectivos sociales, punxímonos a trabayar en comuña p’amosar qu’hai una Asturies que nun se resigna, frente a un gobiernu que’l Día la Nación namás qu’organiza actos festivos, escaeciendo los problemes del país y les nueses reivindicaciones como asturianes y asturianos”.

Compromisu señala qu’“esti 8 setiembre, reclamaremos una Asturies soberana que puea definir les polítiques que precisamos, lo qu’esixe una autonomía financiera cola que nun cuntamos, pa lluchar contra’l desemplegu, l’éxodu masivu la mocedá, l’esfarrape medioambiental y la eliminación de tou elementu cultural que recuerde qu’Asturies tien una identidá propia”.

Pero tamién “por una Asturies xusta, onde los recursos públicos se dediquen a solucionar los problemes de la mayoría social, y non los de la vieya casta de políticos-empresarios que se retroalimenta pa caltenese en poder, que tán penriba la democracia, la llei y que nun tienen de la más mínima vergoña”-

Yolanda Huergo rescampló que “la convocatoria Asturies Decide, amuesa que dalgo se mueve nuna sociedá cansada col sistema políticu actual, y que nun va baxar los brazos frente a los abusos del gobiernu autonómicu, central, européu, nin desi ente que naide vota pero que controla les nueses vides que ye la Troika” remató.

El Conceyu d’Uviéu vieno acabante prescindir de la concesión por “incumplimientos gravísimos de contratu” de la xestión del Palaciu de Calatrava, según el conteníu del informe del abogáu municipal, Justo de Diego. Ente esos incumplimientos alcueéntrense’l cobru de comisiones irregulares a les compañíes que prestaben servicios auxiliares nos congresos, la cesión illexítima de la xestión del Palaciu a una tercera empresa y defectos na financiación.

El prósimu 8 el PAS va celebrar el día de la nación en Bimenes, en concretu en Santuyanu/San Julián, con dellos actos que ta previsto entamar a les 12,30 hores con una ofrenda floral ante’l monumentu al mineru, recordando l’importante papel de les families mineres y la minería na historia d’Asturies y na cultura asturiana.

L’actu algama un relieve especial nestos momentos en que PSOE y SOMA olvídense del tradicional actu de memoria y cultura minera de Rodiezmo.

Dempués habrá una visita cultural al palaciu Martimporra y al Muséu la Radiu y finalmente, una comida de xeremandía. Además de la Executiva Nacional del PAS, presente nos actos, tendrá un especial relieve el conceyal del PAS Aitor García.

Dende Compromisu por Xixón, al traviés del so voceru Daniel Fernández, quieren treslladar la so solidaridá a los 230 emplegaos de Tenneco Automotive, y pidir a toles instituciones públiques que torguen el zarru de la planta, ante l’ausencia de motivos económicos que xustifiquen el mesmu.

Compromisu por Xixón afirma que nun se puede dexar el zarru d’una fábrica en Xixón ensin qu’esistan perdes nin rendimientos de producción distintes a otres plantes de la mesma empresa, a cencielles porque la patronal diga que tien unes previsiones negatives” amás indicaron que “les previsiones de la patronal suelen ser tan fiables como les del Bancu Central Européu, el FMI o la Troika, esto ye, pures patrañas pa xustificar lo inxustificable”.

Pa Compromisu por Xixón “la única respuesta asumible pola ciudadanía ye que toles instituciones públiques enfrentar a esti zarru, y que los sindicatos esixan el restablecimiento inmediatu de l’actividá de la planta de la ciudᔠyá que “nada hai qu’axustar, cuando nengún motivu ta ufiertándose a el trabayadores más allá de les típiques palabres bueques de reestructuración, previsiones y axustes”.

Daniel Fernández concluyó criticando que “la política llaboral del PP, que yá empecipió’l PSOE con Zapatero, dexa al empresariu faer lo que-y sale de la real gana, tenga pérdida beneficio, y eso ye directamente intolerable”.

La convocatoria d’un manifestamientu conxuntu nel Díi de la Nación Asturiana, primer espresión práutica de la xunidá d’aición pola que dellos partíos nacionalistes vienen naguando dende va tiempu va ser realidá nesti 8 de setiembre: La convocatoria conxunta d’Andecha Astur con Compromisu, Conceyu Abiertu ya Izan, y el sofitu del sindicatu CSI, Xunta Estudiantil Asturiana, Darréu-Mocedá independentista, y el Centru Social La Semiente, costitúi la primer espresión pública y práutica de la xunidá d’aición que munchos vienen plantegando nestos años.

Sigún asoleyaba esti día Andecha Astur na so web, “Ye nidio que la convocatoria nun ye al 100% la que quinxéremos dende’l nacionalismu d’izquierda que representa Andecha Astur, pero a lo menos cubre unos mínimos que permiten l’actuación conxunta y la necesaria acumulación de fuercies na defensa de los drechos nacionales y sociales del Pueblu Asturianu”.

Esti ye’l manifiestu conxuntu:

ASTURIES DECIDE: SOBERANÍA Y CAMBIU SOCIAL

“Esti 8 de setiembre cellebramos el día de la nación asturiana o un día de llucha pa reivindicar qu’Asturies tien que decidir el so futuru, faciendo exerciciu de la so soberanía al traviés de la participación ciudadana dende abaxo, pa lluchar pol necesariu cambéu social, que convierta la Política nun preséu al serviciu del 99% de les persones.

Asturies sufre dende va décades un desaniciu industrial que deriva nel estáu de crisis estructural nel que s’atopa’l nuesu país. Seutores industriales como la siderurxa, la minería, el naval, la pesca, l’agricultura o l’alimentación foron destruyíos, al calor de la denomada “reconversión industrial” empobinada polos poderes económicos capitalistes al traviés de ferramientes como el Reinu d’España o la Xunión Europea, convirtiéndonos en bona midida nuna mera colonia enerxética, quedando en Asturies la contaminación y degradación del territoriu.

El casu más sangrín ye’l de la minería, tantu pública como privada que, nes caberes trés décades, pasó de tener más de 40 mil trabayadores a los 3.000 que malapenes tien anguaño. Ye tamién destacable la delictiva “xestión” institucional, empresarial y sindical del desaniciu de la minería y la so pretendida reconversión al traviés de los multimillonarios “Fondos Mineros”, que valieron pa la creación d’una rede clientelar de la que se sirvieron de mena especial el PSOE –como principal partíu gobernante n’Asturies y nes comarques mineres- y los sindicatos SOMA-UGT y CC.OO, amás d’empresarios como Victorino Alonso, cuyes práutiques delictives y d’esplotación llaboral son más que conocíes. Ensin escaecer que l’actual gobiernu español del PP, ta acelerando al máximu’l procesu de zarru de la minería, poniendo a Asturies nuna situación insostenible llaboral y economicamente.

Al sometimientu económicu hai qu’amestar la situación d’opresión nacional sufría por Asturies, que ve cómo dende les instituciones de gobiernu se marxina y reprime toa espresión cultural, llingüística, o de cualquier otru calter, que seya d’orixe asturianu. La non oficialidá de la llingua asturiana y la falta de drechos de los sos falantes, o les constantes agresiones al patrimoniu hestóricu, arquitectónicu, arqueolóxicu, etc, son fechos que venimos careciendo con toles formaciones polítiques que caltuvieron el poder n’Asturies, llámese PSOE, Foro, IU, PP, o la reciente complicidá gubernamental d’UPyD. Asina, l’ausencia de toes elles nel procesu xudicial del casu Marea, el mayor casu de corrupción de la política asturiana, ye una bona amuesa d’ello.

Lo que fai más necesariu que nunca establecer nuevos procesos constituyentes frente al fracasu históricu de la mal llamada Transición, y la puesta en cuestión del réximen surdiu del mesmu, al traviés de procesos dende abaxo y empobinaos a llograr la máxima participación nel mesmu, abandonando esi engañu que supón la representación política, el partidismu profesionalizáu, les élites gobernantes coles que non nos idintificamos y munchos menos nos representen, y apostando por formes de democracia directa.

Too esto nun ambiente de vuelta al centralismu más conservador, que fainos desapaecer, entá más, como entidá política autónoma, tarazando les nuestres escases víes d’autogobiernu y anulando l’autonomía de les nueses entidaes locales, y que busca esaniciar directamente figures tradicionales como la parroquia, tan enraigonaes en Asturies. Culpabilizar a l’autotonomía política de la crisis, convirtióse n’otru de los mandamientos que les élites polítiques y económiques españoles quieren facenos creyer.

Poro, la situación ye de crisis a tolos niveles, y nuna doble vertiente gubernamental: los retayos de servicios sociales, les agresiones ecolóxiques, la opresión llingüística y cultural, o la falta d’oportunidaes llaborales en condiciones dignes non sólo son responsabilidá de les instituciones asturianes y los sos actores políticos, sinon en gráu cimeru del gobiernu estatal, como principal impulsor de les sos rellaciones sucursalistes pa con Asturies.

La mocedá sufré de forma especial esta situación, con un paru n’Asturies namái homologable a nivel européu col griegu, y qu’obliga a miles de mozos y moces a emigrar cada añu fuera d’Asturies pa poder trabayar. Ante ello, namái atopamos la falta d’aición d’un gobiernu asturianu dependiente dafechu del español, qu’al mesmu tiempu ye un simple títere de poderes capitalistes supraestatales como la Xunión Europea, o’l FMI, cola perconocía “Troika”.

Ye por ello que les organizaciones convocantes consideramos necesario articular una rempuesta popular, que dende posiciones asturianes y tresformadores seya quién a dá-y la vuelta a la situación, ufriendo una alternativa al sistema económicu actual, a les cinco fuercies del arcu parllamentariu asturianu –que nun son más qu’un brazu más del aparatu institucional- y a les burocracies del sindicalismu mayoritariu, col so papel d’inmovilismu y desmovilización de la clase obrera.

Esti espaciu d’alderique y aición conxunta ye tamién necesariu pa plantegá-y a la sociedá asturiana la necesidá de superar un sistema económicu caducu a tolos niveles, escontra’l que non sólo hai qu’oponese, sinon tamién hai qu’ufrir una alternativa que mos garantice la xusticia social, y dea igua a la opresión nacional, de clase, de xénero o cualquier otru tipu de dominación”.

El coordinador d’IX Manuel González Orviz, reclamó güei una solución urxente pa los afectaos pol frayatu de la canal de la compañía Eon, n’Arenas de Cabrales, qu’inda nun fueron indemnizaos pola empresa, a pesar de que la traxedia produxose hai yá un añu. El máximu responsable de la formación esplicó, en entrevistándose esta mañana colos propietarios de les queseríes n’Arenas de Cabrales, que nun se trata namái d’un problema particular de los dos empreses artesanales afectaes, sinón qu’afecta a tol sector queseru d’Asturies, yá que repercutió na capacidá de producción de quesu cabrales.

“A un añu de la traxedia, Eon tien les responsabilidaes derivaes d’esta traxedia. Equí teníamos dos queseríes que al día de güei nun pueden desenvolver la so actividá porque nun recibieron les indemnizaciones correspondientes. Lo qu’apura ye la puesta en funcionamientu de los dos queseríes y que se produza un alcuerdu. Hai que tener en cuenta qu’equí nun son tres empreses les que tán aldericando les indemnizaciones, sinón dos productores artesanales y una gran empresa. Ye una cuestión que podríamos dicir de David contra Goliath”, aseguró.

Pal coordinador d’IX ye fundamental, nestos momentos, que se desenvuelva una política activa pa dinamizar el sector agroganadero. “El mediu rural, si nun somos conscientes, o tomamos midíes, muerrenos ente les manos”. Manuel González Orviz punxo como exemplu la producción del cabrales. “Tamos nuna zona onde’l Principáu tien que curiar lo que ye la distribución del conxuntu de los quesos y dar cobertoria a los productores. Entendemos que nuna situación difícil como esta, equí, el mercáu, la iniciativa privada, les entidaes financieres nun van dar cobertoria económica a productores. Tolo contrario, van tirase contra ellos, nel cumplimientu de los plazos, obligaciones que tienen contraíes coles entidaes financieres y el Principáu tien que xugar un papel de garantizar el caltenimientu de l’actividá, ayudar a que pasen esta travesía del desiertu porque tenemos siquier 30 productores de cabrales consolidaos y nun podemos dexar qu’esti procesu lleve a nengún per delantre”. Manuel González Orviz dixo que’l Principáu d’Asturies nun puede ser un espectador pasivu yá que tien una responsabilidá especial na dinamización del sector. “Según nel so momentu entendimos que la minería ye una cuestión bien importante pa les contornes mineres y que ye responsabilidá del Gobiernu (d’España),entendemos que la producción quesera, y non solo del cabrales, ye una competencia en parte importante del Principáu y amás fundamental pal desenvolvimientu económicu d’esta zona. El cabrales ye la cabeza tractora de la zona, pero tamién de los quesos”. El coordinador d’IX amosóse críticu cola Alministración Autonómica yá que, dixo, “nun ta siendo sensible y nun ta dando les garantíes, que nun son palabres, nin discursos, sinón recursos, les garantíes económiques, los avales, que puedan precisar tantu productores como nesti casu los mesmos distribuidores”.

González Orviz reclamó amás el desenvolvimientu d’un plan forestal n’Asturies que ponga n’usu terrenales güei esbardiaos na so esplotación y que tienen de ser una pieza clave pa rellanzar la economía de les árees rurales asturianes.

El Parlamentu Européu vieno acabante reconocer esti mes el catalán como llingua en peligru d’estinción, al aprobase pola Comisión de Cultura, l’informe sobre les llingües europees en peligru d’estinción y la diversidá llingüística na Unión Europea, estatus nel que tamién s’alcuentra l’asturianu.

La Comisión de Cultura del Parlamentu Européu, impulsáu pol descubrimientu de lo que son inda baxos niveles d’estudiu nos Países Miembros de les llingües minoritaries en peligru d’estinción, aprobó por unanimidá na so xunta de 17 de xunu, dempués de la inclusión de delles enmiendes de distintos grupos políticos, l’informe que se presentó nel so primer borrador de la eurodiputada François Alfonsi (Partitu d’una nación corsa – Los Verdes / Alianza Llibre Europea), nel qu’apaez como idioma en peligru’l catalán xunta otros como l’asturianu que ya vienieren siendo cosnideraos d’esta mena. Una enmienda presentada polos miembros de Izaskun Bilbao Barandica (Partíu Nacionalista Vascu) y Ramón Tremosa i Balcells (Convergència Democràtica de Catalunya), dambos pertenecientes al Grupu de l’Alianza de los Demócrates y Lliberales per Europasobremanera, fai fincapié na importancia de “les polítiques en materia d’educación con “inmersión total” pol so efectu probáu na preservación de les llingües europees non hexemónicos”.

Según el testu final aprobáu, que va pasar nel Parlamentu en septiembre, los Estaos Xuníos d’europa, por tanto, tienen de siguir una política llingüística que dexe a los neños a aprender l’idioma en peligru d’estinción, la so llingua materna, a partir d’una edá temprana.

Nel mesmu informe, el multillingüismu ye reconocíu como espresión de la riqueza y la diversidá de los pueblos d’Europa “, na creencia de que” la sociedá multilingüe cohesionada y que dirixe la so propia diversidá llingüística nuna sociedá democrático y sostenible contribúi al pluralismu, son más abiertos y tienen más posibilidaes de contribuyir a la riqueza de la diversidá llingüística “.

Tamién por esta razón ye necesariu que’l marcu financieru tresañal 2014-2020 apúrrense los fondos necesarios pa sofitar a les llingües en peligru d’estinción, y encamiéntase “a les polítiques d’estructura pa revitalizar les llingües en peligru d’estinción en redol a los trés exes que demostraron efectiva na promoción d’idiomes débiles.

Conceyu Abiertu declara qu’esti Festival Aéreu de Xixón ye un “despilfarru y una acción propagandística del exércitu español amazcaritada d’espectaculu pa tolos públicos”. Dende la organización recuerden que “nun hai d’escaecer qu’anguaño’l principal pesu de les masacres perpetraes polos exércitos occidentales provienen d’estes “atracciones turístiques”.

Pa CA “un solu dia de branu na fastera costera nun fin de selmana…o sea la zona y el momentu más concurríu de Xixón ensín necesidá de denguna clase d’actu belicista”.

Pero esti añu, espliquen “ye entá mas feriente, nos carteles colos qu’enllenaron les marquesines podemos ver aviones qu’inequívocamente pertenecen a exércitu golpista de Franco y un bombarderu aleman”. Pa Conceyu Abiertu “nun tamos énte un espectáculu inocente, sinon una nidia glorificación a dos exércitos que bombardearon cruelmente a la población civil de la nuesa ciudá y el nuesu país, amás de la de dellos países europeos”.

Cola llegada del branu la Federación Socialista Asturiana (FSA-PSOE) anunció l’usu del asturianu na so páxina. Una novedá no que cinca al tratamientu de la llingua asturiana per parte de los socialistes asturianos. Na noticia, asoleyada na so web, espliquen que siguen “los criterios recoyíos na so política lilngüística”. Espliquen que quieren “facer una reconocencia espresa al fomentu de la llingua asturiana” y convertir a la web socialista en “una de les canales de promoción y puxu del bable”.

La web inclúi yá n’asturianu una hestoria del PSOE n’Asturies asina como delles noticies que pueden consultase n’asturianu al calcar sobre’l testu “N’ASTURIANU” qu’apaez na esquina drecha superior de les noticies.

Conteníos n’asturianu na web de la FSA