Política

Andecha Astur fai una valoración positiva del manifestamientu xunitariu rializáu nel Díi de la Nación Asturiana, camentando que, dixebradamente del resultáu cuantitativu del mesmu, supón un avance cualitativu na dinámica del nacionalismu asturianu, que por una vegada foi a superar vieyes zunes seutaries y poner per delantre los intreses del Pueblu Asturianu.

Dende Andecha Astur considérase qu’esti primer pasu tien que dir seguíu d’otros mayores, afondándose nesa dinámica de xunidá d’aición y avanzando haza lo que tien de ser una Mesa Nacional na que puean tar representaes toles organizaciones sociales qu’asumen comu principiu la lliberación nacional y social del Pueblu Asturianu, y que sirva pa intercambiar opiniones, xenerar dinámiques d’actuación y xuncir esfuercios, aumentando la capacidá de reaición y rempuesta de la sociedá asturiana frente a les contines agresiones del Estáu español.

El presidente d’Asturies, el socialista Javier Fernández, recibió esti día a una delegación de l’Asociación pal Progresu de la Dirección (APD), col so presidente estatal, Rafael Miranda, a la cabeza y col so presidente n’Asturies, Pablo Junceda, como representante cimeru asturianu. L’APD reclama pa sí ser el “filu conductor” ente empresarios y directivos pa llograr que la economía asturiana aporte darréu al desenvolvimientu del nuevu ciclu económicu alcista.

Según desplicaron los directivos tres de la xunta, APD n’Asturies quier ser un foru d’alderique, pa compartir idegues nel ámbitu empresarial: “Tamos, como foru abiertu, encantaos de collaborar con toles instituciones asturianes del ámbitu empresarial, social ya institucional”, dixeron a los periodistes los sos represetantes”

La direutiva d’APD estatal y la d’Asturies convidaron a Javier Fernández a participar activamente cola asociación nel primer actu importante que van facer n’Asturies dientro dos selmanes, sobre la reforma alministrativa.

Daniel Fernández, voceru de Compromisu por Xixón, afirmó esti día que la so organización nun entiende por qué Carmen Moriyón sigue de Conceyala d’Igualdá.

Dende Compromisu por Xixón “yá señalemos reiteradamente que tantu en materia de medioambiente como d’igualdá, Carmen Moriyón quixo meter les competencies nun caxón” pero en materia d’igualdá “ta superándose a sigo mesma na so irresponsabilidá, convirtiendo aquellos propósitos iniciales nes que dicía qu’acutaba tales materies pa da-yos un especial impulsu, n’iróniques a lo menos”.

Pa Compromisu por Xixón “l’actuación de l’Alcaldesa cola tema de la póliza de seguros onde se cubre l’acoso sexual, solo puede calificase d’esperpéntica, porque rescampla que nun revisa l’actividá del gobiernu en materia d’igualdá como ye la so obligación como conceyala, cuando amás son especialmente ofensives pa les muyeres como ye’l casu” lo que según la organización “agrávase ante la so negativa a axuntase coles asociaciones implicaes nesta tema, como tendría de faer en materies de la so competencia”.

Compromisu por Xixón tamién quixo destacar que “nenguna actuación digna de mención conocemos de Carmen Moriyón nesta materia que xustifique la so condición de Conceyala d’Igualdá”, anque “nun pidimos la so dimisión como Conceyala d’Igualdá, yá que rescampla que Foru nun tien nenguna voluntá de desenvolver esti campu d’actuación, a cencielles nun entendemos porque dicen qu’esiste la mentada conceyalía, cuando nun fai nin un mínimu pa considerar qu’esista actividá na mesma” concluyó Daniel Fernández.

Izquierda Xunida presentó la so campaña ‘Non al Fracking’ pa oponese na cai y nes instituciones a esta “Peligrosa” técnica pa llograr enerxía y fízolo ayeri llunes pol so responsable federal de Polítiques Enerxétiques d’IX, Adolfo Abarrena, denunciando que “demientres un bon númberu de países refugaron yá o establecieron prórrogues pa la mesma, el Gobiernu del PP, al traviés del ministru d’Industria, José Manuel Soria, apuesta decididamente por ella y paez-y maraviyosa”.

El responsable federal de Polítiques Enerxétiques d’Izquierda Xunida, Adolfo Abarrena, presentó la campaña estatal ‘NON al fracking’ que punxo en marcha esta formación en contra del usu d’esta técnica de quebra hidráulica pal llogru de recursos enerxéticos. Nuna rueda de prensa xuntu al coordinador federal, Cayo Lara, Abarrena adelantró qu’IX va llevar la negativa a toles instituciones autonómiques y municipales onde tien representación pa forzar l’alderique y, na midida de lo posible, frenar una técnica peligrosa pa la salú, tóxica y contaminante”.

Adolfo Abarrena esplicó qu’esta campaña “netamente esplicativa”, amás del material gráfico y audiovisual creáu a costa fecha pa les redes sociales y les actuaciones polítiques correspondientes nes instituciones, inclúi la movilización na cai a comuña coles organizaciones sociales que se tán movilizando contra’l ‘fracking’.

Esta fin de selmana, el Mazucu allugó un emotivu homenaxe a los milicianos del Exércitu asturianu y a los compañeros vascos y de l’Asturies de Santillana que participaren na defensa d’Asturies frente al facismu español por parte de delles fuercies de la izquierda política asturiana.

La memoria hestórica de la heroica resistencia del exércitu asturianu frente a los exércitos facistes español y alemán foi aprofitáu non solo pa reivindicar al Conseyu Soberanu d’Asturies y Lleón felizmente independizáu de la República Española, sinon pa dar un exemplu d’internacionalismu hermanandose colos collacios vascos que tamién participaren na defensa d’El Mazucu, y de los asturianos de l’Asturies de Santillana que fixeren causa común col exércitu asturianu. Un cientu presones participaren nesti emotivu homenaxe, nelq u’hebio una guapa participación dende Larrabetxu, alcaldesa incluyía.

L’Alcaldesa de Santiso d’Abres vota nos plenos polos sos conceyales y obliga a la oposición a exercer el so derechu primero que l’equipu de gobiernu. Esa ye la denuncia que vieno acabnte facer el conceyal d’IX de Santiso d’Abres, Pedro Amago, y qu’asitia a Asturies nel caciquismu del sieglu XIX.

El conceyal d’IX de Santiso d’Abres, Pedro Amago, alvierte de que ye illegal que María Goretti Quintana usurpe’l derechu individual de cada conceyal del so grupu al votar en nome de los conceyales del PP y obligue a la oposición a votar con anterioridá a los del equipu de gobiernu, en cuenta de facelo simultaneamente.

Amago al traviés d’un ruegu presentáu pal plenu d’esti mes indica a l’alcaldesa María Goretti Quintana que cumpla cola llegalidá y dexe de “votar en tolos plenos por ella y los sos compañeros”. El grupu municipal d’IX denuncia que la práctica habitual de la rexidora de Santiso ye la de votar polos conceyales del so propiu partíu ensin qu’estos tan siquier asientan a les votaciones o a mano alzada.

Llamazares vieno acabante pedir al Fiscal Xeneral del Estáu un espediente pa la illegalización de grupos fascistes, por considerar que los idearios d’estos grupos ultres tán tipificados como delitos pol Códigu Penal. Darréu d’ello reclama una investigación al Ministeriu del Interior de sucesos como los de Blanquerna

El diputáu d’IX, Gaspar Llamazares amosóse partidariu esta mañana de que’l Fiscal Xeneral del Estáu abra un espediente pa la illegalización de grupos fascistes, pa lo que se dirixió a Eduardo Torres-Duce, y presentó delles entrugues parlamentaries respectu al recién casu de Blanquerna, nel que miembros de movimientos ultres afrellaron a delles persones agresiones demientres la celebración d’un actu por cuenta de la Diada en Madrid.

Pal parllamentariu, “estos incidentes nun pueden ser consideraos como un casu aislláu” y denunció una medría de l’agresividá y la violencia de los grupos fascistes. “Creemos que nun ye un casu aislláu, creemos qu’hai una estratexa y qu’hai una medría de l’agresividá y de la violencia de los grupos fascistes nel nuesu país y lo que-y pidimos al Ministeriu del interior ye que lo investigue y lo que-y pidimos al Fiscal Xeneral del Estáu ye qu’abra un espediente d’illegalización d’eses organizaciones”. Y ye que, según Llamazares, esisten suficientes motivos pa empecipiar el procedimientu, yá que se trata d’organizaciones que tienen un ideariu que ta dientro del Códigu Penal. “Podríamos llama-y un ideariu d’odiu y que por aciu la so acción directa tán pasando de la presión a l’agresión, y de l’agresión al terrorismu y creemos que son razones abondes pa que’l Fiscal Xeneral del Estáu interesar pola so illegalización”.

Ente les organizaciones que vienen sofitando l’actu qu’entama tolos años por estes feches FAMYR n’El Mazucu, Andecha Astur vieno d’apautase esta selmana a esi actu d’homenaxe al exércitu asturianu que, “una vuelta independizáu de la República española, llantó cara al exércitu facista español n’El Mazucu”.

L’actu, entamáu por FAMYR tendrá llugar esti sábadu 14 de setiembre de magar les 12 hores, nel Altu la Tornería, El Mazucu, Llanes, pa homenaxear “a los combatientes antifacistes del exércitu asturianu y tamién dellos vascos y de l’Asturies de Santillana, que llantaren cara al exércitu franquista y a la Llexón Condor, nuna de les batalles más heroiques”.

El pernomáu Alderique sobre l’estáu de la rexón, l’Alderique d’Orientación Política, va celebrase los díes 8, 9 y 10 d’ochobre, según l’alcuerdu de la Xunta de Voceres al qu’aportaron los mesmos na mañana d’esti miércoles 11 de setiembre.

El Conseyu de Gobiernu del Principáu d’Asturies aprobó na tardi del xueves un techu de gastu non financieru de 3.522 millones de euros pa 2014, lo que supone una reducción del 1,15 por cientu respective al gastu nun financieru de los presupuestos de 2013.

L’anuncia aportó esti viernes pela mañana na rueda de prensa que dieron en Palaciu de Gobiernu la conseyera de Facienda y Sector Públicu, Dolores Carcedo, xunta’l conseyeru de la Presidencia y Portavoz gubernamental, Guillermo Martínez, na que dexaron bien afitao que barrunten aportar a esta llende nel gastu darréu de sumar los ingresos non financieros, que suponen 3.250 millones de euros xunto pa col déficit públicu máximu, que s’sitia nel 1% del PIB nominal previstu pa Asturies en 2014: 225 millones de euros. Tamién se tuvo en cuenta l’axuste de la contabilidá del Estáu nacional, qu’algama un total de 47 millones de euros.