Política

Ayeri aconceyó en Xixón el Círculu Lliberal d’Asturies, ex simpatizantes del Centro democrático Liberal ya independientes, y alcordóse la creación d’UDAs (Unión Demócrata Asturiana), coleutivu social nacíu col envís d’afitar un espaciu d’alderique y pensamientu pal asturianismu democráticu de centru, axuntando a xente qu’aporta la so visión de país con una variedá de procedencies allugada dende’l reformismu al lliberalismu, y enfotáu na defensa de los derechos civiles y llingüísticos de la ciudadanía asturiano. Esta xunta designó a Humberto Gonzali como voceru hasta la celebración del 1º congresu del coleutivu.

A consecuencia d’esti alcuerdu, el Círculu Lliberal d’Asturies procede a la so disolución ya integranción na UDAs.

El diputáu d’IX, Aurelio Martín, responsable de los asuntos de agroganadería na Xunta Xeneral, denunció esta mañana qu’Asturies va tener menos fondos na aplicación de la Política Agraria Común que nel anterior periodu. Asturies va perder dende 2014 a 2020 alredor de 52,8 millones d’euros que nun van llegar al so mediu rural, ya qu’el Ministeriu amenorgó la parte que financia y la comunidá tendrá d’apurrir más, si puede, pa faer frente a esti descensu. Esta ye la conclusión que’l diputáu argumentó na comparecencia a pidimientu propiu de la Conseyera de Agroganadería y Pesca, María Jesús Álvarez, na Xunta Xeneral.

Martín aseguró que nun ye ciertu qu’Asturies “ganara” nesta negociación sectorial de la PAC, yá que magar ye verdá que se sumó 18 millones de fondos europeos hasta llegar a los 325 millones pa los seis próximos años, na cofinanciación per parte del Ministeriu pasa de 133 millones nel periodu 2007-2012 a 52,8 nel 2014-2020, un descensu considerable” a xuiciu del diputáu d’IX.

El diputáu d’IX, qu’apautara la posición de la comunidá autónoma cola Conseyera y el restu de grupos parlamentarios, enfeó-y a ésta que nun hubiera consiguíu nengunu de los oxetivos políticos recoyíos nel documentu que “toos compartíamos”: nin la tasa plana, nin la renacionalización, nin la converxencia interna que nos dexaría dir a una mayor nivel de cohesión”, pela contra, han regionalizado les ayudes y la figura del llabrador activu “ye absolutamente insuficiente”; tampoco se tuvo en cuenta la propuesta de techamiento de les ayudes, esto ye, d’afitar un tope máximu por perceptor, nin s’hai promovido el primar a les 50 primeres hectárees que favorecería al pequenu llabrador y a cambéu fíxose una política que beneficia a los mayores de 65 años, xubilaos, que son yá un terciu de quien perciben ayudes.

Izquierda Xunida llanza a la sociedá un ambiciosu alderique p’ameyorar la democracia participativa y buscar alternatives a la estratexa neolliberal d’axuste económicu, sigún ficieron anuncia José Luis Centella y Alberto Garzón en rueda de prensa, al presentar el documentu ‘Revolución Democrática y Social’ abiertu de par en par a les aportaciones tantu de les bases de la organización como a colectivos, asociaciones y grupos representantes de la sociedá civil, ensin dexar a un llau les propuestes individuales de la ciudadanía.

La dirección federal d’Izquierda Xunida abrió a la sociedá lo que yá ye una de les sos propuestes más ambicioses d’alderique ya intercambiu directu d’idees tantu coles sos bases como con colectivos, asociaciones y grupos representantes de la sociedá civil, ensin dexar a un llau les aportaciones individuales de la ciudadanía. IX ta empeñada en realizar un intercambiu cola ciudadanía pa plantegar una batería de propuestes qu’ameyoren sustancialmente la democracia participativa y qu’alcen el nivel d’esixencia y control social frente a les graves aburuyes de que carez el sistema actual.

Pa ello, Izquierda Xunida ellaboró un primer documentu de trabayu y oxetu d’alderique denomináu ‘Revolución Democrática y Social’. Y güei presentaronlu en rueda de prensa’l coordinador de la Presidencia y voceru parlamentariu, José Luis Centella, y el diputáu y coles mesmes responsable encargáu de coordinar el documentu y los trabayos, Alberto Garzón.

Les idees-base yá incluyíes por Izquierda Xunida nel so trabayu inicial plantegen, amás d’articular un cambéu nes riegles del xuegu democráticu y nel valor de la representatividá ciudadana, consiguir alternatives sociales “a la estratexa neolliberal d’axuste económicu”.

Los parllamentarios d’IX esplicaron tamién que dalgunes de les iniciatives que se llogren tres los alderiques van afigurar n’iniciatives parlamentaries pa llevar al Congresu de los Diputaos o a aquelles instituciones onde se tenga representación. Tán abiertos a que tamién sían d’aplicación a nivel internu d’IX y a la so inclusión de cara a futuros programes electorales.

El documentu ‘Revolución democrática y social’ esboza más d’una docena de propuestes, ente les que figuren que los cargos públicos rindan cuentes de forma permanente ante los sos representaos demientres el so periodu d’elección. Unu de los puntos que más llamó l’atención de los medios de comunicación ye la creación de la figura del ‘revocatoriu’. IX plantega la posibilidá de que los cargos públicos puedan ser removíos de los sos puestos polos ciudadanos si nun cumplen colos sos compromisos o se se desconecten” de los sos representaos. Esto tendría de empezar colos miembros de los gobiernos a nivel nacional, autonómicu o municipal. El trabayu nun plantega una forma zarrada pa ello y ye unu de los puntos nos qu’Izquierda Xunida tien interés d’oldear opiniones cola sociedá.

Páxina web del Manifiestu

“La ñegativa del espresidente del “Principado” a declarar na comisión qu’investiga la xestión del Niemeyer ponlu n’evidencia a elli y a la mafia del PSOE n’Asturies”, según Andecha Astur que pide esti día nuna nota de prensa que’l gobiernu asturinu lleve a los Tribunales a los responsables de la situación de la Fundación d’Avilés.

Andecha atalanta que’l “Principado” tien la obligación de recurrir a la Xusticia si de verdá quier determinar les responsabilidaes llegales.

Pala organización nacionalista, “el fechu de que quien pretendía ser presidente vitaliciu del chiringu del Niemeyer, l’espresidente del “Principado”, Álvarez Areces, se negara a declarar énte la comisión parllamentaria qu’investiga la xestión del Niemeyer pon de nueu n’evidencia a esti llamentable presonaxe que llevó a la so másima espresión la política del PSOE n’Asturies de les redes clientelares, la financiación illegal y los beneficios presonales a costa del Pueblu Asturianu”.

L’Asociación Cultural N’AST amestosé recién iniciáu febreru a instituciones comu l’Academia de la Llingua Asturiana y colleutivos comu la Xunta pola Defensa de la Llingua Asturiana ya Iniciativa pol Asturianu nes sos crítiques al Alcalde Noreña, el “socialista” César Movilla, pol nuevu casu de represión llingüístico protagonizáu pol mesmu al refugar al Coleutivu de Paraos y Precarios de Sieru y Noreña una solicitú d’un llocal públicu p’aconceyase por tar redautada en llingua asturiana.

N’Ast tamién quier pidir la dimisión del señor Movilla porque, ensin necesidá d’entrar en más considerances, lo propio d’un cargu públicu asturianu ye defender lo asturiano, non atacalo, y l’Alcalde Noreña nun sólo nun lo fae sinón que nun dexa facelo a aquelles persones que sí defenden los drechos fundamentales del pueblu asturianu, tanto los llingüísticos comu, nesti casu, los llaborales.

Poro, dende N’Ast queremos dicí-y públicamente al señor Movilla que yá valió, y alverti-y qu’esta ye la última vegá que-y pasamos esti tipu d’actitudes. Si l’Alcalde Noreña insiste en siguir reprimiendo l’usu de la llingua asturiana esta asociación va vese obligada a: 1.- Treslladar el casu a la direición federal del PSOE, que paez más sensible a estes problemátiques de violación de drechos fundamentales qu’una Federación Socialista Asturiana que nun sólo nun corta de raigón estes actitudes de los sos miembros sinón que les ampara col so silenciu. 2.- Acudir a los tribunales de xusticia col enfotu de ver si les actuaciones del Alcalde Noreña son constitutives de delitu. Y ye que, magar que ye cierto que l’asturianu nun ye llingua oficial, tamién lo ye que tien un marcu llegal –probetayu, pero tiénlu– que lu ampara, tanto a nivel “autonómicu” comu estatal ya internacional. Ye más, nesti casu, la vulneración d’un drechu –l’usu de la llingua propia– trai la vulneración d’otru drechu tamién básicu, comu ye’l d’aconceyamientu por parte d’un colleutivu ciudadanu.

El Coleutivu de Paraos y Precarios de Siero y Noreña denunciaba’l llunes que l’alcalde de Noreña, Cesar Movilla, de al FSA-PSOE, negó-yos a estos ciudadanos l’usu de la llingua asturiana al traviés d’un escritu nel qu’obligaba a esti coleutivu a volver a presentar un documentu solicitando un local pa reunise “en castellano”. Ente les organizaciones que criticaben durantemente la midida atopase Iniciativa pol Asturianu que calificaba como pergrve un fechu “que, amás de dir contra la llexislación vixente, lo que ye bien grave que se faiga dende les instituciones, ye un ataque a la dignidá y la igualdá de los ciudadanos asturianos que deciden en llibertá espresase na so llingua propia”.

Nesi sen, Paraos y Precarios de Siero y Noreña manifestaron que nun esperaben “atopanos con un portazu na cara de buenes a primeres”, no que camienten “ye un insultu a tolos paraos y paraes de los conceyos de Siero y Noreña” por usar l’asturianu. A la so quexa añadieron la sorpresa desagradable por esti fechu “nun entendemos cómo pue negase’l so usu a los ciudadanos”.

Dende Iniciativa pol Asturianu solicitaben “la dimisión del alcalde de Noreña, por esti fechu, que nun ye’l primeru, pues yá intentó prohibir l’usu del asturianu n’otros ámbitos, como’l plenu del Conceyu de Noreña. Esiximos la Federación Socialista Asturiana (FSA-PSOE) que tomen midíes contra esti alcalde antidemocráticu que reprime a ciudadanos por querer usar la so llingua propia, tal y como recueye como drechu la Llei d’Usu del Asturianu, vixente dende 1998”.

El Tribunal Supremu (TS) refugó esta selmana pasada un recursu de casación interpuestu pola Generalitat contra un autu que dictara’l Tribunal Superior de Xusticia de Catalunya (TSXC) en xineru de 2013 qu’esixía al Govern adoptar les midíes necesaries pa incorporar el castellán como llingua vehicular na enseñanza xunto col catalán, depués de la demanda presentada pola familia d’un alumnu.

Sigún se supo recién, el Govern interpunxo un recursu contenciosu-alministrativu énte’l mesmu TSXC que lu tornó, polo que llevó’l casu al Supremu, que caltién agora’l posicionamientu del tribunal catalán, encamentando a la Conseyería a adoptar “cuantes midíes sían necesaries p’afacer el sistema d’enseñanza llingüística, en cuanto afecte a los fíos del recurrente, a la nueva situación creada pola sentencia 31/2010 del Tribunal Constitucional (TC)”.

Compromisu por Asturies decidió esti pasáu sábadu nel so Conceyu Abiertu sofitar y participar nel procesu constituyente de Podemos Asturies, de la mesma forma que anima a la izquierda, l’ecoloxismu y al asturianismu políticu a participar nel procesu pa enrequicelu coles sos aportaciones.

Na xunta celebrada na CSOA La Madreña n’Uviéu la organización soberanista vio como mui positivu’l calter abiertu y participativu del nuevu procesu constituyente n’Asturies, mui na llínea de lo que s’aprebara nel Congresu Fundacional de Compromisu por Asturies en Xuno de 2012.

Dende Compromisu por Asturies consideren básicu abrir el camín a superar el réxime de la Transición y de la Constitución de 1978 qu’estableció el sistema políticu-empresarial onde los dos partíos mayoritarios PP y PSOE, son el garante de los intereses de una minoría económica que s’enriquez cola privatización de los servicios públicos y la eliminación de los drechos de la mayoría social.

Pa la organización también ye fundamental la necesidá de qu’Asturies recupere la so soberanía económica, política y cultural frente a les instituciones europees gobernaes por entidaes en sin cálter democráticu nengún, como la Troika, el BCE o’l FMI.

La Fundación Príncipe d’Asturies publica esti día na so páxina web la convocatoria al Pueblu Exemplar d’Asturies correspondiente al añu 2014 y, Pela primer vez, el reglamentu pa presentar candidatures pue consultase n’asturianu y en gallego-asturianu, amás del formulariu, que tamién se pue descargar en formatu pdf n’entrambes llingües.

Esta iniciativa de la Fundación Príncipe d’Asturies cuntó cola collaboración na traducción del Serviciu de Política Llingüística que fai anuncia tamién de la noticia na so web.

El Premiu al Pueblu Exemplar d’Asturies concédese como persaben tolos asturianos “al pueblu, llugar, nucleu de población, espaciu paisaxísticu o grupu humanu del Principáu d’Asturies que destacare de manera notable na defensa y caltenimientu de la so contornada natural, ambiental, del so patrimoniu históricu, cultural o artísticu, n’iniciatives d’impulsu económicu y social o na realización d’obres a comuña o otres manifestaciones de solidaridá estraordinaria”.

Ricardo Sixto, como voceru d’Izquierda Xunida nel Congresu, vieno acabante rexistrar una iniciativa pa que’l gobiernu impulse la ellaboración d’una guía similar a la de la Bundesliga pa facer frente a la invisibilidá de los deportistes gays. El diputáu d’IX reclama la implicación de la Real Federación Española de Fútbol o la Lliga de Fútbol Profesional “na promoción ya impulsu de los valores de tolerancia, convivencia y el respetu pa lluchar contra la homofobia nel mundu del fútbol”.

El diputáu d’IX y voceru parlamentariu en materia de Deporte, Ricardo Sixto, rexistró una iniciativa parlamentaria, sigún asoleya esti día la web de izquierda xunida, na qu’encamienta al Gobiernu a “promover ya impulsar la ellaboración d’un documentu o guía similar al desenvueltu na Bundesliga d’Alemaña, pa faer frente a la invisibilidá de los deportistes gais”, amás de pa consiguir que los clubes señalen públicamente que nun refuguen la homosexualidá nel fútbol.

Sixto invoca na so proposición non de llei’l documentu ellaboráu pola Federación Alemana de Fútbol (DFB) tituláu ‘Umgang mit coming-outs im Fussball’ (que la so traducción lliteral podría ser ‘Cómo faer frente a la salida del armariu nel fútbol’), onde se numberen una serie de midíes qu’ayuden a facilitar la vida personal d’un xugador profesional que decidiera desvelar, voluntariamente, la so homosexualidá.

El diputáu d’IX por Valencia demanda na so iniciativa que s’implique a les instituciones “más representatives del fútbol español, como la Real Federación Española de Fútbol (RFEF) o la Lliga de Fútbol Profesional (LFP), na promoción ya impulsu de los valores de tolerancia, convivencia y el respetu pa lluchar contra la homofobia nel mundu del fútbol”, pa redactar un documentu como’l citáu.

Na motivación de la iniciativa señálase’l casu d’un xugador profesional homosexual alemán que va meses dio una entrevista anónima onde confesó la enorme presión que sufre al tener que despintar la so opción sexual. La entrevista tuvo un enorme impactu, hasta’l puntu de que la canciller Angela Merkel afaló a el xugadores a que ‘salieren del armariu’. “Tenéis De saber que vivís nun país onde yá nun hai que tener mieu”, dixo Merkel nun mensaxe empobináu a los xugadores gays.

La iniciativa d’IX vien coincidir cola noticia protagonizada pol futbolista profesional Thomas Hitzlsperger -52 vegaes internacional cola selección alemana- que fizo pública la so homosexualidá. Dellos deportistes yá reconocieron la so identidá sexual, pero nengunu cola relevancia d’ésti, non yá na Bundesliga sinón nel fútbol européu.