Política

Les marches entamaes dende dellos puntos d’Asturies que tienen de finar n’Uviéu esta tarde de premios pa criticar los recortes en materies de cobertoria social y formativa o cultural, embaxo l’eslogan “Somos Reales”, percorrieron Asturies a lo llargo del día pa aportar esta tarde a la Capital asturiana.

Llugones foi como amuesa la semaya’l puntu d’alcuentru al meudía de les marches qu’aportaben de la mariña asturiana.

Andecha vienoa cabante de denunciar nun comunicáu asoleyáu esti día que la Fiscalía protexe al PSOE d’Asturies.

Sigún el partíu nacionalista asturianu, la Fiscalía négase a acusar a dengún de los ocho imputaos poles factures del Niemeyer y desestimar la denuncia escontra Graciano Torre presentada por Oro no, “permitiendo la impunidá de la trama mafiosu-clientelar del PSOE”.

Enfastiaos d’informaciones parciales o “direutamente de desinformaciones calculaes sobro la esapaición de la llinia de ferry Xixón- Saint Nazaire”, Andecha Astur pidió esta selmana desplicaciones al Gobiernu español.Andecha Astur, al traviés del diputáu de AMAIUR, Jon Iñarritu García, compañeru de los nacionalistes asturianos na coalición Los Pueblos Deciden, presentó delles entrugues al Gobiernu con ruegu de rempuesta per escritu, n’esponiendo delles siguientes irregularidaes cometíes pola operadora LDLINES.

Concretamente, les irregularidaes denunciaes yeren:

– Nun se cumplieron los siete años de serviciu obligatorios, comu se contemplaba nes condiciones de la sovención.

– Una de les empreses que forma parte del consorciu qu’esplotaba la llínea ye Suardíaz (con un 10%),la cuala agora pretende abrir, tamién con sovención europea, la mesma llínia (na que yá cunta col 100% de la nueva empresa) pero dende Vigo, ufiertando esta nueva ruta a la cartera de veceros que consiguió cola llínia Xixón- Saint Nazaire.

– El nivel d’acupación de la llínea Xixón- Saint Nazaire ye del 72 – 75%. Cabe pensar que na solicitú de sovención va figurar un estudiu de viabilidá, que se desconoz, pero que probatiblemente podría cuntar con menos d’esi 72% pa envalorar la rentabilidá que xustificara la sovención.

– A la de xustificar la rentabilidá de la llínia sovencionada, la empresa fixo constar un gastu diariu por barcu de 12.000 euros, cuando en rialidá, según ye público, y dende el primer díi foi de 18.000 euros.

Josu Juaristi (EH Bildu) eurodiputáu de Los Pueblos Deciden entrugó al candidatu a Comisariu Européu de Clima y Enerxía, Miguel Arias Cañete (PP) en nome d’Andecha Astur sobre si obligará al Estáu español a cumplir la prohibición del usu del cianuru nes tecnoloxíes mineres, aprobada nel parllamentu Européu en 2010.

La pregunta va en rellación a la campaña “Oro Non” y el proyectu de mina a cielu abiertu en Salave. Cañete nun duldó en afitar que va obligar a facer cumplir la normativa al estáu español y al restu d’estaos miembros de la Xunión Europea…Nós vamos siguir col tema nel parllamentu européu al traviés del nuesu eurodiputáu.

Una moción presentada por Izquierda xunida a la Comisión d’Economía y Interior del Conceyu d’Uviéu sobre l’usu del asturianu nel tresporte urbanu salió alantre colos votos de PP y PSOE, y l’astención de Foro. Iniciativa pol Asturianu presentara tamién va un mes una quexa al Conceyu d’Uviéu pola falta d’usu del asturianu nel sistema de tresporte públicu de viaxeros d’Uviéu (TUA) lo que motivó la esmolición d’Izquierda Xunida por iguar la situación.

Izquierda Xunida vieno acabante pidir al Gobiernu que respete’l modelu cooperativista de les Caxes Rurales que tanta importancia tien nel norte d’España y que tan averáu s’alcuentra a la cultura d’Asturies y Euskadi, por exemplu. El senador d’IX, Jesús Iglesias, esixó güei que se respete’l modelu de les Caxes Rurales, por atalantar qu’estes entidaes tan en peligru pol interés qu’espertaron nel sector bancariu y que’l Gobiernu quier intervenir no que denominó “estratexa de saquéu de lo colectivo”.

El parllamentariu presentó una moción na Cámara Alta coles mires de salvaguardar la continuidá d’estes entidaes que crecieron a pesar de la crisis gracies a una xestión prudente. Les Caxes Rurales, esplicó Iglesias, preséntense como la única anomalía del sector financieru y, a pesar de ser “pequenes”-el so negociu supon el 6% del total, con depósitos per valor de más de 91.000 millones d’euros- ye apetecedor pa la banca privada.

“Desenvolvieron una banca pegada a la so realidá, dirixida fundamentalmente a autónomos, pequenes empreses y nun se metieron en nenguna aventura siendo solventes al cien per cien: los creitos concedíos fueron llixeramente inferiores a los depósitos colos que cunten”, señaló Jesús Iglesias.

Prueba del interés de les entidaes privaes n’introducise nel nichu de negociu de les Caxes Rurales ye la creación, per parte de los dos bancos más importantes del país, de filiales empobinaes al mundu rural. Ye precisamente esti enclín el que llevantó les medranes de que se pretenda una bancarización, lo que supondría la desapaición d’un modelu cooperativista qu’apigura a más de 2,7 millones de socios.

Podemos Avilés, el círculu que Monedero amosó como exemplu de cómo se puen llograr un 20% de votos con 300 euros d’inversión, entama mañana l’alderique sobre los sos principios organizativos. L’Alderique que xeneró dellos documentos a nivel estatal, y autonómicu al traviés de la plataforma Reddit, onde se presentaron numberoses propuestes que van ser aldericaes pola asamblea.

A la propuesta del grupu técnicu xúnense les propuestes de Pablo Echenique (Eurodiputáu) y la propuesta de Daniel Ripa (Candidatu per Asturies nes pasaes elecciones),. Tamién se van aldericar delles propuestes xeneraes dende’l circulo d’Avilés. Otra de les temes va ser la futura manifestación que se ta entamando a favor de los vecinos del Nodo xuntu con otres organizaciones.

Aprofitando la cellebración del Díi de la Nación Asturiana, y l’apertura del nueu cursu politicu, Andecha Astur presentó na Xunta Xeneral una propuesta oficial por que el “Principado d’Asturies” pase a ser denomináu “Princesado d’Asturies”, dao qu’esi nome, impuestu dende Madrid al igual que l’Estatutu autonómicu, ta venceyáu al herederu de la corona española, y comu quiera que nesti momentu ye de sesu femenín, lo propio –dientru la so llóxica monárquica- sedríe que pasara a denominase “Princesado”.

“Con esta iniciativa pretende poner n’evidencia lo risible, servilista y monárquico que resulta la denominación de “Principado” impuesta dende Madrid a la nuesa nación y reivindicar el nome de Asturies comu únicu válidu”.

Con esta propuesta Andecha Astur quier reivindicar el términu hestóricu d’Asturies comu l’únicu válidu a la hora de referise a la nuesa nación, y poner n’evidencia’l calter sucursalista y monárquicu de la denominación de “Principado d’Asturies”, al empar que denuncia comu tanto esta denominación comu l’Estatutu d’Autonomía fueron impuestos dende Madrid, darréu que, a diferencia d’otres comunidaes del Estáu español, nunca se dexó al Pueblu Asturianu votalo.

Asina mesmu Andecha Astur quier remembrar que, a diferencia d’otres naciones del Estáu cuyes istituciones d’autogobiernu fueron abolíes pol franquismu y recuperaes na llamada transición, nel casu d’Asturies non solo nun se recuperó la nuesa istitución democrática, el Conseyu Soberanu, sinón que se mos impunxo una institución decimonónica ayena a la voluntá del Pueblu Asturianu al que se torgó l’exercer el derechu democráticu de refrendala por votación, y que supon un humillante servilismu haza España y la so monarquía.

Por too ello, Andecha Astur perafítase na so reivindicación de la denominación hestórica d’ASTURIES a la hora de referise a la nuesa nación, na reivindicación del Conseyu Soberanu comu másima istitución democrática asturiana, esaniciada pol franquismu, y denuncia l’inventu de “Principado d’Asturies” y el so estatutu d’autonomía comu una vergoñosa ya intolerable imposición del Estáu español nel so enfotu de destruición y asimilación de la nuesa patria.

Izquierda Xunida, al traviés del so Grupu Parlamentariu d’IX, ICV-EUiA, CHA, va forzar el próximu miércoles, día 10, l’alderique nel Congresu sobre la convocatoria d’un referéndum consultivu pa que la ciudadanía se pronuncie ente monarquía y república como forma d’organización del Estáu.

Sigún asoleyaba IX esti día na so web, “la Xunta de Voceros del pasáu martes aprobó incluyir nel orde del día de la próxima selmana, na que se volver a entamar el periodu ordinariu de sesiones tres del parón branizu, la interpelación rexistrada por IX el pasáu 3 de xunetu. La iniciativa rexistrose nestos términos: “el Grupu Parlamentariu d’IX, ICV-EUiA, CHA, la Izquierda Plural presenta la siguiente interpelación urxente sobre la política del Gobiernu en relación cola posibilidá de realizar un referéndum consultivu con cuenta de los ciudadanos puedan espresar el so deséu sobre la monarquía o república como forma política del Estáu, pal so alderique en Plenu”.

Una vegada producíu esti alderique, el grupu parlamentariu va concretar la so propuesta de forma detallada al traviés de la correspondiente moción consecuencia d’esta interpelación pal so alderique y votación nel Plenu de la selmana siguiente.

Izquierda Xunida diz cumplir asina “col oxetivu anunciáu’l pasáu mes de xunu de consiguir que pueda aldericase esta cuestión en see parlamentaria, magar la reticencia amosada polos grupos mayoritarios”. Ello ye que na enmienda a la totalidá con testu alternativu presentada al proyectu de llei d’abdicación aldericada’l 11 de xunu’l grupu d’IX, ICV-EUiA, CHA yá indicaba que “si daqué da sentíu a la insatisfaición fonda que los ciudadanos sienten escontra’l sistema de democracia parlamentaria ye la percepción de que, tal como se desenvolvió, esclúi la participación directa de la ciudadanía, en contra del mandatu constitucional del artículu 23 de la CE”.

Como cada añu, el Partíu Asturiana tien convocada la so celebración del Día d’Asturies qu’esti añu va tener llugar el día 8 en Xixón, a les 12,30 hores, L’homenxe floral d’esti añu sedrá a Pelayu, como fundador del Estáu asturianu, allugándose na so estatua del Muelle de Xixón.

Darréu de l’homenaxe celebraráse la comida de xermandía.