Política

“El pucherazu retirándomos les papeletes al menos nun centenar de meses elleutorales debiere ser abondo pa invalidar estes elleiciones, pero nun teo dengún enfotu na calidá democrática española”. Con este pallabres, Paulo Arboleya, candidatu nacional d’Andecha Astur, valoraba esti llunes los resultaos nestes elleiciones nacionales, amestando tamién una valoración positiva al so apueste poles candidatures populares de conceyu que comu Conceyu Abiertu por Noreña, vieron recompensáu’l so esfuerciu, duplicando’l númberu conceyales.

De toes formes, y anque considera que los resultaos yeren los esperables nel actual contestu, Paulo Arboleya afirma contundente que “los resultaos, con ser los esperables y vese perafeutaos pol pucherazau sufríu nun se correspuenden cola capacidá d’incidencia social y política d’Andecha Astur, y son un puntu d’inflexón qu’obliga a redefinir tol asturianismu políticu”.

Al menos, nun centenar de meses elleutorales, llocalizaes preferentemente en Xixón, retiráronse les papeletes d’Andecha Astur y “énte la costatación de la retirada de les papeletes d’Andecha Astur pola actuación d’interventores y apoderaos del PP y el PSOE; que rializaron una malintencionada interpretación de la resolución de la Xunta Elleutoral Provincial d’Asturies, na qu’autorizaba la llegalidá de les papeletes n’asturianu d’Andecha Astur, pero non la so presencia nos colexos elleutorales (nuna espresión d’apartheid llingüísticu únicu na Europa ocidental)”.

Los interventores del PP-PSOE aprofitaron, según Andecha, esta anómala situación “pa retirar les papeletes n’español de los colexos elleutorales, impidiendo asina qu’a lo menos nunes 100 meses, principalmente llocalizaes en Xixón y Avilés, los elleutores tovieren al so algame les papeletes d’Andecha Astur, en dellos casos fasta cerca de les 2 de la tardi, pese a la incesante actividá d’apoderaos ya interventores d’Andecha Astur y de la mesma Xunta Elleutoral de Zona y Xunta Elleutoral Provincial”.

Lo que denuncia Andecha dexa bien a les clares que se tan conculcando n’Asturies derechos fundamentales cola connivencia de fuerces polítiques que se dicen progresistes nuna situación que raya col tercermundismu.

La denuncia d’Andecha Astur énte la OLAF, que favoreció’l so demoledor informe, tien de resultes les primeres declaraciones d’imputaos énte l’Audiencia Nacional. A Rexach y Díaz Rato tendrán de siguir González Buendía, d’aquella conseyeru de Mediu Ambiente, Ordenación del Territoriu ya Infraestructures y el mesmu Álvarez Areces como postrer responsable de la obra faraónica que soterró millones de Fondos Europeos sol mar y engordó los bolsos de dalgunos.

Yá lo apuntaba Andecha Astur na so denuncia énte la OLAF, el cúmulu d’illegalidaes, dende la contratación de la obra fasta’l burdu intentu de faer pasar por una segunda fase’l sobrocostu énte la XE.Y tien responsables con nome y apellíos nos distintos gobiernos del PSOE, dende’l “Principado”, fasta’l Ministeriu de Fomentu español, pasando pel mesmu Conceyu de Xixón. Vamos ver desfilar énte la Andiencia Nacional a tolos qu’apaecen na semeya de “familia” el día de la nauguración de l’ampliación d’El Musel y responder polos graves delitos que la mesma OLAF apunta nel so informe.

Andecha Astur validó por fin les papeletes n’asturianu y ye la única organización política que cuntará con papeletes en llingua asturiana depués de lluchar por algamalo a lo llargo de les últimes convocatories electorales y viendo siempres como se-y torgaba esti derechu pola Xunta Electoral. Na opinión d’esti partíu, “con ser un ésitu consiguir esta validación pola Xunta Elleutoral Provincial d’Asturies, a Andecha Astur nun-y queda sinon que denunciar qu’esta mesma Xunta Elleutoral non solo nun saca papeletes n’asturianu del conxuntu les organizaciones polítiques que se presenten a les elleiciones, sinon que prohibe espresamente qu’estes papeletes puedan ufrise nos Colexos Elleutorales el díi de la votación, colo qu’en cuentes de reconocer un drechu, lo que ta faciendo ye crear un guetu pal asturianu”.

Arriendes d’ello Andecha Astur considera 2persignificativo que de tolos partíos que se presenten a estes elleiciones y que lleven nel so programa la oficialidá del asturianu, namás Andecha Astur esmolecióse en validar les papeletes n’asturianu, nuna nuea amuesa de coherencia, enfotu y compromisu pa cola llingua y la cultura d’Asturies”.

Pesia que les papeletes n’asturianu nun tarán nos colexos elleutorales a dimposición de los votantes, Andecha Astur “imprimirá y falicitará estes papeletes a quien quiera facer usu dela llingua asturiana a la hora votar”.

Izquierda Xunida ye la única formación con representación anguaño na Xunta Xeneral que nun sólo fai apueste nidiu pola oficialidá sinon que presenta so programa electoral en llingua asturiana, como vieno faciendo dende hai tiempu. Andecha Astur, vieno faciéndolo dende la primera vegada que se presentara a les elecciones y Foro fai apueste pola oficialidá anque cola matización de que s’algame pa ello un consensu abondu. El casu más enguedeyáu ye’l de Podemos que tien nel so programa la oficialidá como derechu fundamental, pero nes declaraciones públiques de los sos dirixentes nun cuenta lo mesmo que nel so programa electoral y dexa abierta la puerte a la especulación.

Izquierda Xunida nun dexa duda a la so postura alrodiu de la oficialidá: “nel nuevu Estatutu vamos establecer d’una vegada la oficialidá de la Llingua Asturiana, y de la fala o gallego-asturianu nel so ámbitu territorial tantu pa garantizar el caltenimientu d’unu de los más importan- tes patrimonios culturales de los que gociamos, la nuesa llingua, como pa reconocer los derechos llingüísticos de los y les asturianu-falantes”.

Y en materia de comunicación dexa tamién afitao’l compromisu d’un presupuestu pa la RTPA que sía abondu pa garantizar una programación estable y calidable que cumpla colos oxetivos d’articular social y territorialmente la comunidá autínoma, “espardiendo al máximu la realidá cultural asturiana, con mención espresa d’una programación n’asturianu que cohesione la llingua coles mires de la oficialidá”.

Izquierda Xunida ye la más ambiciosa deles formaciones al facer propuestes nel so programa electoral onde defende “la nuesa idea d’Asturies como país, d’autoestima como pueblu, de la defensa de les nueses señes d’identidá, de la protección y fomentu del nuesu patrimoniu cultural, de la recono- cencia de la nuesa llingua, dientro d’un proyectu global pa Asturies”. Pa ello plantega delles propuestes concretes ente les que s’alcuentren les que vienen darréu: • Fomentu de desenvolvimientu de la oficina la Normalización del Usu de la Llingua Asturiana. • Ellaboración d’un estudiu rigurosu y científicu de la toponímia tradicional n’Asturies. • Ellaboración d’un plan de normalización que contemple l’usu de la Llingua pa: • Folletos, dípticos, cartelos, catálogos artÍsticos… Onde se recueya información, publicidá istitucional o anuncios d’actos culturales, deportivos o festexos entamaos pola alministración. • Retulación en tolos departamentos y servicios que dependen de les alministraciones publiques. Bandos y Edictos, anuncios oficiales na prensa y otros medios. • Emplegu na escritura del nome del Principau • Campaña de desplicación de les midíes normalizadores y de sensibilización ciudadana cola Llingua Asturiana. • Cursos de Llingua Asturiana pa funcionariáu. • Asignación d’una partía presupuestaria añal abonda pa la realización de les propuestes anteriores. • Puntuación de la conocencia de la Llingua Asturiana nel accesu al emplegu”.

Foro Asturias

Les propuestes de Foro alrodiu de la llingua van afitaes nel capítulu de Cultura del so programa electoral y enmárquense nun apartáu de Patrimoniu llingüísticu onde se diz nidiamente que sofitarán “cuando se dean les circunstancies polítiques y el consensu social necesariu que dexen la reforma del nuesu estatutu d’autonomía, el cambéu del so artículu 4 pa incluyir la oficialidá, tal como se recueye nel artículu 3.2 de la Constitución española”.

Asina Foro pronúnciase pola oficialidá per dexa en manes de les otres fuercies la posibilidá de qu’esa oficialidá puea declarase nel Estatutu, xustamente lo que los candidatos de Podemos dicen nes sos declaraciones públiques tamién.

Foro, diz nel so programa que “les llingües autóctones d’Asturies constitúin una parte irrenunciable del nuesu patrimoniu cultural, un factor sustancial de la nuesa identidá como Comunidá Autónoma, pero tamién parte fundamental del patrimoniu común de toos el españoles, que la so preservación ye responsabilidá principal de los asturianos”. Por tou ello en Foro dicen que van “trabayar por un ampliu consensu social y políticu na defensa de les llingües d’Asturies, respetando la llibertá y la voluntariedá del so usu ensin imposiciones pero tamién ensin torgues pa los ciudadanos”. Y al mesmu tiempo dicen que van “contribuyir a la normalización llingüística en toles esferes de la sociedá asturiana promoviendo la presencia de les nueses llingües na enseñanza, na toponimia y nos medios de comunicación” y a “faer cumplir les lleis y disposiciones de la Unión Europea en materia de defensa de derechos llingüísticos”, desenvolviendo “reglamentariamente y de manera non restrictiva la llei d’usu del asturianu y del gallegu asturianu”.

Podemos o non

Les propuestes de Podemos son nidies nel so programa electoral, pero nun concuerden coles declaraciones esbarioses del so candidatu Emilio León y d’otros candidatos que falen tol tiempu de consensu como Foro.

Nel programa de Podemos dizse bien a les clares que “los falantes d’asturianu tienen los mesmos derechos que cualquier persona falante d’otra llingua; por ello, tienen de reconocése-yos los mesmos derechos llingüísticos, como’l derechu a espresase n’asturianu”. Y por mor d’ello caltienen que “ye necesario garantizar la so presencia nos medios de comunicación, nes comunicaciones instituci nales, na toponimia, na enseñanza, etcétera”.

Amás, Podemos defende la Declaración Universal de los Derechos Humanos y, por tanto, “aspira a esaniciar toles discriminaciones, del tipu que sían. Qu’el marcu xurídicu constitucional dea al castellán el rangu de llingua oficial, obliga a los territorios con llingües propies a da-yos a estes un tratamientu equivalente pa salvaguardar la non discriminación de los sos falantes”.

Nesti sen, so propuesta 188 plantega la “Reconocencia de los derechos llingüísticos de les persones falantes d’asturianu y, nel so ámbitu, de gallego-asturianu, al traviés de la promoción de la llingua a la categoría xurídica de cooficialidá por aciu la reforma del Estatutu d’Autonomía”. Y con calter inmediatu, plantega’l “desenvolvimientu plenu de los derechos llingüísticos de los falantes d’asturianu y, nel so ámbitu, de gallego-asturianu, nel marcu estatutario y llegal vixente, con especial atención a la Carta Europea de Llingües Rexonales y Minoritaries”.

Podemos plantega tamién enl programa coses que nun se siente nes sos intervenciones públiques como desenvolver un Plan de Normalización Sociollingüística pala Llei d’Usu y Promoción del asturianu y el gallego-asturianu y crear un marcu global qu’apigure toles acciones sobre política llingüística que s’impulsen dende una Acción de Gobiernu.

Tamién planteguen la puesta en marcha de programes en llingua asturiana y gallegu-asturiano nos medios de comunicación de titularidá pública, garantizando “el derechu de la ciudadanía a aportar a conteníos audiovisuales na so llingua. D’esta manera, los medios de comunicación van contribuyir a la equiparación de toles llingües d’Asturies nel espaciu públicu, afitando la dignificación de los sos falantes”.

Énte les distintes informaciones que recueyen la participación del candidatu de Podemos n’Asturies, dientru de les llistes de Andecha Astur nes elleiciones llocales de 1999 y 2007, Andecha Astur quier manifestar el procesu de criminalización que se ta comentiendo pa cola organización y que “llegó a la so llende cola intervención d’Adriana Lastra del PSOE n’Asturies, rializaes en La Sexta, Noche del sábadu, acusando a Podemos de llevar a un “llíder es militante d’un grupu nacionalista d’ultra izquierda, llamáu Andecha Astur”, siguíu d’un inaceptable silenciu del contertuliu de Podemos, Iñigo Errejón”.

La nota de prensa na que desplica la situación sirve a Andecha Astur pa esclariar que la participación d’Emilio León nes llistes elleutorales “respondió a la so condición de simpatizante de la organización, siendo avezada la so participación en distintes actividaes y movilizaciones d’Andecha Astur demientres esos años” y l’orgullu qu’Andecha tien por esa presencia de León nes sos llistes.

La nota recueye lliteralmente les consideraciones que se recueyen darréu:

• Que lo qu’en principiu podría considerase como una información periodística d’interés xeneral cara a conocer la evolución política d’Emilio León pasó a ser utilizada comu argumentu de criminalización, tantu de Andecha Astur y los sos militantes y simpatizantes comu del propiu candidatu de Podemos. • Qu’esti procesu de criminalización llegó a la so llende cola intervención d’Adriana Lastra del PSOE n’Asturies, rializaes en “La Sexta, Noche” del díi d’ayeri, acusando a Podemos de llevar a un “llíder es militante d’un grupu nacionalista d’ultra izquierda, llamáu Andecha Astur”, siguíu d’un inaceptable silenciu del contertuliu de Podemos, Iñigo Errejón. Por tou ello Andecha Astur considera pertinente esclariar que: • Efeutivamente, Emilio León foi candidatu d’Andecha Astur nes elleiciones llocales de 1999 (Corvera) y 2007 (Llanes). • Acullá de les rellaciones d’amistanza d’Emilio León con militantes de Andecha Astur, la so participación nestes llistes elleutorales respondió a la so condición de simpatizante de la organización, siendo avezada la so participación en distintes actividaes y movilizaciones d’Andecha Astur demientres esos años. • Esta condición d’Emilio León comu simpatizante d’Andecha Astur, non solo nun supon dengún deshonor pal mesmu, sinón qu’avala’l so compromisu social y políticu a lo llargo’l tiempu. Per otra parte, p’Andecha Astur foi un arguyu cuntar cola collaboración d’una presona de la so coherencia y compromisu social. • Consideramos que la so actual militancia al mandu de Podemos, acullá del inaceutable calter sucursalista madrilanu de dicha formación nel nuesu país, nun supon un reblincón ideolóxicu nel tarrén social por parte d’Emilio León, darréu que ye sabío y manifiesto qu’Andecha Astur comparte en bona midía dellos de los postulaos de Podemos, siquier los de la so etapa inicial.

Per otru llau, y no que cinca a la intervención d’Adriana Lastra nel programa de la sexta criminalizando a Andecha Astur y de forma secundaria a Podemos, queremos manifestar que: • Ye comprensible que’l PSOE intente desacreitar per tolos medios a la nuesa formación, toa vegada que nos 25 años d’esistencia d’Andecha Astur toviemos ocasión de poner repitíes vegaes escontra les cuerdes al PSOE n’Asturies, nos sos múltiples casos de corrución y especulación. Por citar dos casos recientes nel fraude d’El Musel o na paralización del PGOU de Llanes. • Ye’l PSOE quien tien sobraos motivos p’avergoñase y pa ser criminalizáu, siendo conocío la implicación de los sos dirixentes políticos en casos que van dende la participación nos asesinatos del GAL fasta’l sistema de corrución xeneralizada qu’a nivel estatal tán apaeciendo caberamente como son los ERES n’Andalucía, y a nivel nacional con casos comu’l del es conseyeru Riopedre, el Niemeyer, o más apocayá’l de José Ángel Fernández Villa (a quien Andecha Astur yá denunciara como corruptu 10 años enantes de que se confirmara); por nun citar los resultaos de les sos polítiques al mandu d’istituciones estatales, nacionales y de conceyu, que nel casu d’Asturies nun traxeron más que dolor y sufrimientu pal Pueblu Asturianu, con destruición del texíu industrial y económicu asturianu, perda incesante de les condiciones sociales y llaborales, decenes de miles d’asturianos obligaos a emigrar y les sos conocíes polítiques d’asimilación cultural ensin más oxetu que faer d’Asturies un barriu de Madrid; y que colos sos más de 30 años al frente del “Principado” consiguieron faer de Asturies un país aprobetao y avieyao. • Per otra parte el silenciu d’Errejón énte les acusaciones d’Adriana Lastra ye inaceptable, non solo por nun salir en defensa del so compañeru de partíu n’Asturies, sinón por poner n’entedichu les sos conviciones democrátiques, al dexar que se criminalice públicamente a una organización política llegal comu Andecha Astur, qu’a lo llargo de les sos yá 25 años d’hestoria foi siempres un exemplu d’honradez y coherencia na defensa de los llexítimos drechos ya intereses d’Asturies y el Pueblu Asturianu.

Nuna decisión sorprendente, depués de munchos años de militancia y de referencia nel asturianismu de centru-derecha, Humberto Gonzali asoleyaba esta fin de selmana la so decisión de dase de baxa del PP. “Güei solicité’l términu pa la mio condición d’afiliáu al Partíu Popular”, escribía’l sábadu nun comunicáu nel que tamién daba les razones de la so baxa: “El Partíu Popular, n’Asturies y en Xixón, perdecidióse por un proceder que lu allueña pasu ente pasu d’esi lliberalismu social, de progresu y asturianista, fondamente democráticu, que non pocos militantes díbemos propugnando”.

Esta baxa llega tres d’una trayectoria “d’apueste por una vía política qu’entamara en 1994 en faciendo públicu’l mio venceyamientu al proyectu popular, y que siguió con mayor intensidá nel conceyu de Xixón onde como militante de l’agrupación local, dende 2004, trabayé con discreción, compromisu y llealtá”.

Sigún desplica Gonzali, foi un tiempu de facer políticu apináu, como toa obra humana, de satisfacciones y desaliendu, de llogros que pusieron en valir l’emperru nos principios y d’esfuerzos balderos o apostalgaos. Foi un tiempu de convivencia nun partíu que me dexa amigos y la conocencia de persones válides y preparaes enforma pa la xestión de los intereses xenerales. Y foi, tamién, tiempu onde les faltes d’una estructura política y el nun s’afacer a la realidá social espeyáronse de toes toes de manera repetida. Soi lliberal y soi asturianu y, poro, creo dafechu que la democracia ye l’espaciu natural del lliberalismu, y que l’amor a tolo que na nuestra tierra pue defininos como lo que somos ye la esencia del asturianismu”.

Humberto Gonzali nun pue ser más claru na so renuncia: “El Partíu Popular, n’Asturies y en Xixón, perdecidióse por un proceder que lu allueña pasu ente pasu d’esi lliberalismu social, de progresu y asturianista, fondamente democráticu, que non pocos militantes díbemos propugnando. Y non, nun me ye posible, entós, ser lliberal refugando la democracia nin asturianu despreciando al asturianismu”.

Por mor d’ello, esti sabado, Gonzali formalizaba la baxa “nun Partíu Popular al que-y deseyo lo meyor, al pesar de que n’Asturies nun pudiera o nun quixera, como sí quixo y pudo n’otros llugares, ser referente de los que n’amor a la patria primera dedíquen-y a ésta pal so progresu los más grandes enfotos. A ellos, a nós, que de guía tengamos aquella frase del prócer xixonés Gaspar Melchor de Xovellanos; Almiro al que defende la verdá y sacrifícase poles sos idees, pero non a los que sacrifiquen a otros poles sos idees”.

Humberto Gonzali nació en Figareo, Mieres, en 196 y ye un escritor asturianu que foi miembru de l’asociación Conceyu Bable y profesor de llingua asturiana. En 1985 yera nomáu secretariu de la Xunta pola Defensa de la Llingua Asturiana, onde coordinó numberoses acciones de protesta pola denegación de derechos llingüísticos, destacando les promovíes ante la sanción al factor de FEVE de Nava por usar la toponimia tradicional. Xunto con Juan Bonifacio Lorenzo Benavente y Xicu Monteserín fundaba en 1988 Orbayando, revista asturiana d’información, que codirixó hasta l’añu 1990.

Nel 1990 creó con otros autores asturianos l’asociación Escritores y Traductores en Llingua Asturiana (ETLLA) de la que foi’l so presidente. Promovió la IV Xunta d’Escritores Asturianos celebrada en Villaviciosa en 1996, y promovió y foi’l coordinador de la V Xunta d’Escritores Asturianos fecha en Lluanco en 1998. En 2006 crea l’Arribada, foru de lliteratura qu’impulsa nel conceyu de Xixón.

El PSOE volvería ganar les elecciones autonómiques n’Asturies si celebrárense güei con un 25,5 per cientu de los votos, cuatro puntos más de los que llograría Podemos (21,4), qu’entraría nel Parlamentu rexonal como la segunda fuerza más votada, per delantre del PP, col 19,9 per cientu de los sufraxos. Esos son los datos qu’ufre la encuesta del Centru d’Investigaciones Sociolóxiques que tamién valora la xestión del gobiernu asturianu que la mayoría del electoráu desaprueba dafechu.

Según la encuesta del Centru d’Investigaciones Sociolóxiques publicada güei, los asturianos suspenden al Gobiernu de Javier Fernández al camentar la mayoría que la xestión de los caberos cuatro años foi regular o mala cuando non mui mala. Namái qu’un 8% de los encuestaos califiquen de bona la xestión.

No que cinca a los resultaos electorales, Foro, principal grupu de la oposición, esbarrumbaríase porque perdería más de la metá de los sofitos y asitiaríase, col 10 per cientu de los votos, por detrás de Ciudadanos, que consiguiría un 10,6 per cientu.

Izquierda Xunida tamién vería amenorgaos los sos votoss y cayería hasta’l 6,7 per cientu de los sufraxos, mui percima de los resultaos que se-y dan nes demás comunidaes del Estáu, ente qu’UPyD, con un 2,2 per cientu, nun consiguiría los necesarios pa entrar nel Parlamentu.

Sicasí, la peculiaridá del mapa electoral asturianu, que ta estremáu en tres circunscripciones electorales, xunta emoción al resultáu final ya que, tres los socialistes, el mayor númberu d’escaños dependería de los resultaos de les circunscripciones d’Oriente y d’Occidente.

En concretu, los socialistes consiguiríen 13 escaños, cuatro menos de los que llograron na actual llexislatura, ente que los populares ganaríen unu y algamaría los once parlamentarios.

Por detrás d’ellos, asitiaríase Podemos, qu’entraría nel hemiciclu asturianu con diez representantes, el doble de los que llograría For, que perdería siete diputaos.

Ciudadanos tamién entraría per primer vegada na Xunta Xeneral del Pincipado con cuatro diputaos, ente qu’IX vería amenorgada la so representación de cinco a dos diputaos y UPyD, perdería’l diputáu que llogró va trés años, anque’l diputáu qu’ocupó esi escañu, Ignacio Prendes, seguiría nelli al presentase como númberu dos na llista de Ciudadanos.

A nivel nacional, el PP ganaría les elecciones xenerales si celebrárense güei, con un 25,6 %, ente que’l PSOE asitiar en segundu llugar a pocu más d’un puntu (24,3 %), adelantrando a Podemos, que s’esbarrumba más de siete punto (16,5 %).

Acordies con el sondéu correspondiente al mes d’abril, Ciudadanos esperimenta una fuerte crecedera al pasar del 3,1 per cientu de los sufraxos de xineru al 13,8 per cientu de los sufraxos.

Izquierda Xunida cai hasta’l 4,8 per cientu ente qu’UPyD, que tenía’l sofitu del 4,6 per cientu, queda cásique desapaecíu con un 1,9%.

Nuna nota de prensa asoleyada ayeri, la XPDLA critica al Presidente de la Xunta Xeneral del Principáu por facer campaña electoral y desprestixar los derechos llingüísticos de los asturianos nun actu institucional que tenía de ser neutru: “Ayeri hubo un actu institucional na Xunta Xeneral del Principáu d’Asturies dientro del programa de la Selmana de les Lletres Asturianes y el presidente de la Xunta Xeneral, el socialista Pedro Sanjurjo, nun pudo evitalo y tuvo qu’aprovechar pa facer unes declaraciones pa dexar claru l’apoyu a la llinia del so partíu en cuantes a la cuestión llingüística: promoción del asturianu, pero ensin reconocimientu de derechos llegales”.

“Toi en contra de la oficialidá porque les llingües nun tienen que ser pa imponer o confrontar”, vieno a dicir. Nun saben na XPDLA “si tenía mieu a que lu confundieren con un bablista peligrosu por acoyer la llectura d’unos testos lliterarios y por eso quixo dexar claro qu’él ye de los que tán en contra. Lo que nos llama l’atención ye esa declaración y güei precisamente. Paeznos impropio del so papel institucional, de mano ecuánime y imparcial, que se dedique a facer política partidaria”.

Na XPDLA dicen nun saber tampoco “si concibe la promoción del asturianu namás p’actos simbólicos y lliterarios un día o una selmana al añu, pero si tanto-y gusta que nun haya imposiciones nin confrontaciones tendría que saber de sobra qu’eso consíguese con midíes llexislatives que garanticen que naide imponga nada a naide, non dexando les coses como tán. Güei, n’Asturies, la única imposición qu’hai ye la del usu del castellanu a tolos efectos llegales porque l’asturianu nun ye oficial. Polo tanto, la confrontación búscala quien s’empeña en negar derechos en cuenta de favorecelos”.

La nota de prensa diz tamién que “el señor Sanjurjo, igual que’l partíu del Gobiernu, nun s’entera. O, más bien, nun quier enterase y piensa que somos fatos, pero somos munchos los que queremos derechos llegales, quier dicise, la oficialidá. Y eso nun s’arregla con una Selmana na que nun creen y na que participen tapando les narices, pa cubrir l’espediente y esperar al añu que vien”.