Política

Nun comunicá que facía públicu esti día, la Xunta Pola Defensa de la Llingua lamentaba que les direcciones del PSOE y PP se pongan d’alcuerdu p’acabar cola llingua y facíalo con estes pallabres que reproducimos darréu:

“La propuesta d’artículu 4.u que la Federación Socialista Asturiana (FSA)presenta na Ponencia de la reforma estatutaria y que cuenta yá col apoyu del grupu parllamentariu del PP, ye un exerciciu tan escomanáu d’hipocresía, trilerismu políticu y autismu que produz vergüenza. La velocidá con que quieren resolver lo que pa ellos ye un trámite incómodu ye bien sintomática. Lo que proponen ye más de lo mesmo, pero adornao, dicho d’otra manera. Fabaraca, pero con muncha lliteratura. En resumíes cuentes, que d’oficialidá nada, qu’eso ye pa los ciudadanos y les llingües de primera, non p’Asturies.

Unos pocos dirixentes de los dos partíos políticos alcuerden afitar la marxinación llegal del asturianu y condenar a muerte al nuesu patrimoniullingüísticu. Fáenlo d’espaldes a la sociedá asturiana, robando la posibilidá del debate públicu incluso dientro de los sos propios partíos. Unos pocos dirixentes del PSOE y del PP imponen esti gravísimu determín primero de que pueda ser debatío pola so propia militancia y a pocos meses y selmanes de cellebrar los sos prósimos congresos. ¿Porqué tanta priesa? ¿Porqué tantu mieu a la democracia? ¿Porqué tantu mieu a la llingua asturiana?

De los tres apartaos nos que se reparte l’artículu que proponen, l’apartáu 2 ye una copia del que yá hai. L’apartáu 1 nun diz nada que nun sepamos yá: que l’asturianu y el gallego-asturianu son un patrimoniu y un valor de convivencia. ¿Y eso, pa qué val nel articuláu d’una llei? Más vergüeza produz que, depués de lleer los dos primeros apartaos y ver que nun hai nada nuevo en comparanza col anterior, el terceru fala d’una llei d’usu y promoción, ¡que yá ta aprobada en 1998, pero qu’agora va necesitar 2/3 de la Xunta Xeneral p’aprobala! Pa esti viaxe nun facíen falta les alforxes.

Les direcciones del PSOE y PP n’Asturies siguen cieges y sordes a les reclamaciones democrátiques d’un sector significativu de la sociedá que dicen representar. Los alcuerdos de los sos partíos a nivel estatal, onde falen de los beneficios del billingüismu pa la convivencia y el respetu, onde se dexa claro qu’oficializar les llingües propies nun provoca imposiciones sinón más llibertaes, equí nun valen. Eso de les llibertaes nun va colos asturianos. Pa les élites dirixentes nosotros somos ciudadanos de segunda y, la nuestra llingua tamién.

Tolo que nun seya garantizar llegalmente los derechos ciudadanos cola oficialidá ye un atentáu que fai recamplar que n’Asturies hai un déficit democráticu intolerable. Vivimos nun estáu onde unos ciudadanos ven reconocida la so llingua de manera oficial y otros, non. Eso ye indefendible pa cualquiera que se diga democrata y l’aristocracia que manexa los destinos del PSOE y PP n’Asturies va tener qu’esplicar por qué lo que val pa los demás nun val pa nós.

Yá tán clares les intenciones d’Ovidio Sanchez y Fernando Lastra xunto a los sos cómplices políticos: pretenden acabar con una llingua milenaria que les xeneraciones anteriores fueron tresmitiendo a les siguientes hasta llegar a nós. Lo que nos queda por saber ye si les bases, el conxuntu de la militancia d’estos dos partíos, quieren asumir la mesma responsabilidá énte la historia. Tán, los dos partíos, en procesos congresuales onde la soberanía política debería residir nos delegaos. ¿Van mirar pa otru llau? ¿Van dexar que se tome esta decisión primero de que la militancia pueda falar? ¿Piensen de verdá qu’insistiendo na mesma política pue recuperase una llingua que tamos viéndola desapaecer en tiempu real? ¿Nun ven que la siguiente reforma estatutaria, de siguir les intenciones d’esti grupín de dirixentes profesionales, va ser dientro de munchos y llargos años?. Pero principalmente, señores Ovidio Sánchez y Fernando Lastra: ¿de verdá piensen qu’un estatutu ensin oficialidá nun va cerrase en falso? ¿Piensen que con esta agresión van facer callar a un movimientu de reivindicación llingüística que cada día ye más ativu y más plural? Ye evidente que non, apuesten decidídamente pola vía de la imposición y de la confrontación social durante más y más años. Eso ye lo que vienen consiguiendo hasta agora y mientres apuesten por esta vía muerta va seguir siendo asina. Somos munchos miles de ciudadanos coscientes de los nuesos derechos y puen tar seguros que nun nos vamos dar nunca primero de llogralos”.

IX-BA-LV acusa la Federación Socialista Asturiana (FSA-PSOE) de condergar a los asturianos a ser la comunidá autónoma col Estatutu d’Autonomía más regresivu, “que nun reconoz nin ún solu derechu social y supón una clara rebaxa sobre l’actual” nun comunicáu col que valoraba los últimos apautamientos de la ponencia estatutaria de la que forma parte en minoría.

Según izquierda Xunida, “la propuesta de la FSA amuesa un cinismu n’estáu puru porque los socialistes asturianos defenden derechos sociales con una mano demientres qu’empleguen la otra pa torgar el reconocimientu d’esos mesmos derechos n’Asturies. La direición de la FSA tendría d’esplica-yos a los asturianos por qué los socialistes de Castiella y Lleón apoyen el reconocimientu d’unos derechos qu’ellos nieguen pa los asturianos”.

Pel so llau, Unidá Nacionalista Asturiana califica d’insultu a los asturianos l’alcuerdu ente PSOE y PP sobre la llingua.

Faustino Zapico, voceru d’Unidá Nacionalista Asturiana, afirmó que dende la UNA ven con munchu esmolecimientu la negociación ente PSOE y PP.

PSOE y PP firmaron ayeri’l que ye un nuevu alcuerdu d’Estatutu d’Autonomía p’Asturies nel que nun va incluyise otra vegada la reconocencia de drechos pa los asturfalantes. La redacción del Estutu, que refuguen Izquierda Xunida y les fuercies asturianistes estraparllamentaries, nun fala yá de “bable” ya inclúi per primer vegada los términos “asturianu” y “gallego-asturianu”.

1. L’asturianu y el gallego-asturianu, nes sos estremaes variantes llocales, son patrimoniu llingüísticu del Principáu d’Asturies y un valor social de respetu, convivencia y entendimientu.

2. El Principáu d’Asturies ha afalar y promover el so usu, el so espardimientu nos medios de comunicación y el so enseñu, repetando en tou casu, les variantes llocales y la voluntariedá nel so deprendizaxe.

3. Por Llei del Principáu d’Asturies, que p’aprobase, modificase o derogase requier mayoría de dos tercios de la Xunta Xeneral nun votación final sobre’l conxuntu del testu, regúlase la proteición, l’usu y la promoción del asturianu y del gallego-asturianu.

Llueu de conocer la propuesta de redaición del Artículu 4u del Estatutu d’Autonomía p’Asturies, pautada polos partíos mayoritarios (PSOE y PP) y asoleyada na prensa asturiana del vienres 11 de xunetu de 2008, l’Academia de la Llingua Asturiana quier dexar afitao y dar anuncia pública de lo que vien darreu:

• 1) La redaición propuesta ye un intentu consciente, plantegáu arremente, d’acabar dende’l puntu de vista llegal col patrimoniu inmaterial más importante d’Asturies: la so llingua y cultura.
• 2) L’Academia refuga dafechu la redaición y conteníu del artículu 4u porque supón nidiamente un atentáu contra la llingua y contra la dignidá del pueblu asturianu. Non solo nun hai nengún avance, sinón que ye un retrocesu bultable en rellación colos llogros d’estos años.
• 3) De nenguna de les maneres l’Academia de la Llingua Asturiana sedrá cómpliz d’un desafueru como’l que supón la redaición que se nos ufierta na actual reforma del Estatutu d’Autonomía.
• 4) Los representantes políticos que roblen el pautu tienen que tener clara la so responsabilidá histórica nel procesu de desaniciamientu de la llingua asturiana que se ta produciendo.
• 5) L’Estatutu con esta redaición dexa fuera a una parte importante de los asturianos. Darreu d’ello ye, dende la so nacencia, un estatutu provisional que fairá falta volver a iguar bien llueu. Y ello nun ye bono nin pa la llingua, nin p’Asturies, nin pa la so xente.
• 6) Los asturianos han saber que si nun problema de fácil arreglu lo que s’intenta ye buscar les víes más dañibles, ello lleva apareyao que la llingua seya elementu permanente de discrepancia y confrontación ente los asturianos. Los firmantes d’esa redaición son los únicos que tán xenerando na sociedá una tensión innecesaria.
• 7) Nun se pue almitir como xida pa esti tratamientu llamentable la invocación a los problemes llingüísticos d’otres comunidades. Nes comunidaes con problemes como los que s’anuncien foron, nunos casos, la inhibición d’esos partíos políticos y, n’otros, una trayeutoria indefendible los que xeneraron problemes qu’en nada s’asemeyen al casu asturianu. Ente nós podíen iguase mui bien les coses, pero la vía qu’escueyen les fuercies polítiques mayoritaries ye, llastimosamente, un brinde a semar el desánimu y la protesta social desque nun dexen ninguna vía alternativa razonable.
• 8) L’Academia fai un llamamientu a los militantes del PSOE y del PP pa que faigan entrar en razón a unes executives qu’amuesen de contino’l más xabaz complexu antiasturianu. Nun se pue pensar que dientro d’estos partíos seyan mayoritaries les posiciones viscerales a la escontra de la llingua d’Asturies y de les sos posibilidaes de futuru. Encamentamos, entós, a esa militancia y a tola sociedá asturiana que faigan tolo posible pa que nestos momentos inciertos pa la llingua asturiana se pueda reconducir una situación que va oxetivamente a la escontra de la unidá, harmonía y futuru del pueblu asturianu.

El Conceyu de Ribeseya ta acabante roblar un conveniu cola Academia de la Llingua Asturiana. L’oxetivu d’esti acuerdu ye’l de contribuyir al desarrollu, promoción y usu del asturianu y pa ello, el Conceyu va rotular n’asturianu los servicios y dependencies municipales, tamién la rede viaria de la zona rural y urbana, promoverá publicaciones y material impresu en llingua asturiana y va contar con un representante de l’Academia de la Llingua como xuráu nos premios lliterarios que se convoquen en Ribeseya pa promocionar l’asturianu.

Pela so parte, l’Academia de la Llingua comprométese a asesorar al Conceyu de Ribeseya en temes llingüísticos y n’especial a lo que se refier a la toponimia llocal, a incluyir a Ribeseya como llugar de desarrollu de les sos actividaes editoriales, formatives y culturales, asina como a facilitar un exemplar de cáun de les publicaciones del so fondu editorial y a asesorar y revisar el trabayu de recoyida de toponimia oral de les parroquies riosellanes.

Los grupos asturianos con representación parlamentaria pesllaron esti día l’artículu 4 que na propuesta apautada ente PP y PSOE denoma al asturianu y al gallego-asturianu como patrimoniu llingüísticu que presenta un “valor social de respeto, convivencia y entendimiento”. L’articulu apautáu ente PP y PSOE recueye’l deber del Principáu de promover y fomentar l’usu y l’espardimientu nos medios de comunicación y na enseñanza, respetando en tou casu les variantes.

PP y PSOE vienen acabantes d’apautase nuna redacción que conderga al asturinu a ser la única llingua normalizada del Estáu ensin oficialidá, calteniendo postures estremaes de los mesmos partíos en toles demás comunidaes autónomes onde se fala una llingua propia.

La redacción del articuláu ye tan surrealista como eufemística, nel imposible intentu d’escaecese del mandatu constitucional que diz que “sedrán oficiales” toles llingües nes sos respectives comunidaes autónomes.

La elección del Presidente d’Asturies va ser al traviés del procedimientu d’investidura lo que va permitir a los grupos parllamentarios votar a favor, a la escontra y abstenese, frente al modelu actual que prohíbe un posicionamientu a la escontra. Esta ye polo menos, la conclusión del conceyu d’esta mañana de la ponencia del Estatutu. El grupu parllamentariu d’IX-BA-Verdes caltuvo esta propuesta d’investidura dende un primer momento y a la mesma sumáronse’l Partíu Popular cola negativa del PSOE.

“Esti ye unu de los pocos avances democráticos d’esti procesu de reforma estatutaria”, a xuiciu de Jesús Iglesias, voceru parllamentariu d’IX-BA-Verdes na Xunta Xeneral, “xunto a la posibilidá de disolver la cámara ensin restricciones”.

La ponencia tamién abordó la parte dedicada a l’alministración de Xusticia. A esti respectu la novedá va ser que se cree un Conseyu de la Xusticia. La propuesta d’IX-BA-Verdes yera que l’Estatutu yá creara esi conseyu y fuere una llei posterior la que lo desenrrollara, definiera y regulara. PP y PSOE dexaron la redacción en que l’Estatutu prevea la posibilidá de qu’esista esi Conseyu de la Xusticia n’Asturies. Los Conseyos nes comunidaes nun son esáctamente un reflexu del Conseyu Xeneral del Estáu nel ámbitu autonómicu, pero sí son una apuesta por dar participación nel calter del poder del Estáu de la Xusticia estableciendo los mecanismos de participación, aseguró Iglesias. “Pa nós, ensin nenguna dulda, fuere mui bono que se creara esi conseyu yá, por embargu pola decisión de les fuercies mayoritaries va quedar pendiente de que nel futuru s’opte o non pola so creación”, esplicó’l voceru parllamentariu d’IX-BA-Verdes.

Nel conceyu de mañana abordaráse la conclusión del marcu de rellación de la comunidá autónoma con otres, col estáu y cola Unión Europea. A lo llargo de la sesión de güei estableciéronse una serie de preceptos que reflexen eses posiblidaes de participación d’una forma qu’IX-BA-Verdes prefirieren más concreta pero optóse por una fórmula xenérica, que nun esclúi nada, pero tampoco nun reflexen unos marcos “claros” de participación d’Asturies nel ámbitu del estáu. Mañana abordaráse la rellación d’Asturies cola Unión Europea.

Dempués d’esti apartáu entamaráse la revisión del preámbulu del Estatutu, probablemente polos principios rectores de l’acción política, qu’IX-BA-Verdes tien l’oxetivu de convertir nuna Carta de Drechos Sociales, tal como figura n’otros estatutos yá aprobaos por PP y PSOE.

El presidente del Partíu Popular confirmó güei les declaraciones d’Aréstegui no tocante a l’estatus del asturianu na reforma del estatutu d’autonomía.

Ovidio Sánchez dió sofitu güei, dempués d’un nuevu aconceyamientu de la Ponencia de Reforma l’Estatutu, a les declaraciones feches por Joaquín Aréstegui nes que refugaba la propuesta del Conceyu Abiertu pa facer oficial la llingua asturiana.

“Nel PP nun tamos pola oficialidá como nun lo tuviemos nunca”, dixo Sánchez.

La cabezalera del Partíu Popular en Xixón, Pilar Fernández Pardo, unviaba ayeri un mensaxe sms a tolos sos afiliaos convidándolos a pasar pela sede del partíu na ciudá, onde se compromete a “xestionar l’adhesión” de los militantes que quieran firmar el “Manifiestu pola Llingua Común, el castellán”, qu’impulsen dellos medios de comunicación como El Mundo o la Cadena COPE y que pretende reducir la presencia de les llingües minorizaes na enseñanza de les comunidaes autonómes billingües, ente otros oxetivos, col envís de reforciar la hexemonía del castellán.

Manifiestu pola llingua común, el castellán

El Conceyu Abiertu pol Asturianu presentó ayeri pela tarde y énte la Xunta Xeneral la so propuesta d’artículu 4u pal Estatutu d’Autonomía. Una redacción qu’abre la presencia del gallego-asturianu nel Estatutu y que garantizaría los drechos de los asturfalantes, cola idea de dexar en manes d’una futura llei los plazos de procesu de normalización.

La redacción propuesta ye la que va darréu:

Les llingües cooficiales del Principáu d’Asturies son el castellán y l’asturianu. El gallego-asturianu tamién ye llingua cooficial nel so ámbitu territorial.

Tolos ciudadanos y ciudadanes tienen el drechu a conocelos y usalos. Naide pue ser discrimináu por mor de la llingua que llibremente escueya y use.

Les alministraciones públiques van garantizar l’usu normal d’estes llingües, amás de la so promoción, enseñu y presencia afayadiza nos medios de comunicación.

Una Llei de la Xunta Xeneral del Principáu va determinar los criterios del procesu de normalización llingüística.