Política

Según una nota asoleyada na páxina del Círculu Lliberal, organización de calter lliberal cercana al Partíu Popular y presidida por Humberto Gonzali, “mentanto se discutía’l borrador pa la ponencia estatutaria, los representantes socialistes llegaron a proponer la eliminación de tol artículu 4º”, lo que supondría la desapaición de toa mención a la llingua, “nuna estratexa que llevaba a que l’actual propuesta de “patrimoniu llingüísticu” fuera asumida como mal menor”, en pallabres del Círculu Lliberal, que tamién recordó qu’esto foi posible “gracies a la blandura de dos de los tres negociadores populares”.

Nuna nota echa pública esti llunes 28, l’Asociación Xuristes pol Asturianu considera la postura del PP y el PSOE sobre la cooficialidá un “desacatu a la constitución”.

Pol so interés reproducimos darréu la nota fecha pública pola Asociación:

Dende la espublización del llamentable informe encargáu pol señor Areces al Conseyu Consultivu, col qu’entama’l procesu de reforma del Estatutu d’Autonomía, l’Aconceyamientu de Xuristes pol Asturianu vien razonando, una y otra vuelta, dende toles perspeutives posibles y ensin la oposición de naide que sepa del asuntu (mazcayaes d’atrevíos sentímosles tolos díes), que l’artículu 3.2 de la Constitución (“Les demás llingües españoles sedrán tamién oficiales nes respeutives Comunidaes Autónomes alcordies colos sos Estatutos”) instaura la cooficialidá de toles llingües españoles y delega nos Estatutos d’Autonomía, esclusivamente, l’establecimientu del modelu de cooficialidá.

Pal que-y queden duldes al respeutu reproduzse darréu’l criteriu de les Cortes Españoles, espresáu nel Entamu d’una Llei, la 12/2005, pela que se modifica l’artículu 23 del Rexistru Civil:

“El Tribunal Constitucional ha declarado que el artículo 3 de la Constitución supone una habilitación de las Comunidades Autónomas con lengua propia para que, en el marco establecido en sus Estatutos de Autonomía, puedan regular el alcance del concepto de oficialidad (STC 82/1986, de 26 de junio, y 56/1990, de 29 de marzo), lo cual supone establecer el contenido básico de dicha oficialidad (STC 337/1994, de 23 de diciembre) y, además, determinar las medidas que sean precisas para el fomento o la normalización de su lengua propia (STC 74/1989, de 24 de abril, y 337/1994, de 23 de diciembre)”.

Como cualquiera pue apreciar nuna llectura llibre de prexuicios, les Cortes, invocando al Tribunal Constitucional, afiten qu’a los Estatutos d’Autonomía autorízalos la Constitución a regular l’algame de la cooficialidá, lo que quier dicir que la so declaración o reconocencia yá ta fecha n’otru sitiu. ¿Ónde?. Xustamente na mesma Constitución y pente medies de la fras primera del so artículu 3.2 (“Les demás llingües españoles sedrán tamién oficiales nes respeutives Comunidaes Autónomes”) .

Pero l’establecimientu nel Estatutu del algame y conteníu básicu de la cooficialidá de les llingües, al empar de les midíes pal so fomentu y normalización, ye, arriendes d’un drechu, un deber pa los sos redautores porque’l nun facelo, na prautica, camuda en papel moyao la reconocencia constitucional de cooficialidá.

Por embargu, los representantes del PSOE y del PP na ponencia pa la reforma del Estatutu d’Autonomía d’Asturies nun solo se ñeguen a cumplir col mandáu constitucional sinón que anduvieron xurgando pela hestoria más llaceriosa del drechu español fasta atopar dos Decretos franquistes –el 1433 y el 2929, entrambos los dos del añu 1975- que, amestaos, dieron pa un testu, el proyeutu d’artículu 4 del Estatutu, perafayadizu pa desaniciar dafechu, nunos años, la presencia de la llingua asturiana del país onde ñació.

Poro, no que cinca a la llingua, eso ye lo que’l PSOE y el PP ufren a la sociedá asturiana del sieglu XXI: un desacatu constitucional de nidia inspiración franquista.

L’Aconceyamientu de Xuristes pol Asturianu mandó ayeri un comunicáu nel que denuncien lo que pa ellos ye “un desacatu constitucional de nidia inspiración franquista que’l PSOE y el PP ufren a la sociedá asturiana del sieglu XXI” al dar por válidu un “llamentable informe encargáu pol señor Areces al Conseyu Consultivu” que pa los xuristes contradiz el mandáu de la Constitución Española “artículu 3.2 de la Constitución (“Les demás llingües españoles sedrán tamién oficiales nes respeutives Comunidaes Autónomes alcordies colos sos Estatutos”)”, que “instaura la cooficialidá de toles llingües españoles y delega nos Estatutos d’Autonomía, esclusivamente, l’establecimientu del modelu de cooficialidá”.

Según AXA “los representantes del PSOE y del PP na ponencia pa la reforma del Estatutu d’Autonomía d’Asturies nun solo se ñeguen a cumplir col mandáu constitucional sinón que anduvieron xurgando pela hestoria más llaceriosa del drechu español fasta atopar dos Decretos franquistes –el 1433 y el 2929, entrambos los dos del añu 1975- que, amestaos, dieron pa un testu, el proyeutu d’artículu 4 del Estatutu, perafayadizu pa desaniciar dafechu, nunos años, la presencia de la llingua asturiana del país onde ñació”.

La FSA-PSOE, celebró esta fin de selmana’l so trenta congresu na capital d’Asturies y decidió refugar les enmiendes presentaes p’ameyorar el tratamientu del asturianu. Unes propuestes que buscaben avanzar nel estatus llegal del asturianu y na so promoción y nel casu de la presentada por Nava pidiendo abiertamente la oficialidá pal idioma d’Asturies. Nes puertes del congresu socialista miembros del CAO repartieron copies de la carta abierta qu’esta organización dixiró los militantes de la FSA.

La formación va mantenr el so criteriu de refugar la posibilidá de da-y al asturianu calter de llingua oficial d’Astuties. Pa cualesquier cambiu, la FSA va defender “la vía del alcuerdu y el consensu” que garantice “la condición de valor social de respetu y entendimientu del asturianu”.

L’artíuculu aprobáu a la fin na Ponencia Marcu, foi minimamente modificada y solliña a la fin que l’asturianu y el gallego-asturianu “son patrimoniu llingüísticu del Principáu d’Asturies”, una redacción mui asemeyada a la que PSOE y PP quieren aprobar na reforma del Estatutu d’Autonomía.

Per otru llau, los socialistes asturianos dicen “siguir afalando les polítiques pa fomentar l’usu y la difusión del asturianu, garantizando la ufierta del so deprendizaxe nel sistema educativu.

Andecha Astur decidió aniciar una campaña vindicativa baxo’l lema “¡Queremos votalu!” nel contestu de la reforma del Estatutu d’Autonomía pal Principáu d’Asturies.Con esta campaña, Andecha Astur “quier remarcar qu’a los asturianos y asturianes nin siquier se nos permitió, nin permite, votar la institución, nin l’estatutu, asoleyando asina parte del conflictu democráticu que carecemos n’Asturies”.

La campaña, qu’entama esta fin de selmana, va consistir na distribución pol país de materiales propagandísticos (cartelos y pegatines), informativos (trípticos) y d’alderique (documentu políticu abiertu).

Dientro la campaña tamién hai programaes movilizaciones, la primera una concentración delantre la Xunta Xeneral el próximu 13 d’agostu.

Los primeros materiales, los cartelos y pegadielles, van tar na cai esta fin de selmana entamando asina l’espardimientu la campaña pelos distintos conceyos del país.

Nos próximos díes, informa

L’Academia de la Llingua Asturiana y el Conceyu de Carreño firmaron esti pasáu martes 22 de xunetu un conveniu de collaboración col envís de normalizar l’usu del asturianu nel Conceyu y col enfotu de trabayar pola promoción, espardimientu y dignificación del usu del asturianu nel so ámbitu y sobre manera nel de la so Alministración Local. Asina l’Academia va asesorar al mesmu, ente otres xeres, na rotulación de les dependencies y servicios municipales, na igua de la toponimia local y recoyida oral qu’esti Conceyu pela so parte tamién se comprometió en llevar alantre.

La firma contó cola presencia de Manuel Ángel Riego González, Alcalde de Carreño, y Ana María Cano González, Presidenta de l’Academia de la Llingua Asturiana, que roblaron esti documentu nun actu tuvo llugar a les 12:30 hores nel Salón de Plenos de la Casa Conceyu.

La firma d’esti conveniu de collaboración, informen dende l’ALLA, aprobóse por unanimidá de tolos grupos políticos del Conceyu en comisión de Cultura.

La llingua materna ye una identidá primaria. Lloñe de ser bandera política, ye un vínculu a la tierra asturiana, una forma d’atalantar el mundu global dende lo llocal. Esta llingua ye un patrimoniu de toes y toos los asturianos. Tien que dexar de ser un espaciu de conflictu pa ser una ferramienta normal y normalizada de convivencia ciudadana. La Llingua Asturiana ye, como’l catalán, el gallego y otres llingües, una llingua romance europea. Tien mil años d’esistencia na Península Ibérica. Ye la llingua hestórica del vieyu reinu d’Asturies y Lleón. Con toles sos variantes dialeutales tien un tueru únicu, dixebrao del castellanu, magar que cercanu. Ye significativo que’l Mirandés, del troncu dialeutal del asturianu, que tien namái 15.000 falantes, seya oficial en Portugal. El gallegu, catalán y otres llingües del estáu español son oficiales. Nun pedimos más que los derechos que se-yos reconocen a otres comunidaes. La cooficialidá de les llingües de la nuesa comunidá nun ye una imposición, sinón una reconocencia llegal a los falantes y dar validez xurídica a la llingua que llibremente quieran escoyer y usar. L’Estatutu d’Autonomía d’Asturies tien de garantizar la igualdá ente toes y toos los ciudananos. Nun pue discriminar por mor de llingua a ciudadanos coles mesmes obligaciones fiscales, pero ensin iguales derechos civiles. La UNESCO, nel so Atlas of the World Languages in danger of desappearing qu’espubliza esti Añu Internacional de les Llingües, 2008, recueye la llingua asturiana como llingua en peligru de desapaición, dando-y malpenes dos xeneraciones de vida. La Llei d’Usu, los Planes de Normalización, o les Ordenances Municipales, les actuales normes de proteición, nun fueron quién a parar darréu esti retrocesu permanente, nin la situación d’amenorgamientu o invisibilidá. Namái la equiparación llegal pue garantizar la sobrevivencia de la llingua asturiana, con presencia social nos medios de comunicación, la enseñanza, l’alministración o los espacios públicos. La Declaración Universal de los Derechos Humanos diz que naide ha ser discrimináu pola so llingua. La Carta Europea de les Llingües Minorizaes, ratificada pol estáu español, la Convención pal Patrimoniu Inmaterial de la UNESCO o la Declaración de los Derechos Llingüísticos afiten que toa llingua tien derechu a ser emplegada polos sos falantes ensin torgues nin discriminaciones. La propia Constitución Española diz que les otres llingües del Estáu serán oficiales d’alcuerdu a los sos Estatutos d’Autonomía. Son derechos fundamentales. Los derechos nun se dan. Reconócense. Nun somos a entenderr cómo un Partíu Socialista, mayoritariu y gobernante n’Asturies, nel que munchos militantes son dafechu falantes d’asturianu o gallego-asturianu, tenga tala insensibilidá pa con esti bien cultural. Inda más cuando la posición del Congresu Federal y del so Secretariu Xeneral, Jose Luis Rodríguez Zapatero, defende les llingües cooficiales como un valor de convivencia y pluralidá. Si la Oficialidá nun ye imposición pa los socialistes d’otres Comunidaes, hai que destacar la contradición de que n’Asturies sí lo ye. El Conceyu Abiertu pola Oficialidá (CAO) integrao por más de 300 asociacionnes, culturales, sociales, politiques y sindicales, dende’l respetu al debate internu de los socialistes asturianos, ufre estes considerances a la militancia de la FSA. Esta carta abierta quier ser un puntu d’información y reflexón pa un alderique tan importante p’Asturies. Tendémos-y la mano pal diálogu a la FSA y saludamos a los sos militantes, como asturianos y asturianes. De la vuestra decisión depende la vida o la muerte de la Llingua Asturiana. Feliz Congresu y que seya granible pal futuru d’Asturies.

Dende un total de cinco agrupaciones de la Federación Socialista Asturiana van presentase estremaes enmiendes favoratibles a la oficialidá nel próximu congresu rexonal de la FSA, que va desendolcase los díes 25, 26 y 27 de xunetu. Les Agrupaciones de Xixón, Uviéu, Nava, Cangues d’Oníes y La Ribera.

La enmienda de Nava afita nidiamente la necesidá de seguir los pasos de “los compañeros socialistes d’otres comunidaes autónomes que se comprometieron coles polítiques de normalización llingüística llevaes a cabu poles sos alministraciones, siempre basaes na convivencia y el respetu a los drechos individuales”.

Ye por eso qu’a l’Agrupación de Nava de la FSA-PSOE paez-y “razonable acometer una reforma del estatus xurídicu de la nuesa llingua otorgándo-y’l rangu de cooficial xunto col castellanu, amás del gallegu-asturianu nel so territoriu”.

L’Agrupación de Xixón plantega “que ye necesario actuar pa consolidar lo realizao hasta’l presente y entamar una aición coordinada y planificada pa llegar a la proteición total de la nuesa llingua mediante la cooficialidá de la mesma, igual que los nuesos compañeros apoyen la oficialidá de les sos llingües nes sos distintes comunidaes del Estáu Español”. Y la d’Uviéu, diz “apostar pola cooficialidá de la llingua asturiana, como lo que tien de ser, un derechu ayenu a imposiciones, asegurando la voluntariedá del so usu, pero tamién la garantía de que puea ser usada en tolos ámbitos polos qu’asina lo deseen”.

En definitiva, planteamientos asemeyaos que falen de movimientos nes bases de la militancia socialista escontra les decisiones d’una cúpula dirixente cada vegada más alloñada d’eses bases na cuestión llingüística.

El Conceyu Abiertu pola Oficialidá (CAO) yá adelantara el pasáu 23 de xunu, nuna rueda de prensa delantre la Xunta Xeneral, que delles agrupaciones de la FSA diben presentar enmiendes, de cara al congresu rexonal previstu pa xunetu, a favor de la reconocencia de la oficialidá del asturianu nel Estatutu d’Autonomía.

El CAO diz que na FSA hai agrupaciones pola oficialidá

“Puede que’l PP pretenda lla$varse la cara cola so propuesta de someter a referendum l’Estatutu, pero, por coherencia colos nuestros planteamientos, tenemos de que los ciudadanos se pronuncien. Y más col Estatutu que se tá faciendo, que nun reconoz drechos a los asturianos y rechaza la oficialidá”. Con estes pallabres, Valledor facía un apueste nidiu por siguir los pasos del PP y poner al pueblu asturianu al frente d’un procesu estatutariu que se-y secuestrare.

En declaraciones feches esti miércoles, Valledor destacó que les reformes autonómiques sometiéronse a referéndum notres comunidaes, como Andalucía o Cataluña.