Plástiques

El Centru de Cultura Antigu Institutu de Xixón acueye hasta’l prósimu 24 de xunetu la esposición “Caligrafíes árabes”, una amuesa de partitures musicales realizaes pol calígrafu arxelín Yacine Kacimi el Hassani, que vienen complementar les actividaes de la VIII Semana de Música Antigua. La esposición ufierta diversos llenzos escritos a tinta nos que l’autor recueye temes poéticos, relixosos y filosóficos siguiendo’l métodu de composición caligráfica que la cultura árabe desenvolvió a lo llargo de sieglos.

Armáu cola so caña y una tinta de la que guarda en secretu la fórmula, el calígrafu arxelín Yacine Kacimi el Hassani da forma a esta esposición que se puede visitar nel Centro de Cultura Antigu Institutu, y na que se ufierten caligrafíes que van del gris al negro, pasando pol dorao y l’ocre. Les amueses, tanto en horizontal como en vertical, tresporten al que les contempla a la reflexón sobre temes bien diversos, como l’amor divín, la poesía o les evocaciones relixoses del Islám.

La caligrafía, yera pa los árabes un arte d’ escribir emparentáu col dibuxu y la pintura, nel que se pretende embellecer el testu del artista y permite al llector diferentes interpretaciones. Les formes y los colores son los protagonistes d’esta amuesa, na que s’aprecien influencies de les escritures magrebís, iraquís ya iranís.

La esposición “Caligrafíes árabes de Yacine Kacimi el Hassani” puede visitase nel CCAI dende esti domingu 17 al 24 de xunetu en horariu de llunes a viernes de 18 a 21 hores, los sábados de 11 a 14 y de 18 a 21 hores y los domingos de 11 a 14 hores.

La sala d’esposiciones del Banco Herrero acueye dende esti llunes n’Uviéu l’amuesa “Paulino Vicente ‘El mozo'(1924-1956)”, una esbilla retrospectiva de la obra d’un de los artistes más singulares y menos conocíos de la pintura asturiana contemporánea. Fíu del artista uvieín Paulino Vicente, “El mozo, y contemporáneu de Vaquero Palacios y Rubio Camín, la so obra busca un llinguaxe propiu nos márxenes de la figuración al través del retratu de tipos humanos y paisaxes.

La esposición ta entamada con una cincuentena d’obres d’esti artista nacíu n’Uviéu en 1924 y muertu, por mor de la tuberculosis, a los trentaiún años. Ente elles retratos, paisaxes, figuraciones d’oxetos y espardimientos finales dica l’abstracción. En conxuntu una visión bien completa de lo que foi el trabayu creador d’un artista, que paeció componer la so obra al marxe de les corrientes vanguardistes que percorrieron el so tiempu.

L’amuesa “Paulino Vicente ‘El Mozo'”, entamada pola Conseyería de Cultura en colaboración cola Fundación Banco Sabadell ta comisariada por Francisco Crabiffosse Cuesta y va tar abierta al públicu hasta’l prósimu 23 de setiembre.

Pablo Armesto ufierta na sala d’esposiciones del Centru Cultural de Cajastur en Mieres la so amuesa “Grabados”, un conxuntu de ventidós obres feches con estremaes técniques y testures nes que l’artista xixonés espresa en tres series una reflexón introspectiva alrodiu de llugares y caminos onde perdese nun viaxe a niundes y a tolos aldos. Ye la primer vez qu’Armesto ufre una amuesa individual de los sos trabayos de grabao.

Ventidós grabaos nos que se combina’l llabor en técniques diverses: aguafuertes, aguatintes, xilografíes, gofraos, collages…ye la propuesta cola que l’artista xixonés -premiu Astragal 2004- ufierta esta parte del so trabayu na que desenvuelve la parte más íntima y introspectiva de la so xera como creador. A diferencia d’otros trabayos suyos pensaos pa espacios abiertos Armesto define estos grabaos como “un trabayu bien distintu a la reflexón que se busca, pongo por casu, nuna instalación entamada nun espaciu abiertu y onde se busca la provocación pa facer reflexonar, equí pol contrario, búscase más que la mirada s’acerque, una complicidá que tien d’allegase a les propies obres pa visualizales”.

Les tres series nes que ta dividida la esposición: “Rumbo al norte”, “Nel camín” y “Llugares”, con distintos formatos y onde’l predominiu de les diverses técniques tamién ye estremáu, tienen un filu conductor na mirada y la busca difusa a los caminos de niundes: “son caminos y llugares pa perdese más que p’alcontrase”, afirma l’autor, “el mesmu color que predomina, tonos pastelaos con grises, quier suxerir esi andar pente lo borroso d’una realidá”. Delles de les técniques empleaes tamién conviden a esa busca y a que l’espectador allegue la so mirada: “son obres onde la prosimidá y l’atención del que les mire tien de procurar un espaciu mui cercanu pa poder apreciales nes sos testures, nes vetes más seles”.

Mentantu espón estos grabaos Pablo Armesto sigue trabayando en nuevos proyectos y trabayos, el más prósimu nel tiempu una instalación de la so obra “Sueños de papel” nel festival de Benicassim.

L’amuesa “Grabados” va tar na sala de Caxastur en Mieres y después presentaráse n’Avilés y Xixón.

El Muséu Nicanor Piñole de Xixón abelluga dende esti xueves 5 de xunetu la esposición “Sorolla y sus contemporáneos”, una cuarentena de llenzos pintaos pol artista valencianu y otros autores del so tiempu como Rosiñol, Zuloaga, Camarasa, Pinazo y Martínez Cubells. L’amuesa recueye nel muséu xixonés trenta y nueve del mediu centenar d’obres que conserva’l Muséu de Belles Artes de L’Habana. Les obres van esponese hasta’l prósimu 28 d’agostu nos horarios avezaos del Piñole.

Joaquín Sorolla, un de los pintores que meyor supo arrepresar nos sos llenzos la lluz mediterránea del so llevante natal, ufiértase nes obres espuestes nel muséu xixonés con tola so personalidá. Los organizadores de l’amuesa, entamada pola fundación cultural de Bancaja, tienen tresnao un espaciu propiu pa les obres del artista valencianu, que van poder contemplase como un conxuntu unitariu nuna de les sales del Nicanor Piñole, nes otres sales averaes amuésense les obres de los sos contemporáneos.

‘Estudio para la vuelta de la pesca’ (1894), ‘Valenciana recogiendo naranjas’ (1908), ‘Barcas en un canal’, (1900), o ‘Gitana’, (1899) o ‘La niña de las uvas’ (1905) son delles de les pintures de Joaquín Sorolla que se puen ver nesta esposición xunta cuadros como “Paisaje con figura” de Pinazo, un Rosiñol y obres de los mencionaos Camarasa, Zuloaga, Martínez Cubells y José Mongrell.

Los fondos del Muséu de Belles Artes de la ciudá de L’Habana vienen presentar en Xixón una visión más amplia de Sorolla, un pintor que tien una significativa parte de la so obra colgada nel Muséu de Belles Artes d’Asturies y qu’agora, amosada xunta la de dalgunos de los sos contemporáneos nel muséu que lleva’l nome d’otru d’ellos, l’asturianu Piñole, va cobrar nuevu interés pa los que quieran allegase a ella.

Según informen güei diversos medios asturianos la xixonesa Rosina Gómez Baeza, responsable de la Feria ARCO a lo llargo de venti años ye la candidata más firme pa dirixir el nuevu Centru d’Arte Contemporáneu de la Universidá Llaboral. La propia Gómez Baeza, qu’asistía estos días al xuráu del Príncipe d’Asturies de les Artes, dexó entever tala posibilidá en declaraciones a esos medios. El complexu artísticu de la Llaboral ye un de los proyectos culturales más ambiciosos del gobiernu del Principáu.

La hasta agora responsable d’ARCO -una de les feries d’arte contemporáneu más importantes del mundu- anunció la so intención de dexar la dirección de la feria madrilana y namás paez tar esperando a que’l Patronatu del Centru d’Arte de la Llaboral s’aconceye en xunetu pa decidir la so incorporación al frente del proyectu. Hasta agora, Rosina Gómez Baeza yera asesora d’esi mesmu patronatu al través del COnseyu de les Artes y les Ciencies.

El nuevu centru d’arte del Principáu va dedicase fundamentalmente a la creación audiovisual y dixital, y los sos responsables quieren convertilu nun espaciu de referencia dientro d’estes artes a nivel internacional. La Conseyería de Cultura y Comunicación quier tamién que’l Centru d’Arte de la Llaboral tea vinculáu dafechu al nuevu Ente Públicu de Radiotelevisión y qu’entramos compartan proyectos y medios tecnolóxicos.

L’Amuesa d’Artes Plástiques d’Asturies, Dispararte, inauguróse ayer en Xixón con presencia de la directora xeneral de Mocedá, Carmen Becerra, la conceyal del Cultura del conceyu agospiador, Mercedes Álvarez, y el comisariu de la esposición, Francico Cabrifosse. La colectiva espón 62 trabayos d’artistes mozos nun conxuntu xeneral nel que predominen la pintura y la fotografía, asina como la diversidá de tendencies y propuestes estétiques de los sos autores.

Nomes como los de Lorena Álvarez, Irma Álvarez-Laviada, Cristina Busto, Juan Díaz-Faes, Jorge Faes, José Jorge Nava, Jacobo de la Peña, Elena Rato, Fermín Santos, Eduardo Guerra, Isabel Fernández y Eva María Pividal, son dellos de los qu’enseñen el so llabor nesta Amuesa, que en palabres del so comisariu Crabifosse “ye una guía de per ónde va l’arte asturianu actual y per ónde va dir nos prósimos años”.

Los empiezos de la carrera como modistu y diseñador de Yves Saint Laurent son el motivu central de la esposición de semeyes del fotógrafu Pierre Boulat que puede vese na Galería de Fnac-Asturies hasta’l prósimu mes d’agostu. Son trenta y seis fotografíes en blanco y negro d’una serie na que Boulat retrató los preparativos de la primer colección firmada pol mitu de la moda europea en 1962. L’amuesa ye un amenu reportaxe gráficu sobro los empiezos d’un estilu de vistir, ver el mundu y d’un de los grandes imperios de les firmes internacionales con buelga artística.

Yves Saint Laurent preparaba en 1962 la so primer colección creativa col propiu nome, yera la so apuesta por entamar la so mesma casa de costura

después de trabayar como diseñador pa la casa Dior. Agora escomenzaba el so propiu camín en colaboración con Pierre Bergé. Les fotografíes agora espuestes na Galería de Fnac-Asturies recreen esos momentos d’ansiedá, enfotu y creatividá efervescente del principiu de la carrera d’un de los iconos de la moda contemporánea. Boulat acompañó la carrera de Sain Laurent a lo llargo de les décades siguientes, amosando al creador nel so ésitu y na so intimidá. Agora podemos ver unes imáxenes del iniciu d’esa carrera y de la so llarga amistá.

El Muséu Nicanor Piñole de Xixón ofrez dende’l pasáu 6 de mayu l’amuesa titulada “La fotografía como arte” y na que se presenta parte de la obra desenvuelta pol fotógrafu xixonés Arturo Truan dende la primera década del sieglu XX hasta mediaos los años trenta. Semeyes coloreaes, retratos, paisaxes y bodegones fotografiaos col oxetivu de la cámara del artista, igüen esta amuesa na que s’esponen tamién dellos de los sos trabayos comerciales en formatu de tarxeta postal.

Arturo Truan, nacíu en Xixón nel añu 1868 y muertu en Santander en 1937, cultivó diverses disciplines artístiques a lo llargo de la so vida, sobremanera la pintura y la fotografía. Nesta amuesa de la so obra gráfica ufiértase la ocasión de comprebar los personales esperimentos de combinar entrambes disciplines con resultaos estéticos qu’averen la obra de Truan a les vanguardies. Contemporáneu de pintores del rexonalismu asturianu como Nicanor Piñole y Evaristo Valle, les sos fotografíes paecen beber nes mesmes fontes de la realidá novedosa de la naturaleza y el paisaxe: estampes de playa, retratos de la vida cotidiana o del entornu rural, cásique toos procedentes del conceyu de Xixón, imáxenes que ronden el tópicu desbordándolu con un sorprendente

xuegu de lluces, sombres y esperimentación col color. Mesmo se puede ver esti afán d’aventura esperimental nes obres destinaes a fines comerciales como tarxetes postales, delles abondo populares nel so tiempu.

Les composiciones de bien de los trabayos recoyíos nesta amuesa recuerden a les de la pintura, con un procuru pola recreación de la figura, l’amestáu de formes y volúmenes, too fecho al través de técniques emparentaes col pictoralismu. Na evolución de la so obra aprécisase un procuru del artista por buscar nuevos llinguaxes arreyaos a l’abstración y a una nueva oxetividá de lo retratao. Adelantráu al so tiempu, Arturo Truan desenvolvió una obra que lu allega a les vanguardies fotográfiques europees y americanes, especialmente al movimientu constructivista. El Piñole de Xixón dexa agora la oportunidá de conocer un rellumu provechosu d’esa obra a mediu camín ente lo local y lo cosmopolita, ente’l realismu figurativu y el desenfoque modernu de la realidá.

El dibuxante Gaspar Meana ta acabante rematar los últimos tomos de la so monumental obra de narrativa gráfica “La Crónica de Leodegundo”, un proyectu entamáu fai dieciséis años alrodiu del tiempu del Reinu d’Asturies y del que lleva publicaos ventidós volúmenes. D’agora nun añu podía tar completáu l’últimu tomu de la serie, un epílogu sobre’l fin del reináu d’Alfonso II nel qu’a manera de sorpresa final demuéstrase la esistencia real del Bernaldo del Carpio y les verdaderes razones de la llegada al tronu de Ramiro tres derrocar al Castu.

Ventidós tomos publicaos, dieciseis años de trabayu y una voluntá fuera de lo corriente, alcuando baqueteada polos desdeños de la realidá, son delles razones que lleven al dibuxante Gaspar Meana a sentir una impresión ambivalente de la so propia obra

Ventidós tomos publicaos, dieciseis años de trabayu y una voluntá fuera de lo corriente, alcuando baqueteada polos desdeños de la realidá, son delles razones que lleven al dibuxante Gaspar Meana a sentir una impresión ambivalente de la so propia obra: “Cuando empecé’l proyectu tenía ventiocho años y tengo agora cuarenta y cinco, toi satisfechu del trabayu que fice pero nun tengo mui claro que pagara la pena en vista de la casi nula repercusión que tuvo n’Asturies”, afirma’l dibuxante.

La obra en marcha, una de les más ambicioses y minucioses que s’entamaran nunca nel xéneru del cómic hestóricu, tenta dende los primeros tomos publicaos ufiertar lo que Meana define como “una aprosimación caledoscópica al tiempu del antigu reinu d’Asturies con secuencies simultánees de lo que sucedía nel restu del mundu conocíu”. La Crónica narra al través de la visión d’un soldáu d’Alfonso II les vicisitudes que marcaron l’aldu del so imperiu y de la realidá internacional del so tiempu, los sieglos VII y IX de la nuestra era. Como recuerda l’autor d’esta monumental obra: “el reinu d’Asturies ocupaba prácticamente tol cuadrante atlánticu de la Península, dende les llendes col reinu francu, n’Alava, hasta Lisboa”, per esi territoriu, una auténtica potencia d’Europa occidental, “pasaben conexiones con tol mundu conocíu, dende los finisterres galaicos hasta los vais de Mesopotamia”, recuerda l’ilustrador que basa la so narración enriba los acontecimientos que documentaos na mesma data que’l periodu hestóricu d’Alfonso II.

La entrega que va poner fin a la serie a manera d’epílogu desentraña la tesis que Gaspar Meana caltién a lo llargo de tola “Crónica” y que ye la del güelpe de fuerza de Ramiro pa facese col poder n’Uviéu, apartando a los heriedes lexítimos d’Alfonso: Nepociano y el so fíu Aldroito. Nesti últimu tomu Meana afirma reservar “una sorpresa final na que prebo que Bernaldo del Carpio nun foi un personaxe de llienda, sinón un espatariu del rei Alfonsu con esistencia real.”. La tesis que’l dibuxante y narrador caltién alrodiu de la caída del reináu d’Alfonso II y l’empiezu de la so decadencia como imperiu ye la llegada de los normandos a les costes del reinu: “un exércitu d’unos 5.000 ó 6.000 homes preparaos pal combate más estremu” mientres les tropes del reinu asturianu combatíen n’Álava una rebelión separatista de vascones.

Respective a la repercusión pública del so trabayu, Gaspar Meana amuésase con sentimientos ambivalentes: “presta a veces saber qu’apaez un llector interesáu en consiguir dalgún de los tomos esgotaos nel llugar más inesperáu y saber qu’autores a los qu’admiro la superieron valorar, en cuantes al ámbitu editorial y a la repercusión que pudiera haber tenío, ye la parte más desengañadora de too, editoriales importantes refugaron la publicación del trabayu y la que lu vien editando n’asturianu ye pequeña, tampoco nun paez que se moleste abondo, y en cuantes a la incidencia que pudo tener n’Asturies ye prácticamente nula”. Meana nun considera que la suya sea una situación escepcional sinón “común a la mayoría d’ilustradores, mesmo a los más esitosos”, nesi sen recuerda la esperiencia de compartir na so mocedá un viaxe al Salón d’Angulema acompañando a un grupu onde diben los dibuxantes con mayor proyección editorial del estáu y la mayoría confesáben-y que los sos editores refugaben ún tres d’otru los sos proyectos más personales pa pidi-yos namás obres de fácil salida al mercáu. L’autor de La Crónica de Leodegundo recuerda una frase que-y acostumaba repetir a la so profesora Esther García na Escuela d’Artes d’Uviéu: “Nunca lloré tanto na vida como cuando tuvi d’andar corriendo despachos”. Gaspar Meana ironiza alrodiu del so propiu futuru como creador tres la publicación del últimu tomu de la Crónica: “nun sé en qué nuevu proyectu me voi meter o si voi acabar realmente suicidándome pelos despachos de les editoriales”.

El Muséu de Belles Artes d’Asturies quier remembrar nel venticincu aniversariu de la so fundación a un artista que tuvo vinculáu a esta institución dende’l so entamu en 1980 y a la que donó cincuenta y siete obres dende entós y hasta la so muerte. La pinacoteca asturiana quier agora rendi-y homenaxe esponiendo eses pintures nuna amuesa que recuerda la primera monográfica qu’espunxo’l Muséu a poco d’inaugurase va agora venticinco años embaxo’l títulu “Cuarenta años de pintura”.La esposición inaugúrase mañana xueves.

Orlando Pelayo ye un de los artistes más innovadores y universales del arte asturianu contemporáneu. Nacíu en Xixón en 1920, treslladóse de nenu cola so familia a vivir a Albacete, onde reside hasta 1938, l’añu nel que s’incorpora al Exércitu de la República y col que combate el restu de la guerra civil hasta la so salida al esiliu en 1939. Permanez recluíu nun campu de concentración n’Orán y ye nesa ciudá, en recobrando la llibertá en 1941 onde fai la so primer esposición na sala Colline.En 1947 treslládase a París, la ciudá onde va vivir bien de tiempu hasta la so vuelta a España.

Pelayo ye autor d’una amplia y diversa obra plástica na que destaquen sobremanera los óleos, aguafuertes y serigrafíes. En 1980 donó la so primer obra al recién inauguráu Muséu de Belles Artes d’Asturies y hasta’l so fallecimientu diez años después diría cediendo de manea altruista a la pinacoteca hasta un total de 57 obres, que son les qu’agora s’esponen nesta amuesa homenaxe.