Plástiques

El Centru de Cultura Antigu Institutu de Xixón acueye hasta’l prósimu 12 de febreru la esposición “Los lenguajes de Picasso”, un ampliu percorríu poles diverses facetes creatives desenvueltes pol xeniu malagueñu. Oleos, dibuxos, grabaos, cerámiques, cartelos y llibros ilustraos enséñense nesta amuesa irrepetible.

La esposición “Los lenguajes de Picasso” recueye obres procedentes de diverses colecciones privaes ya institucionales d’Europa y América. Nella pueden contemplase los óleos “Busto de mujer II” y “Figura”, de 1954 y 1968 respectivamente; tamién una selección de grabaos fechos pol malagueñu ente los años 1945 y 1971. Amás d’estes escoyetes hai una serie de dibuxos remataos por Picasso empleando llapiceros, ceres o tinta china.

Otru de los puntos d’interés de la esposición ta nes pieces de cerámica que se pueden contemplar y que tán realizaes ente 1949 y 1971. La temática d’estes obres tiene que ver con la tauromaquia, la mitoloxía y la representación de rostros, principalmente. La esposición complétase con una esbilla de los más de 150 llibros que Picasso llegó ilustrar. Equí enséñense ocho libros y tres cartelos al través de los que se pueden ver les diferentes etapes del pintor a lo largo de la so vida, dende 1905 hasta 1974. Nestos llibros tán presentes tolos seres de la corte picasiana: les muyeres, el pintor y el so modelu, arlequines, faunos, minotauros, etc.

“Los lenguajes de Picasso” ye una amuesa organizada pola Obra Social y Cultural d’Ibercaja y comisariada por Dolores Durán.

La Sala Vértice d’Uviéu acueye hasta’l prósimu 23 de xineru una amplia amuesa de la obra artística d’Aurelio Suárez. Setenta y seis obres procedentes de diverses colecciones repasen la trayectoria creativa d’un de los autores más singulares del panorama plásticu asturianu.

Oleos, guaches, cerámiques, bocetos y hasta tires cómiques formen esta esposición dedicada al conxuntu de la obra de Suárez con aportaciones del Muséu de Belles Artes d’Asturies o de la Obra Social y Cultural de Caxastur. En xunto la Sala Vértice enseña una panorámica percompleta del trabayu d’un artista qu’al pesar del so talentu y de la singularidá de la so xera namás agora, tiempu después del so fallecimientu algama la reconocencia pública.

La esposición compleméntase con un catálogu-estudiu de la obra d’Aurelio Suárez (1910-2003) fechu pol conservador del Muséu de Belles Artes d’Asturies Gabino Busto nel que s’analiza la dimensión artistica del creador xixonés dende diversos puntos de vista y asitiándolu nel panorama de les vanguardies hispániques.

La galería xixonesa Espacio Líquido va ser la única sala d’arte d’Asturies presente na prósima edición de la feria Arco 2006 que va celebrase en Madrid en febreru del añu qu’entra. Cuco Suárez, Rebecca Menéndez y Avelino Sala son los artistes seleccionaos pa representar al nuestru país nuna edición d’Arco que va vali-y al Principáu pa presentar el proyectu de La Laboral.

La fundación del patronatu del Centru d’Arte y Creación Industrial La Laboral va aprovechar la fiesta d’inauguración de la feria madrilana pa dar a conocer la iniciativa puesta en marcha pola administración autonómica asturiana na antigua Universidá Laboral de Xixón. Nel eventu va tar presente la más firme candidata a dirixir La Labora y hasta fai poco másima responsable d’Arco, l’asturiana Rosina Gómez Baeza y les principales autoridaes polítiques del Principáu.

El patronatu de la Fundación del Centru d’Arte y Creación Industrial de La Laboral celebra esti miércoles 30 el so primer aconceyamientu cola consitución de la so comisión executiva y l’acoyida de nuevos patronos como principales puntos nel orde del día. La reunión tamién va tratar del perfil de la dirección del centru pal que la ex directora d’ARCO, l’asturiana Rosina Gómez Baeza ye la más firme candidata.

El Centru d’Arte y Creación Industrial ye un de los proyectos estrella del gobiernu de Vicente Álvarez Areces y va cuntar con un presupuestu añal de cinco millones d’euros. Una dirección xeneral y otra de conteníos, xunto la comisión executiva, otra científica y el patronatu de la Fundación son los sos órganos de gobiernu. Nel patronatu participen delles de les principales empreses privaes asturianes como Hidrocantábrico (HC Energía), la Autoridad Portuaria, Sedes, Alcoa Inespal, Telefónica, FCC (Fomento de Construcciones y Contratas), Necso Entrecanales Cubiertas, Dragados, S. A., y Constructora San José.

La exposición “Red Night” del retratista alicantín, Albert Corbí, elixíu Nuevu Talentu Fnac de Fotografía, foi inaugurada esta mañana na Biblioteca Ramón Perez de Ayala en presencia del Director Xeneral de Promoción Cultural y Política Llingüística del Principáu, Carlos Madera.

Albert Corbí (Alcó, 1976) foi elixíu Nuevu Talentu Fnac de Fotografía 2005 por esti trabayu, “Red Night”, seleccionáu ente los 206 orixinales que participaron en concursu.

El xuráu, que taba compuestu por Laura Serani, directora de la Galería de Photo Fnac, Carlos Luján, Nuevu Talentu Fnac de Fotografía 2004, Carlos Perez, responsable de programación del MuVIM y Miguel González, delegáu de l’Axencia Magnum n’España, destacó de la obra’l tratamientu innovador d’un tema tan clásicu como’l boxeu, apreciando especialmente l’usu de la color y la fuerza de les cuarenta semeyes que componen el trabayu.

La exposición va poder vese na Biblioteca del Fontán hasta’l 3 de xineru de 2006.

Un grupu d’artistes plásticos convocaos pol Foru Arte Ciudá esponen les sos obres nuna amuesa entamada en sofitu de les reivindicaciones pola oficialidá que desembocaron na manifestación del pasáu 5 de payares. Los trabayos pueden vese nel Llar Solidariu d’Uviéu.

La esposición recueye obres de Maite Centol, Pablo Maojo, María Xesús Rodríguez, Adolfo Manzano, Ástur Paredes, Huggo O’Donnell, El Contuberniu, Pablo Armesto, Adelaida Ovana, Piru de la Fuente, Nel Amaro, Ánxel Nava y once artistes más, ente ellos Paco Naide -ganador del Premiu Astragal- que presenta la so instalación sonora “Los pilares del silenciu” xunto con dos video-proyecciones: «Lluvina» de Juán Luís Ruíz y «Les nueses pallabres» del Coleutivu Fiumfoto.

L’amuesa englobada embaxo’l títulu “Artistes pola oficialidá” forma parte de la esposición itinerante Llingua Solar y va poder contemplase nos locales del Llar Solidariu d’Uviéu n’horariu de 18.00 a 22.00 hores hasta’l prósimu 18 de payares.

El Muséu Barjola de Xixón va acoyer dende’l prósimu viernes 3 y hasta’l 5 d’avientu la esposición de El Artilugio, una singular propuesta creativa del escultor uvieín Manuel Calvo na que los visitantes pueden intervenir directamente. Ye la primer vez que se presenta n’Asturies esta obra en marcha del artista qu’escomenzó crease en 1967 en Madrid.

El trabayu que va enseñase nel Muséu Barjola ufierta la propuesta que Calvo punxo en marcha va trenta y ocho años nel so taller de la madrilana cai d’Alcántara, compuestu con toa triba de materiales de desfechu y activáu con enerxía eléctrica y motriz. En 1968 la obra espúnxose na Galería Seiquer y diez años más tarde el proyectu aumentáu presentóse na Galería Studio Levi. Agora amuésase en Xixón.

Manuel Calvo nació n’Uviéu en 1934. De formación autodidacta espunxo en Madrid nel añu 1958 na Galería Marfil. Tuvo vinculáu a los grupos Equipo 57 y Equipo Córdoba y a lo llargo de les décades siguientes espunxo la so obra en sinfinidá de sales del estáu. En 1984 ufiertó una amuesa retrospectiva nel Muséu de Belles Artes d’Asturies y en 1992 participó na Bienal d’Uviéu.

L’escritor y artista polifacéticu Nel Amaro inaugura’l prósimu viernes 28 n’Uviéu una esposición titulada ‘1990-2005’ na que presenta una retrospectiva de los sos poemes visuales realizaos a lo llargo de les dos últimes décades y nos que’l filu común ye una personal mirada crítica y tresgresora de la realidá establecida.

L’amuesa del perfomanceru turonés va abrise na Sala Aula Abierta de la Llibrería Trabe el prósimu viernes 28 a les 20.00 hores nun actu que va cuntar cola presencia del tamién artista Ánxel Nava y nel cursu del cualu Amaro va executar dalgunos de los poemes conteníos na so serie ‘Españoleando’.

La esposición de Nel Amaro va tar na Sala Aula Abierta d’Uviéu (c/ Padre Buenaventura de Paredes, 4) hasta’l prósimu 17 de payares.

El fotógrafu canadiense d’orixe xudíu Matei Glass presentó esta mañana la exposición fotográfica ‘Marnetic identities’, que se va inaugurar mañana nel Centru de Cultura Antiguu Institutu Xovellanos de Xixón. La exposición, que durará hasta’l prósimu 13 de payares, recueye un conxuntu d’imáxenes nes que l’autor amuesa la so reflexón sobre les memories entrecruzaes del conflictu palestín.

Les imáxenes, que pertenecen a los sos viaxes a Gaza y Cisjordania a lo llargo de cinco años, fueron nominaes nel añu 2004 pal premiu ‘Dialogue de l’Humanite’, festival Rencontres Internationales de l’Image de Arles, Francia.

Glass, fíu de refuxaos xudíos de Rumanía supervivientes del Holocaustu, creció nun entornu que nun conoció la historia del destín de los palestinos, y nel que la idea d’Israel yera la de “la valiente patria”, poro l’artista diz que los sos retratos “xurden de la necesidá de rellenar esos espacios na mio memoria personal, pa ver la otra cara de la utopía”.

Les obres de Glass tienen sío publicaes en numberoses revistes y eventos d’arte contemporáneu internacional, alcontrándose munches d’elles en colecciones públiques y privaes.

El pintor madrilanu Álvaro Delgado inauguró esti llunes 17 n’Uviéu la esposición “Asturias, verdes y negros”, una serie inspirada na mitoloxía tradicional y la fauna del país cola que l’artista quier celebrar la relación sentimental que caltién con Asturies dende va cincuenta años.

Delgado nació en Madrid en 1922 y formó parte de la nomada Escuela de Vallecas, xunto a artistes como Benjamín Palencia. En 1955 viaxó a Asturies y d’esa dómina daten les sos primeres obres inspiraes nel país recién descubiertu. Dende entós les sos series ‘asturianes’ estructúrense en tres ciclos: “Crónica del Navia”, “Crónica Astur” y esta qu’agora presenta n’Uviéu: “Asturias, negros y verdes”.

La esposición d’Álvaro Delgado ta patrocinada pola Conseyería de Cultura y va tar abierta na Sala d’Esposiciones del Banco Herrero n’Uviéu hasta’l prósimu 8 de xineru de 2006.