Plástiques

El conceyal de Mocedá d’Aviles, Luís Ramón Fernández Huerga, presentó ayeri en compañía d’Angel de la Calle y Jorge Iván Arquíz, el XI Certame de Cómic Villa d’Aviles, que se va celebrar del 1 al de 15 de setiembre. Nesta nueva edición del esperáu festival del cómic van poder vese esposiciones de Kenny Ruíz, Luis García y Carlos Puerta, cuntándose además cola presencia d’autores de prestixu como Mike Ploog, Phil Jimenez, Arthur Suydam, Eddie Berganza, Charlie Adlard o Alan Davis, ente otros.

Los protagonistes de les esposiciones de la XI edición del Certame de Cómic Villa d’Aviles van ser Carlos Puerta, responsable de les ilustraciones de los primeros tomos d’El Capitán Alatriste de Perez Reverte o d’obres como Tierra de Nadie o Perdición; Luis García, artista de trazu hiperrealista y autor de Nova-2 y Las Crónicas del Sin Nombre; y Kenny Ruiz, autor mozu d’El Cazador de Rayos y ganador de tres premios populares nel Salón de Barcelona 2005.

Per otra parte, la organización cunta con una llarga llista d’invitaos na que figuren nomes de prestixu internacional como los norteamericanos Mike Ploog (lleenda viva del cómic y l’autor más importante d’El Motorista Fantasma), Phil Jimenez (Infinity Crisis o La Patrulla X), Arthur Suydam (padre de dalgunes de les ilustraciones más conocíes d’Alien) y l’editor Eddie Berganza (Batman o La Liga de la Justicia).

Los británicos Charlie Adlard (Los Muertos Vivientes), Mike McKone (qu’espubliza en Los Nuevos Titanes y Los cuatro Fantásticos), Trevor Hairsine (El Capitán America y Wisdom), Dean Ormston (Lucifer, Los Libros de la Magia o Los Carnívoros) y Alan Davis (un clásicu: Excalibur, Capitán Britania, Batman, X-Men…), el frances David B (co-creador del sellu de referencia L’Association y autor d’obres tan premiaes como La Ascensión del Gran Mal), l’arxentín Al Barrionuevo (dibuxante pal mercáu americanu de Batman: Gotham Knights o El Detective Marciano) y los españoles Ramón F. Bachs (autor d’abondoes obres de Star Wars nos EE.XX y de personaxes como Manticore), Enrique Ventura (habitual d’El Jueves con Groucho) y KIM (otru clásicu d’El Jueves gracies a la serie de Martínez, el Facha), son otros de los participantes nesta nueva edición del festival del cómic avilesín, onde tamien se va pasar un ciclu de videocine ente los díes 6 y 9 de setiembre.

El prósimu vienres 7 de xunetu va inaugurase nes instalaciones de la Casa d’Asturies en Bruseles la esposición de les obres que quedaron finalistes del I Concursu de Fotografía ASBRU-ASMA, organizáu col envís d’afalar la creación fotográfica n’Asturies y sobre Asturies. Los asturianos Mónica Riveiro y Pablo Luis Bernad, van viaxar dende Madrid y Londres pa tar presentes na inauguración.

El xuráu del premiu, qu’aposto dende’l primer momentu poles nueves tecnoloxíes en toles sos fases, tuvo presidíu pol periodista asturianu Jose Luis Balbín y compuestu por varios fotógrafos y profesionales de reconocíu prestixu internacional, otorgó el primer premiu na modalidá “Asturies” a Mónica Riveiro pola serie de semeyes entitulada “Xixón” y el primer premiu de la modalidá “Tema llibre” a Pablo Luis Bernard pola serie en blanco y negro “Sin título”.

La esposición, que s’organiza con calter itinerante, va poder visitase na Casa d’Asturies de Bruseles hasta’l 14 de xunetu y va volver repitise en Madrid peles feches de la seronda.

La Sala d’Esposiciones del Centru Municipal de L’Arena espón dende ayeri hasta’l día 29 de xunu la colección ‘Naturaleza Abierta’ d’Antonio Rodríguez Dosantos. Les obres son retratos, paisaxes y figures humanes dientro de los ambientes y colores de la naturaleza asturiana, cola finalidá de crear escenes partiendo d’elementos de la vida diaria, tratando de da-yos una fundura sicolóxica o tresmitiendo una preocupación universal.

Dalgunes de les obres de Rodríguez Dosantos amuesen los efectos de la guerra al travies del retratu d’una neña n’Afganistán. Rodríguez Dosantos sigue la másima de Friedrich Nietzsche que diz que cuando te mires nel abisu, l’abisu tamien te mira a ti, llogrando asina que los sos paisaxes dean la sensación de tar reflexándose nel espectador.

Los artistes asturianos Iván Perez (Tineu, 1973) y Avelino Sala (Xixón, 1972) participen nel Festival Internacional de Fotografía y Artes Visuales madrilanu que lleva por nome PhotoEspaña 2006, na que participen otros 375 fotógrafos de 33 nacionalidaes diferentes. Entrabos artistes participen con dos exposiciones nel llamáu Festival Off d’esti certame que nesta edición ta dedicáu a la naturaleza.

La exposición d’Avelino Sala que lleva por nome Drama, fai una reflexón sobre l’arte dende los plantegamientos del retratista que lu faen mantener l’arte como una actitú vital y al tiempu cuestiona la diferencia ente arte y diseñu. Pela so parte, la exposición d’Iván Perez lleva por nome Paisajes para un animal muerto y ta basada na captura de persones n’estáu d’almiración o estelamientu.

La exposición de Sala puede visitase dende mañana na galería Raquel Ponce, mentes que la Perez yá ta inaugurada dende’l pasáu día 3 na galería Depósito 14 de Madrid.

A partir de güei hasta’l prósimu 3 de xunu, el Palaciu de Valdecarzana d’Aviles acueye les obres de más de cincuenta artistes asturianos que foron donaes polos sos autores al Conceyu Abiertu pola Oficialidá p’apoyar la campaña de reivindicación llingüística d’esta plataforma cívica qu’axunta a más de 170 colectivos asturianos. L’amuesa va rematar con una puya pública’l sábadu 3 de xunu a partir de les siete la tarde.

El Foru Arte Ciudá, organizador de la exposición, consiguió axuntar una gran representación de les artes plástiques d’Asturies pola defensa de los derechos llingüísticos de los asturianos. Artistes veteranos como Hugo O’Donnell, Berto Álvarez Peña, Ánxel Nava, Neto, Ástur Paredes, Fernando Alba y Avelino Sala, exponen xunto a otros más mozos pero non por ello menos conocíos como son Violeta Sánchez Trejo, Berto Vázquez, Ernesto Avelino y Natalia Pastor.

L’amuesa va rematar con una puya pública de les obres el sábadu día 3 de xunu a partir de les siete la tarde, na que se va cuntar cola collaboración del actor Antón Caamaño y la Galería Octógono d’Aviles.

Esti vienres 7 d’abril, a les siete de la tarde, la Casa de la Xuventú de Samartín del Rei Aurelio en Sotrondio acoyerá la presentación de la esposición “De la gloria les ruines”. Esta esposición que pue visitase hasta’l 21 d’abril consta de cuarenta fotografíes y poemes en llingua asturiana colos que l’escritor de Sotrondio Xose Ramón Martín Ardines regresa a la poesía.

Sigún l’autor tamos delantre una “esposición y versos pal antidiscursu, fotografíes de ruines industriales, escombros… Una realidá diferente a l’Asturies qu’apaez nos cartafueyos turísticos pero que ta presente en cualaquier rincón, recordándonos lo que somos,lo que fuimos y lo que irremediablemente seremos: ruines d’estos tiempos de gloria”.

L’actu va cuntar cola presencia del autor, l’Alcalde del Ayuntamientu de Samartín del Rei Aurelio y del escritor Pablo Rodríguez Medina que fadrá la presentación de la misma.

La realizadora Ángeles Muñiz presentó esti llunes n’Uviéu el so documental “Jaime Herrero…pinta de escritor”, un percorríu pela obra y la vida del artista qu’aumesa tamién un periodu del mundu creativu asturianu dende les últimes décades del sieglu pasáu hasta l’actualidá.

Muñiz (autora ente otres obres de la película breve “La neña los mios güeyos”) sigue al pintor y escritor Jaime Herrero pelos diversos escenarios vitales onde desenvuelve la so obra, una de les más singulares del panorama artísticu del nuestru país. El propiu artista ye’l que va devanando el filu narrador d’esti documental de cuarenta y cinco minutos de duración y que fue producíu pola Obra Social y Cultural de Caxastur.

La Coordinadora de ONGD d’Asturies convoca un concursu de cartelos dotáu con un premiu de mil euros y empobináu a ilustrar como imaxen los IV Alcuentros de Cooperación al Desarrollu que van celebrase en Xixón del 8 al 11 de payares. El certame ta abiertu a cualquier artista que quiera apurrir la so visión personal al tema del que van tratar los Alcuentros de ONGD: la Delda Esterna.

Los cartelos pueden facese al través de cualaquier técnica o procedimientu, siempre que seya posible la so reproducción por medios técnicos y les dimensiones nun pueden superar los 50×70 cm., en cualaquier disposición. El plazu de pieslle pa la recepción d’orixinales remata’l prósimu 4 d’abril.

Más información

La pintora Mª Paz Téllez espón na sala Aula Abierta de la Llibrería Trabe la so obra titulada ‘Frágil’, un conxuntu d’estampes feches con diverses técniques nes que l’artista astur-madrilana amuesa’l so llau más esistencialista. L’autora de ‘Frágil’ ta acabante algamar el premiu ‘Artífice’ de pintura enriba papel, el mesmu formatu que presenta agora n’Uviéu.

Téllez, nacida en 1974 en Madrid ye profesora de la escuela artística uvieína Crearte. Nesta esposición que se puede conteplar hasta’l prósimu 9 de marzu na Llibrería Trabe la pintora ufierta trece obres sobre papel d’estraza, realizaes ente 2003 y 2004 con técniques nes que concurren la cera, l’acuarela líquido, el acrílicu y, en dalgunos casos, el betún de Xudea y el carboncillo.

El Centru d’Arte Revillaxixéu de Xixón allampia por entrar nel circuitu internacional pa poder amosar al públicu asturianu esposiciones de grandes nomes de la pintura y la escultura universales. El muséu que xestiona la Obra Social y Cultural de Caxastur negocia con empreses privaes les posibilidaes pa medrar como centru de referencia mundial.

L’amuesa d’a lo menos un par d’esposiciones de grandes artistes a lo llargo del añu podía valir pa que’l Revillaxixéu algamara’l nivel pol qu’allampia. Según informen dellos medios informativos asturianos la Obra Social y Cultural de la Caxa ta negociando ente otres empreses con Aqualium Spain, la galería propiedá del ex ministru del PP Francisco Álvarez Cascos y la so muyer María Porto.