Plástiques

El Festival de Cine de Xixón entama dende’l 23 de payares una riestra esposiciones venceyaes al mundu del cine. La trayectoria profesional de Toni Galindo, diseñador gráficu y dibuxante; Larry Clarki, fotógrafu cinematográficu; Nicolas Combarro, colos sos xuegos de combinación ente l’espaciu y les sos obres; o la esposición Tiempo Irreal de Blanca Nieto son dalgunes de les muestres que se van poder disfrutar en Xixón durante’l Festival.
Esposiciones del Festival de Cine de Xixón 2006

• Sólo para tus ojos, Galería Espacio Líquido
• Larry Clark, Antiguu Institutu
• Nicolas Combarro, Galería Altamria
• Fin de Sesión, Xiz bar
• Tiempo Irreal, Galería Espacio Líquido
• Trine Lise Nedreaas, Galería Espacio Líquido
• Marilyn (Never got old), Galería Espacio Líquido
• Labios A”, Galería Espacio Líquido

“Ensembles” de Juan José Pulgar y “El desafío” del colectivo Ropa Tendida son les obres ganadores del VII Premiu Astragal. Güei a les 20,00 fadrase la ceremonia d’entrega de los Premios Estragal nel espaciu del mesmu nome del Conseyu de Mocedá de Xixón. Los premios Astragal empobínense a la mocedá creadora asturiana, o residente n’Asturies, y tan organizaos pol Conseyu de Mocedá de Xixón en collaboración cola Fundación Municipal de Cultura de Xixón y l’Institutu Asturianu de la Mocedá.
Juan José Pulgar, xixonés de 34 años y llicenciáu n’Historia del Arte presenta n’Ensembles tres elementos, fotografíes, video-instalación y testos de periódicos. L’autor xuega col pasáu y presente pa tratar d’espresar dos circunstancies históriques diferentes que pasen nel mesmu llugar. La serie, en pallabres del autor, “pensóse pa fotografíes y dende la convocatoria del premiu amplióse”. El proyectu sumérxese nel espaciu de la recuperación de la Memoria Histórica del nuesu país al través d’una recreación peles cais de Xixón de lo que yera la vida na ciudá nos momentos de la Revolución del 34 y la Guerra Civil. Una exposición fotográfica y una Videoproyección nel ESpaciu Astragal y doce intervenciones na ciudá van recordar a los ciudadanos que n’eses cais les xentes diben armaes en mediu d’una guerra. Pa ello Pulgar sofitaráse nel trabayu del fotógrafu xixonés Constantinos Suárez. “Lo que m’interesa ye la Historia y como esa Historia marca a les persones, y tamién concienciar a la xente de que toos formamos parte d’esa Historia”.
L’otru proyectu ganador titúlase El Desafío, y fue presentáu pol “Colectivu Ropa Tendida”, del que formen parte Sofía Fernández Castañón, David Feito, Juan Tizón, Olga Fernández, Ricardo Santana, Diego Muñiz Santamarta, Gullermo Tuñón y Victor García. Trátase d’una instalación artística qu’utiliza l’Espaciu Astragal onde se simula un cuadriláteru d’un Ring de Boxéu. El proyectu suxier una griesca poética que se podrá ver en directu o en videu y qu’incluyirá un recital de poemes d’autores asturianos como José Luís Piquero o David González.
Les obres tarán espuestes na sala Astragal dende’l 14 de payares hasta’l 5 d’avientu de 2006.

La inauguración fadráse a les 19,30 hores nel Aula Abierta de la Llibrería Asturiana de Trabe, cai Buenaventura de Paredes 4 d’Uviéu. L’Aula Abierta de Trabe acoye dende güei los últimos trabayos de Menchu Ontañón (Barcelona, 1974). Residente n’Asturies dende la so neñez por ascendencia familiar, esta creadora moza, qu’algamó la so llicenciatura na Facultá de Belles Artes de Cuencua ya entamó’l so doctoráu en Leipzing, alterna anguaño’l llabor artístico cola docencia como profesora de Plástica na Educación Secundaria.
Nesta muestra, la segunda individual na carrera de l’artista, podremos ver dos espresiones pictóriques trabayaes al óleu sobre llienzos de 100×100 cm y compuestes por bandes rectes y verticales de dellos ya intensos colores. Estos elementos, anque derivaos d’una modalidá de l’abstracción postpictórica, presenten un tratamientu diferente, pos reciben variaciones xeneradores d’efectos especiales.
El restu de les pieces confórmenlu pequeños volúmenes inspiraos en motivos arquitectónicos. La mayor parte d’ellos, fechos en resina policromada, muestren formes de llinaxe constructivista. Otros, fechos con escayola teñío, recueyen esploraciones del espaciu negativu.

La Sala Borrón, sala d’arte dependiente del Institutu Asturianu de la Mocedá, volvió abrir depués de que nel añu 2005 la so actividá se detuviere pol pesllé de la sala histórica, na cai del Xeneral Yagüe d’Uviéu. La nueva sé de Borrón tien una superficie 600 metros cuadraos y cuntó con una inversión de 1,8 millones d’euros.
Sicasí’l gobiernu asturianu mercara por 1,8 millones d’euros un edificiu, na cai Santa Susana, empobináu pal Institutu Asturianu de la Mocedá, y tamién pa la sala Borrón, polo que l’apertura de los locales de Xeneral Yagüe sedrá provisional.
La Sala Borrón ye ún de los referentes estatales del arte mozu, peles sos paredes nos venti años d’historia pasaron más de 250 esposiciones. La reinauguración de Borrón faese cola XVII Muestra d’Artes Plástiques del Principáu “Hesptasis 06+1”.

La llibrería asturiana Trabe inaugura güei a les 7 de la tarde la exposición de fotografíes SNUDOS d’Enrique G. Cárdenas. Amás de la exposición de semeyes asoleyaráse’l catálogu del mesmu títulu publicáu por Ediciones Trabe, con prólogu d’Ana Vanessa Gutierrez. Con esta exposición abre la temporada esta sala, na que van dir alternándose pintores y escultores hasta la Selmana de les Lletres de 2007.
Enrique G. Cárdenas exerce como fotógrafu profesional dende 1985, abarcando tolos aspectos d’esi llabor, anque principalmente l’industrial, el publicitariu, l’editorial y l’empresarial, ensin desdexar los actos sociales o culturales. Foi fotógrafu de prensa y agora publica de manera continuada en diverses revistes asturianes.
Ente los llibros ilustraos con fotos suyes podemos destacar: El viajero independiente: Asturias; Guisanderas, tradición en la cocina asturiana; Santa Eulalia de Mérida, patrona de Oviedo y Asturias; Rutas de Asturias o Recetas con historia. Tamién tienen fotos d’Enrique G. Cárdenas publicaciones como Nudex (editáu en Berlín); Desnudos femeninos; Cien textos para cien fotógrafos asturianos o Las reliquias de San Salvador de Oviedo. La so primer exposición fotográfica féxola n’Uviéu en 1991.
Con esta exposición abre la temporada esta sala, na que van dir alternándose pintores y escultores hasta la Selmana de les Lletres de 2007.

La galería fotofráfica de la Fnac de Parque Principáu va esponer hasta’l próximu 28 de payares una amuesa na que se recueyen les imáxenes del Kubrik más desconocíu, el más íntimu, xugador d’axedrez y del director que da indicaciones al so equipu nos rodaxes de les películes “2001: Una odisea en el espacio” (1968), “La naranja mecánica” (1971), “El resplandor” (1980) y “Lolita” (1962), ente otres.

Con ventiún años, debutaba col so primer cortu “Day Of The Fight. La bona respuestar per parte del públicu y la crítica motivólu pa dirixir el segundu, “The Flying Padre”, y ehí descubrió la so vocación de cineasta. En 1956 rueda “Atraco Perfecto”, y empieza la so llarga llista de trunfos: “Senderos de gloria” (1957); “Espartaco” (1960); “Lolita” (1962) o “La chaqueta metálica” (1987). Kubrick morrió en 1999 en Harpenden, Inglaterra, dexando recien terminada “Eyes Wide Shut”.

La exposición Los Archivos de Stanley Kubrick foi posible gracies a la collaboración de la editorial Taschen.

La Casa d’Asturies en Bruseles, lo que yera l’antiguu edificiu ‘Le Peuple’ de la capital de la Europa comunitaria, acueye hasta’l día 15 d’esti mes una esposición de l’Asociación de Pintores del Valle del Nalón. Una amuesa que forma parte del programa d’actos organizaos con motivu del Día d’Asturies y que nel actu d’inauguración contó cola presencia del conseyeru de Cultura de la Embaxada d’España, Segovia, por representantes de la propia Casa d’Asturies y pol presidente de l’Asociación de Pintores del Valle del Nalón, Luis García Bernardo.

La esposición axunta la obra de 16 pintores integraos na citada Asociación que cuenta col apoyu de la Conseyería de Cultura y Comunicación del Principáu d’Asturies. La muestra celebrada en Bruseles ta patrocinada pola Embaxada d’España ente’l Reinu de Belxica al travies de la Conseyería Cultural y pola Mancomunidá del Valle del Nalón.

La segunda de les tres esposiciones que s’organicn nel marcu de les XI Xornaes del Cómic Villa d’Aviles arrancó’l pasáu sábadu 2 de setiembre na sala d’esposiciones de la Casa Municipal de Cultura. La muestra, que ta dedicada a la trayectoria profesional del dibuxante español Luis García, autor clásicu de proyección internacional, sumóse a l’abierta nel Centru Comercial L’Atriu sobre la obra de Carlos Puerta.

La muestra sobre Luis García fai un recorríu completu pela so obra dende los comienzos con 13 años na editorial Bruguera, pasando per obres tan importantes como Las Crónicas del Sin Nombre (con guiones de Víctor Mora) o Nova-2 hasta la recien Experimentando por el Terror, hestoria curtia incluyida nel llibru de la Selmana Negra-Pepsi Guernica Variaciones Gernika.

La esposición ta formada na so totalidá por orixinales cedíos pol autor y va poder visitase de llunes a vienres de 11.00 a 14.00 y de 18.00 a 21.00 hores y los sábados de 11.00 a 14.00 hores.

El XI Salón Internacional del Cómic d’Aviles va dedicar la xornada de güei, a partir de les seis de la tarde, al cómic de temática gai y lesbica, cola participación, ente otros, de Sebas García, autor de cómics como XY y Las aventuras del Capitán Eclipse y miembru de Xega Xoven, y Rosa Navarro y Gema Arquero, creadores del cómic Salidas de emergencia.

La Comarca la Sidra ta acabante de sacar les bases de la IV edición del Concursu de Cómic n’Asturianu que tien el so plazu abiertu a la participación hasta’l 13 de payares. Basáu en dos modalidaes, una de cómic n’asturianu y otra de tires cómiques p’autores menores de 14 años de les escueles de la zona, el concursu pide testos de tema llibre, con guiones y personaxes ineditos que tean dafechu escritos n’asturianu. Amás de ser reconocíes con premios en metálico, que van dende los 200 a los 500 euros, delles de les obres seleccionaes van formar parte d’una esposición itinerante pelos diferentes centros culturales de la Comarca la Sidra, asina como formar parte d’una publicación especial coles obres.

Los trabayos han d’univase al Serviciu de Normalización de la Comarca de la Sidra, na Cai Escueles de Paraes de Nava (CP 33529), o a les Oficines d’Información Xuvenil de Nava o Villaviciosa.