Plástiques

Dende esti xueves 10 de xineru al 10 de febreru ta disponible non locales de la Delegación del Gobiernu del Principáu en Madrid una amuesa que recueye les obres de los ganadores de la XVII Amuesa d’Artes Plástiques del Principáu na edición de 2006. “Heptasis 06+1” ye una esbilla del trabayu de los asturianos Isabel de la Sierra, Enrique Álvarez de Celis, Elena Rato Tascón, Adriana Rodríguez, Cristina Busto, Noe Baranda y Juan Jose Pulgar.

Col problema del repartu del agua de plena actualidá entama en Xixón l’amuesa “Vive los ríos del norte”, un espaciu itinerante organizáu pola Confederación Hidrográfica del Norte (CHN) nel que s’informa, al travies de vídeos y paneles, de la meyor manera pa facer un usu responsable del agua. Hasta’l 21 de xineru va tar abierta al públicu nel Institutu Xovellanos, de 10.00 a 20.00 y de llunes a sábadu, pa treslladase dempues a otres capitales del norte d’España.

Paneles informativos, vídeos interactivos y talleres empobinaos a la reciella formen el conxuntu d’esta esposición que naz col oxetivu cimeru d’algamar que la xente reconoza l’agua como un derechu fundamental de todos, según informó CHN nuna nota de prensa. La amuesa tamien espeya la situación del agua nel mundiu, n’España y los retos pala so conservación nel futuru.

Hasta’l prósimu mes de Xineru va tar disponible nel Museu Baárjola de Xixón la esposición “Sights for now/Lugares” que recueye un piñu d’obres d’artistes suecos y asturianos ente instalaciones, escultures, vísio y fotografía. En total son diez creadores, cinco asturienos y cinco suecos los que componen esta amuesa organiza alredor del conceutu de llugar ya espaciu y la so compenetración cola cultura.

Baxo la dirección de les comisaries Paola Zamora y Karolina Pahlen los artistes que se pueden ver nel Bárjola son: Loulou Cherinet, Patrik Gustavsson, Juan Castillo, Patricio Aros, Hector Siluchi, Maite Centol, Avelino Sala, Tomás Miñambres, PSJM y Benjamín Menendez.

Baxo’l nome, “Encuentros de arte íntimo” la Sala LAi, asitiada nel Barrio de La Soledad de Cimavilla de Xixón va cellebrar esti vienres 28 d’avientu una xornada artística de varios creadores. Dende les 19:00 hores pasarán pola sala artistes como Jaime Rodríguez, Alfredo Colunga (pieces testuales), la Fundación Perrosituacionista Laszlo Kovacs, El hombrecito azul de playmobil, Pulgu o Nel Amaro.

Amás va presentase una edición de materia gráficu sobre lienzu con obra d’Amalia Ulman, Begoña Muñoz, Carlos Perez, Eduardo Morales, Jaime Rodríguez, María Mieres, Noelia del Dago y Veronique Hubert. Dos ediciones estampaes en serigrafía, una al cargu de Noelia del Dago y la otra obra de Filigrana embaxo la dirección d’Ana Cabranes y estampada por Valle Baranda Ferrero.

Tadamori Yamaguchi, l’artista nipón que foi merecedor de la quinta edición de les beques del Museu Bárjola de Xixón, ta esponiendo dede’l pasáu vienres y hasta’l prósimu 27 de xineru, la instalación cola que algamó la beca precisamente nel museu xixones. “La idega d’esti proyectu básase en tresformar l’espaciu y participar d’el, non en facer dalgo namás qu’espositivo, sinón en crear un espaciu nuevu llegando inclusive a modificar la perspectiva de visión pa poder aprecialo”, esplicó l’artista.

L’artista y escultor natural de Osaka nun se limita a ocupar l’espaciu espositivu y xuega con el faciedolu partícipe de la propia obra. Tamaguchi suel usar na so escultura dellos elementos industriales como puntes, tablones o vares matáliques.

Julio Cuadrado inauguró esti llunes 17 d’avientu, una nueva amuesa de semeyes nel espaciu artísticu Mediadvanced de Xixón (C/Ezcurdia, 9). L’artista asturianu afonda n'”Iconos” nel poder iconográficu de la fotografía al travies de la deconstrucción de la propia semeya nun puzzle que la mirada del espectador tiene que iguar. Cuadrado convierte la sala d’esposiciones nun espaciu sacro pa asoleyar la rellación de la fotografíoa colo alegórico, lo simbólico y lo relixoso.

La esposición entamó esti llunes a les 19:30 hores y va tar visible al públicu, de baldre, hasta finales d’esti mes d’avientu.

p>Güei miercoles a les 19:30 hores escomienza nel Museu de Belles Artes d’Asturies la amuesa de cerámica “Ente concos 12+1 propuestes de cerámica artístico n’Asturies”. Embaxo la dirección y coordinación de Manuel Cimadevilla, la esposición amosa la mirada de doce artistes, procedentes del terren de la pintura y la escultura, alredor de les tecniques cerámiques.

Con esta nueva esbilla, amás de ufrir al visitante la posibilidá de ver como dellos artistes trabayen con otres tecniques y materiales, tamien quier recuperar los llazos tradicionales de collacoración ente los ceramistas ya’l restu d’artistes como pintores y escultores

El diariu “El Comercio”entama esti miercoles 5 d’avientu la sesta selmana d’arte contemporáneu “AlNorte”. Hasta’l 16 d’esti mesmu mes van sucedese talleres, esposiciones, conciertos, montaxes artísticos, en Xixón, Aviles ya Uvieu. Esti miercoles, a les 18:00 na sala Dasto, va tener llugar la primer presentación d’una de les ganadores de les beques “AlNorte” de Proyectos Espositivos 2007: Silvia Guerín con “Los límites de la luz”.

En Xixón van esponer, dede les siete en toles sales, Santiago Lara y Beatriz Coto con “Bosque interior” na galería Espacio Líquido, Cristina Ferrández, con “El autor y la consciencia” en Cornión y Carmen González con “La fragilidad de la medusa”nel Museu Bárjola. N’Aviles la primer cita ye con Eduardo Guerra, el día 10 d’avientu cola obra Límites del tiempo nel Centru Municipal d’Esposiciones.

Cervantes6, el nuevu espaciu d’arte n’Uvieu, inauguró esti llunes 3 d’avientu la so andadura na rexón con una amuesa de pintores asturianos que va tar disponible al públicu hasta’l prósimu día 11 d’esti mesmu mes. La esposición amosa 41 obres d’artistes como Favila, Manolo Linares, Luís Azón, Vaquero Placios, Díaz de Orosia ya Iván Quesada, con temes pictóricos que van dende’l paisaxe al bodegón col denominador común de la so procedencia asturiana.

El V Concursu de Cómic y III de Tires Cómiques n’Asturianu “Comarca de la Sidra” dio na modalidá de mayores de 14 años, el primer premiu dotáu con 500€, al dibuxante Alfonso Zapico Fernández pola obra titulada “Les Cuentes de Gasparín”

Alfonso Zapico, (Blimea, 1981) ye una de les realidaes con más sonadía del cómic asturianu. Diseñador gráficu, trabaya, pa con otros llabores, como ilustrador na editorial Edelvives, pa la que tien iguaos 9 llibros de testu de primaria y secundaria. De los premios algamaos por esti artista, rescampla enforma’l llográu esti añu na feria FestiBd, en Ville de Moulins, Francia, al meyor trabayu de calter históricu, pol so álbum “La Guerra Del Profesor Beltenev”, publicáu en Francia, Bélxica, Suiza y Canadá países nos que tamién asoleyó l’álbum “Un día de mayu” n’andecha con otros autores. Anguaño trabaya nuna novela gráfica, “Café Budapest”, que va espublizase pal añu que vien. N’asturianu, ye l’autor de la serie “Manolita Pulgarcita” qu’apaez en “El Gomeru”.

Xunto col primer premiu, el xuráu formáu por Pablo Maojo, Xuan Pedrayes y Arancha Prado, decidió dar dos accésit de 200 euros y diploma a les historietes ¿otru culín? De Juan Miguel Borja Estevez y “Milagru na Canga” de José Juan González García”. Amás del premiu en metálico y los diplomes pa los tres ganadores, la organización va editar una publicación na que van tar recoyíes estes obres. El Xuráu dio tamién los premios nes categoríes pa escolinos.

L’actu d’entrega de premios, publicación y esposición de les obres presentaes a concursu, va celebrase mañana miércoles na Casa Cultura “Marta Portal” de Nava, a les 19:00 hores y va contar cola comunicación “Historia del Cómic n’Asturianu”, por Chechu García, y l’actuación del grupu “Xentiquina”.