Plástiques

El fotógrafu vascu afincáu n’Uvieu Iñigo Calles inaugura esti xueves 31 de xineru, a les 19:30 hores, la que va ser la so primer esposición en solitariu. L’amuesa va poder vese na galería Vertice de la capital hasta’l 8 de marzu y ta formada por un total de venti fotografíes. Les semeyes tan feches pa esta esposición durante 2007 y formen parte del proyectu “Paisajes Rebelados”, col que l’artista ufre una particular visión de los paisaxes industriales abandonaos.

Iñigo Calles ye de formación autodidacta y dende 2002 tien espuesto xunto con otros artistes nel Certame Nacional d’Arte de Lluarca, n’Entrefotos, nel Centru Cultural Conde Duque de Madrid, en galeríes como Dasto, Ángulo y Vertice d’Uvieu, na Fundación Mondariz, en Clics de Extremadura, nel festival Notodofotofest y nel Concursu de Fotografía Purificación García.

“Muyeres con Arte”, una esbilla del trabayu artísticu de la muyer n’Asturies organizada pola Asociación Empresa-Muyer (ASEM) y la Federación Asturiana d’Empresarios (FADE) va tar espuesta dende esti llunes 28 de xineru na sala d’esposiciones que la FADE tien n’Uvieu. Na amuesa participen la empresa MOMA, la escuela d’arte Crearte, l’estudiu de diseñu Carmen Menendez, Pintar-Pintar (diseñu ya illustración), el taller d’ebanistería Artesanía Victoria Casielles, y l’estudiu de Maika Ramírez (acabaos).

24 paneles componen la esposición “100 años de Ciencia con Tintín”, qu’acueye El Café Español d’Uviéu y que sigue abierta hasta’l 17 de febreru que vien. Los paneles tán redactaos n’asturianu y en castellán, una midida que’l Conceyal de Cultura d’Uviéu José Suárez Arias-Cachero “Felechosa” calificó na inauguración, va una selmana, d’“Un pasu más pa la normalización de la llingua asturiana”.

La esposición ta financiada pola caxa d’aforros vasca “Kutxa” y nella se repasen los cien años del ñacimientu del célebre escritor belga Hergé, que nes sos hestories introducía la ciencia de contino, convirtiéndose asina nun visionariu, adelantando ideees como’l viaxe a la lluna. El Muséu Marítimu de Lluanco cede pa esta esposición delles pieces que faen más prestosu’l percorríu.

La Conseyería de Cultura del Principáu ya’l Banco Herrero renovaron esti llunes un alcuerdu de collaboración pa favorecer la difusión y la promoción cultural fecha n’Asturies. La primera de les esposiciones que va poder disfrutar el públicu asturianu por mor d’esti conveniu ye “¿Que arte? Discursos sin fronteras”, qu’entamó esti llunes nel Edificiu Hestóricu de la Universidá d’Uvieu con motivu del 400 aniversariu de la institución educativa asturiana.

Tres esta primer actividá van llegar tres esposiciones. Siempre nel espaciu d’arte del Banco Herrero, el ciclu va siguir a metá del mes d’abril con una amuesa n’homenaxe de la obra de la pintora xixonesa Pepa Osorio. El turnu pasará dempues al fotógrafu Edward Steichen, un de los más poderaos de la so xeneración pol so trabayu en revistes como “Vogue” o “Vanity Fair”. La última de les cuatro esposiciones previstes va tar dedicada al pintor asturianu durante la II República, Andres Vidau.

Esti alcuerdu ente les dos entidaes ye una renovación del que firmaron en 2002 con un resultáu de 20 esposiciones de diferentes estilos feches por mor d’esta collaboración. La novedá principal nesta nueva firma, que tendá valor durante un ciclu de cinco años, ye la incorporación del compromisu poles dos partes de difudir la cultura y los artistes asturianos nel estu d’España.

Les pegatines como instrumentu de propaganda na hestoria de la democracia española ye’l tema central de la amuesa qu’arrancó esti llunes nel Palaciu Conde Toreno d’Uvieu de la mano de la Fundación Jose Barreiro. La esposición recueye un total de venticuatro paneles de material propagandísticu con temátiques rellacionaes ente si: el referendum de 1976, les elleiciones ente 1976 y 2004, el referendum pa la constititución de 1978 y la consulta que se fizo p’aprobar la entrada na OTAN en 1986.

Al actu de presentación acudieron el presidente de la Fundación Jose Barreiro, Manuel Fernández de la Cera y los políticos asturianos d’aquella dómina Manuel García Fonseca, Emilio García-Pumarino Ramos, Juan Luis de la Vallina Velarde y M.ª Nelly Fernández Arias.

Esti llunes 21 de xineru a les 19:30 hores arranca l’amuesa “¡Que Arte?. Discursos sin fronteras” que recueye una esbilla de la produción de varios artistes asturianos. La organización d’esta esposición cuerre al cargu de la Universidá d’Uvieu, ta fecha con motivu de les cellebraciones del so 400 aniversariu y va poder vese nel espaciu qu’habilitaron pa ella nel Edificiu Hestóricu d’Uvieu hasta’l prósimu 29 de febreru.

Fotografía, escultura, pintura, obra gráfica y delles propuestes multimedia son los terrenos polos que se muieven los artistes de Que Arte? nesta amuiesa que va poder vese en horariu de 09:00 a 20:00 hores, de llunes a vienres y de 10:00 a 14:00 los sábados. A la inauguración de l’amuesa van asistirán el el Rector Juan Vázquez, la Conseyera de Cultura, Encarnación Rodríguez ya’l presidente del Banco Sabadell, Jose Oliú.

“Miradas cruzadas” ye’l nome de l’amuesa artística que dende’l pasáu sábadu ta espuesta nel Museu Evaristo Valle de Somió con motivu del 25 aniversario del centru cultural xixones sobre la figura del pintor asturianu. 25 obres n’homenaxe a la pintura d’una de les figures clave de la pintura asturiana del sieglu pasáu, 8 orxinales del propiu autor, componen una esposición que va poder visitase hasta’l prósimu 27 d’abril.

Los pintores qu’aporten parte del so trabayu pa la ocasión son: Jose Arias, Camín, Cuervo Arango, Reyes Díaz, Begoña Goyenechea, Manolo Grande, Ángel Guache, Josefina Junco, Miguel Mingotes, Pelayo Ortega, Pepa Pardo, Vicente Pastor y Javier del Río.

24 paneles componen la esposición “100 años de Ciencia con Tintín”, qu’acueye El Café Español d’Uviéu hasta’l 17 de febreru que vien. Los paneles tán redactaos n’asturianu y en castellán, una midida que’l Conceyal de Cultura d’Uviéu José Suárez Arias-Cachero “Felechosa” calficó d’“Un pasu más pa la normalización de la llingua asturiana”.

La esposición ta financiada pola caxa d’aforoos vasca “Kutxa” y nella se repasen los cien años del ñacimientu del célebre escritor belga Hergé, que nes sos hestories introducía la ciencia de contino, convirtiéndose asina nun visionariu, adelantando ideees como’l viaxe a la lluna. El Muséu Marítimu de Lluanco cede pa esta esposición delles pieces que faen más prestosu’l percorríu.

El Muséu de Belles Artes d’Asturies ta acabate d’asoleyar un calendariu pa esti añu 2008. El calendariu ta ilustráu con dibuxos de los sieglos XIX y XX, trece reproducciones d’obres del fondu del Muséu. El calendariu ta editáu en trés versiones distintes, caúna nuna llingua: asturianu, eonaviegu y castellán.

Apaecen nel calendariu dibuxos davezu difíciles de ver y escoyíos d’ente un fondu de 2.373 exemplares, de Jenaro Pérez Villaamil, Federico de Madrazo, León y Escosura, Valle, Piñole y Luis Fernández.

Les obres seleccionaes nel XXXVIII Certamen Nacional d’Arte de Luarca van tar espuestes nuna amuesa na Sala Cultural Cajastur d’Uvieu (Teatru Campoamos) dende esti xueves y hasta’l 10 de febreru. Ente les obres que se van poder ver tan la semeya ganadora del premiu Cajastur, “Mujer” de Carlos Suárez, y la pintura ganadora del premiu Ayuntamientu de Valdes, “Sueños sin dueño”, de Faustino Ruiz de la Peña.

Amás de los dos primeros premios, dotaos con 4.200 euros caún, los baxos del Campoamor tamien van agospiar a los dos trabayos merecedores de les menciones especiales: la fotografía “Mis ángeles son vuestros demonios” de Pablo Iglesias ya’l vídiu performance d’Avelino Sala “Arde lo que será”.

A este edición del concursu, organizáu por Cajastur y l’Ayuntamientu de Valdes, concurrieron 167 obres de les que’l xuráu esbilló 30 que son les que componen l’amuesa itinerante qu’agora espón Cajastur. Tres pasar por Luarca, Gijón, Mieres,Aviles, ya Uvieu l’amuesa viaxará’l 10 de febreru a los locales de la delegación del gobiernu asturianu en Madrid.