Plástiques

Esti llunes 25 de febreru va tener llugar en Xixón l’actu de clausura del programa CREACIÓN, na sala Astragal de la villa xixonesa de magar les 12:30 hores. Nel actu, que va servir pa facer balance de les actividaes feches, van participar dellos alcaldes de los conceyos de la Comarca de la Sidra y los responsables de la Obra Social y Cultural de Cajastur, que son les entidaes que punxeren en marcha esti ciclu d’esposiciones.

L’ultimu de los artistes que tuvieren ocasión d’esponer la so obra dientro del programa CREACION foi Noe Baranda, ganador de la Bienal de Arte Emerxente coloes obre de “Entre las flores”, que esti llunes finen la so iterancia poles sales asturianes.

L’Ateneu de La Calzada en Xixón ta esponiendo nes sos instalaciones una amuesa que recueye cartelería rellacionada cola imaxen del Che Guevara, nuna esposición que quier rendir homenaxe al revolucionariu. La colección ta formada por semeyes feches en Cuba a cartelos qu’ilustraben la figura del guerrilleru, munchos dellos inspiraos na famosa fotografía qu’Alexander Korda fizo del Che durante’l funeral poles víctimes de la explosión de Coubre. L’horariu de visites ye de 09:00 a 21:00 hores.

“Retratos naturales”, una amuesa pictórica del artista ovetense Arturo de Miguel, va poder vese la Sala Cultural Cajastur del Teatru Campoamor d’Uvieu a partir del martes 19 de febreru y hasta’l 30 de marzu. L’ovetense ye un ilustrador naturalista apasionáu de la fauna asturiana y nesta esposición ufre una esbilla del so trabayu dende la decada de los ochenta. Tres la estancia na capital, la esposicioón va pasar por Mieres (del 4 d’abril al 4 de mayu), Aviles (del 8 al 31 de mayu) y Xixón (del 5 de xunu al 4 de xunetu).

L’amuesa qu’espón los trabayos más destacaos nel quintu concursu de Cómic n’asturianu de la Comarca la Sidra va poder vese na Casa la Cultura de Sama dende esti llunes 19 de febreru hasta’l 7 del prosimu mes de marzu. L’amuesa ta organizada pol Serviciu de Mocedá y la Oficina de Normalización Llingüística de la Mancomunidá Comarca de la Sidra.

Nesta última edición del concursu, el premiu foi pal álbum “Les Cuentes de Gasparín” del debuxante Alfonso Zapico Fernández. Amás del trabayu de Zapico van esibise una ventena de trabayos escritos n’asturianu.

Esti miercoles 13 de febreru fina na Casa de Cultura de Colunga el tiempu d’esibición de l’amuesa itinerante”Miraes 2007”, una esbilla del trabayu fechu polos reporteros gráficos asturianos durante l’añu 2006 que se vien esponiendo en Colunga dende’l 25 del mes pasáu. L’amuesa, formada por más de 90 semeyes d’actualidá, ta organizada pola Asociación Profesional de Fotoperiodistes Asturianos y la Consejería de Cultura del Principáu.

Hasta’l 15 de febreru va poder vese en dellos centros culturales d’Asturies una esposición itinerante qu’amosa los meyores trabayos de la quinta edición del concursu de cómic n’asturianu de la Comarca de la Sidra”. La primer llocalidá n’agospiar l’amuesa va ser Nava pa viaxar dempues a otros centros culturales d’Asturies como los de Llangreu y Llanera.

L’amuesa, que lleva por títulu “Cómic n’asturianu” ta organizada pol Serviciu de Mocedá y la Oficina de Normalización Llingüística de la Mancomunidá Comarca de la Sidra. Entotal van esibise una ventena de trabayos escrites n’asturianu qi’espeyen l’actualidá del cómic fecho n’Asturies.

A partir del miercoles 6 de febreru (19:30 hores) va tar disponible nel centro municipal de La Arena en Xixón l’amuesa del autor ovetense Carlos Barral, “Hechos Inexplicables V. Poesía + Pintura”. Esta esposición itinerante, enantes pasó por Grau, Corvera, Aviles y Mieres, axunta la producción poetica de Barral col so acercamientu a la pintura. Organizada pol Ateneu Obreru de Xixón, l’amuesa va poder vese hasta’l vienres 29 de febreru.

Carlos Barral ye articulista, illustrador, escritor, poeta y manager de Tejedor ente otres ocupaciones. Dende 1994 coodirixe de la empresa de xestión de conciertos y actividaes culturales “El Cohete”, foi finalista nel concursu de poesía “Asturias Joven” en 2003 col poemariu “La erótica del desatino” y debuta como pintor en xineru del añu pasáu na Casa Cultura de Grau con esta amuesa qu’agora aporta a Xixón.

Celsius 1538 ye la temperatura de fusión del aceru ya’l nome de l’amuesa que’l centru municipal de El Llanu, na planta baxa, ufre del pintor Rafael Fernández Aviles hasta finales d’esti mes de febreru. Fernández Aviles fai usu de los tonos ocre y de les formes que se xeneren a partir de la tresformación del aceru por mor de la so esposición al calor. L’amuesa ta organizada pola Fundación Municipal de Cultura, Educación y Universidá Popular de Xixón y pue visitase de baldre n’horariu de 08:00 a 22:00 hores.

La Galería xixonesa Espacio Líquido va participar en ARCO 2008 con tres artistes, un d’ellos l’avilesina Rebeca Menendez, que concurre a la feria internacional d’arte que a cellebrar en Madrid, con serigrafíes y fotografíes. Amás de l’asturiana, Espacio Líquido llevará a ARCO al vidiuartista holandes Eelco Brand y a la mallorquina Amparo Sard.

Rebeca Menendez tien espuesta obra na esposición, recientemenmte inaugurada na Universidá d’Uvieu, ” ¿Que Arte? Discursos sin fronteras”; “Entre Arte II” nel Palaciu de Revillaxixeu de Xixón; “Hasta el infinito y más allá”, nel CAS de Sevilla o “Luz Bit”, que pudo vese nel museu Barjola de Xixón. En ARCO va tar presente del 13 al 19 d’esti mes de febreru.

Esti llunes 4 de febreru fina l’amuesa dedicada a la obra del reporteru gráficu venezolanu Enrique Abril, que se vien esponiendo dende’l pasáu 11 de xineru na sala d’esposiciones del centru municipal de El Coto en Xixón. La entrada ye llibre y los horarios son de 10:00 a 13:30 y de 17:00 a 21:00 hores. Esta amuesa del primer reporteru gráficu de venezuela ye una inciativa de l’Asociación Cultural Venezolano-Asturiana Araguaney sofitada pol ayuntamientu de Xixón.

El centru de El Coto recieye parte de les más de 300 imáxenes qu’Avril espublizó en medios como “Photo-Gazelle”, “El Cojo Ilustrado”, “Actualidades” y “El Nuevo Diario”, durante la so carrera. Henrique Avril, morrió el 27 de xunu de 1950 en Puertu Cabello y dende entós cada ventisiete de xunu cellebrase’l día’l periodista en Venezuela.