Patrimoniu

Hai una “necesidá manifiesta” de que les escavaciones nel yacimientu romanu de La Carisa, na llende ente L.lena y Ayer, continúen na prósima temporada de veranu. Asina lo mantienen los arqueólogos responsables de los trabayos, qu’esperen un alcuerdu a lo llargo de los prósimos meses ente Caxastur y el Principáu que permita sufragar una prollongación de la investigación.

Un día depués de la vista que cursó al yacimientu el director xeneral de Promoción Cultural y Política Llingüística, Carlos Madera, quien alitó a los ayuntamientos d’Ayer y L.lena a tramitar la declaración de Bien d’Interés Cultural pal complexu arqueolóxicu, los responsables del llabor nel picu Curriel.los destaquen la importancia de los afayos más recientes, ente ellos una fortificación.

Según precisó Jorge Camino, qu’integra l’equipu d’arqueólogos de La Carisa xunta Yolanda Viniegra y Rogelio Estrada, los restos del gran campamentu romanu atopáu na cordal de Carracéu ocupen una superficie de 15 hectáries y evidencien que na zona esistió un “teatru bélicu” de gran importancia, polo que llamen a les instituciones a mantener el sofitu que-y vienen dando al so llabor dende’l descubrimientu’l yacimientu, hai agora dos años.

Los directores de les escavaciones na llende ente Ayer y L.lena, qu’asoleyaron monedes y otros oxetos dataos nel sieglu I antes de Cristu, completen agora xeres de documentación y estudios xeolóxicos, y enfótense na posibilidá d’entamar una esposición coles pieces afayaes, si bien “ye una idea subyacente que nun sabemos bien cuándo se concretará”, matizó Camino.

L’Ayuntamientu de L.lena ta acabante aprobar en Plenu la propuesta de solicita-y a la Conseyería de Cultura, Comunicación Social y Turismu la declaración de Bien d’Interés Cultural pa los restos afayaos na cordal de Carracéu, que respuende al deseyu de l’Asociación d’Amigos de La Carisa, collectivu constituyíu pa defender la promoción y conservación del yacimientu.

Madera apoya la reconocencia del yacimientu romanu de La Carisa como Bien d’Interés Cultural

El yacimientu romanu de La Carisa envereda’l camín pa la so declaración como Bien d’Interés Cultural (BIC). El director xeneral de Promoción Cultural del Principáu, Carlos Madera, acoyó güei con bonos güeyos esa posibilidá nel trescursu d’una visita al yacimientu arqueolóxicu na que los alcaldes d’Ayer y L.lena, conceyos en cuya llende s’alluga el descubrimientu, apostaron por abrir sendos centros d’interpretación del antiguu campamentu.

Na so incursión nel picu Curriel.los, Madera dio por fechu el sofitu de la Conseyería de Cultura a la catalogación del conxuntu de La Carisa baxo’l másimu nivel de protección que contempla la llexislación autonómica de patrimoniu, y alitó l’apertura d’un espediente nesi sen.

Un pasu al que yá contribuyó l’Ayuntamientu de L.lena, que ta acabante aprobar en Plenu la propuesta de solicita-y a Cultura la declaración de Bien d’Interés Cultural pa los restos afayaos na cordal de Carracéu, y que respuende al deseyu de l’Asociación d’Amigos de La Carisa, collectivu constituyíu pa defender la promoción y conservación del yacimientu.

Datáu nel sieglu I antes de Cristu y descubiertu hai agora tres años, el conxuntu arqueolóxicu asitiáu na llende ente Ayer y L.lena derívase d’un gran campamentu romanu de 15 hectáries d’estensión emplegáu con toa probabilidá por lexones qu’aportaben dende Lleón, según afitaron afayos recientes de monedes y otros oxetos de la época.

Reivindicar el patrimoniu industrial pa saca-y partíu como industria cultural. Espertos d’Arxentina, Francia, España y el Reinu Xuníu aconceyarán con esi oxetivu en Xixón ente’l 22 y el 25 de setiembre nunes xornaes entamaes pola asociación Industria, Cultura y Naturaleza (Incuna), que quier revisar esperiencies internacionales na didáctica del patrimoniu industrial.

Con centru na Escuela Superior d’Inxenieros Industriales de Xixón, en cuya aula magna desendolcaránse les sesiones y ponencies, les xornaes d’Incuna traerán a Asturies a Jorge Tartarini, director del Muséu del Agua de Buenos Aires; André Guillerme, responsable’l Centru Nacional Arts et Metiers de Francia; James Douet, miembru’l Comité internacional pal caltenimientu’l patrimoniu industrial; y Marcelo Martín, técnicu del Institutu Andaluz de Patrimoniu Hestóricu.

Les xornaes, que tamién contarán cola participación de les profesores universitaries Roser Calaf y Olaia Fontal, sedrán inaguraes el 22 de setiembre na Escuela d’Hostelería de Xixón, allugada nel paséu de Begoña, y culminarán nuna visita final a la Ruta los molinos y la fábrica d’El Gaitero en Villaviciosa, el Muséu’l Xurásicu y una mina d’acebache n’Oles.

Amás d’esos destinos, los asistentes al congresu podrán participar en visites guiaes opcionales a la Universidá Llaboral de Xixón, el Muséu’l Ferrocarril, el Muséu Etnográficu del Pueblu d’Asturies, el Xardín Botánicu, la ciudadela de Capua y les instalaciones de la vieya industria ‘Litografías Viña’.

El preciu de matrícula afitáu por Incuna pa la participación nes xornaes ye de 20 euros pa estudiantes, paraos y pensionistes, a los qu’hai que sumar 30 euros más si s’opta por asistir a la escursión final. Con calter xeneral, los asistentes deberán pagar 40 euros pola inscripción, más otros 40 euros en casu de querer asistir a la visita guiada.

Programa íntegru de les xornaes en formatu pdf

Nin los fondos documentales de que se fala son especialmente ricos, nin paez esistir un proyectu claru. Esi ye’l diagnósticu de Juaco López, director del Muséu Etnográficu’l Pueblu d’Asturies -l’equipamientu museísticu xixonés más visitáu en 2003- sobro la eventual xunificación de fondos hestóricos de Xixón nun mesmu edificiu, proyectu pal que l’Ayuntamientu valora les posibilidaes de la vieya fábrica de tabacos de Cimavilla.

N’opinión de López, que dirixe un muséu al qu’accedieron más de 74.000 visitantes a lo llargo del añu pasáu, les colecciones que se prevén allugar nel futuru equipamientu son en xeneral “bastante probes”, escluyendo los llibros que les integren, y nun paez haber una idea clara y definida pa concretar esa xunificación de fondos.

Poro, entiende’l director del Pueblu d’Asturies, l’atención debería desplazase de proyectos futuribles a fechos factibles como la prollongada desapaición de colecciones y documentos d’altu valir, nun momentu nel que “cada vez se tán tirando más coses a la basoria”.

Magar que López valora l’apoyu de les instituciones na financiación del Pueblu d’Asturies -“somos de los más agraciaos nesi aspectu”, asegura-, el director del principal centru etnográficu del Principáu reivindica un aumentu d’inversiones nos museos, que se ven llimitaos nel so funcionamientu diariu por cuestiones como, nel casu l’etnográficu xixonés, carecer d’un “bon almacén”.

Xixón piensa na Fábrica de Tabacos p’allugar l’archivu hestóricu xunificáu de la ciudá

La Fábrica de Tabacos de Cimavilla, posible sé del archivu hestóricu xunificáu de Xixón. L’equipu de gobiernu municipal de la ciudá inclúi el centenariu edificiu en desusu por Tabacalera na llista de candidatos a agospiar la hemeroteca provincial y la biblioteca hestórica, integrada por volúmenes del Padre Patac y de Patricio Adúriz.

Según publica na so edición de güei el diariu ‘La Voz de Asturias’, el vieyu proyectu municipal d’axuntar los fondos hestóricos de la ciudá pa racionalizar les consultes y facilita-yos el llabor a los investigadores podría materializase nún de los espacios qu’agora tán llibres na antigua factoría xixonesa, anque l’inmueble de Cimavilla nun ye l’únicu nel que piensa l’Ayuntamientu pa llevar alantre los sos planes.

Nesti sen, la única decisión que la Corporación xixonesa asoleya como firme ye la xunificación de los fondos hestóricos nun mesmu allugamientu pa evitar la dispersión con qu’anguaño tienen que s’enfrentar los ciudadanos interesaos en consultar fondos hestóricos sobro la ciudá, qu’han acceder a la Biblioteca Asturiana’l Padre Patac na Biblioteca Xovellanos y deben treslladase a les inmediaciones del Parque la Fábrica’l Gas, en L’Arena, pa consultar la hemeroteca.

L’Ayuntamientu tien previsto asitiar na factoría de Cimavilla la pinacoteca municipal, nuna decisión cuya definitiva puesta en práctica nun depende n’esclusiva de la Corporación municipal.

La vertiente más popular de la evocación de los dinosaurios. El Muséu’l Xurásicu, allugáu en Colunga y afitáu como l’equipamientu cultural más visitáu d’Asturies dende la so apertura n’abril pasáu, busca captar nuevos públicos con una esposición de cómics, illustraciones, fotografíes, cromos, troquelaos y lliteratura al rodiu de los dinosaurios entamada pol escritor xixonés Juan José Plans y que güei s’abre a les visites.

Espertu na narrativa escrita y audiovisual de la ciencia-ficción, Plans lleva a la sala d’esposiciones del muséu de la rasa de San Telmo un garrapiellu de materiales atropaos d’estremaes fontes y documentaos con fiches y bibliografía, que tarán estructuraos en 14 estayes y amosarán-y al públicu la recreación de los dinosaurios nos océanos, en “mundos perdíos y prohibíos” y n’ambientaciones del futuru.

L’amuesa contién amás un espaciu dedicáu a les representaciones de dinosaurios vinculaes d’algún mou a Asturies. Nesti sen, Plans aprovechará la inaguración de la esposición -que s’abre col títulu ‘La Gran Aventura de los Dinosaurios’- pa presentar el so llibru ‘Cuélebre, el dragón’, un volume de 172 páxines editáu nel añu 2001 pola casa Brand.

El Muséu’l Xurásicu superó en sólo los sos primeros cuatro meses de vida les cien mil visites, una cifra que va más allá de les 85.000 entraes despachaes a lo llargo de tol 2003 pol que nesi añu foi el muséu más visitáu d’Asturies, el de la Minería y la Industria, y qu’afita l’equipamientu de Colunga como’l de mayor potencial turísticu del Principáu.

El Muséu’l Xurásicu consolídase como gran atractivu turísticu, con cien mil visites en cuatro meses

Mieres da un pasu decisivu nel caltenimientu’l so patrimoniu etnográficu. La Conseyería de Cultura, Comunicación Social y Turismu sufragará con 24.000 euros el remocicamientu integral de la casona llamada de Fernando y Jacoba, considerada la primer edificación de Gallegos, qu’albergará les instalaciones centrales del muséu etnográficu de la llocalidá y permitirá ampliar la colección del equipamientu.

El preste de Cultura, que güei publica’l Boletín Oficial del Principáu d’Asturies (BOPA), inyectará dineru nel proyectu técnicu pa la recuperación de la casona, edificada nel sieglu XVII y anguaño enforma deteriorada, y condiciona l’ayuda a la ellaboración d’un proyectu museolóxicu y museográficu qu’habrá ser supervisáu pola Conseyería.

La colección etnográfica de Gallegos abrióse al públicu en 1997 a partir de les pieces que l’asociación de vecinos de la llocalidá acumulara nes vieyes escueles, inmueble nel qu’hasta agora s’amosaba el patrimoniu’l muséu con importantes llimitaciones pa la organización y espoxigue de la colección del equipamientu. L’alcalde de Mieres, Luis María García, y la conceyala de Turismu, Isabel Sánchez, presentaron en marzu de 2003 los planes de meyora pal muséu etnográficu de Gallegos.

L’ayuda del Principáu pa da-y puxu a esi equipamientu enmárcase na resolución de la convocatoria de subvenciones pa inversiones de los museos asturianos, que güei publica el BOPA y que beneficia amás a los equipamientos etnográficos de Grao, que recuperará un llagar; de Casu, que mercará una bandurria y meyorará la so fontanería y calefacción; de Quirós, qu’emplegará la subvención n’alquirir materiales; y del vinu, en Cangas de Narcea.

En total, Cultura reparte 116.000 euros ente los museos y colecciones allugaos nel Principáu y sofita inversiones ente les que sobresalen la fechura d’un proyectu pa la pinacoteca de Llangréu (33.000 euros), la meyora de la Casa de l’Apicultura de Bual y la creación d’un circuitu peslláu de televisión na Casa Natal de Xovellanos, el Muséu Nicanor Piñole y el parque arqueolóxicu de la Campa Torres, en Xixón.

Promulgación de la midida nel BOPA

Cangas de Narcea rescata la industria tradicional del fierru. L’Ayuntamientu y la Conseyería de Cultura, Comunicación Social y Turismu abren al públicu el remocicáu complexu del Mazu d’Abaxu, una de les instalaciones dotaes de ferrería y fragua qu’abastecía de preseos a la comarca y qu’agora ensértase nun itinerariu turísticu qu’inclúi la visita a la casa natal del dramaturgu Alejandro Casona.

Según informa l’Ayuntamientu de Cangas nuna nota asoleyada esta mañana, un guía esplica a los visitantes el procesu col que, al traviés d’una mecigaya de fueu ya enerxía hidráulica, los habitantes del conceyu algamaben les ferraúres, los clavos y les ferramientes necesaries nel so llabor cotidianu n’hasta cuatro mazos como’l qu’agora s’amuesa a los turistes.

La promoción municipal de los recursos de Cangas de Narcea complétase cola inclusión, nel mesmu paquete qu’inclúi la visita al Mazu d’Abaxu, del accesu a la casa l’autor teatral Alejandro Casona, onde’l dramaturgu nació nel añu 1903 y allugada nel paraxe de Besullu.

El serviciu de visites guiaes funciona nel tramu final de la selmana, ente’l xueves y el domingu, en tres tandes opcionales: de 14 a 16 hores, de 16 a 18, y de 19 a 21 hores.

El futuru d’ocho grandes proyectos culturales p’Asturies escamplará a partir de setiembre. La Conseyería y el Ministeriu de Cultura negociarán na seronda la viabilidá o liquidación del Muséu militar de Trubia, y del remocicamientu de la Ilesiona de Xixón, el cascu vieyu de Llastres, el monasteriu de La Mercé de Raíces y la Casa Hevia, en La Villa. Toes eses obres foron comprometíes pol ex ministru de Fomentu, Francisco Álvarez Cascos, con cargu al denomináu 1 por cientu cultural, pero tán nel aire por carecer de presupuestu.

Asina lo avanzara el pasáu llunes, na so primer visita a Asturies, la ministra de Cultura, Carmen Calvo, quien precisó qu’antes de fin d’añu firmaránse sendos convenios pa sacar alantre, como actuaciones prioritaries, el proyectu de la cueva de Tito Bustillo y el remocicamientu’l monasteriu de San Salvador de Corniana. El restu de proyectos comprometíos por Cascos al traviés del 1 por cientu cultural -obligación de cada ministeriu de reservar esi procentaxe p’acciones culturales nes inversiones de más de 100 millones de pesetes- queden nel aire, pero Calvo nun concretó nada más allá d’un compromisu n’abstracto: Respetaránse sólo les obres yá n’execución.

Eses iniciatives yá en marcha son cuatro: la igua de les cubiertes de la catedral, del monasteriu uvieín de San Pelayo y del entornu monumental de Valdediós, amás del Plan director del prerrománicu, pal que Principáu y Gobiernu central anuncien especial procuru.

Na llista opuesta, la de los descartes, figuren el remocicamientu de la Torre’l Reló en Figueiras, el mercáu de La Pola Siero y la ilesia cabraliega de Santa María de Llas, amás de les actuaciones yá citaes en Trubia, Xixón, Llastres, Castrillón y La Villa. Sobro toos esos proyectos habrán falar darréu fine’l veranu la ministra y la conseyera de Cultura, Ana Rosa Migoya, que’l llunes presenció n’Uviéu la declaración d’intenciones de Calvo pa los proyectos del 1 por cientu cultural.

Según publica na so edición de güei el diariu ‘La Voz de Asturias’, Álvarez Cascos dexó nel aire proyectos culturales cifraos en más de 25 millones d’euros, que foron públicamente comprometíos pero que llueu nunca nun se concretaron nuna planificación con dotación presupuestaria.

El Ministeriu de Cultura da-y prioridá a les actuaciones en Tito Bustillo y el monasteriu de Corniana

El yacimientu prehestóricu de Tito Bustillo y el monasteriu de San Salvador de Corniana. Eses son les dos prioridaes del Ministeriu de Cultura p’Asturies en 2004 y como tales figurarán, antes de fin d’añu, en sendos convenios firmaos col Gobiernu autonómicu. La ministra de Cultura, Carmen Calvo, precisó n’Uviéu que namás va realizase el 12 por cientu de los proyectos culturales comprometíos pal Principáu pol ex ministru de Fomentu, Francisco Álvarez Cascos.

Y sedrá esa cifra, sostuvo Calvo, porque sólo el 12 por cientu de les iniciatives anunciaes por Cascos con cargu al denomináu 1 por cientu cultural -porcentaxe destináu por llei a actuaciones culturales en cada inversión ministerial que supere los 100 millones de pesetes- tán en marcha. El restu, una llarga llista na que s’inclúin proyectos como’l Muséu Militar de Trubia, quedarán en suspensu por ser anuncios que, según Calvo, ficiéronse en ruedes de prensa “nes que llegaron a comprometese 28 millones d’euros en diez minutos” y llueu nunca nun se concretaron, careciendo incluso de dotación presupuestaria.

Nesti sen, la ministra de Cultura aseguró que nos ocho años de gobiernu’l Partíu Popular, n’Asturies namás s’invirtieron 7 millones d’euros con cargu al 1 por cientu cultural, una cifra enforma menor a la comprometida y qu’amás repartióse acordies col collor políticu de los ayuntamientos: Tres cuartas partes del dineru recibiéronlu iniciatives allugaes en territoriu de corporaciones llocales gobernaes pol PP.

Calvo quier cambiar esa tendencia y sostién que “nun va parar obres que yá tán en marcha”, pero avisa darréu que namás va respetar aquellos proyectos nos que’l so ministeriu tien “obligaciones xurídiques y presupuestaries” de continuidá respecto a los sos predecesores: los que yá tán n’execución.

Nel ‘purgatoriu’ de les iniciatives queden por agora, poro, les actuaciones qu’anunció Cascos pero que nun tienen “reflexu presupuestariu”, y qu’entrarán na nueva planificación que Principáu y Ministeriu concretarán nesta llexislatura. Antes de nada, sacaránse alantre la meyora de Tito Bustillo, manteniendo’l proyectu que defende’l Gobiernu autonómicu y esperando, según la ministra, la collaboración del Ayuntamientu de Ribesella; y la recuperación integral del monasteriu de Corniana, onde, aseguró Calvo, “hai un claustru qu’esbarrumba y otru que yá ta remocicáu”, n’alusión a l’actuación yá fecha con perres del Principáu y a la pendiente de financiación del Estáu.

Nes dos hores de xuntanza que mantuvieron ayeri la ministra y el presidente autonómicu, Vicente Álvarez Areces, ocuparon asinamesmo un llugar destacáu el Plan Director del Prerrománicu, les diverses efemérides qu’Asturies cellebrará nel próximu 2008 y el 25 aniversariu que la Fundación ‘Príncipe de Asturias’ conmemora a partir de la seronda del añu qu’entra.