Patrimoniu

La Plataforma pola Defensa del Patrimoniu Cultural de Corvera presentó ayeri ente’l Rexistru Xeneral d’Aviles un manifiestu de denuncia firmáu por más de 700 ciudadanos, asociaciones culturales, vecinales y agrupaciones polítiques, nel que se pide la dimisión del xefe de Serviciu de Patrimoniu Cultural d’Asturies, Ignacio Alonso, pola firma d’un informe ensin base llegal pal desmantelamientu de los horros y treslláu d’una panera, que valió mesmo pal Ayuntamientu de Corvera como a la promotora de Los Balagares pa que’l primeru dictare resolución favoratible, ‘incumpliendo la llegalidá vixente’, y pa que’l segundu ‘llantare esos horros envede desmontalos, poniendo de manifiestu’l despreciu d’esta promotora pol patrimoniu cultural asturianu’.

L’escritu, que fue remitíu a la conseyera de Cultura, Ana Rosa Migoya, fue firmáu por más de 700 persones y avaláu por estremaos colectivos y asociaciones, ente los que s’encuentren el Conceyu d’Estudios etnográficos BELENOS , la Plataforma Cívica Cellagú , l’Asociación Astur – Breithz , asociaciones vecinales ; AVALL ( Asociación de vecinos y amigos de Llanes), AVAM ( Asoc. Vecinos y amigos de Muros ), ACA , AVV Xunios – Los Campos , y les agrupaciones polítiques d’Andecha Astur y el PCPE.

La Plataforma anuncia qu’esta vulneración de la llei va ser puesta en conocimientu de la fiscalía pa qu’actúe en derechu y se depuren responsabilidaes mesmo al xefe de Patrimoniu Cultural como al Ayuntamientu de Corvera y la promotora Grupo Proinasa – Dolabay – Erma SA.

La propuesta de les nueves directrices rexonales d’Ordenación del Territoriu aprobada pol Gobiernu del Principáu quier prohibir que se llanten les casones tradicionales asturianes de los núcleos rurales y que, al tiempu, estes edificaciones valgan como exemplu pa les nueves viviendes del campu. Estes nueves normes, qu’agora tienen de sometese a debate políticu, vienen a sustituyir a les actuales que daten de 1991.

Na so propuesta, el Gobiernu prohibe que s’echen abaxo les cases d’espíritu tradicional, cola única escepción de que ‘perdieren de forma irreparable la tipoloxía tradicional’. Dientro de les esixencies d’estes nueves directrices les cases han d’adaptase al entornu y tamien quedaríen prohibíes les edificaciones de característiques asomeyaes a les zones urbanes.

El detalle d’estes directrices llega’l puntu de marcar la franxa ‘onde les cubiertes camuden de teya a pizarra’, pa lo que se va trabayar sobre un mapa qu’especifique les zones d’usu d’unos materiales o otros.

El valle de Cuna y Cenera quier sacar alantre un proyectu nel que lleva trabayando más de dos años y que se conoz como ‘El valle encantáu’. Una iniciativa que busca facer una gran sienda mitolóxica, asentando un circuitu cultural centráu na mitoloxía asturiana; recuperando pa ello’l pueblu abandonáu de La Foz y llevantando un pueblu tradicional asturianu nel que los turistes puedan conocer les costumes típiques del país.

El proyectu que ta firmáu pol artista mierense Antonio García ‘Llongueras’, recibió una gran acoyida per parte de les asociaciones de vecinos y los hosteleros del valle. Sicasí, l’ambiciosu proyectu necesita d’una fuerte inversión económica, pa lo que tien solicitao la implicación del Principáu pa llograr los dos millones d’euros que valdría, en principiu, sacar alantre esta propuesta.

La Plataforma pola Defensa Cultural de Corvera denuncia y llamenta la estroza de los horros de Truyes per parte de la empresa que ta construyendo una urbanización de luxu llamada “Los Balagares”. Les pieces de gran valor etnográficu, formaes por cuatro horros uníos dos a dos, foron tiraos embaxo ayeri «ensin cuntar colos permisos qu’estipula la llei, pero cola complicidá del Ayuntamientu del xefe de Patrimoniu de la Conseyería de Cultura», según manifestaron los miembros de la Plataforma que lleven meses lluchando contra esta obra.

La Plataforma pola Defensa Cultural de Corvera denuncia amás que’l xefe de Patrimoniu de la Conseyería de Cultura «sin siguir los trámites llegales d’aprobación y audiencia, escribió una carta ensin validez llegal autorizando’l desmantelamientu y almacenáu de los horros», al tiempu que la empresa constructora fue más allá y, envede desmantelar, «directamente derribólos».

Informes de prestixosos hestoriadores afalagaben la importancia d’estos horros, de los qu’esisten mui pocos exemplares n’Asturies y namás qu’otru en toa Corvera

Andecha Astur denuncia nun comunicáu l’estáu de deterioru nel que s’alcuentren les Torres de Donlebún en Castropol, un edificiu del sieglu XVI, declaráu monumentu nel so día y qu’anguaño cuerre peligru d’esbarrumbar, según alerta la formación nacionalista.

Nun escritu presentáu nel Ayuntamientu castropolense los nacionalistes encamienten a l’administración municipal a entamar midíes urxentes pa la recuperación del monumentu, anguaño de titularidá privada. Andecha pide que s’obliga a los actuales propietarios a actuar nel edificiu hestóricu o que’l propiu Conceyu, d’oficiu, declare la rehabilitación forzosa de les torres. Nesi sen, la formación política, cita l’encamientu fechu pola Comisión de Patrimoniu del Principáu en marzu de 2002 col que se-y remembraben a los propietarios les sos obligaciones col monumentu acordies cola llei sobre Bienes d’Interés Cultural(BIC).

El muséu de la Cueva de Tito Bustillo en Ribesella ye una de les obres que van licitase esti añu dientro del Plan de la Prehistoria pal oriente d’Asturies elaboráu pola Conseyería de Cultura. La titular del departamentu, Ana Rosa Migoya, presentó esti llunes 20 los conteníos del plan pa difundir el patrimoniu prehestóricu d’una rexón d’Asturies que cuenta, amás de Tito Bustillo, con xacimientos como El Llonín y El Sidrón, amás del nomáu ídolu del Peñatu.

El centru d’interpretación del Peñatu va ser el primeru de los equipamientos puestos en marcha pol Principáu y el segundu el de la fauna glacia de la Cueva d’Avín, n’Onís. Entrambos proyectos pueden tar remataos pa empiezos del veranu.

D’ente los proyectos elaboraos por Cultura pa difundir el patrimoniu prehestóricu del oriente asturianu l’entamu estrella ye’l del Muséu de la Cueva de Tito Bustillo en Ribesella pal qu’hai presupuestáu un total de 10,6 millones d’euros y que va licitase a lo llargo d’esti añu, anunció la conseyera Migoya.

Los gobiernos de Galicia, Cantabria, País Vascu y Asturies roblaron una declaración conxunta na qu’encamiénten-y a la UNESCO la declaración de les sos rutes xacobees como Patrimoniu de la Humanidá. La propuesta común pide l’ampliación de les declaraciones ya reconocíes a otres rutes y reivindica’l papel hestóricu desenvueltu pol Camín del Norte como vía de comunicación ya intercambiu cultural.

Las cuatro comunidades atlántiques cuiden que tres la declaración en 1993 del nomáu Camín Francés como Patrimoniu Mundial de la UNESCO y l’ampliación en 1998 a les cuatro rutes principales de Francia, quedaron fuera víes xacobes de singular importancia y que hay de incluir na declaración, según manifestó el director xeneral de Cultura del Principáu, Carlos Madera. Les dos rutes que s’inxeren en territoriu asturianu seríen la que diba d’Uviéu a Compostela y la del camín de la costa.

Madera aseguró que l’administración asturiana lleva invertíos alrodiu seis millones d’euros nel Camín xacobéu y cifró en venti mil persones les qu’acudieron en 2005 a Asturies siguiendo la ruta del antigu camín a Santiago.

Tres la declaración conxunta de les tres comunidaes del norte, agora ye’l Conseyu del Patrimoniu Hestóricu Español l’encargáu de dar el vistu bonu a la so inclusión nel listáu de solicitúes pa la UNESCO y esperar después a que l’organismu mundial lo aprebe.

Para saber si se acepta o no la propuesta del Norte, el Consejo del Patrimonio Histórico Español debe dar su visto bueno a la inclusión en el Listado de Patrimonio Mundial del camino de Santiago y luego, a esperar y seguir el guión marcado por la UNESCO.

Andecha Astur de Noreña denuncia nun escritu el derribu d’una casona del sieglu XVII nel barriu de Sorribes na villa condal. L’edificiu, catalogáu, baltióse, según la formación nacionalista, ensin autorización de la Conseyería de Cultura nin de la CUOTA y l’Ayuntamientu concedió la llicencia urbanística pal derribu ensin cuntar con esa autorización.

Enantes del entamu de les obres Andecha presentó alegaciones al informe favorable de la Comisión de Patrimoniu y dende entós tábase a la espera de que la Conseyería concediera o non l’autorización a la empresa que tien la propiedá sobre l’edificiu catalogáu. L’agrupación noreñense de la organización nacionalista denuncia agora que se echó abaxo la casona ensin esperar el permisu correspondiente pa facelo. Nel escritu de denuncia afírmase que’l pasáu 6 de febreru escomenzó’l derribu del edificiu hestóricu polo qu’esta organización considera que dende esi día vien executándose un proyectu “non autorizáu al cualu, sorprendentemente, l’Ayuntamientu dio llicencia d’ obres.

La formación nacionalista pregúnta-y al alcalde de Noreña nel escritu presentáu nel rexistru municipal: “¿ Por que se dio llicencia pa demoler un bien de interés cultural, artísticu y monumental?” y pídi-y a la másima autoridá municipal qu’aclarie públicamente les razones que llevaron al Conceyu a conceder el permisu ensin l’autorización del Principáu.

La desestimación pol Tribunal Supremu del recursu presentáu pola empresa causante de la estroza del castru de Cellagú n’Uviéu, la cantera Readymix Asland, nuna sentencia conocida va unos díes ye’l motivu pol que l’agrupación carbayona d’Andecha Astur pide la dimisión de la conseyera de Cultura y del Director de Promoción Cultural, como responsables de “dar vía llibre” al procesu que llevó a la destrución del xacimientu arqueolóxicu.

La formación nacionalista cuida que la sentencia del Supremu -avalando otra del Tribunal Superior de Xusticia d’Asturies- ye razón bastante pa desixir responsabilidaes polítiques a los responsables de la Conseyería por permitir lo sucedío ya que, según afirma’l portavoz d’Andecha Ezequiel Sánchez: “esti castru foi arrasáu por persones desconocíes, ensin que se ficiere dengún tipu d’investigación seria pola parte los responsables de Cultura y llueu, a la escontra de les opiniones de los historiadores, foi desmantelau pa ser treslladáu, nun sabemos cuando, a una finca pública, dexando asina llibre’l tarrén pa que la empresa Readymix Asland pueda siguir col frente de cantera onde tenia previsto”.

Andecha pide amás de la dimisión de la conseyera Migoya y de Carlos Madera la restitución de los restos del xacimientu al so sitiu orixinal, al considera que “tres la sentencia del Tribunal Supremo la empresa nun podrá siguir trabayando nesi frente de cantera enxamás, colo que carez de tou xaciu’l so camude de llugar, pa poder visitalu, a denguna otra zona del conceyu, siendo esta la única apropiada por ser la, orixinalmente, escoyida polos antepasaos de nueso pal so allugamientu”, manifestó el portavoz de la organización nacionalista.

L’agrupación local d’Andecha Astur presentó nel rexistru de la Conseyería de Cultura nel que se pide a esti departamentu qu’asuma les obres d’arreglu del órganu de la ilesia de Santa María de la Corte, inutilizáu por mor d’unes obres entamaes pol propiu Principáu. La formación nacionalita encamienta a la Conseyería pa que faga cumplir les sos responsabilidaes respective a esta estroza del órganu históricu a la empresa encargada de los trabayos de restauración del monumentu.

Los fechos denunciaos por Andecha remóntense al añu 2003 nel que por mor de les obres d’igua de la ilesia de La Corte una avería d’agua dexó inutilizáu l’órganu del templu. Trescurríos casi dos años del accidente A.A. pide agora a Cultura qu’asuma l’arreglu del instrumentu.