Patrimoniu

Redacción.

El sábadu que vien, 2 de xunu, dende les once la mañana va impartise nes instalaciones del Museu Etnográficu del Oriente d’Asturies el taller ‘Llicores pa les cuatro estaciones’, impartíu pola conocida artesana Lola Mencía. El cursu ta basáu na conocencia d’un interesante y perabondante recetariu pa la ellaboración de llicores caseros coles frutes propios de casa estación.

Nel mesmu, enseñense distintes teuniques de formentar la bebida, asina como conocimientos básicos sobre conservación, decoración y presentación de los mesmos.
El taller va tener una duración aproximada d’ocho hores y va ser fundamentalmente práuticu.

P’apuntase pue acercase a Barriu Llacín e/n, en Porrua (Llanes), onde tien la sede’l Museu Etnográficu del Oriente, llamar al telefonu 985402547 o al ponese en contautu al travies de la so páxina n’internet www.porrua.net

Páxina web del Muséu Etnográficu del Oriente d’Asturies

Redacción.

El Conseyu de Gobiernu del Principáu d’Asturies aprobó esti xueves 17 de mayu l’espediente pol que s’oficialicen los topónimos tradicionales como los propios del conceyu de Casu. A lo llargo d’esta llexislatura 2003-2007 aprobáronse yá los espedientes toponímicos de ventitres conceyos, anque’l so usu en dalgunos d’ellos ta siendo mui pequeñu.

El procesu d’oficialización de los topónimos faise por pidimientu de los conceyos, que son los qu’entamen el procesu. En 2005 entamaron a aprobase espedientes, los primeros fueron los de Carreño, el Franco y Llanes. En 2006 namás Nava, Xixón, La Ribera y Colunga pasaron pela aprobación del Conseyu de Gobiernu. Esti añu, últimu de la llexislatura aprobáronse los espedientes d’Amieva, Corvera, Grau, Noreña y ayeri, el de Casu.

Redacción.

Los responsables del Ayuntamientu d’Ayer dieron entamu a les obres pa dotar al conceyu d’un Centru d’Interpretación de la Vía Carisa. La instalación va tar asitiada en La Enfistiel.la, Nembra y apaez alredor de la vía d’orixe romau y de los restos arqueolóxicos alcontraos na zona. El presupuestu del Centru, sufragáu pol programa Proder II de la Montaña Central, asciende a 342.576,79 euros y inclúi la rehabilitación del edificiu y la execución museográfica. Les obres van entamar ensiguida y van dotar a la zona d’aparcamientu, amás d’una sienda pa los visistantes

El Centru d’Interpretación ñaz col envís d’averar al visitante al conocimientu de La Carisa y a tol procesu de formación de la rede de caminos del país y la so forma de dir creandose.

La Vía de La Carisa ye la primer gran vía de comunicación construyida n’Asturies con motivu de la conquista romana, afalada pol llegáu d’Octavio Augusto, el xeneral Publio Carisio, de quien garra’l nome. D’esti vieyu camín conservase na zona parte del trazáu orixinal.

La seleición bretona algamó esti sábadu en La Pola Gordón (Lleón) el XIV campeonatu d’Europa de Lluches Celtes que se cellebra na población montañesa per primera vegada. Los bretones arramplaron-y el títulu a los lleoneses que quedaron na segunda posición por namái que dos caíes.

El total de puntos foi de 103 palos primeros clasificaos y 101 pala llucha lleonesa. Más alloñaos quedaron Canarias con 92, Austria con 56, Holanda con 52, Escocia con 50, Islandia con 32, Cerdeña con 17 ya Ingalaterra con 15. Los leoneses, que nun fueron a caltener el títulu européu, sí algamaron el galardón individual más importante, el de meyor lluchador européu que consiguió Héctor García, nes dos lluches, Gouren y Back-hound.

Nes categoríes femenines Lleón proclamóse, con 65 puntos, campeona de Europa quedando tres d’ella Bretaña y Canarias con 48 puntos. Destacaron les lluchadores lleoneses Tamara Gómez, campeona en Gouren; y Mirian Marcos, que llogró la primera plaza en Back-houd.

Esti domingu cellébrase tamién en La Pola Gordón el campeonatu rexonal de lluches celtes dende les doce del meudía./p>

Redacción

La esposición «La nuesa agua de siempres, pa siempres» inaugúrase güei y tará abierta al públicu hasta’l llunes 23 d’abril na Casa Cultura del conceyu de Navia cola intención de dar a conocer los problemes d’abastecimientu d’agua y les formes que cada ciudadanu tien pa tratar de reducir el consumu d’agua.

L’amuesa ta organizada pol Ministeriu de Mediu Ambiente y ta xebrada en dos grandes apartaos. El primeru ta centráu na concenciación medioambiental pa col problema de l’agua como recursu llimitáu y el segundu da a conocer al ciudadanu les infraestructures del agua na fastera más occidental d’Asturies.

La esposición, que cuenta con un educador ambiental como asistencia al visitante, va tar abierta al públicu hasta’l vienres de d’11:30 a 15:00 hores y el sábadu de cinco a ocho de la tarde, pa percorrer dempues los conceyos d’El Franco, Cuaña, Castropol, A Veiga y Villayón.

La Villa de Romana de Veranes abrió al públicu esti llunes 19 de marzu. Depués de diez años d’escavaciones arqueolóxiques. Conocida popularmente como’l Torrexón de San Pedro esta villa romana ta nel llugar de Veranes na parroquia de Cenero. L’obxetivu d’esti muséu ye ufrir al visitante la posibilidá de conocer, a través de conteníos audiovisuales, la vida nel territoriu astur durante la colonización romana.
Los trabayos d’escavación de la villa de Veranes entamaron en 1997 embaxo la dirección de Carmen Ochoa, arqueóloga de la Universidá Autónoma de Madrid. A partir d’estes primeres cates s’entamaron a descubrir diferentes estructures y construcciones d’un espaciu que taría ocupáu hasta bien entrada la edá media.
La villa de Veranes ta a pocos kilómetros de la capital de l’Asturies romanizada Lucus Asturum (Llugo).

El Parque de la Prehistoria de Teberga va amuesar reproducciones de les principales cueves con arte rupestre del Arcu Atlánticu. Amás de les copies de les pintures de les cueves de Tito Bustillo, Cándamo o La Covaciella, el nuevu muséu va tener reproducciones de les cueves d’Altamira o Lascaux, recoyendo asina nuna sola instalación una bona amuesa del arte prehistóricu d’esta rexón europea.
El Parque de la Prehistoria ta na parroquia de San Salvador d’Alesga, nel conceyu de Teberga. Pa la xestión de la instalación el Gobiernu asturianu creo una empresa denominada Recrea Asturias. El presupuestu inicial de la instalación ye de 10,7 millones d’euros, formando parte del Plan Complementariu pa la Reactivación de les Comarques Mineres. El proyectu d’esti muséu tuvo supervisáu por un conseyu científicu presidíu por Javier Fortea, de la Universidá d’Uviéu, y nel que participaron Manuel Morales de la Universidá de Cantabria, Jesús Altuna de la Universidá del País Vacu, Jean Clottes y Dominique Baffier
El conxuntu museísticu axunta a tres edificios nos que s’amuesen los aspectos más conocíos sobre la vida nes dómina.

L’Académicu de la Llingua Asturiana y caderalgu d’Historia de la Universidá d’Uviéu Javier Fernández Conde va inaugurar güei’l ciclu de conferencies sobre la historia de Castrillón tituláu “Una mirada a Castrillón” entamada pol conceyu de Castrillón. A lo llargo d’estes xornaes va repasase les etapes históriques d’esti conceyu asturianu.

La conferencia de Javier Fernández va entamar a les 19,30 hores na biblioteca de Salinas. Fernández Conde repasará la dómina medieval del conceyu, centrando bona parte de la so conferencia nel papel del castillu de Gauzón na historia del conceyu, y la so importancia na historia d’Asturies.
La xornada del martes cuntará cola participación de Natalia Tielve, profesora d’Historia del Arte na Universidá, nesta conferencia va falase sobre los elementos del Patrimoniu Industrial del conceyu.
El llicenciáu en Xeografía Carlos Sierra desenvolverá na so charra la historia del conceyu a lo llargo del sieglu XX
La educación nel conceyu tendrá’l so sitiu’l próximu xueves cola conferencia d’Esther García, pedagoga y escritora, que falara sobre les primeres escueles del conceyu
El sábadu a partir de les 11 va facese una visita guiada a Raíces y al castillete de la mina d’Arnao, los arqueólogos Iván Muñiz y Alejandro García serán los encargaos d’amuesar los dos llugares.

Toles charres van facese a partir de les 19.30 hores na biblioteca de Salinas.

La Casa Cultura de Llanes acueye hasta’l próximu 14 de marzu l’amuesa “Mitoloxía Asturiana” de la Obra Social y Cultural de Caxastur. L’amuesa ta compuesta de treinta y nueve elementos nos que se representen los principales mitos de la tradición asturiana L’apaición de los mitos de los que se fala na esposición ta situada alredor de los sieglos III y V, sicasí bona parte d’ellos proceden de la época anterior a la invasión romana.

L’Asociación deVecinos de Llaranes y El Pozón denuciaron publicamente la situación na que s’alcuentra un horru na Avenida Santa Apolonia d’Avilés por mor de les obres que se tán faciendo na zona.
L’horru ye d’un altu valor etnográficu, tando datáu d’entamos del sieglu XVIII. El so estáu de conservación ye bonu y según la normativa vixente ta protexíu, por ser anterior a 1900.
L’Asociación de Vecinos de Llaranes y El Pozón va remitir a la Casa Conceyu d’Avilés una denuncia formal, pa que s’adopten les medíes afayadices de protección del horru. Asina mesmo subrayen que s’han evitar casos “tan sangrantes” como la destrucción de dos horros axuntaos por un corredor en Truyés, Corvera.