Patrimoniu

El Sábadu 3 de xineru la tradición féxose otra vuelta realidá. Nel Conceyu d’Ayande, nos pueblos de San Salvador, Fonteta y Villalaín desendolcóse una reisada como nun había dende hai 46 años. Dos comparses de mozos mazcaraos pidieron l’agulandu pelas casas que dende primera hora de la mañana taben abiertes y los sos vecinos naguando pola llegada de los guilandeiros.

Los choqueiros abrieron camín pel pueblu faciendo ruxir las chocas y los músicos tocaron pal baille y pa cantar en cada casa. Nengún vecín quedó ensin visisitar y foron espléndidos col guilandu que dieron.

Dempués, na plaza del pueblu de San Sanvaldor féxose el saludu de los choqueiros blincándo coles sos piértigues y engarrándose nuna griesca ritual que nos remontó polo menos un par de miles d’años na historia, cultura y tradición d’Asturies.

A mediu día féxose una xinta en comuña pa tolos vecinos y veceros d’esta tradición nes escueles de Fonteta y armóse una bona folixa tola tarde, pandereteros, gaiteros, tamboriteros y curdioneros ayudaron a que’l baille aguantara hasta la nueche.

Nun podemos dexar de señalar amás la presencia de los estremaos medios de comunicación y sobro manera d’estudiosos de la etnografía que se treslladaron nun solo dende Asturies, sinon tamién d’otres provincies, fotógrafos como Carlos González Ximénez, (http://flickr.com/photos/ximenez/) con estudios de les mascaraes d’iviernu de tola península ye quiciaves el más nomáu, pero tamién rexistraron esta tradición etnógrafos llegaos de Portugal a la gueta de los reises hermanos de les cellebraciones propies del norte d’esti país, sobro manera en Tras Osmontes, rexón de la que nun podemos escaecer los llazos culturales que mos xuncen.

La recuperación d’esta reisada foi posible pol enfotu d’estremada xente: los vecinos de Fonteta, Villalaín y San Salvador que acoyeron los reis y revivieron una tradición casi desaniciada, el propiu ayuntamienu d’Ayande que con esti apueste empobina los sos esfuerzos al resurdimientu de los sos pueblos y de les vieyes tradiciones, tamién dellos investigadores del folclor como Xosé Antón “Ambás” que collaboró activamente na preparación de la reisada con material etnográficu y como gulandeiro o Naciu i’Riguilón tamién como guilandeiro que se xuntaron a esta recuperación de forma desinteresada lo mesmu que músicos nomaos como Diego Pangua o otres persones arreyaes a la cutura asturiano como Lisardo Lombardía.

N’últimu llugar el Conceyu de Cultura tradicional Vezos Astures que foi quien a iguar dos comparses completes (24 persones) colos traxes que los vecinos más vieyos recordaben, mázcares de piel, caretes de yelsu, lluecas, basoira, rodalo,… y llevalo al llugar onde la tradición tien sentíu, tantu facela como recibila, porque la cultura por definición ye la xuntura del que desendolca una actividá y del que la disfruta, la entiende y la reconoz como propia.

La organización Unidá Nacionalista Asturiana (UNA) presentó esti día una alegación al catálogu d’elementos protexíos del Ayuntamientu de Samartín del Rei Aurelio, pa que s’incluya nel mesmu a la casa de máquines del Pozu de L’Entregu. UNA atalanta que “nun incluyir esti elementu nel mencionáu catálogu contradiz la Llei de Patrimoniu Cultural del Principáu d’Asturies”.

Nun comunicáu, la organización entiende que ye “un error grave incluyir como elementu protexíu namás que’l castillete del pozu, porque ye una unidá cola casa de máquines y si nun se fai una protección integral del elementu, taría afeutándose ensin remediu a ún de los meyores exemplos del patrimoniu industrial d’Asturies, fecháu en 1909”.

El Conceyu de Cultura Tradicional Vezos Astures, dedicáu y enfotáu dende hai años a la recuperación y espardimientu de la cultura traicional, entama l’añu 2009 cola recuperación del día “Dos Reises” nos pueblos de San Salvador y Fonteta nel Valledor, Conceyu d’Ayande.

La reisada va desendolcase el día 3 de xineru de 2009 dende les 11 de la mañana. Habrá dos comparses (grupos de mozos mazcaraos) encabezaos por personaxes propios d’esta mascarada, choqueiro (figura del cartelu), basoira, gocha, etc… que pidirán el guinaldo pelos dos pueblos, dempués fadrase una xinta en comuña colos veceros que vaigan disfrutar de la tradición viva.

Los Reis son una de les mueses más antigües de les mazcaraes d’iviernu qu’entá anguaño se caltienen en casi tol occidente peninsular. Tan venceyaes a cellebraciones precristianes d’entamu del añu y enguedeyaes nos ritos naturales de dómines bien antigües.

Los reises nel Valledor pidíense tolos años unos díes enantes del 6 de xineru, día que se xuntaben les estremaes comparses de mozos, dempués de tener percorríos tolos pueblos de la redolada pidiendo el guinaldo, na ilesia parroquial, aonde s’entamaba una griesca ritual ente los choqueiros. Los mozos diben mazcaraos, unos con pelleyes, representando lo vieyo y la natura (“los tolos”) y otros con ropa bueno, representando la modernidá, madamas, valencianos, soldaos (“los guapos”). Recupérase esta tradicón dempués de 50 años gracies a los testimonios de los vecinos del Valledor y al so enfotu na recuperación de les braeres señes d’identidá cultural, asina como pol sofitu necesariu del Ayuntamientu d’Ayande, asociaciones de vecinos ya investigadores del folclor, que desinteresadamente van collaborar nesta tradición, empobinada nel marcu y contestu onde braeramente tien xeitu y sentíu: nos llugares que lo caltuvieron hasta anguaño y dientro d’esi universu que dende hai milenta años vien iguando la tradición.

La editorial asturiana Madú ta acabante espublizar una guía de la universdá llaboral de Xixón, “La Llaboral de Xixón, un secretu”, nuna cuidada edición trillingüe (asturianu, castellán ya inglés) redactada por Adolfo Camilo Díaz y Mercedes Menéndez. El llibru guía al visitantes a un “apasionáu y apasionante viaxe peles histories y les artes, los tiempos y los espacios que s’alcuentren na Universidá Llaboral de Xixón, la obra maestra de Luis Moya, tresformada güei na Ciudá de la Cultura”.

El llibru va presentase esti llunes 29 d’avientu, na sala de prensa de La Llaboral, a partir de les seis de la tarde, cuntando cola presencia de los autores y de Jesús López, xerente de RECREA; José Ramón Pérez Ornia, director del Ente Públicu de Comunicación del Principáu d’Asturies y de Cristian Velasco, editor de la obra. La presentación va cuntar con una visita a los principales llugares del edificiu.

Adolfo Camilo Díaz (Ayer, 1963) ye historiador, xestor cultural y escritor. Nome fundamental de la nueva lliteratura asturiana. Ensayista («El teatru popular asturianu», «El cine fantaterrorífico español»), narrador («Imago», «Diariu de viaxe»), dramaturgu («País», «Nueche»); director de videoclips («Miraes») y compositor («Inaux», «Una mañana»).Mercedes Menéndez (Uviéu, 1979) ye historiadora del arte, especialista en Xestión Cultural y Postgráu d’Escritura y Producción pa TV pola Universidá d’Uviéu; conductora de l’Axenda Cultural «Al aldu» de la RTPA; como analista cultural collabora nel selmanariu Les Noticies, La Voz de Avilés o en publicaciones especializaes como El Súmmum.

La revista La Sidra va inaugurar esti vienres una esposiciónn con un actu que va sirvir tamién pala entrega de premios del II Concursu de Semeyes La Sidra, na Sidrería La Galana, allugada na plaza del Ayuntamientu de Xixón.

Esti concursu, organizáu pola revista La Sidra, en collaboración col llagar JR resultó un éxitu en cuanto a númberu de participantes y semeyes presentaes, con 142 participantes que presentaron un total de 342 semeyes de temática sidrera. La mayoría d’ellos son asturianos, pero tamién hubo una importante participación a nivel estatal y hasta internacional, con semeyes univaes dende México, Bélxica y Arxentina.

La calidá de les semeyes foi, según la organización, mui aceptable, presentándose obres con téuniques variaes, dende cuidaes composiciones a instantánees dinámiques y suxerentes.

Coincidiendo cola inauguración de la esposición realizada na Sidería La Galana, va dase a conocer les semeyes premiaes pol xuráu presidíu por Xurde Margaride, y constituyíu por fotoperiodistes de reconocíu prestixu y José Luis Acosta como representantes de la revista La Sidra, va procedese a la entraga de premios y va acabar l’actu con sidra y una espicha.

El conceyal de Cultura, Román Antonio Álvarez González, presentó esti miércoles les 13.00 n’El Carbayéu, l’horru patrón del conceyu d’Avilés. Nesta presentación tuvo acompañáu por Xosé Nel Navarro Suárez, miembru del comité téunicu de normalización del horru asturianu, que desplicó xunta’l conceyal el proyeutu denomináu xenéricamente ‘Horros Beta’ nel que van analizase horros y paneres significativos de cada conceyu, a la gueta d’un modelu pa validar y catalogar horros en base al Horru-Patrón.

El proyecutu inxertase dientru’l plan d’I+D+i del Principáu d’Asturies y participen nelli l’Ayuntamientu de Xixón, el Muséu del Pueblu d’Asturies, la Direición Xeneral de Patrimoniu del Gobiernu del Principáu d’Asturies y la Viceconseyería de Ciencia y Teunoloxía asturiana, amás de la Universidá d’Uviéu.

Güei, miércoles 17 d’avientu a les 19:30 hores, va tener llugar nel Atenéu Obreu de Xixón, asitiáu na xixonesa cai Cuadonga, númberu 2, pisu 1u, la charra “Cultura Castreña nel Noroeste Peninsular”, a cargu del arqueólogu Alfonso Menéndez Granda, Llicenciáu en Xeografía y Hestoria pola Universidá d’Uviéu y director técnicu de delles escavaciones, toes elles feches nestos caberos años: los castros de Chao Samartín, Monte Castrelo de Pelou y, anguaño, Os Castros de San Tiso d’Abres.

Alfonso Ménendez, tien espublizaos, xunto a la tamién arqueóloga Estefanía Sánchez Hidalgo, dellos trabayos, ente ellos tán los inventarios arqueolóxicos de trés conceyos asturianos: Cabrales, Ponga y Casu; amás d’artículos en revistes especializaes al rodiu la Terra Sigillata nel castru de Chao Samartín, asitiáu en Grandas.

Dende’l conocimientu de primera mano de los caberos descubrimientos fadráse una revisión de los elementos que conformaron esta rica cultura a lo llargo’l tiempu: llendes territoriales, tipos de castros y ocupación del territoriu, sistemes defensivos, urbanismu de los poblaos, cultura material y cómo, en definitiva, la Cultura Castreña pervivió a lo llargo un mileniu nel territoriu asturianu, dende la Edá del Fierru a la Edá Moderna.

La cultura castreña desendolcóse, dende finales de la Edá del Bronce hasta entamos la nuesa era, nel noroeste de la Península Ibérica, dientro de una fastera qu’abarcaría’l norte del actual Portugal dende la oriella norte del riu Dueru, Galicia, la fastera occidental d’Asturies y un cachu del noroeste de Lleón.

La formación política Unidá Nacionalista Asturiana presentó ayeri una denuncia énte’l Serviciu de Patrimoniu de la Conseyería de Cultura, pola desapaición de la talla, esixendo la “aplicación estricta de la Llei de Patrimoniu Cultural Asturianu”. Esta norma, según la UNA, “a pesar de tar en vixencia ya dende l’añu 2001, paez tener simplemente un valor decorativu y de declaración d’intenciones, porque nun sólo les midíes que contienen nun s’aplique poles sos propios autories, sinón que nin siquier son aumíes por ellos, como pasa munches ocasiones con otres lleis asturianes”.

Pa la organización “si de verdá se quixere aplicar esta llei, y cuidar del nuesu patrimoniu tenía qu’haber un serviciu efeutivu de vilixancia y proteición del patrimoniu asturianu, y los autores de los destrozos nun quedaben impunes, como pasa na mayoría de los casos”.

Un exemplar de pez lluna real (lampris guttatus), una especie mui poco habitual n’agües asturianes, foi recoyíu en tarrén marítimu asturianu por una pareya d’arrastreros con base na población llucense de Celeiro.

Según informó’l Cepesma nuna nota prensa esti día el pez lluna real ye una especie peláxica de la que nos últimos diez años namái se garraron dos exemplares n’agües asturianes.La especie vive hasta los 400 metros y pue algamar 1,80 centímetros de llargor. Esti pexe tien una característica franxa ondulada que percuerre’l so cuerpu en dambos costaos asemeyando una costura. La so carne ye apreciada y mui asemeyada a la del salmón.

El voceru d’IX-BA-LV, Francisco Javier García Valledor denuncia la destrucción d’una talla única de mediaos del sieglu XVI realizada nun horru de la llocalidá de Llorío, en Llaviana. Un fechu que pa Valledor “non sólo supón la perda irreparable d’una xoya del nuestru patrimoniu cultural, sinón que demuestra l’abandonu, la neglixencia y en definitiva la fonda inorancia y despreciu de los responsables que vinieron xestionando la política cultural na nuesa Comunidá”.

Ye esta, pa Valledor, una política cultural de “pompa y circunstancia”, de “grandes eventos”, d’una “supuesta modernidá que desprecia los nuesos raigaños culturales más fondos”.

El relieve agora destruyíu, foi estudiáu por Chema Vega Blanco y Alberto Álvarez Peña, y representaba una escena ideográfica de fertilidá na qu’una muyer embarazada copulaba a la vez con dos homes .Un grabáu únicu d’una escena de corte naturalista qu’emparenta cola tradición iconográfica asturiana sobre la fertilidá que llega hasta l’arte parietal paleolíticu.

Siendo esti fechu gravísimu, ye tovía más, diz Valledor, que se produza porque “dende los responsables políticos culturales nun quixo tresmitir a la nuesa sociedá’l valir y significáu de la nuesa cultura tradicional nes sos diverses y riques vertientes: vivimos nuna Asturies na que desgraciadamente nun sabemos valorar la importancia, l’enorme valir, que pa cualesquier sociedá mínimamente culta y civilizada representa’l so patrimoniu artísticu y la so cultura tradicional”.

García Valledor, emplaza a la nueva Conseyera de Cultura a “cambiar radicalmente la orientación d’unes polítiques que llevaron a la destrucción d’una gran parte del nuesu Patrimoniu cultural”.

Énte esti fechu Valledor esixe l’aprobación de delles midíes que va presentar: “Plan Integral de Patrimoniu, Reglamentu de desenrrollu de la Llei de Patrimoniu Cultural d’Asturies y la inclusión del patrimoniu de la cultura tradicional asturiana (etnográficu) nel Inventariu Cultural d’Asturies.”

Pa Valledor nun ye posible “siguir manteniendo una política na que s’invierten miles de millones de les antigües pesetes en grandes infraestructures culturales de duldosa eficiencia y nun se protexe y pon en valor la cultura tradicional asturiana”. El diputáu camienta que nun hai nada “más moderno y actual pa cualesquier sociedá culta y civilizada que cuirar y valorar el so Patrimoniu, que nun ye namás de so sinón de tola humanidá”.