Patrimoniu

La Plaza del Conceyu en Xixón va acoyer esti llunes una protesta, organizada por Unidá Nacinalista Asturiana, pol valtamientu d’ocho horros en San Andrés de los Tacones y pola situación xeneral del patrimoniu asturianu, que considera “desastrosa”.

La convocatoria facíase esti vienres al traviés d’un comunicáu nel qu’UNA facía pública la convocatoria d’esti “funeral polos horros destruyíos”, que va tener llugar de magar les 20 hores del llunes.“Nesti funeral que quier valir como denuncia pola desidia y permisividá tanto del gobiernu municipal como de la Conseyería de Cultura nesti casu, o de protesta pola situación del patrimoniu en Xixón, UNA va denunciar de la mesma manera como ‘inconsciente’ la inclusión de los horros como elementos patrimoniales suxetos al impuestu del IBI (contribución) en Xixón, lo que pue suponer un incentivu pa destruyir o simplemente dexar cayer los horros, dao que’l so caltenimientu supón un aumentu na carga económica adicional”.

Énte la destrución de los horros y les paneres nes obres de la ZALIA na parroquia de San Andrés de los Tacones en Xixón, toles fuercies polítiques de la oposición condergaron los fechos y piden responsabilidaes al Auntamientu de Xixón y al Gobiernu d’Asturies, gobernaos pol Partíu Socialista ya Izquierda Xunida-Bloque por Asturies.

L’agrupación del Partíu Asturianista en Xixón comentó nun comunicáu que la organización y los militantes en coxuntu tán “indignaos pola destrucción d’esti patrimoniu cultural tan característicu y propiu” y piden a l’Ayuntamientu y al Gobiernu “una rempuesta clara y rápida” como tamién a la sociedá xestora de la ZALIA y al presidente del conseyu d’alministración, Francisco González Buendía.

El PAS camiente qu’esti fechu “vergoñoso” pueda quedar “impune y ensin nenguna responsabilidá”. Amás reclamen una “una normativa propia del conceyu de Xixón y una Llei de Patrimoniu del Principáu y que nengún organismu faiga nada por cumplir la llexislación”.

Pal Partíu Popular de Xixón “El PSOE demostró a les clares que nun tien nengún respetu col patrimoinu; carez de cualesquier sensibilidá y demostrólo una vez más permitiendo’l derribu d’ocho horros”. El conceyal del PP, Manuel Pecharromán solicitó “la dimisión de los políticos que tomaren esta salvaxe decisión”.

El voceru de la estaya de cultura d’Unidá Nacionalista Asturiana, Ignaciu Llope, declaró esta mañana que “la desapaición d’ocho horros supón un gravísimu atentáu escontra’l patrimoniu cultural asturianu, que ye pior si cabe, al comprobar la pasividá cola que actuaron nesti casu, tanto dende l’Ayuntamientu de Xixón como la Conseyería de Cultura”. Pa la UNA “la pasividá ya inoperancia de los organismos públicos nesti casu clama al cielu, y dende UNA fai que nos entruguemos polos verdaderos intereses que puen llevar a la Conseyería de Cultura y al Ayuntamientu de Xixón a nun facer nada en defensa del patrimoniu arquitectónicu asturianu. Abúltanos que l’oxetivu de construir la ZALIA de toes toes paez que ta penriba de la propia llei, que pa casos como esti ye perclara”.

Amás recordaron que den UNA ta estudiándose la posibilidá “d’entamar con acciones llegales tanto escontra los autores d’esti atentáu como escontra les instituciones implicaes”.

Les obres de la Zona d’Actividaes Loxístiques (Zalia) na parroquia xixonesa de San Andrés de los Tacones tán acabante valtar un conxuntu de polo menos ocho horros y paneres, catalogaos pol Ayuntamientu de Xixón como “de protección integral”. Sicasí, la pasividá d’esta insititución y de la Conseyería de Cultura, permtió’l destrozu de los mesmos, magar de que los vecinos avisaren va yá dellos meses.

Dalgunos de los horros daten de 1805 y de cuasi toos ellos namás queden agora los escombros que dexaron les escavadores d’esta obra que lleva alantre’l Principáu nel conceyu de Xixón.

El presiodente de l’Asociación de Vecinos de San Andrés de los Tacones, Eusebio Ortega Villalvilla, llevantó la voz d’alarma na primavera del añu pasáu, el día 10 de xunu de 2008, con una carta a la Conseyería de Cultura pola que tovía esperen respuesta.

Una vegada más, la Llei de Patrimoniu Cultural de 2001 nun sirve pa protexer el patrimoniu asturianu d’una clas política despreocupada y neglixente.

El Principáu va entamar el próximu llunes una actuación urxente nel texu del Pastur, nel conceyu d’Eilao, p’asegurar la so sobrevivencia. El Texu resultó afeutáu hai poco polos efeutos de la ventolera qu’azotó la rexón.

Los llabores nel Texu van consistir nun saniamientu xeneral del exemplar y na llimpieza y l’aplicación d’antiparásitos. Los trabayos van arrancar con una pequeña poda na rama que ta sobre’l teyáu de la ilesia, que nesti momentu ta remocicando la Conseyería de Cultura, col oxetivu de compensar el pesu del texu.

Énte les afirmaciones feches pol Director Xeneral de Patrimoniu, Jose Luis Vega, asegurando “qu’enantes de finar el presente trimestre va desplazase cola Conseyera de Cultura a Madrid pa intentar zarrar un alcuerdu alredor de la financiación del Prerrománicu”, Andecha Astur quixo recordar que “el pasáu 5 de payares, el PSOE refugó nel Congreso (colos votos del BNG y del PNV) una enmienda presentada polos compañeros de coalición d’Andecha Astur, Ezquerra Republicana de Catalunya, na Comisión de Presupuestos del Congresu de los Diputaos, qu’incluyía la concesión de tres millones d’euros pa la conservación del prerrománicu asturianu”.

Según Andecha “pa mayor ironía y baxeza del PSOE «asturianu», foi Hugo Morán, l’anterior Alcade de L.lena, quien defendió’l votu contrariu a la enmienda d’Esquerra que suponía un sofitu económicu tan importante como imprescindible pal Prerrománicu asturianu”.

P’AA resulta evidente que “d’aprovase dicha enmienda, la situación d’anguañu del prerrománicu asturianu podría ser mui distinta de xuru, y en cualaquier casu algamaríase esi presupuestu d’una forma digna, ensin necesidá de recurrir a actitúes mendicantes como les que agora protagonicen el direutor de Patrimoniu y la Conseyera de Cultura”.

La formación nacionalista camienta que “ye impresentable ya irresponsable dafechu que se pretenda restar importancia a la situación de deterioru y abandonu na que s’alcuentra’l prerrománicu asturianu, y que les partíes económiques anunciaes pal so calteniemientu nun solo son irrisonries (tamos hablando d’unos 300.000 € pa dellos monumentos), sinon y sobre too, insuficientes pa la magnitú del deterioru que tá sufriendo’l prerrománicu asturianu, tal y como vienen denunciando reiteradamente los espertos y como últimamente vien recoyendo la prensa asturiana”.

El Gobiernu d’Asturies robló un conveniu coles principales asociaciones de criadores d’animales de races autóctones que contempla l’aportación de 4,9 millones d’euros pa la promoción d’estes especies, que consideren “d’incalculable valir económicu, social, ambiental y xenéticu”.

Según el Conseyeru de Mediu Rural y Pesca, Aurelio Martín, les iniciatives d’esti tipu permiten la conservación d’un “patrimoniu de toos que d’otra manera desapareciere”.

Les ayudes van beneficiar a cerca de 5.000 ganaderos inscritos nes distintes asociaciones de fomentu de la cría d’unas especies que sumen yá n’Asturies unes cien mil cabeces de ganáu.

La Conseyería de Cultura y Turismu del Principáu empobinó 113.755 euros pa financiar la instalación d’un sistema d’allumáu nuevu de la ilesia prerrománica de San Pedro de Nora, na redolada d’Uviéu, que s’inauguró’l domingu pasñau cola presencia del Director Xeneral de Patrimoniu Cultural, José Luis Vega.

Esta actuación, según informa la Conseyera de Cultura y Turismu, Mercedes Álvarez González, desendolcóse sobre la base d’un proyectu redactáu pol arquitectu Javier Felgueroso Carrascal, quien por encargu de la Conseyería plantegó una actuación que tuvo como criteriu fundamental consiguir los niveles d’illuminación más afayadizos en función del estilu prerrománicu del edificiu, polo que s’optó por qu’esos niveles fueran baxos.

“La obra”, añade Mercedes Álvarez, “estremó’l control del desllumamientu, seleccionando los proyectores y los sos fexes, colocándolos nos puntos menos visibles y dirixéndolos pa les zones superiores del edificiu y a los sos paramentos, dotándolos amás de sistemes denominaos de “apantallamientu”. Tamién se buscó usar fontes de lluz qu’aúnen eficacia y una bona reproducción cromática y una tonalidá alcordies colos paramentos que se quieren facer rescamplar, d’aende se que s’emplegaren fundamentalmente llámpares d’haloxenuros metálicos.

Na nave central instaláronse dos llinies de focos (una pa proyectar la lluz a los paramentos dende la parte superior de la muria y la otra dende los alféizares de los valeros de celosía a la cubierta de la nave). La potencia media de los proyectores ye de 35w. Na capiella central usaron trés proyectores, que dirixen los sos fexes lluminosos pa la bóveda de cañón del ábside central y pal testeru del templu. Un proyector con brazu regulable d’óptica flood ta dispuestu pa illuminar l’altar. Nes naves llaterales y nes capielles norte y sur dispunxeron otros cuatro proyectores, mientres que nel accesu a la ilesia al traviés del pórticu instaláronse dos lluminaries nel centru del suelu.

Finalmente, y pa destacar dende l’esterior la ventana de la cámara supraabsidial, punxeron na parte superior de les sos muries llaterales dos proyectores que proyecten lluz pa la parede opuesta y pal techu, con una potencia baxa de 20 w. Nes capielles central y sur instaláronse seis lluminaries d’empotrar, colocaes nel suelu.

Les obres fíxoles la empresa Esfer Construcciones y Proyectos. Na execución de los trabayos decidióse sanear los pavimentos de la zona del ábside y la colocación d’un vidriu d’alabastru nes celosíes del templu. Tola l’actuación tuvo siguimientu arqueólogu realizáu por Sergio Ríos.

En 2005, amás, la Conseyería de Cultura concedió una subvención al Arzobispáu d’Uviéu por importe de 5.500 euros, colos que se procedió a remocicar la imaxe de San Pedro esistente nel interior del templu, asina como la columna sobre la que ta posáu. Esta actuación foi desendolcada pol restaurador Jesús Puras.

La ilesia prerrománica de San Pedro de Nora, construyida a finales del sieglu IX, fue oxetu de delles actuaciones de remocique nos años últimos. Dende 1993 asocediéronse les actuaciones d’acondicionamientos, llimpia, creación de sistemes de drenaxe y les reparaciones de muria, too ello complementáu con estudios arqueolóxicos y la realización de llevantamientos planimétricos, lo que supunxo pa la Conseyería de Cultura y Turismu una inversión de 71.020,39 euros, a los que se sumen los 113.755 de l’actuación que s’inauguró’l domingu.

IX d’Asturies recuerda a Hugo Morán, responsable de Medioambiente y Sostenibilidá de la executiva federal socialista, que’l PSOE yá afirma que ye necesariu’l banzáu de Caliao “enantes de que tengamos nengún estudiu técnicu sobre les necesidaes d’agua na fastera central qu’asina lo acredite, dalgo que demuestra la contradicción d’estes declaraciones”, denuncien dende IX.

IX d’Asturies sostien qu’esisten “suficientes recursos d’agua n’Asturies si se prioriza l’abastecimientu a la población sobre otros usos”. “N’Asturies esiste suficiente agua nestos momentos p’abastecer a una población que duplique l’actual”, añaden.

N’IX llamenten “qu’Hugo Morán, dende qu’asumió responsablidaes en Madrid, perdieres’l contactu cola realidá asturiana. Nesti sentíu, Hugo Morán tendria de saber qu’en Xixón disminuyóse’l consumu d’agua, pesie a ser el mayor noyu de población d’Asturies, como resultáu de la inversión nes infaestructures de suministru y abastecimientu”. Pa Izquierda Xunida “Evitar que l’agua se pierda peles tuberíes ye una de les polítiques qu’hai qu’entamar a aplicar y Hugo Morán tendría d’aplicase más na difusión y puesta en marcha de polítiques sostenibles y del sieglu XXI y non basar les sos polítiques nes inauguraciones de banzaos, que son más propios d’otros tiempos”.

Per otru llau, IX d’Asturies cree que los dirixentes socialistes “tendríen de tar más esmolecíos n’afrontar el problema del paru y en xenerar empléu qu’en fomentar polémiques estériles que nun interesan a naide”.

La Fundación Belenos ta acabante espublizar la so revista d’estudios y divulgación del patrimoniu etnográficu asturianu, “Asturies. Memoria encesa d’un país”, qu’algama venticinco entregues. Nesti númberu puen atopase artículos como “Asturies y Galicia na ‘Geographia’ de Ptolomeo” de Tomás F. Tornadijo y “Asturies y el so gloriosu ‘Exército Defensivo Asturiano’(II)”, de l’Asociación Recreacionista Históricu Cultural d’Asturies, ente otros.

Carmen Meneses Fernández-Baldor ufre nesti númberu un estudiu sobre la ilesia de “Santa Olaya d’Abamia, del escaezu al despreciu”,a la que se suma una colección de semeyes de Benia, a escomienzos del sieglu XX, recoyíes por Gausón Fernande y José Manuel González; un estudiu ilustráu sobre “Arques y arcones tallaos n’Asturies» d’Inaciu Hevia y Alberto Álvarez Peña; otru sobre «Los bail.les d’El Val.le” y la tradicional estaya de novedaes bibliográfiques y musicales, al cargu d’Ignaciu Llope.