Patrimoniu

Una nueva edición de la Tertulia cultural Pachín de Melás, col títulu de “Regasificadora en Xixón, necesidá y peligros que comporta” va celebrase na cervecería Astuera, na cai Joaquín Fernández Acebal, 2 (detrás Centru San Agustín) el xueves 23 de xunetu a les 8:30 la tarde.

Nesti casu va cuntase con Leopoldo García, portavoz del Movimientu ciudadanu contra el proyectu de planta regasificadora de Xixón; Paco Ramos, d’Ecoloxistes n’Acción; Tino Fernandez, voceru de la estaya de mediuambiente d’Unidá Nacionalista Asturiana y Ramón González “Turón”, vecín afectáu.

El plenu de l’Asamblea del XXII Alcuentru d’Escueles Asociaes de la UNESCO, celebráu na última fin de selmana n’Avilés, decidió por unanimidá sofitar la inclusión nel Llistáu de Patrimoniu Mundial de los Caminos de Santiago del norte peninsular.

Darréu recuéyense los principales puntos de la declaración de l’Asamblea, na que participaron más de 160 representantes de centros educativos nacionales y estranxeros que desendolquen programes dientro del marcu de la UNESCO:

“Nos sos mil doscientos años d’historia, el Camín de Santiago consolidóse como’l gran itinerariu cultural y relixosu de la Europa occidental, siendo ún de los elementos que más decisivamente propició la formación d’una identidá común ente los estremaos pueblos del continente. La so relevancia foi reconocida pola UNESCO cola inscripción, en 1993, na Llista de Patrimoniu Mundial de la mentada ruta francesa al so pasu pela Meseta Norte d’España, y, en 1998, de los principales caminos de pelegrinación xacobeos per Francia.

Tanto’l Camín Primitivu a Santiago como’l costeru y los estremaos tramos de conexón ente estes víes y el camín francés clásicu, configuren rutes históriques de singular importancia, que contribuyeron a modelar y a construyir el territoriu septentrional d’España y qu’atesoren un notable conxuntu d’elementos patrimoniales a elles venceyaes. La so incorporación nel Llistáu del Patrimoniu Mundial de la UNESCO supón completar el reconocimientu yá fechu en 1993 y 1998 al Camín de Santiago Francés, sumando les primeres víes de pelegrinación a Compostela seguíes nel sieglu IX, asina como otres rutes costeres que representen el resultáu lóxicu de la espansión del fenómenu xacobéu na plena y baxa Edá Media.

Dende 2006 les comunidaes autónomes del País Vascu, Cantabria, Galicia y el Principáu d’Asturies participen, baxo la coordinación d’ésta última, na ellaboración del espediente que se tien que presentar na UNESCO p’algamar la mentada ampliación. Constituyóse a tal efeutu un Grupu de Trabayu dientro del Conseyu Xacobéu Nacional, y ta trabayándose cola previsión de poder presentar esta candidatura al altu organismu internacional nel 2009, de tal manera que se puea algamar l’ampliación.

(…) Ye evidente que de la declaración de la UNESCO quedaron hasta’l momentu fora de les víes xacobees de singular importancia. Ye’l casu del Camín Primitivu, qu’enllaza Uviéu y Santiago de Compostela pel interior del suroccidente asturianu y lucense, y que foi la primer vía emplegada polos pelegrinos que diben a Compostela nel sieglu IX tres el descubrimientu de la tumba del Apóstol. Ye, igualmente, el casu del Camín Costeru, qu’algamaría gran importancia dende los sieglos XII y XIII y que diba pela costa d’Euskadi, Cantabria, Asturies y Galicia, y que foi’l qu’emplegaron munchos pelegrinos aportaos per mar dende Inglaterra y otros puntos de la costa atlántica europea a dellos de los puertos de la fachada septentrional de la península Ibérica.

Estes rutes poseen de manera inequívoca toles carauterístiques propies de les víes de pelegrinación a Compostela, tal y como éstes vinieron siendo definíes por espertos investigadores del fenómenu xacobéu.

Son múltiples les prebes documentales y monumentales que dan fe de que les víes norteñes de pelegrinación a Santiago fóronlo realmente nel medievu y la modernidá. Igualmente ta contrastada históricamente la esistencia d’una densa malla d’equipamientos asistenciales al pelegrín na Edá Media, que fai que, por exemplu, nel casu d’Asturies téngase constancia probada de la esistencia de más de 50 hospitales y albergueríes pa pelegrinos nesi periodu y na Edá Moderna.

Dellos reconocimientos internacionales vinieron destacando nes dos últimes décades el calter plural y reticular que la rede de caminos de pelegrinación a Santiago tuvo a lo llargo la historia. Ye’l casu de la declaración del Camín como Primer Itinerariu Cultural Européu, fecha pol Conseyu d’Europa en 1987 (qu’afeutaba a tolos caminos pelos que pasaben los pelegrinos a Santiago) o’l Premiu Príncipe d’Asturies de la Concordia dau a esta vía pola so contribución a la creación d’una identidá común europea”.

El Plenu del Conseyu de Patrimoniu Cultural d’Asturies estudió esti miércoles la declaración como Bien d’Interés Cultural de la Fábrica de Lloza de San Claudio, que foi aprobada al tiempu que la restauración de la Girola de la Catedral. Nel plenu tamién foi estudiáu’l Plan Especial de la Fábrica de Gas.

La declaración de Bien d’Interés ye la primera que se fai d’un elementu del patrimoniu industrial asturianu.

El Garrapiellu ta acabante dar anuncia de delles novedaes pa esti añu. El domingu 28 de xunu a les 12:00 embaxo’l Texu de La Collá, parroquia de Siero, va celebrase’l tradicional homenaxe que cada añu faen colos vecinos per San Pedro. Nesta ocasión quieren da-y “un mayor impulsu a la convocatoria con el oxetivu de consiguir la declaración de bien cultural y natural protexíu pal conxuntu del texu y la ilesia vieya de La Collá”. Esti añu habrá gaiteros y xinta popular dempués de la misa n’asturianu.

El Garrapiellu va a celebrar esti añu tamién, el Camín a Cuadonga, los díes 24, 25 y 26 de xunetu. P’apuntase ha llamase al teléfonu 606.39.03.44. Esti añu van revisar el camín ya intentar revalorizalu con delles acciones.

Amás, El Garrapiellu va celebrar dientro poco’l so venti aniversariu, y pa organizalu, acaben de nomar a Tino Lozano, Rocío Tuñón, Pablo Armesto, Chema Vega y Dubardu Puente, como miembros del comité encargáu de la celebración.

La Conseyería de Cultura y Turismu del Principáu vieno acabante decidir esti día incluyir nel Inventariu del Patrimoniu Cultural d’Asturies el conxuntu de les mines de Llumeres, asitiaes nel conceyu de Gozón, colo que se-yos dota d’un altu grau de proteición a estes antigües mines.

Asitiaes na parroquia de San Nicolás de Bañugues, les mines foron nos sieglos XIX y XX la principal esplotación de mineral de fierru d’Asturies.

Les mines de Llumeres foron l’aniciu de la esplotación de fierru más importante d’Asturies hasta que pesllaron en 1967. De Llumeres xurdía más del 40 por cientu del total del fierru asturianu.

Dende 19861 hasta 1967, la mina tuvo en manes de Duro Felguera, empresa que construyó toles infraestructures y edificaciones d’anguaño, incluyendo’l pobláu de 64 viviendes pa trabayadores en Bañugues.

Andecha Astur dio anuncia de la dedicisión d’archivar la denuncia que ficieren pola desapaición de los horros de San Andrés de los Tacones, en Xixon, pola construcción de la zona loxística de la ZALIA. Con esta decisión, AA camienta que “queda n’evidencia la impunidá de los atentaos escontra’l Patrimoniu Hestóricu y Etnográficu asturianu”.

La formación, qu’estudia apelar la decisión xudicial, nun entiende esta decisión xudicial, tomada pese a que la ZALIA “entregó al xulgáu un dossier que non solo nun aporta un res pa esclariar que fixeron cola mayoría de los horros y paneres esapecíes de les estremaes propiedaes qu’alquirieron en S. Andrés, sinon qu’actuanco con consciente mala fe inclúin una carta d’ún de los propietarios, residente en Galicia y que vendió la so finca y panera a la ZALIA, dirixida a l’Asociación de Vecinos de S. Andrés llamándolos «chivatos» por denunciar l’espoliu”.

P’AA, “la patética defensa la ZALIA llega a alxuntar una denuncia presentada énte la policía pol robu d’un protón metálicu pa intentar xustificar el desmontaxe y treslláu de los horros pol peligru de robu y vandalismu que, sigún ellos, corríen”.

Namás tres díes dempués de la entrega del dossier de la ZALIA, “y con una celeridá inusual”, el xulgáu decide’l sobroseimientu provisional de la causa ensin prauticar la mayoría de les dilixencies solicitaes por Andecha Astur na so denuncia.

AA atalanta que sedría “pergrave que delitos escontra’l Padrimoniu Hestóricu y Etnográficu asturianu quedaren en simples sanciones alministratives y, lo que mos esmolez entávía más, qu’empreses de dapital públicu comu ZALIA S.A. actúen con impunidá dafechu destruyendo’l padrimoniu heredáu de tolos asturianos cola conivencia de les autoridaes competentes”.

La Conseyería de Cultura y Turismu del Princiáu va destinar un total de 280.000 euros pa les sovenciones pa la restauración d’horros, paneres y cabazos, según ecueye la convocatoria de sovenciones pa la restauración, per parte de particulares y instituciones sin ánimu de llucru, d’elementos integrantes del Patrimoniu Cultural asturianu, que s’espublizaba esti día.

Los interesaos van poder presentar les solicitudes hasta’l próximu 5 de xunu y les ayudes, que disponen d’un importe global de 800.000 euros, van contar con tres llinies d’actuación.

L’Ayuntamientu de Llangréu inaugurará el centro de cultura y llingua asturiana Casa los Alberti de Ciañu el 14 de mayu coincidiendo col arranque del festival “Tolo d’Asturies”.

Los organizadores de la muestra cultural Tolo d’Asturies enxertaron la inauguración dientro del programa d’actos de la tercer edición d’esti festival qu’amiesta la música col llibru y los productos del país y qu’esti añu va celebrase ente’l 14 y 17 de mayu en Llangréu.

Esti xueves 14 mayu van entamar los actos cola presentación oficial de la III Muestra Cultural Tolo d’Asturies a les siete la tarde nun actu que va sirvir pa inaugurar la Casa de los Alberti y con un conciertu nel que van participar Ignacio Alfayate, Filippo Gambeta, Xuan Nel Expósito y los Alumnos de la Escuela Acurdión de la Escuela de Música Tradicional Reija de Llangréu. Va inaugurase amás na Casa los Alberti la Esposición d’Acurdión Tradicional y los cursos de curdión diatónicu de la Escuela de Música Tradicional Reija de Llangréu.

La Fundación Osu Pardu alviertió esti día d’un envenenamientu d’animales nuna zona osera de Cangas del Narcea, onde vixilantes de la Fundación y cazadores de la sociedá d’El Narcea atoparon la selmana pasada un perru muertu, con signos d’envenenamientu.

La Fundación alertó al Seprona y la Direición Xeneral de Biodiversidá que coordinaron un operativu qu’acabó cola llocalización nes inmediaciones d’otru perru y un córvidu, muertos los dos.

El Bloque por Asturies (B.A) quier solidarizase colos vecinos de Cogollu nel conceyu de Les Regueres y la preocupación que tienen por cuenta’l Parque eólicu que-yos quieren poner en frente de casa. Paez que los vecinos y les vecines de Les Regueres tienen que tar estos últimos años protestando contra instalaciones que los vecinos d’otros concejos nun quieren polo males que son y que paez ser que siempre s’intenten facer nesti conceyu col consentimientu del equipu de gobiernu.

De mano, según el Bloque, hai un fallu na tramitación por nun cumplir el plazu d’información pública que nun pue ser de menos de 20 díes. Lo segundo ye la falta de compatibilidá urbanística, porque nel momentu de pidir l’autorización almistrativa, nel añu 2005, yera suelu non urbanizable d’interés forestal. Tampoco cumple’l marcu ambiental, nin respeta la distancia que tien qu’haber de la instalación al llugar de Cogollu que tien que ser de polo menos 1000 metros y equí hai cases a menos de 300 metros. Amás de too esto la declaración d’impactu ambiental yá caducó hai más de 20 meses.

Por too esto dende’l Bloque por Asturies (B.A.) compartese la preocupación que tienen tolos vecinos y vecines de Cogollu contra esta instalación polos problemas de ruiu, polvu y la estroza que va traer nuna zona de ganaderos y llabradores como ye esta parroquia del conceyu de Les Regueres.