Patrimoniu

La Conseyería de Mediu Ambiente, Ordenación del Territoriu y Infraestructures tien suspendida temporalmente l’actividá cinexética na so modalidá de caza menor d’aves nel territoriu de la comunidá autónoma. El paru va facese efectivu güei miércoles, una veada que se publique nel Boletín Oficial del Principáu d’Asturies la resolución que regula’l cese, y va durar hasta’l domingu 17 de xineru.

Los Bomberos de Mieres estinguieron esti día un incendiu que calcinó dafechu un horru asitiáu nel pueblu de L.lamas, en conceyu Ayer, ensin que se rexistraran daños personales.

El Centru de Coordinación d’Emerxencies del 112-Asturies recibió l’avisu a les 3.15 hores y darréu movilizóse a los bomberos antes citaos, que dieron por estinguíu l’incendiu a les 6.20 hores, ensin que se conozan les causes qu’orixinaron el fueu.

Esti domingu 20 d’avientu, la Tertulia Cultural El Garrapiellu aconceyó con bien de socios y collacios na ilesia vieya de La Collá, nel conceyu de Siero pa, como yá ye vezu, d’esta asociación, colocor el Ñacimientu nes ruines del templu d’esta parroquia sierense.

Nel texu milenariu, asitiáu a la vera la ilesia, fizose una danza prima col enfotu de reivindicar esti árbol sagráu de los antiguos habitantes d’Asturies, entá se puen atopar estos árboles apegaos a bien de llugares relixosos.

Con esta cita l’asociación quier tamién facer un llamáu sobre’l “llamentable estáu d’abandonu y escaecimientu que sufre’l patrimoniu asturianu”.

El Muséu Etnográfico de Castiella y Lleón, con sede na ciudá de Zamora, convocó dos beques pa desenrrollar un proyectu d’investigación del patrimoniu inmaterial de les provincies de Lleón y de Soria. Según informó’l muséu, les beques, afalaes pola Fundación Siglo pa les Arte en Castiella y Lleón y nes que collabora la Obra Social de Caxa España, dexarán desenvolver nestes dos provincies el proyectu “Memoria, territoriu y patrimoniu”.

Esti proyectu, que se llevó a cabu de forma pilotu nes provincies de Burgos y de Zamora en 2007, estiéndese agora a Lleón y a Soria pola mor de lo que comenten fueron “mui bonos resultaos llograos”. Nuna primera fase arrexuntaráse información pente medies d’encuestes a les persones mayores d’estes provincies y na segunda procesarán los resultaos n’encontos de datos, audiuu y vidiu, pa ponelos a disposición de los investigadores.

Les beques, dotaes con una ayuda económica de 4.000 euros caúna d’elles, van durar alredor de cuatro meses y destinaes a investigadores ñacíos o residentes en Castiella y Lleón, llicenciaos en Xeografía y Hestoria, Hestoria del Arte, Antropoloxía o Filoloxía.

El xueves 17 d’avientu va presentase’l segundu tomu del “Cancioneru l’Andecha”, dedicáu a la muñeira n’Asturies, na Biblioteca Ramón Pérez d’Ayala, d’Uviéu. El llibru sigue al espublizáu en 2004, “La Jota n’Asturies” y van presentalu Luciano Rodríguez “Chano”, director d’espardimientu de l’Andecha, y coordinadora del llibru, y de Pedro Pangua Rivas, Coordinador de la Escuela de Música de Llanera, y autor del analís musical del llibru.

Amás, van tar presentes los coordinadores del trabayu, Fernando de la Puente Hevia, folclorista, profesor de la Escuela de Música Tradicional “Manolo Quiros” d’Uviéu y Maribel Alvarez, Directora d’Archivu ya Investigacion de l’asociación.

L’asociación Ecos Astures quier dar a conocer la “ berrea” la época del añu na que los venaos entren en celu, emitiendo los machos incansables berros o bramíos col oxetivu final del apareamientu. Pa ello, los díes 2, 3 y 4 d’ochobre, convierten esti espectáculu nuna actividá que repiten añu tres añu ganando participantes y en medios col pasu’l tiempu, “pretendiendo la valoración del nuesu patrimoniu ambiental dende’l conocimientu y viviendo la naturaleza n’estáu puru n’eventos que incluyen rutes nocturnes o actividaes pasando la nueche en tienda vivac”.

LA BERREA:

La frenética actividá desendólcase principalmente al atapecer y al amanecer, pasando les hores centrales del díi n’algún encame descansando pa nun debilitase más y nun caer vencíos por otros machos nuna rivalidá que muestra la seleición natural de la especie y na que se puen producir feríes de consideración y rotures na cornamenta.

Pasada la “ berrea” el fríu entamará, los ciervos volverán a escondese nes viesques siendo yá muncho más difícil tovía avistalos y los machos agruparánse colos exemplares del so mesmu sesu, al igual que les femes que tarán amás coles críes. Estes últimes tamién soportarán los rigores ivernales amás d’un llargu períodu de xestación d’ocho meses fasta que les nueves críes vean la lluz allá por mayu o xunu.

A diferencia d’otres fasteres de la xeografía peninsular, onde esisten ciervos y alcuéntrense en munches ocasiones en finques vallaes y recibiendo inclusu allimentu, n’Asturies los ciervos alcuéntrense como animales totalmente salvaxes y ensin nengún tipu de curiáu por parte los humanos. Esto, xunío a l’orografía y a la vexetación de los montes cantábricos fai que l’actividá d’observación seya perdifícil.

A pesar d’eso, la “ berrea” n’Asturies gana adeptos, convirtiéndose nuna actividá fascinante de contautu cola naturaleza y de poder sentir y observar in situ los animales totalmente salvaxes, ensin cerques y nel so hábitat natural.

Inscripciones:

L’etnográfu y escritor Alberto Álvarez Peña estudia los “Cuentos colloraos de la tradición oral asturiana” nun llibru col mesmu nome asoleyáu cola editorial Picu Urriellu apocayá. Nel mesmu recueye una montonera d’hestories erótiques de los asturianos d’enantes.

“Munchos de los cuentos –epslica l’autor- tienen los sos raigaños n’otros medievales qu’en dellos casos llegaron a lliteraturizase por autores como Lope de Vega, Bocaccio, Joan Timoneda, etc”. Nes hestories “Abonden los asuntos per onde desfilen maríos cornudos, muyeres espabilaes y cures libidinosos”.

El Teixu, rede pal estudiu y defensa de la llingua asturllionesa organiza en Zamora un cursu d’encuestadores de 10 hores teóriques y 20 práctiques, ente’l 19 de setiembre y el 4 d’ochobre. Col I Cursu d’Encuestadores de Dialectoloxía y Toponimia los sos organizadores quieren contribuír “a poner las bases teóricas y prácticas que sirvan a los alumnos pa facer el diseñu y la realización de trabayos llingüísticos de campu centraos nas falas de la provincia de Zamora”.

Pa ello, esta edición primera del cursu quier familiarizar a los alumnos coles técniques d’investigación de campu en dos disciplines llingüístiques mui rellacionaes: la dialectoloxía (l’estudiu de la variación llingüística nel espaciu) y la investigación toponímica (l’estudiu de los nomes de sitios), según espliquen dende El Teixu.

L’oxetivu final d’esti cursu ye “la preparación pa la recoyida y tratamientu del material oral de las personas de Zamora que tean interesadas nestos campos d’estudiu”.

El preciu ye de 20 euros, y 15 pa estudiantes, incluyendo la matrícula, material de trabayu y el gastu en combustible nes clases práctiuques. Pa más información ha llamase al teléfonu 695 51 53 86 o mandar un corréu a info.elteixu@gmail.com

El programa completu del cursu ye’l que sigue:

La Fundación José Cardín Fernández va presentar esti xueves, na so sede de Villaviciosa, “Hórreos”, de Rafael Balbín Loredo, etnográfu fináu nel añu 2005 a los 34 años d’edá. L’actu, que va empezar a les 11 hores, va cuntar cola participación del maliayu Víctor García de la Concha, presidente de la Fundación y director de la Real Academia de la Llingua Española, quien tamién roblaa’l prólogu del llibru.

El llibru ye un censu y analís fechu por Balbín de les más de 1.500 construcciones esistentes nel conceyu de Villaviciosa.

Les obres de restauración de la ilesia prerrománica de San Salvador de Valdediós, en Villaviciosa, van entamar la próxima seronda y van tener un plazu d’execución de cuatro meses. Asina lo anunció la Conseyera de Cultura y Turismu del Principáu, Mercedes Álvarez González, tres roblar col Ministru de Fomentu, José Blanco, el pautu que va permitir financiar los trabayos con cargu al presupuestu del 1 por cientu cultural. La robla tuvo batura na sede’l Ministeriu de Fomentu y contó cola presencia del Direutor Xeneral de Patrimoniu Cultural del Principáu José Luis Vega.

Esti pautu supón una inversión por parte del Ministeriu de Fomentu de 343.143 euros na execución de la restauración de la ilesia prerrománica de San Salvador de Valdediós. La Conseyería de Cultura y Turismu del Principáu va aportar 150.000 euros nesta actuación.

El proyeutu supón la restauración xeneral del edificiu, consolidándolu estructuralmente y garantizando la so proteición escontra les humedaes. Inclúi les actuaciones que s’especifiquen darréu: drenaxe esterior a cuatro metros de les fachaes llaterales; reparación de la bóveda de la capiella de los Obispos; consolidación de les armadures de fierro sobre los arcos llaterales del anticuerpu occidental; revocamientu de los paramentos esteriores p’algamar la so estanqueidá escontra les filtraciones d’agua de lluvia. Los trabayos tamién van incluyir la llimpieza de los paramentos y la so eventual consolidación superficial. Del mesmu mou, va renovase’l material de cubierta (que, amás, va impermeabilizase), emplegando teya artesanal de tipu romanu.

El presupuestu de llicitación d’estes obres asciende a 493.143 euros, a los que deben sumase les correspondientes direiciones d’obra y el seguimientu arqueolóxicu de les obres, polo que les mesmes van superar el mediu millón d’euros d’inversión global.L’actuación de Valdediós ye la segunda que’l Ministeriu de Fomentu fai nos últimos dos años nel conceyu de Villaviciosa, dempués de l’apautada en 2008 pa la Casa de los Hevia y que va suponer una inversión estatal de 1.341.482,25 euros. N’Asturies, l’Estáu yá comprometió 9,3 millones d’euros del 1% Cultural dende 2004 hasta güei, de los que 1,3 millones foron en 2009 (más de la metá d’ellos a solicitú del Principáu). Les inversiones son les que s’especifiquen darréu: Recuperación del paséu del faru de Cuideiru, 200.000 euros; Restauración del edificiu asitiáu na cai Olavarrieta 26 pa futura casa de les ciencies, en Valdés, 471.076 euros; ya Intervención na cubierta del Monesteriu de San Pelayo d’Uviéiu, 343.143 euros.