Patrimoniu

Güei, miércoles 12 de mayu, a les 20 hores, l’autor occidental va presentar nel Club de Prensa Asturiana d’Uviéu, documental “Flandón en Xedré”, alredor de la figurqa del filandón.

Nel actu van participar Consuelo Vega, directora xeneral de Política Llingüística, l’alcalde de Cangas, l’antropólogu Roberto González Quevedo y la escritora María Esther García.

Nesti trabayu audiovisual, con sotítulos n’inglés, castellán y asturianu, recuéyese la celebración d’un filandón real dividíu en 14 capítulos nos que se van mostrando los distintos aspectos culturales d’esta institución social qu’optó va poco a ser patrimoniu inmaterial de la UNESCO en Lleón.

La Coordinadora Ecoloxista d’Asturies oponse dafechu al proyectu d’un propietariu de talar 11,44 hectárees de castañales y carbayu albar, dalgunos d’ellos centenarios dientro de la Reserva Natural Integral de Muniel.los, según asoleyó esti día nun comunicáu.

Nesi comunicáu, los exoloxisten dicen facer “esti pidimientu pa salvaguardar la integridá d’esti espaciu protexíu, con motivu del trámite de suxerencies de la xestión forestal de Villiel.la en Cangas”.

Dende l’Ayuntamientu de Ribadeo, asumiendo una idega que xurdió del Club de Actividades Subacuáticas Isla Pacha, van pidí-y a la Xunta de Galicia qu’entame los trabayos p’asoleyar toles pieces que s’afayen baxo l’agua, restos de naufraxos que van dende cañones y ancles a cacía de porcelana. L’enfotu ye que les pieces más importantes pasen a formar parte del Muséu Provincial de Lugo y les menores d’una coleición local. Según la formación Andecha Astur esti fechu demuestra qu’“en Galicia quieren arramplar con tolos restos arqueolóxicos que s’alluguen nel fondu de la ría del Eo”, cuando les más d’eses pieces “allúguense na vertiente asturiana de la ría”.

De fechu, recuerda Andecha “foi el club de buceu Figueras Actividades Acuáticas (FIGAS) el que descubrió va tres años catorce cañones nel fondu de la ría; cañones que l’Ayuntamientu Castripol quixo recuperar, pero pa lo que nun atopó sofitu dengún nel Gobiernu’l “Principado”, acullá de la visita d’un arqueólogu en payares de 2008”. Anguaño, los catorce cañones formen parte del Inventariu de Bienes Culturales d’Asturies, anque tovía de forma provisional, y de la Carta Arqueolóxica de Castripol.

Énte esta situación, dende la organización política Andecha Astur denuncien lo que consideren “una nueva dexadez del Gobiernu’l “Principado” pa col patrimoniu arqueolóxicu asturianu derivó nun nuevu ataque galleguista, qu’esperamos nun llegue a bon puertu, y tamién queremos criticar que nun s’atendieren los pidimientos del Ayuntamientu Castripol pa sacar los cañones del agua, dalgo totalmente llexítimo por alcontrase na parte de la ría que ye de competencia asturiana”.

Si bien entendemos que pal Gobiernu asturianu la so recuperación ye difícil, pola nueva llei que va protexer los xacimientos arqueolóxicos marinos, tamién entendemos qu’igual de difícil sedría pal Gobiernu gallegu, polo que-y esixien al Gobiernu d’Asturies más firmeza “énte les pretensiones gallegues”.

Según vieno acabante d’asoletar UNA (Unidá Nacionalista Asturiana) nuna nota de prensa, “la Conseyería de Medioambiente empecipia un periodu d’información previa col envís de conocer les circunstancies del casu concretu y la conveniencia d’entamar un procedimientu de proteición y defensa de la llegalidá urbanística en Nava”.

Tres los documentos unviaos por ApN y UNA, la Conseyería de Medioambiente, Ordenación del Territoriu ya Infraestructures, el serviciu de Xestión y disciplina urbanística, unvió a ApN l’acuse de recibu nel que nos comunica que “con esta mesma data va procedese a solicitar informe al Conceyu de Nava, a los que correspuende la titularidá de les competencies urbanístiques pa la proteición y defensa de la llegalidá urbanística en dichos conceyos; y, si resultare preciso, va ordenase la práctica de la correspondiente inspección per parte de la Inspección Urbanística Rexonal”.

Énte la negativa del alcalde de Nava, Claudio Escobio de facer nenguna actuación, lo mesmo que de nun informar a esti grupu municipal, ApN recurrió a la Conseyería de Medioambiente, pa iguar el problema urbanísticu que se plantega. El casu que yá pasó per manes del Delegáu del Gobiernu, ensin qu’esti entamare nenguna aición en concretu, llega agora a Medioambiente.

Nisen Díaz, secretariu de l’agrupación naveta repitió que nun se quier causar dañu a naide, sinón que se cumpla la llegalidá vixente pa evitar males mayores”, y al respeutive de les circunstancies ApN añedió que “la llegalidá ye por que la cumplan toos, los vecinos que remociquen una corte y les grandes empreses”.

Agora’l Conceyu de Nava va tar obligáu a presentar énte Medioambiente los informes correspondientes de la situación actual de la obra y xustificar la non actuación del alcalde en toos estos años, dempués de ser informáu en repitíos plenos, porque esta traza d’actuar, que “nun se merecen los vecinos de Nava” ye la que provocó la situación actual.

El Foru de Creación y Llectura de la Biblioteca Municipal de Grau, La Conceyalía de Cultura, La Fundación Aula de Les Metáfores y l’Asociación Valentín Andrés, entamen güei, martes 4 de mayu, una conferencia de Xosé Ambás embaxo’l títulu “Tradición oral ya poesía”.

L’actu, que s’enmarca dientro de los V Alcuentros de Lliteratura y Artes , va celebrase na Sala Polivalente de la Casa de Cultura de Grau, a partir de les ocho la tarde.

Xosé Antón Fernández “Ambás” (Ambás, Grau, 1974) ye músicu (Tuenda) y etnógrafu, con un importante trabayu de campu y arquivu de tradición oral. Dende l’añu 2007 presenta na TPA “Camín de cantares”, basáu nel so arquivu y que ye l’espaciu de más audiencia de la televisión asturiana.

Asoleyada nel BOPA la Resolución de la Conseyería de Cultura y Turismu pola que s’aprebaba la convocatoria de sovenciones pa 2010 a les Entidaes Locales nel ámbitu d’esta conseyería, Andecha Astur critica la “esapaición de delles llinies de sovención d’importancia. Nestos años de p’atrás convocávense ocho llínies de sovención estremaes: 1) Normalización social del asturianu, 2) Programes añales d’actividaes culturales, 3) Funcionamientu de museos y coleiciones museográfiques, 4) Inversión n’equipamientos culturales, 5) Patrimoniu hestóricu, 6) Desarrollu turísticu, 7) Actividaes deportives y 8) Participación xuvenil. Por embargu, Andecha denuncia que de la convocatoria d’esti añu desapaecen les llínies 4, 5 y dos de los tres programes que formaben parte de la llínia 8: Programa d’Arruelu Alternativu Xuvenil “Enredar” y Campamentos Urbanos “Esparcer”.

Dende Andecha Astur critícase qu’esti añu nun se convoquen sovenciones nes llínies y subllínies señalaes, “dalgo qu’ensin dulda va influyir negativamente nel gastu que puedan facer los Ayuntamientos, sobre too los más pequeños, na estaya cultural”. Especialmente esmolecedor pa los nacionaliegos ye’l casu de la llínia 5, al traviés de la que los Conceyos recibíen sofitu pa remocicar bienes d’interés hestóricu y etnográficu de la so propiedá (horros, fontes, llavaderos, etc.) asina como pa facer obres de teitáu en construcciones con cubierta vexetal.

De la mesma manera, tamién-y paez “pergrave” a Andecha la desapaición de los programes de la llínia 8 “Enredar” y “Esparcer”, nesti casu empobinaos a sovencionar actividaes culturales dirixíes específicamente a la mocedá. “Sosprende bien d’ello esti casu caberu, sobre too cuando dalgunos Conceyos tan aprebando Ordenances Municipales escontra’l “botellón”: prohíbese esta práutica común ente la mocedá a la vegá que desapaez la financiación p’actividaes alternatives a la mesma” critiquen dende la izquierda nacionaliega.

P’Andecha Astur el Gobiernu asturianu “nun pue defender un recorte tan xabaz nes partíes económiques destinaes a los Ayuntamientos, al traviés de les sovenciones que s’apurren dende la Conseyería de Cultura y Turismu, falando d’axustes derivaos de la crisis económica que carecemos anguañu”, y ye que, per otru llau, “tamos viendo como, por exemplu, se siguen marafundiando miles d’euros en promocionar los “proyeutos culturales estrella” d’esti Gobiernu (Centru d’Arte y Cultura La Llaboral de Xixón, Parque de la Prehestoria de Teberga y Muséu del Xurásicu de Colunga) con cargu al presupuestu de la citada conseyería”.

La Comisión Mista d’Inversiones, integrada polos Ministerios de Cultura y Fomentu, aprobó, con cargu al 1% Cultural estatal, un proyectu de meyora integral del Camín de Santiago costeru d’Asturies presentáu pola Conseyería de Cultura y Turismu. Esti proyectu, que tien un presupuestu de 980.976,26 euros, va ser financiáu al 50% pola mesma Conseyería y pol 1% Cultural del Ministeriu de Fomentu.

L’oxetivu ye consiguir qu’esta ruta costera asítiese nes mesmes condiciones calidable y seguridá que presenten na actualidá’l Camín Primitivu y el del Salvador, tres años d’intervenciones nos mesmos per parte del Gobiernu asturianu, con una inversión superior a los 1,2 millones d’euros.

El proyectu agora aprobáu estrema la ruta costera en trece grandes trayectos, pa los que se plantegen actuaciones de meyora del firme, acondicionamientu d’espacios de la rodiada (creando pequeñes árees de descansu), refuerzu de la señalización y, en dellos casos, pequeñes variantes que garanticen un meyor pasu.

Nos próximos meses, va suscribise un conveniu de collaboración ente’l Ministeriu de Fomentu y la Conseyería de Cultura pa concretar el financiamientu y los plazos d’execución d’un proyectu que se va llevar a cabu a lo llargo de 2011.

Pal PAS “Que venti mil pieces permanecieren mientres una década «en paraderu desconocíu», ensin catalogar y ensin protexer nun puede, efectivamente, calificase más que como un espoliu», pos el so valor arqueolóxicu perdióse”, afirmen.

Los asturianistes camienten que la cuestión “va aportar en muncho más grave entá si se confirma que dalgunes (varies o munches) pieces perdiéronse y que dalgunes se topen en manes de particulares”. “¡Y, amás, fuera de Asturies, en Cataluña!”, recuerden.

Pal PAS “Al marxe de la responsabilidá personal de los arqueólogos, nesti sucesu hai graves responsabilidaes institucionales: les del Conceyu de Xixón y les del Gobiernu Asturianu, amás de les que correspuendan a les instituciones rexonales y estatales qu’han de velar pol patrimoniu”.

Nesa “vergoñosa y escandalosa desidia” tien muncho que ver pa los asturianistes “la inquina y despreciu que’l PSOE (responsable d’eses instituciones) tien a tolo asturiano, despreciu y inquina que se manifiesta en munchos otros casos, como nel tratu que’l PSOE vien dando al «arte asturiano», que dicía Xovellanos, o «prerrománicu»”.

Amás, el PAS diz que “nun puede dixebrase, cuidao que los sos protagonistes son los mesmos, el PSOE y la mesma persona, del otru disparate institucional, el del Muséu Etnográficu de Grandas de Salime”.

El PAS camienta que “una vegada más, el PSOE amuesa que tolo que-y importa d’Asturies ye aprovechase del poder p’asitiar a los suyos, a tuertu o a derechu, y ensin respetu nengunu por Asturies, pola so cultura o polos asturianos.

La noticia de l’apaición de 20.000 pieces arqueolóxiques procedentes de les escavaciones de La Campa Torres n’estáu d’abandonu, y ensin inventariar, nuna habitación clausurada nel llugar ye p’AA “otru motivu de disgustu y quexa pa los asturianos”.

La formación nacionalista esplica que mos atopamos énte “un casu de dexadez del ‘Principado’ y, nesti casu, del Conceyu de Xixón, nun tema referente al padrimoniu históricu asturianu; y de quexa porque l’actitú de los responsables direutos d’esta situación –arqueólogos encargaos de los trabayos en La Campa Torres, políticos municipales y persones al frente de Cultura– ye vergoñosa al pasase la pelota unos a otros”.

Andecha Astur llamenta un casu nuevu “de perda de padrimoniu n’Asturies” y recuerda qu’estes pieces, “claves pa conocer el pasáu de los asturianos y de los primeros habitantes del Conceyu de Xixón, van resultar inservibles p’afondar na evolución del pobláu nos sos ochos sieglos de vida y amenorguen la importancia del so descubrimientu hai agora una década”.

Igualmente, Andecha Astur esixe que dende la Conceyalía de Cultura s’abra una investigación pa conocer quién foi’l responsable direutu del abandonu d’este pieces y que se depuren responsabilidaes.

El sábadu 24 d’abril, el grupu cicloturista de “AsturiesConBici”, realiza una escursión de día enteru de duración y pela la zona de Santa Cristina de L.lena. Les persones interesaes pueden apuntase o recibir más información llamando al 656 450 335 (Eugenia).